ಶ್ರೀ ಕಾಳಿಕಾ ಕವಚಂ (ವೈರಿನಾಶಕರಂ)

ಶ್ರೀ ಕಾಳಿಕಾ ಕವಚಂ (ವೈರಿನಾಶಕರಂ)

ಕೈಲಾಸಶಿಖರಾಸೀನಂ ಶಂಕರಂ ವರದಂ ಶಿವಂ |
ದೇವೀ ಪಪ್ರಚ್ಛ ಸರ್ವಜ್ಞಂ ದೇವದೇವಂ ಮಹೇಶ್ವರಂ || 1 ||

ದೇವ್ಯುವಾಚ |
ಭಗವನ್ ದೇವದೇವೇಶ ದೇವಾನಾಂ ಮೋಕ್ಷದ ಪ್ರಭೋ |
ಪ್ರಬ್ರೂಹಿ ಮೇ ಮಹಾಭಾಗ ಗೋಪ್ಯಂ ಯದ್ಯಪಿ ಚ ಪ್ರಭೋ || 2 ||

ಶತ್ರೂಣಾಂ ಯೇನ ನಾಶಃ ಸ್ಯಾದಾತ್ಮನೋ ರಕ್ಷಣಂ ಭವೇತ್ |
ಪರಮೈಶ್ವರ್ಯಮತುಲಂ ಲಭೇದ್ಯೇನ ಹಿ ತದ್ವದ || 3 ||

ಭೈರವ ಉವಾಚ |
ವಕ್ಷ್ಯಾಮಿ ತೇ ಮಹಾದೇವಿ ಸರ್ವಧರ್ಮಹಿತಾಯ ಚ |
ಅದ್ಭುತಂ ಕವಚಂ ದೇವ್ಯಾಃ ಸರ್ವರಕ್ಷಾಕರಂ ನೃಣಾಂ || 4 ||

ಸರ್ವಾರಿಷ್ಟಪ್ರಶಮನಂ ಸರ್ವೋಪದ್ರವನಾಶನಂ |
ಸುಖದಂ ಭೋಗದಂ ಚೈವ ವಶ್ಯಾಕರ್ಷಣಮದ್ಭುತಂ || 5 ||

ಶತ್ರೂಣಾಂ ಸಂಕ್ಷಯಕರಂ ಸರ್ವವ್ಯಾಧಿನಿವಾರಣಂ |
ದುಃಖಿನೋ ಜ್ವರಿಣಶ್ಚೈವ ಸ್ವಾಭೀಷ್ಟಪ್ರಹತಾಸ್ತಥಾ |
ಭೋಗಮೋಕ್ಷಪ್ರದಂ ಚೈವ ಕಾಳಿಕಾಕವಚಂ ಪಠೇತ್ || 6 ||

ಅಸ್ಯ ಶ್ರೀಕಾಳಿಕಾಕವಚಸ್ಯ ಭೈರವ ಋಷಿಃ ಅನುಷ್ಟುಪ್ ಛಂದಃ ಶ್ರೀಕಾಳಿಕಾ ದೇವತಾ ಮಮ ಶತ್ರುಸಂಹಾರಾರ್ಥಂ ಜಪೇ ವಿನಿಯೋಗಃ |

ಕರನ್ಯಾಸಃ –
ಓಂ ಕ್ರಾಂ ಅಂಗುಷ್ಠಾಭ್ಯಾಂ ನಮಃ |
ಓಂ ಕ್ರೀಂ ತರ್ಜನೀಭ್ಯಾಂ ನಮಃ |
ಓಂ ಕ್ರೂಂ ಮಧ್ಯಮಾಭ್ಯಾಂ ನಮಃ |
ಓಂ ಕ್ರೈಂ ಅನಾಮಿಕಾಭ್ಯಾಂ ನಮಃ |
ಓಂ ಕ್ರೌಂ ಕನಿಷ್ಠಿಕಾಭ್ಯಾಂ ನಮಃ |
ಓಂ ಕ್ರಃ ಕರತಲಕರಪೃಷ್ಠಾಭ್ಯಾಂ ನಮಃ |

