Sri Varaha Sahasranama Stotram

śrī varāha sahasranāma stotraṃ

śaṃkara uvāca
yaḥ pūjayetparātmānaṃ śrīmuṣṇeśaṃ mahāprabhuṃ |
varāhasya sahasreṇa nāmnāṃ puṣpasahasrakaiḥ ||1||

hatakaṃṭakasāmrājyaṃ labhāte nātra saṃśayaḥ |
pārvatyuvāca
kiṃ tannāmasahasraṃ me yena sāmrājyamāpnuyāt ||2||

brūhi śaṃkara tatprītyā varāhasya mahātmanaḥ |
śrutvā varāhamāhāmyaṃ na tṛptirjāyate kvacit ||3||

ko nu tṛpyeta tanubhṛdguṇasāravidāṃ vara |
śaṃkara uvāca
śṛṇu devi pravakṣyāmi pavitraṃ maṃgalaṃ paraṃ ||4||

dhanyaṃ yaśasyamāyuṣyaṃ gopyādgopyataraṃ mahat |
idaṃ purā na kasyāpi proktaṃ gopyaṃ tavāpi ca ||5||

tathā'pi ca pravakṣyāmi madaṃgārdhaśarīriṇi |
sadāśiva ṛṣistasya varāho devatā smṛtaḥ ||6||

chaṃdo'nuṣṭup viśvanetā kīlakaṃ ca śarāgrabhṛt |
hrīṃ bījamastraṃ klīṃkāraḥ kavacaṃ śrīmihocyate ||7||

viśvātmā paramo maṃtro maṃtrarājamudīrayet |
huṃkāraṃ hṛdaye nyasya varāhāyeti murdhani ||8||

bhūrbhuvaḥ svaḥ śikhāyāṃ ca netrayorbhūpatiṃ nyaset |
sarvajñāya namo'straṃ ca śrīṃ hrīṃ kliṃ huṃ ca bhūmapi ||9||

hāṃ hīṃ hūṃ haiṃ hauṃ ha iti svīyāṃguṣṭhadvayādikaḥ |
evaṃ svāṃgakṛtanyāso maṃtrametamudīrayet ||10||

namaḥ śvetavarāhāya namaste paramātmane |
lakṣmīnāthāya nāthāya śrīmuṣṇa brahmaṇe namaḥ ||11||

oṃ śrīvarāho bhūvarāhaḥ paraṃ jyotiḥ parātparaḥ |
paramaḥ puruṣaḥ siddho vibhurvyomacaro balī ||12||

advitīyaḥ paraṃ brahma saccidānaṃdavigrahaḥ |
nirdvaṃdvo nirahaṃkāro nirmāyo niścayalo'malaḥ ||13||

viśikho viśvarūpaśca viśvadṛgviśvabhāvanaḥ |
viśvātmā viśvanetā ca vimalo vīryavardhanaḥ ||14||

viśvakarmā vinodī ca viśveśo viśvamaṃgalaḥ |
viśvo vasuṃdharānātho vasuretā virodhahṛt ||15||

hiraṇyagarbho haryaśvo daityārirharisevitaḥ |
mahātapā mahādarśo manojño naikasādhanaḥ ||16||

sarvātmā sarvavikhyātaḥ sarvasākṣī satāṃ patiḥ |
sarvagaḥ sarvabhūtātmā sarvadoṣavivarjitaḥ ||17||

sarvabhūtahito'saṃgaḥ satyaḥ satyavyavasthitaḥ |
satyakarmā satyapatiḥ sarvasatyapriyo mataḥ ||18||

