ಶ್ರೀ ದಕ್ಷಿಣಕಾಳೀ ಕವಚಂ 2

ಶ್ರೀ ದಕ್ಷಿಣಕಾಳೀ ಕವಚಂ 2

ಕೈಲಾಸಶಿಖರಾರೂಢಂ ಭೈರವಂ ಚಂದ್ರಶೇಖರಂ |
ವಕ್ಷಃಸ್ಥಲೇ ಸಮಾಸೀನಾ ಭೈರವೀ ಪರಿಪೃಚ್ಛತಿ || 1 ||

ಶ್ರೀಭೈರವ್ಯುವಾಚ |
ದೇವೇಶ ಪರಮೇಶಾನ ಲೋಕಾನುಗ್ರಹಕಾರಕಃ |
ಕವಚಂ ಸೂಚಿತಂ ಪೂರ್ವಂ ಕಿಮರ್ಥಂ ನ ಪ್ರಕಾಶಿತಂ || 2 ||

ಯದಿ ಮೇ ಮಹತೀ ಪ್ರೀತಿಸ್ತವಾಸ್ತಿ ಕುಲ ಭೈರವ |
ಕವಚಂ ಕಾಳಿಕಾ ದೇವ್ಯಾಃ ಕಥಯಸ್ವಾನುಕಂಪಯಾ || 3 ||

ಶ್ರೀಭೈರವ ಉವಾಚ |
ಅಪ್ರಕಾಶ್ಯ ಮಿದಂ ದೇವಿ ನರಲೋಕೇ ವಿಶೇಷತಃ |
ಲಕ್ಷವಾರಂ ವಾರಿತಾಸಿ ಸ್ತ್ರೀ ಸ್ವಭಾವಾದ್ಧಿ ಪೃಚ್ಛಸಿ || 4 ||

ಶ್ರೀಭೈರವ್ಯುವಾಚ |
ಸೇವಕಾ ಬಹವೋ ನಾಥ ಕುಲಧರ್ಮ ಪರಾಯಣಾಃ |
ಯತಸ್ತೇ ತ್ಯಕ್ತಜೀವಾಶಾ ಶವೋಪರಿ ಚಿತೋಪರಿ || 5 ||

ತೇಷಾಂ ಪ್ರಯೋಗ ಸಿದ್ಧ್ಯರ್ಥಂ ಸ್ವರಕ್ಷಾರ್ಥಂ ವಿಶೇಷತಃ |
ಪೃಚ್ಛಾಮಿ ಬಹುಶೋ ದೇವ ಕಥಯಸ್ವ ದಯಾನಿಧೇ || 6 ||

ಶ್ರೀಭೈರವ ಉವಾಚ |
ಕಥಯಾಮಿ ಶೃಣು ಪ್ರಾಜ್ಞೇ ಕಾಳಿಕಾ ಕವಚಂ ಪರಂ |
ಗೋಪನೀಯಂ ಪಶೋರಗ್ರೇ ಸ್ವಯೋನಿಮಪರೇ ಯಥಾ || 7 ||

ಅಸ್ಯ ಶ್ರೀ ದಕ್ಷಿಣಕಾಳಿಕಾ ಕವಚಸ್ಯ ಭೈರವ ಋಷಿಃ ಉಷ್ಣಿಕ್ ಛಂದಃ ಅದ್ವೈತರೂಪಿಣೀ ಶ್ರೀ ದಕ್ಷಿಣಕಾಳಿಕಾ ದೇವತಾ ಹ್ರೀಂ ಬೀಜಂ ಹೂಂ ಶಾಕ್ತಿಃ ಕ್ರೀಂ ಕೀಲಕಂ ಸರ್ವಾರ್ಥ ಸಾಧನ ಪುರಃಸರ ಮಂತ್ರ ಸಿದ್ಧ್ಯರ್ಥೇ ಪಾಠೇ ವಿನಿಯೋಗಃ |

ಅಥ ಕವಚಂ |
ಸಹಸ್ರಾರೇ ಮಹಾಪದ್ಮೇ ಕರ್ಪೂರಧವಳೋ ಗುರುಃ |
ವಾಮೋರುಸ್ಥಿತತಚ್ಛಕ್ತಿಃ ಸದಾ ಸರ್ವತ್ರ ರಕ್ಷತು || 8 ||