ಹೃದಯಾದಿನ್ಯಾಸಃ –
ಓಂ ಕ್ರಾಂ ಹೃದಯಾಯ ನಮಃ |
ಓಂ ಕ್ರೀಂ ಶಿರಸೇ ಸ್ವಾಹಾ |
ಓಂ ಕ್ರೂಂ ಶಿಖಾಯೈ ವಷಟ್ |
ಓಂ ಕ್ರೈಂ ಕವಚಾಯ ಹುಂ |
ಓಂ ಕ್ರೌಂ ನೇತ್ರತ್ರಯಾಯ ವೌಷಟ್ |
ಓಂ ಕ್ರಃ ಅಸ್ತ್ರಾಯ ಫಟ್ |

ಧ್ಯಾನಂ |
ಧ್ಯಾಯೇತ್ ಕಾಳೀಂ ಮಹಾಮಾಯಾಂ ತ್ರಿನೇತ್ರಾಂ ಬಹುರೂಪಿಣೀಂ |
ಚತುರ್ಭುಜಾಂ ಲಲಜ್ಜಿಹ್ವಾಂ ಪೂರ್ಣಚಂದ್ರನಿಭಾನನಾಂ || 7 ||

ನೀಲೋತ್ಪಲದಳಪ್ರಖ್ಯಾಂ ಶತ್ರುಸಂಘವಿದಾರಿಣೀಂ |
ನರಮುಂಡಂ ತಥಾ ಖಡ್ಗಂ ಕಮಲಂ ಚ ವರಂ ತಥಾ || 8 ||

ಬಿಭ್ರಾಣಾಂ ರಕ್ತವಸನಾಂ ದಂಷ್ಟ್ರಯಾ ಘೋರರೂಪಿಣೀಂ |
ಅಟ್ಟಾಟ್ಟಹಾಸನಿರತಾಂ ಸರ್ವದಾ ಚ ದಿಗಂಬರಾಂ || 9 ||

ಶವಾಸನಸ್ಥಿತಾಂ ದೇವೀಂ ಮುಂಡಮಾಲಾವಿಭೂಷಿತಾಂ |
ಇತಿ ಧ್ಯಾತ್ವಾ ಮಹಾದೇವೀಂ ತತಸ್ತು ಕವಚಂ ಪಠೇತ್ || 10 ||

ಅಥ ಕವಚಂ |
ಓಂ | ಕಾಳಿಕಾ ಘೋರರೂಪಾದ್ಯಾ ಸರ್ವಕಾಮಪ್ರದಾ ಶುಭಾ |
ಸರ್ವದೇವಸ್ತುತಾ ದೇವೀ ಶತ್ರುನಾಶಂ ಕರೋತು ಮೇ || 11 ||

ಹ್ರೀಂ ಹ್ರೀಂ ಸ್ವರೂಪಿಣೀಂ ಚೈವ ಹ್ರೀಂ ಹ್ರೀಂ ಹೂಂ ರೂಪಿಣೀಂ ತಥಾ |
ಹ್ರೀಂ ಹ್ರೀಂ ಕ್ಷೇಂ ಕ್ಷೇಂ ಸ್ವರೂಪಾ ಸಾ ಸದಾ ಶತ್ರೂನ್ ವಿದಾರಯೇತ್ || 12 ||

ಶ್ರೀಂ ಹ್ರೀಂ ಐಂ ರೂಪಿಣೀ ದೇವೀ ಭವಬಂಧವಿಮೋಚಿನೀ |
ಹೂಂ ರೂಪಿಣೀ ಮಹಾಕಾಳೀ ರಕ್ಷಾಸ್ಮಾನ್ ದೇವಿ ಸರ್ವದಾ || 13 ||