ādhivyādhibhiyo hartā mṛgāṃgo niyamapriyaḥ |
balavīrastapaḥ śreṣṭho guṇakartā guṇī balī ||19||

anaṃtaḥ prathamo maṃtraḥ sarvabhāvavidavyayaḥ |
sahasranāmā cānaṃto'naṃtarūpo rameśvaraḥ ||20||

agādhanilayo'pāro nirākāro nirāyudhaḥ |
amoghadṛgameyātmā vedavedyo viśāṃ patiḥ ||21||

vihṛtirvibhavo bhavyo bhavahīno bhavāṃtakaḥ |
bhaktapriyaḥ pavitrāṃghriḥ sunāsaḥ pavanārcitaḥ ||22||

bhajanīyaguṇo'dṛśyo bhadro bhadrayaśā hariḥ |
vedāṃtakṛdvedavaṃdyo vedādhyayanatatparaḥ ||23||

vedagoptā dharmagoptā vedamārgapravartakaḥ |
vedāṃtavedyo vedātmā vedātīto jagatpriyaḥ ||24||

janārdano janādhyakṣo jagadīśo janeśvaraḥ |
sahasrabāhuḥ satyātmā hemāṃgo hemabhūṣaṇaḥ ||25||

harida(tā)śvapriyo nityo hariḥ pūrṇo halāyudhaḥ |
aṃbujākṣo'mbujādhāro nirjaraśca niraṃkuśaḥ ||26||

niṣṭhuro nityasaṃtoṣo nityānaṃdapadapradaḥ |
nirjareśo nirālaṃbo nirguṇo'pi guṇānvitaḥ ||27||

mahāmāyo mahāvīryo mahātejā madoddhataḥ |
mano'bhimānī māyāvī mānado mānala(ra)kṣaṇaḥ ||28||

maṃdo mānī manaḥ kalpo mahākalpo maheśvaraḥ |
māyāpatirmānapatirmanasaḥ patirīśvaraḥ ||29||

akṣobhyo bāhya ānaṃdī anirdeśyo'parājitaḥ |
ajo'naṃto'prameyaśca sadānaṃdo janapriyaḥ ||30||

anaṃtaguṇagaṃbhīra ugrakṛtpariveṣṭanaḥ |
jiteṃdriyo jitakrodho jitāmitro jayo'jayaḥ ||31||

sarvāriṣṭārtihā sarvahṛdaṃtaranivāsakaḥ |
aṃtarātmā parātmā ca sarvātmā sarvakārakaḥ ||32||

guruḥ kaviḥ kiṭiḥ kāṃtaḥ kaṃjākṣaḥ khagavāhanaḥ |
suśarmā varadaḥ śārṅgī sudāsābhīṣṭadaḥ prabhuḥ ||33||

jhillikātanayaḥ preṣī jhillikāmuktidāyakaḥ |
guṇajitkathitaḥ kālaḥ kroḍaḥ kolaḥ śramāpahaḥ ||34||

kiṭiḥ kṛpākaraḥ svāmī sarvadṛksarvagocaraḥ |
yogācāryo mato vastu brahmaṇyo vedasattamaḥ ||35||

mahālaṃboṣṭhakaścaiva mahādevo manoramaḥ |
ūrdhvabāhuribhasthūlaḥ śyenaḥ senāpatiḥ khaniḥ ||36||

dīrghāyuḥ śaṃkaraḥ keśī sutīrtho meghaniḥsvanaḥ |
ahorātraḥ sūktavākaḥ suhṛnmānyaḥ suvarcalaḥ ||37||

sārabhṛtsarvasāraśca sarvagra(grā)haḥ sadāgatiḥ |
sūryaścaṃdraḥ kujo jñaśca devamaṃtrī bhṛguḥ śaniḥ ||38||

rāhuḥ keturgrahapatiryajñabhṛdyajñasādhanaḥ |
sahasrapātsahasrākṣaḥ somakāṃtaḥ sudhākaraḥ ||39||

yajño yajñapatiryājī yajñāṃgo yajñavāhanaḥ |
yajñāṃtakṛdyajñaguhyo yajñakṛdyajñasādhakaḥ ||40||

iḍāgarbhaḥ sravatkarṇo yajñakarmaphalapradaḥ |
gopatiḥ śrīpatirghoṇastrikālajñaḥ śuciśravāḥ ||41||

śivaḥ śivataraḥ śūraḥ śivapreṣṭhaḥ śivārcitaḥ |
śuddhasattvaḥ surārtighnaḥ kṣetrajño'kṣara ādikṛt ||42||