ಪರಮೇಶಃ ಪುರಃ ಪಾತು ಪರಾಪರಗುರುಸ್ತಥಾ |
ಪರಮೇಷ್ಠೀ ಗುರುಃ ಪಾತು ದಿವ್ಯ ಸಿದ್ಧಿಶ್ಚ ಮಾನವಃ || 9 ||

ಮಹಾದೇವೀ ಸದಾ ಪಾತು ಮಹಾದೇವಃ ಸದಾಽವತು |
ತ್ರಿಪುರೋ ಭೈರವಃ ಪಾತು ದಿವ್ಯರೂಪಧರಃ ಸದಾ || 10 ||

ಬ್ರಹ್ಮಾನಂದಃ ಸದಾ ಪಾತು ಪೂರ್ಣದೇವಃ ಸದಾಽವತು |
ಚಲಶ್ಚಿತ್ತಃ ಸದಾ ಪಾತು ಚೇಲಾಂಚಲಶ್ಚ ಪಾತು ಮಾಂ || 11 ||

ಕುಮಾರಃ ಕ್ರೋಧನಶ್ಚೈವ ವರದಃ ಸ್ಮರದೀಪನಃ |
ಮಾಯಾಮಾಯಾವತೀ ಚೈವ ಸಿದ್ಧೌಘಾಃ ಪಾತು ಸರ್ವದಾ || 12 ||

ವಿಮಲೋ ಕುಶಲಶ್ಚೈವ ಭೀಮಸೇನಃ ಸುಧಾಕರಃ |
ಮೀನೋ ಗೋರಕ್ಷಕಶ್ಚೈವ ಭೋಜದೇವಃ ಪ್ರಜಾಪತಿಃ || 13 ||

ಮೂಲದೇವೋ ರಂತಿದೇವೋ ವಿಘ್ನೇಶ್ವರ ಹುತಾಶಾನಃ |
ಸಂತೋಷಃ ಸಮಯಾನಂದಃ ಪಾತು ಮಾಂ ಮನವಾ ಸದಾ || 14 ||

ಸರ್ವೇಽಪ್ಯಾನಂದನಾಥಾಂತಃ ಅಂಬಾಂ ತಾಂ ಮಾತರಃ ಕ್ರಮಾತ್ |
ಗಣನಾಥಃ ಸದಾ ಪಾತು ಭೈರವಃ ಪಾತು ಮಾಂ ಸದಾ || 15 ||

ವಟುಕೋ ನಃ ಸದಾ ಪಾತು ದುರ್ಗಾ ಮಾಂ ಪರಿರಕ್ಷತು |
ಶಿರಸಃ ಪಾದಪರ್ಯಂತಂ ಪಾತು ಮಾಂ ಘೋರದಕ್ಷಿಣಾ || 16 ||

ತಥಾ ಶಿರಸಿ ಮಾಂ ಕಾಳೀ ಹೃದಿ ಮೂಲೇ ಚ ರಕ್ಷತು |
ಸಂಪೂರ್ಣ ವಿದ್ಯಯಾ ದೇವೀ ಸದಾ ಸರ್ವತ್ರ ರಕ್ಷತು || 17 ||

ಕ್ರೀಂ ಕ್ರೀಂ ಕ್ರೀಂ ವದನೇ ಪಾತು ಹೃದಿ ಹೂಂ ಹೂಂ ಸದಾಽವತು |
ಹ್ರೀಂ ಹ್ರೀಂ ಪಾತು ಸದಾಧಾರೇ ದಕ್ಷಿಣೇ ಕಾಳಿಕೇ ಹೃದಿ || 18 ||

ಕ್ರೀಂ ಕ್ರೀಂ ಕ್ರೀಂ ಪಾತು ಮೇ ಪೂರ್ವೇ ಹೂಂ ಹೂಂ ದಕ್ಷೇ ಸದಾಽವತು |
ಹ್ರೀಂ ಹ್ರೀಂ ಮಾಂ ಪಶ್ಚಿಮೇ ಪಾತು ಹೂಂ ಹೂಂ ಪಾತು ಸದೋತ್ತರೇ || 19 ||

