ಶ್ರೀ ಕಾಳೀ ಕವಚಂ (ಜಗನ್ಮಂಗಳಂ)

ಶ್ರೀ ಕಾಳೀ ಕವಚಂ (ಜಗನ್ಮಂಗಳಂ)

ಭೈರವ್ಯುವಾಚ |
ಕಾಳೀಪೂಜಾ ಶ್ರುತಾ ನಾಥ ಭಾವಾಶ್ಚ ವಿವಿಧಾಃ ಪ್ರಭೋ |
ಇದಾನೀಂ ಶ್ರೋತುಮಿಚ್ಛಾಮಿ ಕವಚಂ ಪೂರ್ವಸೂಚಿತಂ || 1 ||

ತ್ವಮೇವ ಶರಣಂ ನಾಥ ತ್ರಾಹಿ ಮಾಂ ದುಃಖಸಂಕಟಾತ್ |
ಸರ್ವದುಃಖಪ್ರಶಮನಂ ಸರ್ವಪಾಪಪ್ರಣಾಶನಂ || 2 ||

ಸರ್ವಸಿದ್ಧಿಪ್ರದಂ ಪುಣ್ಯಂ ಕವಚಂ ಪರಮಾದ್ಭುತಂ |
ಅತೋ ವೈ ಶ್ರೋತುಮಿಚ್ಛಾಮಿ ವದ ಮೇ ಕರುಣಾನಿಧೇ || 3 ||

ಶ್ರೀ ಭೈರವ ಉವಾಚ |
ರಹಸ್ಯಂ ಶೃಣು ವಕ್ಷ್ಯಾಮಿ ಭೈರವಿ ಪ್ರಾಣವಲ್ಲಭೇ |
ಶ್ರೀಜಗನ್ಮಂಗಳಂ ನಾಮ ಕವಚಂ ಮಂತ್ರವಿಗ್ರಹಂ || 4 ||

ಪಠಿತ್ವಾ ಧಾರಯಿತ್ವಾ ಚ ತ್ರೈಲೋಕ್ಯಂ ಮೋಹಯೇತ್ ಕ್ಷಣಾತ್ |
ನಾರಾಯಣೋಽಪಿ ಯದ್ಧೃತ್ವಾ ನಾರೀ ಭೂತ್ವಾ ಮಹೇಶ್ವರಂ || 5 ||

ಯೋಗಿನಂ ಕ್ಷೋಭಮನಯದ್ಯದ್ಧೃತ್ವಾ ಚ ರಘೂದ್ವಹಃ |
ವರದೀಪ್ತಾಂ ಜಘಾನೈವ ರಾವಣಾದಿನಿಶಾಚರಾನ್ || 6 ||

ಯಸ್ಯ ಪ್ರಸಾದಾದೀಶೋಽಪಿ ತ್ರೈಲೋಕ್ಯವಿಜಯೀ ಪ್ರಭುಃ |
ಧನಾಧಿಪಃ ಕುಬೇರೋಽಪಿ ಸುರೇಶೋಽಭೂಚ್ಛಚೀಪತಿಃ || 7 ||

ಏವಂ ಚ ಸಕಲಾ ದೇವಾಃ ಸರ್ವಸಿದ್ಧೀಶ್ವರಾಃ ಪ್ರಿಯೇ |
ಶ್ರೀಜಗನ್ಮಂಗಳಸ್ಯಾಸ್ಯ ಕವಚಸ್ಯ ಋಷಿಃ ಶಿವಃ || 8 ||

ಛಂದೋಽನುಷ್ಟುಪ್ ದೇವತಾ ಚ ಕಾಳಿಕಾ ದಕ್ಷಿಣೇರಿತಾ |
ಜಗತಾಂ ಮೋಹನೇ ದುಷ್ಟವಿಜಯೇ ಭುಕ್ತಿಮುಕ್ತಿಷು |
ಯೋಷಿದಾಕರ್ಷಣೇ ಚೈವ ವಿನಿಯೋಗಃ ಪ್ರಕೀರ್ತಿತಃ || 9 ||