śaṃkhī cakrī gadī khaḍgī padmī caṃḍaparākramaḥ
caṃḍaḥ kolāhalaḥ śārṅgī svayaṃbhūragryabhugvibhuḥ ||43||

sadācāraḥ sadāraṃbho durācāranivartakaḥ |
jñānī jñānapriyo'vajño jñānado'jñānado yamī ||44||

layodakavihārī ca sāmagānapriyo gatiḥ |
yajñamūrtistrilokeśastridhāmā kaustubhojjvalaḥ ||46||

śrīvatsalāṃchanaḥ śrīmānśrīdharo bhūdharo'rbhakaḥ |
varuṇo vāruṇo vṛkṣo vṛṣabho vardhano varaḥ ||47||

yugādikṛdyugāvartaḥ pakṣo māsa ṛturyugaḥ |
vatsaro vatsalo vedaḥ śipiviṣṭaḥ sanātanaḥ ||48||

iṃdratrātā bhayatrātā kṣudrakṛtkṣudranāśanaḥ |
mahāhanurmahāghoro mahādīptirmahāvrataḥ ||49||

mahāpādo mahākālo mahākāyo mahābalaḥ |
gaṃbhīraghoṣo gaṃbhīro gabhīro ghurghurasvanaḥ ||50||

oṃkāragarbho nyagrodho vaṣaṭkāro hutāśanaḥ |
bhūyānbahumato bhūmā viśvakarmā viśāṃpatiḥ ||51||

vyavasāyo'ghamarṣaśca vidito'bhyutthito mahaḥ |
balabidbalavāṃdaṃḍī vakradaṃṣṭro vaśo vaśī ||52||

siddhaḥ siddhipradaḥ sādhyaḥ siddhasaṃkalpa ūrjavān |
dhṛtārirasahāyaśca sumukho baḍavāmukhaḥ ||53||

vasurvasumanāḥ sāmaśarīro vasudhāpradaḥ |
pītāṃbarī vāsudevo vāmano jñānapaṃjaraḥ ||54||

nityatṛpto nirādhāro niḥsaṃgo nirjitāmaraḥ |
nityamukto nityavaṃdyo muktavaṃdyo murāṃtakaḥ ||55||

baṃdhako mocako rudro yuddhasenāvimardanaḥ |
prasāraṇo niṣedhātmā bhikṣurbhikṣupriyo ṛjuḥ ||56||

mahāhaṃso bhikṣurūpī mahākaṃdo mahāśanaḥ |
manojavaḥ kālakālaḥ kālamṛtyuḥ sabhājitaḥ ||57||

prasanno nirvibhāvaśca bhūvidārī durāsadaḥ |
vasano vāsavo viśvavāsavo vāsavapriyaḥ ||58||

siddhayogī siddhakāmaḥ siddhikāmaḥ śubhārthavit |
ajeyo vijayīṃdraśca viśeṣajño vibhāvasuḥ ||59||

īkṣāmātrajagatsraṣṭā bhrūbhaṃganiyatākhilaḥ |
mahādhvago digīśeśo munimānyo munīśvaraḥ ||60||

mahākāyo vajrakāyo varado vāyuvāhanaḥ |
vadānyo vajrabhedī ca madhuhṛtkalidoṣahā ||61||

vāgīśvaro vājasano vānaspatyo manoramaḥ |
subrahmaṇyo brahmadhano brahmaṇyo brahmavardhanaḥ ||62||

viṣṭaṃbhī viśvahastaśca viśvāho viśvatomukhaḥ |
atulo vasuvego'rkaḥ samrāṭ sāmrājyadāyakaḥ ||63||

