ಶ್ರೀ ಭುವನೇಶ್ವರೀ ಕವಚಂ (ತ್ರೈಲೋಕ್ಯಮಂಗಳಂ)

ಶ್ರೀ ಭುವನೇಶ್ವರೀ ಕವಚಂ (ತ್ರೈಲೋಕ್ಯಮಂಗಳಂ)

ದೇವ್ಯುವಾಚ |
ದೇವೇಶ ಭುವನೇಶ್ವರ್ಯಾ ಯಾ ಯಾ ವಿದ್ಯಾಃ ಪ್ರಕಾಶಿತಾಃ |
ಶ್ರುತಾಶ್ಚಾಧಿಗತಾಃ ಸರ್ವಾಃ ಶ್ರೋತುಮಿಚ್ಛಾಮಿ ಸಾಂಪ್ರತಂ || 1 ||

ತ್ರೈಲೋಕ್ಯಮಂಗಳಂ ನಾಮ ಕವಚಂ ಯತ್ಪುರೋದಿತಂ |
ಕಥಯಸ್ವ ಮಹಾದೇವ ಮಮ ಪ್ರೀತಿಕರಂ ಪರಂ || 2 ||

ಈಶ್ವರ ಉವಾಚ |
ಶೃಣು ಪಾರ್ವತಿ ವಕ್ಷ್ಯಾಮಿ ಸಾವಧಾನಾವಧಾರಯ |
ತ್ರೈಲೋಕ್ಯಮಂಗಳಂ ನಾಮ ಕವಚಂ ಮಂತ್ರವಿಗ್ರಹಂ || 3 ||

ಸಿದ್ಧವಿದ್ಯಾಮಯಂ ದೇವಿ ಸರ್ವೈಶ್ವರ್ಯಪ್ರದಾಯಕಂ |
ಪಠನಾದ್ಧಾರಣಾನ್ಮರ್ತ್ಯಸ್ತ್ರೈಲೋಕ್ಯೈಶ್ವರ್ಯಭಾಗ್ಭವೇತ್ || 4 ||

[ ತ್ರೈಲೋಕ್ಯಮಂಗಳಸ್ಯಾಸ್ಯ ಕವಚಸ್ಯ ಋಷಿಶ್ಶಿವಃ |
ಛಂದೋ ವಿರಾಟ್ ಜಗದ್ಧಾತ್ರೀ ದೇವತಾ ಭುವನೇಶ್ವರೀ |
ಧರ್ಮಾರ್ಥಕಾಮಮೋಕ್ಷೇಷು ವಿನಿಯೋಗಃ ಪ್ರಕೀರ್ತಿತಃ || ]

ಹ್ರೀಂ ಬೀಜಂ ಮೇ ಶಿರಃ ಪಾತು ಭುವನೇಶೀ ಲಲಾಟಕಂ |
ಐಂ ಪಾತು ದಕ್ಷನೇತ್ರಂ ಮೇ ಹ್ರೀಂ ಪಾತು ವಾಮಲೋಚನಂ || 1 ||

ಶ್ರೀಂ ಪಾತು ದಕ್ಷಕರ್ಣಂ ಮೇ ತ್ರಿವರ್ಣಾಖ್ಯಾ ಮಹೇಶ್ವರೀ | [ತ್ರಿವರ್ಣಾತ್ಮಾ]
ವಾಮಕರ್ಣಂ ಸದಾ ಪಾತು ಐಂ ಘ್ರಾಣಂ ಪಾತು ಮೇ ಸದಾ || 2 ||

ಹ್ರೀಂ ಪಾತು ವದನಂ ದೇವಿ ಐಂ ಪಾತು ರಸನಾಂ ಮಮ |
ವಾಕ್ಪುಟಂ ಚ ತ್ರಿವರ್ಣಾತ್ಮಾ ಕಂಠಂ ಪಾತು ಪರಾಂಬಿಕಾ || 3 ||

ಶ್ರೀಂ ಸ್ಕಂಧೌ ಪಾತು ನಿಯತಂ ಹ್ರೀಂ ಭುಜೌ ಪಾತು ಸರ್ವದಾ |
ಕ್ಲೀಂ ಕರೌ ತ್ರಿಪುಟಾ ಪಾತು ತ್ರಿಪುರೈಶ್ವರ್ಯದಾಯಿನೀ || 4 || [ತ್ರಿಪುಟೇಶಾನಿ]