ಅಥ ಕವಚಂ |
ಶಿರೋ ಮೇ ಕಾಳಿಕಾ ಪಾತು ಕ್ರೀಂಕಾರೈಕಾಕ್ಷರೀ ಪರಾ |
ಕ್ರೀಂ ಕ್ರೀಂ ಕ್ರೀಂ ಮೇ ಲಲಾಟಂ ಚ ಕಾಳಿಕಾ ಖಡ್ಗಧಾರಿಣೀ || 10 ||

ಹೂಂ ಹೂಂ ಪಾತು ನೇತ್ರಯುಗ್ಮಂ ಹ್ರೀಂ ಹ್ರೀಂ ಪಾತು ಶ್ರುತಿದ್ವಯಂ |
ದಕ್ಷಿಣೇ ಕಾಳಿಕೇ ಪಾತು ಘ್ರಾಣಯುಗ್ಮಂ ಮಹೇಶ್ವರೀ || 11 ||

ಕ್ರೀಂ ಕ್ರೀಂ ಕ್ರೀಂ ರಸನಾಂ ಪಾತು ಹೂಂ ಹೂಂ ಪಾತು ಕಪೋಲಕಂ |
ವದನಂ ಸಕಲಂ ಪಾತು ಹ್ರೀಂ ಹ್ರೀಂ ಸ್ವಾಹಾ ಸ್ವರೂಪಿಣೀ || 12 ||

ದ್ವಾವಿಂಶತ್ಯಕ್ಷರೀ ಸ್ಕಂಧೌ ಮಹಾವಿದ್ಯಾಖಿಲಪ್ರದಾ |
ಖಡ್ಗಮುಂಡಧರಾ ಕಾಳೀ ಸರ್ವಾಂಗಮಭಿತೋಽವತು || 13 ||

ಕ್ರೀಂ ಹೂಂ ಹ್ರೀಂ ತ್ರ್ಯಕ್ಷರೀ ಪಾತು ಚಾಮುಂಡಾ ಹೃದಯಂ ಮಮ |
ಐಂ ಹೂಂ ಓಂ ಐಂ ಸ್ತನದ್ವಂದ್ವಂ ಹ್ರೀಂ ಫಟ್ ಸ್ವಾಹಾ ಕಕುತ್ಸ್ಥಲಂ || 14 ||

ಅಷ್ಟಾಕ್ಷರೀ ಮಹಾವಿದ್ಯಾ ಭುಜೌ ಪಾತು ಸಕರ್ತೃಕಾ |
ಕ್ರೀಂ ಕ್ರೀಂ ಹೂಂ ಹೂಂ ಹ್ರೀಂ ಹ್ರೀಂ ಪಾತು ಕರೌ ಷಡಕ್ಷರೀ ಮಮ || 15 ||

ಕ್ರೀಂ ನಾಭಿಂ ಮಧ್ಯದೇಶಂ ಚ ದಕ್ಷಿಣೇ ಕಾಳಿಕೇಽವತು |
ಕ್ರೀಂ ಸ್ವಾಹಾ ಪಾತು ಪೃಷ್ಠಂ ಚ ಕಾಳಿಕಾ ಸಾ ದಶಾಕ್ಷರೀ || 16 ||

ಕ್ರೀಂ ಮೇ ಗುಹ್ಯಂ ಸದಾ ಪಾತು ಕಾಳಿಕಾಯೈ ನಮಸ್ತತಃ |
ಸಪ್ತಾಕ್ಷರೀ ಮಹಾವಿದ್ಯಾ ಸರ್ವತಂತ್ರೇಷು ಗೋಪಿತಾ || 17 ||

ಹ್ರೀಂ ಹ್ರೀಂ ದಕ್ಷಿಣೇ ಕಾಳಿಕೇ ಹೂಂ ಹೂಂ ಪಾತು ಕಟಿದ್ವಯಂ |
ಕಾಳೀ ದಶಾಕ್ಷರೀ ವಿದ್ಯಾ ಸ್ವಾಹಾಂತಾ ಚೋರುಯುಗ್ಮಕಂ || 18 ||