śaktipriyaḥ śaktirūpo māraśaktivibhaṃjanaḥ |
svataṃtraḥ sarvataṃtrajño mīmāṃsitaguṇākaraḥ ||64||

anirdeśyavapuḥ śrīśo nityaśrīrnityamaṃgalaḥ |
nityotsavo nijānaṃdo nityabhedī nirāśrayaḥ ||65||

aṃtaścaro bhavādhīśo brahmayogī kalāpriyaḥ |
gobrāhmaṇahitācāro jagaddhitamahāvrataḥ ||66||

durdhyeyaśca sadādhyeyo durvāsādivibodhanaḥ |
durāpo durdhiyāṃ gopyo dūrāddūraḥ samīpagaḥ ||67||

vṛṣākapiḥ kapiḥ kāryaḥ kāraṇaḥ kāraṇakramaḥ |
jyotiṣāṃ mathanajyotiḥ jyotiścakrapravartakaḥ ||68||

prathamo madhyamastāraḥ sutīkṣṇodarkakāryavān |
surūpaśca sadāvettā sumukhaḥ sujanapriyaḥ ||69||

mahāvyākaraṇācāryaḥ śikṣākalpapravartakaḥ |
svacchaśchaṃdomayaḥ svecchāsvāhitārthavināśanaḥ ||70||

sāhasī sarvahaṃtā ca sammato'niṃdito'sakṛt |
kāmarūpaḥ kāmapālaḥ sutīrthyo'tha kṣapākaraḥ ||71||

jvālī viśālaśca paro vedakṛjjanavardhanaḥ |
vedyo vaidyo mahāvedī vīrahā viṣamo mahaḥ ||72||

ītibhānurgrahaścaiva pragraho nigraho'gnihā |
utsargaḥ sanniṣedhaśca supratāpaḥ pratāpadhṛt ||73||

sarvāyudhadharaḥ śālaḥ surūpaḥ sapramodanaḥ |
catuṣkiṣkuḥ saptapādaḥ siṃhaskaṃdhastrimekhalaḥ ||74||

sudhāpānarato'righnaḥ surameḍyaḥ sulocanaḥ |
tattvavittattvagoptā ca paratattvaṃ prajāgaraḥ ||75||

īśāna īśvaro'dhyakṣe mahāmeruramoghadṛk |
bhedaprabhedavādī ca svādvaitapariniṣṭhitaḥ ||76||

bhāgahārī vaṃśakaro nimittastho nimittakṛt |
niyaṃtā niyamo yaṃtā naṃdako naṃdivardhanaḥ ||77||

ṣaḍviṃśako mahāviṣṇurbrahmajño brahmatatparaḥ |
vedakṛnnāma cānaṃtanāmā śabdātigaḥ kṛpaḥ ||78||

daṃbho daṃbhakaro daṃbhavaṃśo vaṃśakaro varaḥ |
ajanirjanikartā ca surādhyakṣe yugāṃtakaḥ ||79||

darbharomā budhādhyakṣe mānukūlo madoddhataḥ |
śaṃtanuḥ śaṃkaraḥ sūkṣmaḥ pratyayaścaṃḍaśāsanaḥ ||80||

vṛttanāso mahāgrīvaḥ kuṃbugrīvo mahānṛṇaḥ |
vedavyāso devabhūtiraṃtarātmā hṛdālayaḥ ||81||

mahābhāgo mahāsparśo mahāmātro mahāmanāḥ |
mahodaro mahoṣṭhaśca mahājihvo mahāmukhaḥ ||82||

puṣkarastuṃburuḥ kheṭī sthāvaraḥ sthitimattaraḥ |
śvāsāyudhaḥ samarthaśca vedārthaḥ susamāhitaḥ ||83||

vedaśīrṣaḥ prakāśātmā pramodaḥ sāmagāyanaḥ |
aṃtarbhāvyo bhāvitātmā mahīdāso divaspatiḥ ||84||

mahāsudarśano vidvānupahārapriyo'cyutaḥ |
analo dviśapho guptaḥ śobhano niravagrahaḥ ||85||

bhāṣākaro mahābhargaḥ sarvadeśavibhāgakṛt |
kālakaṃṭho mahākeśo lomaśaḥ kālapūjitaḥ ||86||