ಪೃಷ್ಠೇ ಪಾತು ಸದಾ ಸ್ವಾಹಾ ಮೂಲಾ ಸರ್ವತ್ರ ರಕ್ಷತು |
ಷಡಂಗೇ ಯುವತೀ ಪಾತು ಷಡಂಗೇಷು ಸದೈವ ಮಾಂ || 20 ||

ಮಂತ್ರರಾಜಃ ಸದಾ ಪಾತು ಊರ್ಧ್ವಾಧೋ ದಿಗ್ವಿದಿಕ್ ಸ್ಥಿತಃ |
ಚಕ್ರರಾಜೇ ಸ್ಥಿತಾಶ್ಚಾಪಿ ದೇವತಾಃ ಪರಿಪಾಂತು ಮಾಂ || 21 ||

ಉಗ್ರಾ ಉಗ್ರಪ್ರಭಾ ದೀಪ್ತಾ ಪಾತು ಪೂರ್ವೇ ತ್ರಿಕೋಣಕೇ |
ನೀಲಾ ಘನಾ ಬಲಾಕಾ ಚ ತಥಾ ಪರತ್ರಿಕೋಣಕೇ || 22 ||

ಮಾತ್ರಾ ಮುದ್ರಾ ಮಿತಾ ಚೈವ ತಥಾ ಮಧ್ಯ ತ್ರಿಕೋಣಕೇ |
ಕಾಳೀ ಕಪಾಲಿನೀ ಕುಲ್ಲಾ ಕುರುಕುಲ್ಲಾ ವಿರೋಧಿನೀ || 23 ||

ಬಹಿಃ ಷಟ್ಕೋಣಕೇ ಪಾಂತು ವಿಪ್ರಚಿತ್ತಾ ತಥಾ ಪ್ರಿಯೇ |
ಸರ್ವಾಃ ಶ್ಯಾಮಾಃ ಖಡ್ಗಧರಾ ವಾಮಹಸ್ತೇನ ತರ್ಜನೀಃ || 24 ||

ಬ್ರಾಹ್ಮೀ ಪೂರ್ವದಳೇ ಪಾತು ನಾರಾಯಣೀ ತಥಾಗ್ನಿಕೇ |
ಮಾಹೇಶ್ವರೀ ದಕ್ಷದಳೇ ಚಾಮುಂಡಾ ರಕ್ಷಸೇಽವತು || 25 ||

ಕೌಮಾರೀ ಪಶ್ಚಿಮೇ ಪಾತು ವಾಯವ್ಯೇ ಚಾಪರಾಜಿತಾ |
ವಾರಾಹೀ ಚೋತ್ತರೇ ಪಾತು ನಾರಸಿಂಹೀ ಶಿವೇಽವತು || 26 ||

ಐಂ ಹ್ರೀಂ ಅಸಿತಾಂಗಃ ಪೂರ್ವೇ ಭೈರವಃ ಪರಿರಕ್ಷತು |
ಐಂ ಹ್ರೀಂ ರುರುಶ್ಚಾಜಿನಕೋಣೇ ಐಂ ಹ್ರೀಂ ಚಂಡಸ್ತು ದಕ್ಷಿಣೇ || 27 ||

ಐಂ ಹ್ರೀಂ ಕ್ರೋಧೋ ನೈರೃತೇಽವ್ಯಾತ್ ಐಂ ಹ್ರೀಂ ಉನ್ಮತ್ತಕಸ್ತಥಾ |
ಪಶ್ಚಿಮೇ ಪಾತು ಐಂ ಹ್ರೀಂ ಮಾಂ ಕಪಾಲೀ ವಾಯು ಕೋಣಕೇ || 28 ||

ಐಂ ಹ್ರೀಂ ಭೀಷಣಾಖ್ಯಶ್ಚ ಉತ್ತರೇಽವತು ಭೈರವಃ |
ಐಂ ಹ್ರೀಂ ಸಂಹಾರ ಐಶಾನ್ಯಾಂ ಮಾತೃಣಾಮಂಕಗಾ ಶಿವಾಃ || 29 ||

ಐಂ ಹೇತುಕೋ ವಟುಕಃ ಪೂರ್ವದಳೇ ಪಾತು ಸದೈವ ಮಾಂ |
ಐಂ ತ್ರಿಪುರಾಂತಕೋ ವಟುಕಃ ಆಗ್ನೇಯ್ಯಾಂ ಸರ್ವದಾಽವತು || 30 ||