ಓಂ ಹ್ರೀಂ ಕ್ರೀಂ ಮೇ ಸ್ವಾಹಾ ಪಾತು ಜಾನುನೀ ಕಾಳಿಕಾ ಸದಾ |
ಕಾಳೀ ಹೃನ್ನಾಮವಿಧೇಯಂ ಚತುರ್ವರ್ಗಫಲಪ್ರದಾ || 19 ||

ಕ್ರೀಂ ಹೂಂ ಹ್ರೀಂ ಪಾತು ಸಾ ಗುಲ್ಫಂ ದಕ್ಷಿಣೇ ಕಾಳಿಕೇಽವತು |
ಕ್ರೀಂ ಹೂಂ ಹ್ರೀಂ ಸ್ವಾಹಾ ಪದಂ ಪಾತು ಚತುರ್ದಶಾಕ್ಷರೀ ಮಮ || 20 ||

ಖಡ್ಗಮುಂಡಧರಾ ಕಾಳೀ ವರದಾಭಯಧಾರಿಣೀ |
ವಿದ್ಯಾಭಿಃ ಸಕಲಾಭಿಃ ಸಾ ಸರ್ವಾಂಗಮಭಿತೋಽವತು || 21 ||

ಕಾಳೀ ಕಪಾಲಿನೀ ಕುಲ್ಲಾ ಕುರುಕುಲ್ಲಾ ವಿರೋಧಿನೀ |
ವಿಪ್ರಚಿತ್ತಾ ತಥೋಗ್ರೋಗ್ರಪ್ರಭಾ ದೀಪ್ತಾ ಘನತ್ವಿಷಃ || 22 ||

ನೀಲಾ ಘನಾ ಬಲಾಕಾ ಚ ಮಾತ್ರಾ ಮುದ್ರಾ ಮಿತಾ ಚ ಮಾಂ |
ಏತಾಃ ಸರ್ವಾಃ ಖಡ್ಗಧರಾ ಮುಂಡಮಾಲಾವಿಭೂಷಣಾಃ || 23 ||

ರಕ್ಷಂತು ಮಾಂ ದಿಗ್ವಿದಿಕ್ಷು ಬ್ರಾಹ್ಮೀ ನಾರಾಯಣೀ ತಥಾ |
ಮಾಹೇಶ್ವರೀ ಚ ಚಾಮುಂಡಾ ಕೌಮಾರೀ ಚಾಽಪರಾಜಿತಾ || 24 ||

ವಾರಾಹೀ ನಾರಸಿಂಹೀ ಚ ಸರ್ವಾಶ್ರಯಾತಿಭೂಷಣಾಃ |
ರಕ್ಷಂತು ಸ್ವಾಯುಧೈರ್ದಿಕ್ಷು ದಶಕಂ ಮಾಂ ಯಥಾ ತಥಾ || 25 ||

ಇತಿ ತೇ ಕಥಿತಂ ದಿವ್ಯಂ ಕವಚಂ ಪರಮಾದ್ಭುತಂ |
ಶ್ರೀಜಗನ್ಮಂಗಳಂ ನಾಮ ಮಹಾಮಂತ್ರೌಘವಿಗ್ರಹಂ || 26 ||

ತ್ರೈಲೋಕ್ಯಾಕರ್ಷಣಂ ಬ್ರಹ್ಮಕವಚಂ ಮನ್ಮುಖೋದಿತಂ |
ಗುರುಪೂಜಾಂ ವಿಧಾಯಾಥ ವಿಧಿವತ್ ಪ್ರಪಠೇತ್ತತಃ || 27 ||

ಕವಚಂ ತ್ರಿಃಸಕೃದ್ವಾಪಿ ಯಾವಜ್ಜ್ಞಾನಂ ಚ ವಾ ಪುನಃ |
ಏತಚ್ಛತಾರ್ಧಮಾವೃತ್ಯ ತ್ರೈಲೋಕ್ಯವಿಜಯೀ ಭವೇತ್ || 28 ||

ತ್ರೈಲೋಕ್ಯಂ ಕ್ಷೋಭಯತ್ಯೇವ ಕವಚಸ್ಯ ಪ್ರಸಾದತಃ |
ಮಹಾಕವಿರ್ಭವೇನ್ಮಾಸಾತ್ ಸರ್ವಸಿದ್ಧೀಶ್ವರೋ ಭವೇತ್ || 29 ||