āsevano'vasānātmā buddhyātmā raktalocanaḥ |
nāraṃgo narakoddhartā kṣetrapālo duriṣṭahā ||87||

huṃkāragarbho digvāsāḥ brahmeṃdrādhipatirbalaḥ |
varcasvī brahmavadanaḥ kṣatrabāhurvidūragaḥ ||88||

caturthapāccatuṣpācca caturvedapravartakaḥ |
cāturhotrakṛdavyaktaḥ sarvavarṇavibhāgakṛt ||89||

mahāpatirgṛhapatirvidyādhīśo viśāṃpatiḥ |
akṣaro'dhokṣajo'dhūrto rakṣitā rākṣasāṃtakṛt ||90||

rajaḥsattvatamohāṃtā kūṭasthaḥ prakṛteḥ paraḥ |
tīrthakṛttīrthavāsī ca tīrtharūpo hyapāṃ patiḥ ||91||

puṇyabījaḥ purāṇarṣiḥ pavitraḥ paramotsavaḥ |
śuddhikṛcchuddhidaḥ śuddhaḥ śuddhasattvanirūpakaḥ ||92||

suprasannaḥ śubhārho'tha śubhaditsuḥ śubhapriyaḥ |
yajñabhāgabhujāṃ mukhyo yakṣagānapriyo balī ||93||

samo'tha modo modātmā modado mokṣadasmṛtiḥ |
parāyaṇaḥ prasādaśca lokabaṃdhurbṛhaspatiḥ ||94||

līlāvatāro jananavihīno janmanāśanaḥ |
mahābhīmo mahāgarto maheṣvāso mahodayaḥ ||95||

arjuno bhāsuraḥ prakhyo vidoṣo viṣṭaraśravāḥ |
sahasrapātsabhāgyaśca puṇyapāko duravyayaḥ ||96||

kṛtyahīno mahāvāgmī mahāpāpavinigrahaḥ |
tejo'pahārī balavān sarvadā'rividūṣakaḥ ||97||

kaviḥ kaṃṭhagatiḥ koṣṭho maṇimuktājalāplutaḥ |
aprameyagatiḥ kṛṣṇo haṃsaścaiva śucipriyaḥ ||98||

vijayīṃdraḥ sureṃdraśca vāgiṃdro vākpatiḥ prabhuḥ |
tiraścīnagatiḥ śuklaḥ sāragrīvo dharādharaḥ ||99||

prabhātaḥ sarvatobhadro mahājaṃturmahauṣadhiḥ |
prāṇeśo vardhakastīvrapraveśaḥ parvatopamaḥ ||100||

sudhāsiktaḥ sadasyastho rājarāṭ daṃḍakāṃtakaḥ |
ūrdhvakeśo'jamīḍhaśca pippalādo bahuśravāḥ ||101||

gaṃdharvo'bhyuditaḥ keśī vīrapeśo viśāradaḥ |
hiraṇyavāsāḥ stabdhākṣo brahmalālitaśaiśavaḥ ||102||

padmagarbho jaṃbumālī sūryamaṃḍalamadhyagaḥ |
caṃdramaṃḍalamadhyasthaḥ karabhāgagnisaṃśrayaḥ ||103||

ajīgartaḥ śākalāgryaḥ saṃdhānaḥ siṃhavikramaḥ |
prabhāvātmā jagatkālaḥ kālakālo bṛhadrathaḥ ||104||

sārāṃgo yatamānyaśca satkṛtiḥ śucimaṃḍalaḥ |
kumārajidvanecārī saptakanyāmanoramaḥ ||105||

dhūmaketurmahāketuḥ pakṣiketuḥ prajāpatiḥ |
ūrdhvaretā balopāyo bhūtāvartaḥ sajaṃgamaḥ ||106||

ravirvāyurvidhātā ca siddhāṃto niścalo'calaḥ |
āsthānakṛdameyātmā'nukūlaścādhiko bhuvaḥ ||107||

hrasvaḥ pitāmaho'narthaḥ kālavīryo vṛkodaraḥ |
sahiṣṇuḥ sahadevaśca sarvajicchātrutāpanaḥ ||108||

pāṃcarātraparo haṃsī paṃcabhūtapravartakaḥ |
bhūriśravāḥ śikhaṃḍī ca suyajñaḥ satyaghoṣaṇaḥ ||109||

pragāḍhaḥ pravaṇo hārī pramāṇaṃ praṇavo nidhiḥ |
mahopaniṣado vāk ca vedanīḍaḥ kirīṭadhṛt ||110||