ಐಂ ವಹ್ನಿ ವೇತಾಳೋ ವಟುಕೋ ದಕ್ಷಿಣೇ ಮಾಂ ಸದಾಽವತು |
ಐಂ ಅಗ್ನಿಜಿಹ್ವವಟುಕೋಽವ್ಯಾತ್ ನೈರೃತ್ಯಾಂ ಪಶ್ಚಿಮೇ ತಥಾ || 31 ||

ಐಂ ಕಾಲವಟುಕಃ ಪಾತು ಐಂ ಕರಾಳವಟುಕಸ್ತಥಾ |
ವಾಯವ್ಯಾಂ ಐಂ ಏಕಃ ಪಾತು ಉತ್ತರೇ ವಟುಕೋಽವತು || 32 ||

ಐಂ ಭೀಮವಟುಕಃ ಪಾತು ಐಶಾನ್ಯಾಂ ದಿಶಿ ಮಾಂ ಸದಾ |
ಐಂ ಹ್ರೀಂ ಹ್ರೀಂ ಹೂಂ ಫಟ್ ಸ್ವಾಹಾಂತಾಶ್ಚತುಃ ಷಷ್ಟಿ ಮಾತರಃ || 33 ||

ಊರ್ಧ್ವಾಧೋ ದಕ್ಷವಾಮಾರ್ಗೇ ಪೃಷ್ಠದೇಶೇ ತು ಪಾತು ಮಾಂ |
ಐಂ ಹೂಂ ಸಿಂಹವ್ಯಾಘ್ರಮುಖೀ ಪೂರ್ವೇ ಮಾಂ ಪರಿರಕ್ಷತು || 34 ||

ಐಂ ಕಾಂ ಕೀಂ ಸರ್ಪಮುಖೀ ಅಗ್ನಿಕೋಣೇ ಸದಾಽವತು |
ಐಂ ಮಾಂ ಮಾಂ ಮೃಗಮೇಷಮುಖೀ ದಕ್ಷಿಣೇ ಮಾಂ ಸದಾಽವತು || 35 ||

ಐಂ ಚೌಂ ಚೌಂ ಗಜರಾಜಮುಖೀ ನೈರೃತ್ಯಾಂ ಮಾಂ ಸದಾಽವತು |
ಐಂ ಮೇಂ ಮೇಂ ವಿಡಾಲಮುಖೀ ಪಶ್ಚಿಮೇ ಪಾತು ಮಾಂ ಸದಾ || 36 ||

ಐಂ ಖೌಂ ಖೌಂ ಕ್ರೋಷ್ಟುಮುಖೀ ವಾಯುಕೋಣೇ ಸದಾಽವತು |
ಐಂ ಹಾಂ ಹಾಂ ಹ್ರಸ್ವದೀರ್ಘಮುಖೀ ಲಂಬೋದರ ಮಹೋದರೀ || 37 ||

ಪಾತುಮಾಮುತ್ತರೇ ಕೋಣೇ ಐಂ ಹ್ರೀಂ ಹ್ರೀಂ ಶಿವಕೋಣಕೇ |
ಹ್ರಸ್ವಜಂಘತಾಲಜಂಘಃ ಪ್ರಲಂಬೌಷ್ಠೀ ಸದಾಽವತು || 38 ||

ಏತಾಃ ಶ್ಮಶಾನವಾಸಿನ್ಯೋ ಭೀಷಣಾ ವಿಕೃತಾನನಾಃ |
ಪಾಂತು ಮಾ ಸರ್ವದಾ ದೇವ್ಯಃ ಸಾಧಕಾಭೀಷ್ಟಪೂರಿಕಾಃ || 39 ||

ಇಂದ್ರೋ ಮಾಂ ಪೂರ್ವತೋ ರಕ್ಷೇದಾಗ್ನೇಯ್ಯಾಮಗ್ನಿದೇವತಾ |
ದಕ್ಷೇ ಯಮಃ ಸದಾ ಪಾತು ನೈರೃತ್ಯಾಂ ನೈರೃತಿಶ್ಚ ಮಾಂ || 40 ||