ಓಂ ಪಾತು ಹೃದಯಂ ಹ್ರೀಂ ಮೇ ಮಧ್ಯದೇಶಂ ಸದಾಽವತು |
ಕ್ರೌಂ ಪಾತು ನಾಭಿದೇಶಂ ಮೇ ತ್ರ್ಯಕ್ಷರೀ ಭುವನೇಶ್ವರೀ || 5 ||

ಸರ್ವಬೀಜಪ್ರದಾ ಪೃಷ್ಠಂ ಪಾತು ಸರ್ವವಶಂಕರೀ |
ಹ್ರೀಂ ಪಾತು ಗುಹ್ಯದೇಶಂ ಮೇ ನಮೋ ಭಗವತೀ ಕಟಿಂ || 6 ||

ಮಾಹೇಶ್ವರೀ ಸದಾ ಪಾತು ಸಕ್ಥಿನೀ ಜಾನುಯುಗ್ಮಕಂ |
ಅನ್ನಪೂರ್ಣಾ ಸದಾ ಪಾತು ಸ್ವಾಹಾ ಪಾತು ಪದದ್ವಯಂ || 7 ||

ಸಪ್ತದಶಾಕ್ಷರೀ ಪಾಯಾದನ್ನಪೂರ್ಣಾತ್ಮಿಕಾ ಪರಾ |
ತಾರಂ ಮಾಯಾ ರಮಾಕಾಮಃ ಷೋಡಶಾರ್ಣಾ ತತಃ ಪರಂ || 8 ||

ಶಿರಃಸ್ಥಾ ಸರ್ವದಾ ಪಾತು ವಿಂಶತ್ಯರ್ಣಾತ್ಮಿಕಾ ಪರಾ |
ತಾರಂ ದುರ್ಗೇಯುಗಂ ರಕ್ಷೇತ್ ಸ್ವಾಹೇತಿ ಚ ದಶಾಕ್ಷರೀ || 9 ||

ಜಯದುರ್ಗಾ ಘನಶ್ಯಾಮಾ ಪಾತು ಮಾಂ ಸರ್ವತೋ ಮುದಾ |
ಮಾಯಾಬೀಜಾದಿಕಾ ಚೈಷಾ ದಶಾರ್ಣಾ ಚ ಪರಾ ತಥಾ || 10 ||

ಉತ್ತಪ್ತಕಾಂಚನಾಭಾಸಾ ಜಯದುರ್ಗಾಽಽನನೇಽವತು |
ತಾರಂ ಹ್ರೀಂ ದುಂ ಚ ದುರ್ಗಾಯೈ ನಮೋಽಷ್ಟಾರ್ಣಾತ್ಮಿಕಾ ಪರಾ || 11 ||

ಶಂಖಚಕ್ರಧನುರ್ಬಾಣಧರಾ ಮಾಂ ದಕ್ಷಿಣೇಽವತು |
ಮಹಿಷಾಮರ್ದಿನೀ ಸ್ವಾಹಾ ವಸುವರ್ಣಾತ್ಮಿಕಾ ಪರಾ || 12 ||

ನೈರೃತ್ಯಾಂ ಸರ್ವದಾ ಪಾತು ಮಹಿಷಾಸುರನಾಶಿನೀ |
ಮಾಯಾ ಪದ್ಮಾವತೀ ಸ್ವಾಹಾ ಸಪ್ತಾರ್ಣಾ ಪರಿಕೀರ್ತಿತಾ || 13 ||

ಪದ್ಮಾವತೀ ಪದ್ಮಸಂಸ್ಥಾ ಪಶ್ಚಿಮೇ ಮಾಂ ಸದಾಽವತು |
ಪಾಶಾಂಕುಶಪುಟೇ ಮಾಯೇ ಹ್ರೀಂ ಪರಮೇಶ್ವರಿ ಸ್ವಾಹಾ || 14 ||

ತ್ರಯೋದಶಾರ್ಣಾ ತಾರಾದ್ಯಾ ಅಶ್ವಾರುಢಾಽನಲೇಽವತು |
ಸರಸ್ವತೀ ಪಂಚಶರೇ ನಿತ್ಯಕ್ಲಿನ್ನೇ ಮದದ್ರವೇ || 15 ||

ಸ್ವಾಹಾರವ್ಯಕ್ಷರೀ ವಿದ್ಯಾ ಮಾಮುತ್ತರೇ ಸದಾಽವತು |
ತಾರಂ ಮಾಯಾ ತು ಕವಚಂ ಖೇ ರಕ್ಷೇತ್ಸತತಂ ವಧೂಃ || 16 ||

