ಶ್ರೀ ಪ್ರತ್ಯಂಗಿರಾ ಸರ್ವಾರ್ಥಸಾಧಕ ಕವಚಂ

ಶ್ರೀ ಪ್ರತ್ಯಂಗಿರಾ ಸರ್ವಾರ್ಥಸಾಧಕ ಕವಚಂ

ದೇವ್ಯುವಾಚ .
ಭಗವನ್ ಸರ್ವಧರ್ಮಜ್ಞ ಸರ್ವಶಾಸ್ತ್ರಾರ್ಥಪಾರಗ .
ದೇವ್ಯಾಃ ಪ್ರತ್ಯಂಗಿರಾಯಾಶ್ಚ ಕವಚಂ ಯತ್ಪ್ರಕಾಶಿತಂ ..1..

ಸರ್ವಾರ್ಥಸಾಧನಂ ನಾಮ ಕಥಯಸ್ವ ಮಯಿ ಪ್ರಭೋ .
ಭೈರವ ಉವಾಚ .
ಶೃಣು ದೇವಿ ಪ್ರವಕ್ಷ್ಯಾಮಿ ಕವಚಂ ಪರಮಾದ್ಭುತಂ ..2..

ಸರ್ವಾರ್ಥಸಾಧನಂ ನಾಮ ತ್ರೈಲೋಕ್ಯೇ ಚಾಽತಿದುರ್ಲಭಂ .
ಸರ್ವಸಿದ್ಧಿಮಯಂ ದೇವಿ ಸರ್ವೈಶ್ವರ್ಯಪ್ರದಾಯಕಂ ..3..

ಪಠನಾಚ್ಛ್ರವಣಾನ್ಮರ್ತ್ಯಸ್ತ್ರೈಲೋಕ್ಯೈಶ್ವರ್ಯಭಾಗ್ಭವೇತ್ .
ಸರ್ವಾರ್ಥಸಾಧಕಸ್ಯಾಽಸ್ಯ ಕವಚಸ್ಯ ಋಷಿಃ ಶಿವಃ ..4..

ಛಂದೋ ವಿರಾಟ್ ಪರಾಶಕ್ತಿರ್ಜಗದ್ಧಾತ್ರೀ ಚ ದೇವತಾ .
ಧರ್ಮಾಽರ್ಥಕಾಮಮೋಕ್ಷೇಷು ವಿನಿಯೋಗಃ ಪ್ರಕೀರ್ತಿತಃ ..5..

ನ್ಯಾಸಃ –
ಶ್ರೀಸರ್ವಾರ್ಥಸಾಧಕಕವಚಸ್ಯ ಶಿವ ಋಷಯೇ ನಮಃ ಶಿರಸಿ .
ವಿರಾಟ್ ಛಂದಸೇ ನಮಃ ಮುಖೇ .
ಶ್ರೀಮತ್ಪ್ರತ್ಯಂಗಿರಾ ದೇವತಾಯೈ ನಮಃ ಹೃದಯೇ .
ಐಂ ಬೀಜಾಯ ನಮಃ ಗುಹ್ಯೇ .
ಹ್ರೀಂ ಶಕ್ತಯೇ ನಮಃ ಪಾದೌ .
ಶ್ರೀಂ ಕೀಲಕಾಯ ನಮಃ ನಾಭೌ .
ಧರ್ಮಾರ್ಥಕಾಮಮೋಕ್ಷೇಷು ವಿನಿಯೋಗಾಯ ನಮಃ ಸರ್ವಾಂಗೇ..

ಕವಚಂ –
ಪ್ರಣವಂ ಮೇ ಶಿರಃ ಪಾತು ವಾಗ್ಭವಂ ಚ ಲಲಾಟಕಂ .
ಹ್ರೀಂ ಪಾತು ದಕ್ಷನೇತ್ರಂ ಮೇ ಲಕ್ಷ್ಮೀರ್ವಾಮ ಸುರೇಶ್ವರೀ ..6..

ಪ್ರತ್ಯಂಗಿರಾ ದಕ್ಷಕರ್ಣಂ ವಾಮೇ ಕಾಮೇಶ್ವರೀ ತಥಾ .
ಲಕ್ಷ್ಮೀಃ ಪ್ರಾಣಂ ಸದಾ ಪಾತು ವದನಂ ಪಾತು ಕೇಶವಃ ..7..

ಗೌರೀ ತು ರಸನಾಂ ಪಾತು ಕಂಠಂ ಪಾತು ಮಹೇಶ್ವರಃ .
ಸ್ಕಂಧದೇಶಂ ರತಿಃ ಪಾತು ಭುಜೌ ತು ಮಕರಧ್ವಜಃ ..8..

ಶಂಖನಿಧಿಃ ಕರೌ ಪಾತು ವಕ್ಷಃ ಪದ್ಮನಿಧಿಸ್ತಥಾ .
ಬ್ರಾಹ್ಮೀ ಮಧ್ಯಂ ಸದಾ ಪಾತು ನಾಭಿಂ ಪಾತು ಮಹೇಶ್ವರೀ ..9..

ಕೌಮಾರೀ ಪೃಷ್ಠದೇಶಂ ತು ಗುಹ್ಯಂ ರಕ್ಷತು ವೈಷ್ಣವೀ .
ವಾರಾಹೀ ಚ ಕಟಿಂ ಪಾತು ಚೈಂದ್ರೀ ಪಾತು ಪದದ್ವಯಂ ..10..