ವರುಣೋಽವತು ಮಾಂ ಪಶ್ಚಾತ್ ವಾಯುರ್ಮಾಂ ವಾಯವೇಽವತು |
ಕುಬೇರಶ್ಚೋತ್ತರೇ ಪಾಯಾತ್ ಐಶಾನ್ಯಾಂ ತು ಸದಾಶಿವಃ || 41 ||

ಊರ್ಧ್ವಂ ಬ್ರಹ್ಮಾ ಸದಾ ಪಾತು ಅಧಶ್ಚಾನಂತದೇವತಾ |
ಪೂರ್ವಾದಿದಿಕ್ ಸ್ಥಿತಾಃ ಪಾಂತು ವಜ್ರಾದ್ಯಾಶ್ಚಾಯುಧಾಶ್ಚ ಮಾಂ || 42 ||

ಕಾಳಿಕಾಽವಾತು ಶಿರಸಿ ಹೃದಯೇ ಕಾಳಿಕಾಽವತು |
ಆಧಾರೇ ಕಾಳಿಕಾ ಪಾತು ಪಾದಯೋಃ ಕಾಳಿಕಾಽವತು || 43 ||

ದಿಕ್ಷು ಮಾಂ ಕಾಳಿಕಾ ಪಾತು ವಿದಿಕ್ಷು ಕಾಳಿಕಾಽವತು |
ಊರ್ಧ್ವಂ ಮೇ ಕಾಳಿಕಾ ಪಾತು ಅಧಶ್ಚ ಕಾಳಿಕಾಽವತು || 44 ||

ಚರ್ಮಾಸೃಙ್ಮಾಂಸಮೇದಾಽಸ್ಥಿ ಮಜ್ಜಾ ಶುಕ್ರಾಣಿ ಮೇಽವತು |
ಇಂದ್ರಿಯಾಣಿ ಮನಶ್ಚೈವ ದೇಹಂ ಸಿದ್ಧಿಂ ಚ ಮೇಽವತು || 45 ||

ಆಕೇಶಾತ್ ಪಾದಪರ್ಯಂತಂ ಕಾಳಿಕಾ ಮೇ ಸದಾಽವತು |
ವಿಯತಿ ಕಾಳಿಕಾ ಪಾತು ಪಥಿ ಮಾಂ ಕಾಳಿಕಾಽವತು || 46 ||

ಶಯನೇ ಕಾಳಿಕಾ ಪಾತು ಸರ್ವಕಾರ್ಯೇಷು ಕಾಳಿಕಾ |
ಪುತ್ರಾನ್ ಮೇ ಕಾಳಿಕಾ ಪಾತು ಧನಂ ಮೇ ಪಾತು ಕಾಳಿಕಾ || 47 ||

ಯತ್ರ ಮೇ ಸಂಶಯಾವಿಷ್ಟಾಸ್ತಾ ನಶ್ಯಂತು ಶಿವಾಜ್ಞಯಾ |
ಇತೀದಂ ಕವಚಂ ದೇವಿ ಬ್ರಹ್ಮಲೋಕೇಽಪಿ ದುರ್ಲಭಂ || 48 ||

ತವ ಪ್ರೀತ್ಯಾ ಮಾಯಾಖ್ಯಾತಂ ಗೋಪನೀಯಂ ಸ್ವಯೋನಿವತ್ |
ತವ ನಾಮ್ನಿ ಸ್ಮೃತೇ ದೇವಿ ಸರ್ವಜ್ಞಂ ಚ ಫಲಂ ಲಭೇತ್ || 49 ||

ಸರ್ವಪಾಪಕ್ಷಯಂ ಯಾಂತಿ ವಾಂಛಾ ಸರ್ವತ್ರ ಸಿದ್ಧ್ಯತಿ |
ನಾಮ್ನಾಃ ಶತಗುಣಂ ಸ್ತೋತ್ರಂ ಧ್ಯಾನಂ ತಸ್ಮಾಚ್ಛತಾಧಿಕಂ || 50 ||

ತಸ್ಮಾತ್ ಶತಾಧಿಕೋ ಮಂತ್ರಃ ಕವಚಂ ತಚ್ಛತಾಧಿಕಂ |
ಶುಚಿಃ ಸಮಾಹಿತೋ ಭೂತ್ವಾ ಭಕ್ತಿ ಶ್ರದ್ಧಾ ಸಮನ್ವಿತಃ || 51 ||