ಹ್ರೂಂ ಕ್ಷಂ ಹ್ರೀಂ ಫಟ್ ಮಹಾವಿದ್ಯಾ ದ್ವಾದಶಾರ್ಣಾಖಿಲಪ್ರದಾ |
ತ್ವರಿತಾಷ್ಟಾಹಿಭಿಃ ಪಾಯಾಚ್ಛಿವಕೋಣೇ ಸದಾ ಚ ಮಾಂ || 17 ||

ಐಂ ಕ್ಲೀಂ ಸೌಃ ಸತತಂ ಬಾಲಾ ಮೂರ್ಧದೇಶೇ ತತೋಽವತು |
ಬಿಂದ್ವಂತಾ ಭೈರವೀ ಬಾಲಾ ಭೂಮೌ ಚ ಮಾಂ ಸದಾಽವತು || 18 ||

ಇತಿ ತೇ ಕಥಿತಂ ಪುಣ್ಯಂ ತ್ರೈಲೋಕ್ಯಮಂಗಳಂ ಪರಂ |
ಸಾರಂ ಸಾರತರಂ ಪುಣ್ಯಂ ಮಹಾವಿದ್ಯೌಘವಿಗ್ರಹಂ || 19 ||

ಅಸ್ಯಾಪಿ ಪಠನಾತ್ಸದ್ಯಃ ಕುಬೇರೋಽಪಿ ಧನೇಶ್ವರಃ |
ಇಂದ್ರಾದ್ಯಾಃ ಸಕಲಾ ದೇವಾಃ ಪಠನಾದ್ಧಾರಣಾದ್ಯತಃ || 20 ||

ಸರ್ವಸಿದ್ಧೀಶ್ವರಾಃ ಸಂತಃ ಸರ್ವೈಶ್ವರ್ಯಮವಾಪ್ನುಯುಃ |
ಪುಷ್ಪಾಂಜಲ್ಯಷ್ಟಕಂ ದತ್ವಾ ಮೂಲೇನೈವ ಪಠೇತ್ಸಕೃತ್ || 21 ||

ಸಂವತ್ಸರಕೃತಾಯಾಸ್ತು ಪೂಜಾಯಾಃ ಫಲಮಾಪ್ನುಯಾತ್ |
ಪ್ರೀತಿಮನ್ಯೋಽನ್ಯತಃ ಕೃತ್ವಾ ಕಮಲಾ ನಿಶ್ಚಲಾ ಗೃಹೇ || 22 ||

ವಾಣೀ ಚ ನಿವಸೇದ್ವಕ್ತ್ರೇ ಸತ್ಯಂ ಸತ್ಯಂ ನ ಸಂಶಯಃ |
ಯೋ ಧಾರಯತಿ ಪುಣ್ಯಾತ್ಮಾ ತ್ರೈಲೋಕ್ಯಮಂಗಳಾಭಿಧಂ || 23 ||

ಕವಚಂ ಪರಮಂ ಪುಣ್ಯಂ ಸೋಽಪಿ ಪುಣ್ಯವತಾಂ ವರಃ |
ಸರ್ವೈಶ್ವರ್ಯಯುತೋ ಭೂತ್ವಾ ತ್ರೈಲೋಕ್ಯವಿಜಯೀ ಭವೇತ್ || 24 ||

ಪುರುಷೋ ದಕ್ಷಿಣೇ ಬಾಹೌ ನಾರೀ ವಾಮಭುಜೇ ತಥಾ |
ಬಹುಪುತ್ರವತೀ ಭೂತ್ವಾ ವಂಧ್ಯಾಪಿ ಲಭತೇ ಸುತಂ || 25 ||

ಬ್ರಹ್ಮಾಸ್ತ್ರಾದೀನಿ ಶಸ್ತ್ರಾಣಿ ನೈವ ಕೃಂತಂತಿ ತಂ ಜನಂ |
ಏತತ್ಕವಚಮಜ್ಞಾತ್ವಾ ಯೋ ಜಪೇದ್ಭುವನೇಶ್ವರೀಂ |
ದಾರಿದ್ರ್ಯಂ ಪರಮಂ ಪ್ರಾಪ್ಯ ಸೋಽಚಿರಾನ್ಮೃತ್ಯುಮಾಪ್ನುಯಾತ್ || 26 ||

ಇತಿ ಶ್ರೀರುದ್ರಯಾಮಲೇ ತಂತ್ರೇ ದೇವೀಶ್ವರ ಸಂವಾದೇ ತ್ರೈಲೋಕ್ಯಮಂಗಳಂ ನಾಮ ಭುವನೇಶ್ವರೀಕವಚಂ ಸಮಾಪ್ತಂ |