ಯಥಾ ಶುಂಭೋ ಹತೋ ದೈತ್ಯೋ ನಿಶುಂಭಶ್ಚ ಮಹಾಸುರಃ |
ವೈರಿನಾಶಾಯ ವಂದೇ ತಾಂ ಕಾಳಿಕಾಂ ಶಂಕರಪ್ರಿಯಾಂ || 14 ||

ಬ್ರಾಹ್ಮೀ ಶೈವೀ ವೈಷ್ಣವೀ ಚ ವಾರಾಹೀ ನಾರಸಿಂಹಿಕಾ |
ಕೌಮಾರ್ಯೈಂದ್ರೀ ಚ ಚಾಮುಂಡಾ ಖಾದಯಂತು ಮಮ ದ್ವಿಷಃ || 15 ||

ಸುರೇಶ್ವರೀ ಘೋರರೂಪಾ ಚಂಡಮುಂಡವಿನಾಶಿನೀ |
ಮುಂಡಮಾಲಾವೃತಾಂಗೀ ಚ ಸರ್ವತಃ ಪಾತು ಮಾಂ ಸದಾ || 16 ||

ಹ್ರಾಂ ಹ್ರೀಂ ಕಾಳಿಕೇ ಘೋರದಂಷ್ಟ್ರೇ ರುಧಿರಪ್ರಿಯೇ ರುಧಿರಪೂರ್ಣವಕ್ತ್ರೇ ರುಧಿರಾವೃತ್ತಿತಸ್ತನಿ ಮಮ ಶತ್ರೂನ್ ಖಾದಯ ಖಾದಯ ಹಿಂಸ ಹಿಂಸ ಮಾರಯ ಮಾರಯ ಭಿಂಧಿ ಭಿಂಧಿ ಛಿಂಧಿ ಛಿಂಧಿ ಉಚ್ಚಾಟಯ ಉಚ್ಚಾಟಯ ದ್ರಾವಯ ದ್ರಾವಯ ಶೋಷಯ ಶೋಷಯ ಸ್ವಾಹಾ | ಓಂ ಜಯ ಜಯ ಕಿರಿ ಕಿರಿ ಮರ್ದಯ ಮರ್ದಯ ಮೋಹಯ ಮೋಹಯ ಹರ ಹರ ಮಮ ರಿಪೂನ್ ಧ್ವಂಸಯ ಧ್ವಂಸಯ ಭಕ್ಷಯ ಭಕ್ಷಯ ತ್ರೋಟಯ ತ್ರೋಟಯ ಯಾತುದಾನಾನಿ ಚಾಮುಂಡೀ ಸರ್ವಜನಾನ್ ರಾಜ್ಞೋ ರಾಜಪುರುಷಾನ್ ಸ್ತ್ರಿಯೋ ವಶಾನ್ ಕುರು ಕುರು ತನು ತನು ಧಾನ್ಯಂ ಧನಮಶ್ವಾಶ್ಚ ಗಜಾಂಶ್ಚ ರತ್ನಾನಿ ದಿವ್ಯಕಾಮಿನೀಃ ಪುತ್ರಾನ್ ರಾಜ್ಯಂ ಪ್ರಿಯಂ ದೇಹಿ ದೇಹಿ ಯಚ್ಛಯ ಯಚ್ಛಯ ಕ್ಷಾಂ ಕ್ಷೀಂ ಕ್ಷೂಂ ಕ್ಷೈಂ ಕ್ಷೌಂ ಕ್ಷಃ ಸ್ವಾಹಾ || 17 ||

ಇತ್ಯೇತತ್ ಕವಚಂ ದಿವ್ಯಂ ಕಥಿತಂ ಶಂಭುನಾ ಪುರಾ |
ಯೇ ಪಠಂತಿ ಸದಾ ತೇಷಾಂ ಧ್ರುವಂ ನಶ್ಯಂತಿ ಶತ್ರವಃ || 18 ||

ಪ್ರಳಯಃ ಸರ್ವವ್ಯಾಧೀನಾಂ ಭವತೀಹ ನ ಸಂಶಯಃ |
ಧನಹೀನಾಃ ಪುತ್ರಹೀನಾಃ ಶತ್ರವಸ್ತಸ್ಯ ಸರ್ವದಾ || 19 ||