bhavarogabhiṣagbhāvo bhāvasāḍhyo bhavātigaḥ |
ṣaḍ dharmavarjitaḥ keśī kāryavitkarmagocaraḥ ||111||

yamavidhvaṃsanaḥ pāśī yamivarganiṣevitaḥ |
mataṃgo mecako medhyo medhāvī sarvamelakaḥ ||112||

manojñadṛṣṭirmārārinigrahaḥ kamalākaraḥ |
namadgaṇeśo gopīḍaḥ saṃtānaḥ saṃtatipradaḥ ||113||

bahuprado balādhyakṣe bhinnamaryādabhedanaḥ |
anirmuktaścārudeṣṇaḥ satyāṣāḍhaḥ surādhipaḥ ||114||

āvedanīyo'vedyaśca tāraṇastaruṇo'ruṇaḥ |
sarvalakṣaṇalakṣaṇyaḥ sarvalokavilakṣaṇaḥ ||115||

sarvadakṣaḥ sudhādhīśaḥ śaraṇyaḥ śāṃtavigrahaḥ |
rohiṇīśo varāhaśca vyaktāvyaktasvarūpadhṛt ||116||

svargadvāraḥ sukhadvāro mokṣadvārastriviṣṭapaḥ |
advitīyaḥ kevalaśca kaivalyapatirarhaṇaḥ ||117||

tālapakṣastālakaro yaṃtrī taṃtravibhedanaḥ |
ṣaḍrasaḥ kusumāstraśca satyamūlaphalodayaḥ ||118||

kalā kāṣṭhā muhūrtaśca maṇibiṃbo jagaddhṛṇiḥ |
abhayo rudragītaśca guṇajidguṇabhedanaḥ ||119||

devāsuravinirmātā devāsuraniyāmakaḥ |
prāraṃbhaśca virāmaśca sāmrājyādhipatiḥ prabhuḥ ||120||

paṃḍito gahanāraṃbhaḥ jīvano jīvanapradaḥ |
raktadevo devamūlaḥ vedamūlo manaḥpriyaḥ ||121||

virācanaḥ sudhājātaḥ svargādhyakṣo mahākapiḥ |
virāḍrūpaḥ prajārūpaḥ sarvadevaśikhāmaṇiḥ ||122||

bhagavān sumukhaḥ svargaḥ maṃjukeśaḥ sutuṃdilaḥ |
vanamālī gaṃdhamālī muktāmālyacalopamaḥ ||123||

mukto'sṛpyaḥ suhṛdbhrātā pitā mātā parā gatiḥ |
satvadhvaniḥ sadābaṃdhurbrahmarudrādhidaivataṃ ||124||

samātmā sarvadaḥ sāṃkhyaḥ sanmārgadhyeyasatpadaḥ |
sasaṃkalpo vikalpaśca kartā svādī tapodhanaḥ ||125||

virajā virajānāthaḥ svacchaśṛṃgo duriṣṭahā |
ghoṇo baṃdhurmahāceṣṭaḥ purāṇaḥ puṣkarekṣaṇaḥ ||126||

ahirbudhnyo munirviṣṇurdharmayūpastamoharaḥ |
agrāhyaśśāśvataḥ kṛṣṇaḥ pravaraḥ pakṣivāhanaḥ ||127||

kapilaḥ khapathisthaśca pradyumno'mitabhojanaḥ |
saṃkarṣaṇo mahāvāyustrikālajñastrivikramaḥ ||128||

pūrṇaprajñaḥ sudhīrhṛṣṭaḥ prabuddhaḥ śamanaḥ sadaḥ |
brahmāṃḍakoṭinirmātā mādhavo madhusūdanaḥ ||129||

śaśvadekaprakāraśca koṭibrahmāṃḍanāyakaḥ |
śaśvadbhaktaparādhīnaḥ śaśvadānaṃdadāyakaḥ ||130||

sadānaṃdaḥ sadābhāsaḥ sadā sarvaphalapradaḥ |
ṛtumānṛtuparṇaśca viśvanetā vibhūttamaḥ ||131||

rukmāṃgadapriyo'vyaṃgo mahāliṃgo mahākapiḥ |
saṃsthānasthānadaḥ sraṣṭā jāhnavīvāhadhṛkprabhuḥ ||132||

māṃḍukeṣṭapradātā ca mahādhanvaṃtariḥ kṣitiḥ |
sabhāpatisesiddhamūlaścarakādirmahāpathaḥ ||133||