ಸಂಸ್ಥಾಪ್ಯ ವಾಮಭಾಗೇ ತು ಶಕ್ತಿಂ ಸ್ವಾಮಿ ಪರಾಯಣಾಂ |
ರಕ್ತವಸ್ತ್ರಪರಿಧಾನಾಂ ಶಿವಮಂತ್ರಧರಾಂ ಶುಭಾಂ || 52 ||

ಯಾ ಶಕ್ತಿಃ ಸಾ ಮಹಾದೇವೀ ಹರರೂಪಶ್ಚ ಸಾಧಕಃ |
ಅನ್ಯೋಽನ್ಯ ಚಿಂತಯೇದ್ದೇವೀಂ ದೇವತ್ವಮುಪಜಾಯತೇ || 53 ||

ಶಕ್ತಿಯುಕ್ತೋ ಯಜೇದ್ದೇವೀಂ ಚಕ್ರೇ ವಾ ಮನಸಾಪಿ ವಾ |
ಭೋಗೈಶ್ಚ ಮಧುಪರ್ಕಾದ್ಯೈಸ್ತಾಂಬೂಲೈಶ್ಚ ಸುವಾಸಿತೈಃ || 54 ||

ತತಸ್ತು ಕವಚಂ ದಿವ್ಯಂ ಪಠದೇಕಮನಾಃ ಪ್ರಿಯೇ |
ತಸ್ಯ ಸರ್ವಾರ್ಥ ಸಿದ್ಧಿಸ್ಯಾನ್ನಾತ್ರ ಕಾರ್ಯಾವಿಚಾರಣಾ || 55 ||

ಇದಂ ರಹಸ್ಯಂ ಪರಮಂ ಪರಂ ಸ್ವಸ್ತ್ಯಯನಂ ಮಹತ್ |
ಯಾ ಸಕೃತ್ತು ಪಠೇದ್ದೇವಿ ಕವಚಂ ದೇವದುರ್ಲಭಂ || 56 ||

ಸರ್ವಯಜ್ಞಫಲಂ ತಸ್ಯ ಭವೇದೇವ ನ ಸಂಶಯಃ |
ಸಂಗ್ರಾಮೇ ಚ ಜಯೇತ್ ಶತ್ರೂನ್ ಮಾತಂಗಾನಿವ ಕೇಶರೀ || 57 ||

ನಾಸ್ತ್ರಾಣಿ ತಸ್ಯ ಶಸ್ತ್ರಾಣಿ ಶರೀರೇ ಪ್ರಭವಂತಿ ಚ |
ತಸ್ಯ ವ್ಯಾಧಿ ಕದಾಚಿನ್ನ ದುಃಖಂ ನಾಸ್ತಿ ಕದಾಚನ || 58 ||

ಗತಿಸ್ತಸ್ಯೈವ ಸರ್ವತ್ರ ವಾಯುತುಲ್ಯಃ ಸದಾ ಭವೇತ್ |
ದೀರ್ಘಾಯುಃ ಕಾಮಭೋಗೀಶೋ ಗುರುಭಕ್ತಃ ಸದಾ ಭವೇತ್ || 59 ||

ಅಹೋ ಕವಚ ಮಾಹಾತ್ಮ್ಯಂ ಪಠ್ಯಮಾನಸ್ಯ ನಿತ್ಯಶಃ |
ವಿನಾಪಿ ನಯಯೋಗೇನ ಯೋಗೀಶ ಸಮತಾಂ ವ್ರಜೇತ್ || 60 ||

ಸತ್ಯಂ ಸತ್ಯಂ ಪುನಃ ಸತ್ಯಂ ಸತ್ಯಂ ಸತ್ಯಂ ಪುನಃ ಪುನಃ |
ನ ಶಕ್ನೋಮಿ ಪ್ರಭಾವಂ ತು ಕವಚಸ್ಯಾಸ್ಯ ವರ್ಣಿತಂ || 61 ||

ಇತಿ ಶ್ರೀ ದಕ್ಷಿಣಕಾಳಿಕಾ ಕವಚಂ |