ಸಹಸ್ರಪಠನಾತ್ ಸಿದ್ಧಿಃ ಕವಚಸ್ಯ ಭವೇತ್ತದಾ |
ತತಃ ಕಾರ್ಯಾಣಿ ಸಿದ್ಧ್ಯಂತಿ ಯಥಾ ಶಂಕರಭಾಷಿತಂ || 20 ||

ಶ್ಮಶಾನಾಂಗಾರಮಾದಾಯ ಚೂರ್ಣೀಕೃತ್ಯ ಪ್ರಯತ್ನತಃ |
ಪಾದೋದಕೇನ ಸ್ಪೃಷ್ಟ್ವಾ ಚ ಲಿಖೇಲ್ಲೋಹಶಲಾಕಯಾ || 21 ||

ಭೂಮೌ ಶತ್ರೂನ್ ಹೀನರೂಪಾನ್ ಉತ್ತರಾಶಿರಸಸ್ತಥಾ |
ಹಸ್ತಂ ದತ್ತ್ವಾ ತು ಹೃದಯೇ ಕವಚಂ ತು ಸ್ವಯಂ ಪಠೇತ್ || 22 ||

ಶತ್ರೋಃ ಪ್ರಾಣಪ್ರತಿಷ್ಠಾಂ ತು ಕುರ್ಯಾನ್ಮಂತ್ರೇಣ ಮಂತ್ರವಿತ್ |
ಹನ್ಯಾದಸ್ತ್ರಪ್ರಹಾರೇಣ ಶತ್ರುರ್ಗಚ್ಛೇದ್ಯಮಾಲಯಂ || 23 ||

ಜ್ವಲದಂಗಾರತಾಪೇನ ಭವಂತಿ ಜ್ವರಿಣೋಽರಯಃ |
ಪ್ರೋಕ್ಷಣೈರ್ವಾಮಪಾದೇನ ದರಿದ್ರೋ ಭವತಿ ಧ್ರುವಂ || 24 ||

ವೈರಿನಾಶಕರಂ ಪ್ರೋಕ್ತಂ ಕವಚಂ ವಶ್ಯಕಾರಕಂ |
ಪರಮೈಶ್ವರ್ಯದಂ ಚೈವ ಪುತ್ರಪೌತ್ರಾದಿವೃದ್ಧಿದಂ || 25 ||

ಪ್ರಭಾತಸಮಯೇ ಚೈವ ಪೂಜಾಕಾಲೇ ಚ ಯತ್ನತಃ |
ಸಾಯಂಕಾಲೇ ತಥಾ ಪಾಠಾತ್ ಸರ್ವಸಿದ್ಧಿರ್ಭವೇದ್ಧ್ರುವಂ || 26 ||

ಶತ್ರುರುಚ್ಚಾಟನಂ ಯಾತಿ ದೇಶಾಚ್ಚ ವಿಚ್ಯುತೋ ಭವೇತ್ |
ಪಶ್ಚಾತ್ಕಿಂಕರಮಾಪ್ನೋತಿ ಸತ್ಯಂ ಸತ್ಯಂ ನ ಸಂಶಯಃ || 27 ||

ಶತ್ರುನಾಶಕರಂ ದೇವಿ ಸರ್ವಸಂಪತ್ಪ್ರದೇ ಶುಭೇ |
ಸರ್ವದೇವಸ್ತುತೇ ದೇವಿ ಕಾಳಿಕೇ ತ್ವಾಂ ನಮಾಮ್ಯಹಂ || 28 ||

ಇತಿ ಶ್ರೀರುದ್ರಯಾಮಲೇ ಕಾಳಿಕಾಕಲ್ಪೇ ವೈರಿನಾಶಕರಂ ನಾಮ ಶ್ರೀ ಕಾಳಿಕಾ ಕವಚಂ |