ಭಾರ್ಯಾಂ ರಕ್ಷತು ಚಾಮುಂಡಾ ಲಕ್ಷ್ಮೀ ರಕ್ಷತು ಪುತ್ರಕಾನ್ .
ಇಂದ್ರಃ ಪೂರ್ವೇ ಸದಾ ಪಾತು ಆಗ್ನೇಯ್ಯಾಮಗ್ನಿದೇವತಾ ..11..

ಯಾಮ್ಯೇ ಯಮಃ ಸದಾ ಪಾತು ನೈರೃತ್ಯಾಂ ನಿರೃತಿಸ್ತಥಾ .
ಪಶ್ಚಿಮೇ ವರುಣಃ ಪಾತು ವಾಯವ್ಯಾಂ ವಾಯುದೇವತಾ ..12..

ಸೌಮ್ಯಾಂ ಸೋಮಃ ಸದಾ ಪಾತು ಚೈಶಾನ್ಯಾಮೀಶ್ವರೋ ವಿಭುಃ .
ಊರ್ಧ್ವಂ ಪ್ರಜಾಪತಿಃ ಪಾತು ಹ್ಯಧಶ್ಚಾಽನಂತದೇವತಾ ..13..

ರಾಜದ್ವಾರೇ ಶ್ಮಶಾನೇ ತು ಅರಣ್ಯೇ ಪ್ರಾಂತರೇ ತಥಾ .
ಜಲೇ ಸ್ಥಲೇ ಚಾಽಂತರಿಕ್ಷೇ ಶತ್ರೂಣಾಂ ನಿವಹೇ ತಥಾ ..14..

ಏತಾಭಿಃ ಸಹಿತಾ ದೇವೀ ಚತುರ್ಬೀಜಾ ಮಹೇಶ್ವರೀ .
ಪ್ರತ್ಯಂಗಿರಾ ಮಹಾಶಕ್ತಿಃ ಸರ್ವತ್ರ ಮಾಂ ಸದಾಽವತು ..15..

ಫಲಶ್ರುತಿಃ –
ಇತಿ ತೇ ಕಥಿತಂ ದೇವಿ ಸಾರಾತ್ಸಾರಂ ಪರಾತ್ಪರಂ .
ಸರ್ವಾರ್ಥಸಾಧನಂ ನಾಮ ಕವಚಂ ಪರಮಾದ್ಭುತಂ ..16..

ಅಸ್ಯಾಽಪಿ ಪಠನಾತ್ಸದ್ಯಃ ಕುಬೇರೋಽಪಿ ಧನೇಶ್ವರಃ .
ಇಂದ್ರಾದ್ಯಾಃ ಸಕಲಾ ದೇವಾಃ ಧಾರಣಾತ್ಪಠನಾದ್ಯತಃ ..17..

ಸರ್ವಸಿದ್ಧೀಶ್ವರಾಃ ಸಂತಃ ಸರ್ವೈಶ್ವರ್ಯಮವಾಪ್ನುಯುಃ .
ಪುಷ್ಪಾಂಜಲ್ಯಷ್ಟಕಂ ದತ್ತ್ವಾ ಮೂಲೇನೈವ ಸಕೃತ್ಪಠೇತ್ ..18..

ಸಂವತ್ಸರಕೃತಾಯಾಸ್ತು ಪೂಜಾಯಾಃ ಫಲಮಾಪ್ನುಯಾತ್ .
ಪ್ರೀತಿಮನ್ಯೇಽನ್ಯತಃ ಕೃತ್ವಾ ಕಮಲಾ ನಿಶ್ಚಲಾ ಗೃಹೇ ..19..

ವಾಣೀ ಚ ನಿವಸೇದ್ವಕ್ತ್ರೇ ಸತ್ಯಂ ಸತ್ಯಂ ನ ಸಂಶಯಃ .
ಯೋ ಧಾರಯತಿ ಪುಣ್ಯಾತ್ಮಾ ಸರ್ವಾರ್ಥಸಾಧನಾಭಿಧಂ ..20..

ಕವಚಂ ಪರಮಂ ಪುಣ್ಯಂ ಸೋಽಪಿ ಪುಣ್ಯವತಾಂ ವರಃ .
ಸರ್ವೈಶ್ವರ್ಯಯುತೋ ಭೂತ್ವಾ ತ್ರೈಲೋಕ್ಯವಿಜಯೀ ಭವೇತ್ ..21..

ಪುರುಷೋ ದಕ್ಷಿಣೇ ಬಾಹೌ ನಾರೀ ವಾಮಭುಜೇ ತಥಾ .
ಬಹುಪುತ್ರವತೀ ಭೂಯಾದ್ವಂಧ್ಯಾಽಪಿ ಲಭತೇ ಸುತಂ ..22..

ಬ್ರಹ್ಮಾಸ್ತ್ರಾದೀನಿ ಶಸ್ತ್ರಾಣಿ ನೈವ ಕೃಂತಂತಿ ತತ್ತನುಂ .
ಏತತ್ಕವಚಮಜ್ಞಾತ್ವಾ ಯೋ ಜಪೇತ್ಪರಮೇಶ್ವರೀಂ .
ದಾರಿದ್ರ್ಯಂ ಪರಮಂ ಪ್ರಾಪ್ಯ ಸೋಽಚಿರಾನ್ಮೃತ್ಯುಮಾಪ್ನುಯಾತ್ ..23..

ಇತಿ ಶ್ರೀರುದ್ರಯಾಮಲತಂತ್ರೇ ಪಂಚಾಂಗಖಂಡೇ ಸರ್ವಾರ್ಥಸಾಧನಂ ನಾಮ ಶ್ರೀ ಪ್ರತ್ಯಂಗಿರಾ ಕವಚಂ .