āsannamṛtyuhaṃtā ca viśvāsyaḥ prāṇanāyakaḥ |
budho budhejyo dharmejyo vaikuṃṭhapatiriṣṭadaḥ ||134||

phalaśrutiḥ -
iti śvetavarāhasya proktaṃ he girikanyake |
samastabhāgyadaṃ puṇyaṃ bhūpatitvapradāyakaṃ ||135||

mahāpātakakoṭighnaṃ rājasūyaphalapradaṃ |
ya idaṃ prātarutthāya divyaṃ nāmasahasrakaṃ ||136||

paṭhate niyato bhūtvā mahāpāpaiḥ pramucyate |
sahasranāmabhirdivyaiḥ pratyahaṃ tulasīdalaiḥ ||137||

pūjayedyo varāhaṃ tu śraddhayā niṣṭhayānvitaḥ |
evaṃ sahasranāmabhiḥ puṣpairvāthasugaṃdhibhiḥ ||138||

abhijātakule jāto rājā bhavati niścitaṃ |
evaṃ nāmasahasreṇa varāhasya mahātmanaḥ ||139||

na dāridryamavāpnoti na yāti narakaṃ dhruvaṃ |
trikālamekakālaṃ vā paṭhan nāmasahasrakaṃ ||140||

māsamekaṃ japenmartyo bhaviṣyati jiteṃdriyaḥ |
mahatīṃ śriyamāyuṣyaṃ vidyāṃ caivādhigacchati ||141||

yo vā śvetavarāhasya divyairnāmasahasrakaiḥ |
pravartayennityapūjāṃ datvā nirvāhamuttamaṃ ||142||

bhavejjanmasahasraistu sāmrājyādhipatirdhruvaṃ |
rātrau śvetavarāhasya sannidhau ya idaṃ paṭhet ||143||

kṣayāpasmārakuṣṭhādyairmahārogaistathā'paraiḥ |
māsādeva vinirmuktaḥ sa jīveccharadāṃ śataṃ ||144||

sarveṣu puṇyakāleṣu paṭhannāmasahasrakaṃ |
sarvapāpavinirmukto labhate śāśvataṃ padaṃ ||145||

sahasranāmapaṭhanādvarāhasya mahātmanaḥ |
na grahopadravaṃ yāti yāti śatrukṣayaṃ tathā ||146||

rājā ca dāsatāṃ yāti sarve yāṃti ca mitratāṃ |
śriyaśca sthiratāṃ yāṃti yāṃti sarve'pi sauhṛdaṃ ||147||

rājadasyugrahādibhyo vyādhyādhibhyaśca kiṃcana |
na bhayaṃ jāyate kvāpi vṛddhistasya dine dine ||148||

viprastu vidyāmāpnoti kṣatriyo vijayī bhavet |
vārdhuṣyavibhavaṃ yāti vaiśyaḥ śūdraḥ sukhaṃ vrajet ||149||

sakāmaḥ kāmamāpnoti niṣkāmo mokṣamāpnuyāt |
mahārākṣasavetālabhūtapretapiśācakāḥ ||150||

rogāḥ sarpaviṣādyāśca naśyaṃtyasya prabhāvataḥ |
ya idaṃ śṛṇuyānnityaṃ yaścāpi parikīrtayet |
nāmaṃgalamavāpnoti so'mutreha ca mānavaḥ ||151||

namaḥ śvetavarāhāya namaste paramātmane |
lakṣmīnāthāya nāthāya śrīmuṣṇabrahmaṇe namaḥ ||152||

yaḥ paṭhecchṛṇuyānnityaṃ imaṃ maṃtraṃ nagātmaje |
sa pāpapāśanirmuktaḥ prayāti paramāṃ gatiṃ ||153||

iti śrīvarāhasahasranāmastotraṃ saṃpūrṇaṃ |