ಪುಷ್ಪಾಂಜಲೀನ್ ಕಾಳಿಕಾಯೈ ಮೂಲೇನೈವ ಪಠೇತ್ ಸಕೃತ್ |
ಶತವರ್ಷಸಹಸ್ರಾಣಾಂ ಪೂಜಾಯಾಃ ಫಲಮಾಪ್ನುಯಾತ್ || 30 ||

ಭೂರ್ಜೇ ವಿಲಿಖಿತಂ ಚೈತತ್ ಸ್ವರ್ಣಸ್ಥಂ ಧಾರಯೇದ್ಯದಿ |
ಶಿಖಾಯಾಂ ದಕ್ಷಿಣೇ ಬಾಹೌ ಕಂಠೇ ವಾ ಧಾರಣಾದ್ಬುಧಃ || 31 ||

ತ್ರೈಲೋಕ್ಯಂ ಮೋಹಯೇತ್ ಕ್ರೋಧಾತ್ ತ್ರೈಲೋಕ್ಯಂ ಚೂರ್ಣಯೇತ್ ಕ್ಷಣಾತ್ |
ಪುತ್ರವಾನ್ ಧನವಾನ್ ಶ್ರೀಮಾನ್ ನಾನಾವಿದ್ಯಾನಿಧಿರ್ಭವೇತ್ || 32 ||

ಬ್ರಹ್ಮಾಸ್ತ್ರಾದೀನಿ ಶಸ್ತ್ರಾಣಿ ತದ್ಗಾತ್ರಸ್ಪರ್ಶನಾತ್ತತಃ |
ನಾಶಮಾಯಾಂತಿ ಸರ್ವತ್ರ ಕವಚಸ್ಯಾಸ್ಯ ಕೀರ್ತನಾತ್ || 33 ||

ಮೃತವತ್ಸಾ ಚ ಯಾ ನಾರೀ ವಂಧ್ಯಾ ವಾ ಮೃತಪುತ್ರಿಣೀ |
ಬಹ್ವಪತ್ಯಾ ಜೀವವತ್ಸಾ ಭವತ್ಯೇವ ನ ಸಂಶಯಃ || 34 ||

ನ ದೇಯಂ ಪರಶಿಷ್ಯೇಭ್ಯೋ ಹ್ಯಭಕ್ತೇಭ್ಯೋ ವಿಶೇಷತಃ |
ಶಿಷ್ಯೇಭ್ಯೋ ಭಕ್ತಿಯುಕ್ತೇಭ್ಯೋ ಹ್ಯನ್ಯಥಾ ಮೃತ್ಯುಮಾಪ್ನುಯಾತ್ || 35 ||

ಸ್ಪರ್ಧಾಮುದ್ಧೂಯ ಕಮಲಾ ವಾಗ್ದೇವೀ ಮಂದಿರೇ ಮುಖೇ |
ಪೌತ್ರಾಂತಂ ಸ್ಥೈರ್ಯಮಾಸ್ಥಾಯ ನಿವಸತ್ಯೇವ ನಿಶ್ಚಿತಂ || 36 ||

ಇದಂ ಕವಚಮಜ್ಞಾತ್ವಾ ಯೋ ಜಪೇದ್ದಕ್ಷಕಾಳಿಕಾಂ |
ಶತಲಕ್ಷಂ ಪ್ರಜಪ್ತ್ವಾಪಿ ತಸ್ಯ ವಿದ್ಯಾ ನ ಸಿದ್ಧ್ಯತಿ || 37 ||

ಸಹಸ್ರಘಾತಮಾಪ್ನೋತಿ ಸೋಽಚಿರಾನ್ಮೃತ್ಯುಮಾಪ್ನುಯಾತ್ |
ಜಪೇದಾದೌ ಜಪೇದಂತೇ ಸಪ್ತವಾರಾಣ್ಯನುಕ್ರಮಾತ್ || 38 ||

ನೋಧೃತ್ಯ ಯತ್ರ ಕುತ್ರಾಪಿ ಗೋಪನೀಯಂ ಪ್ರಯತ್ನತಃ |
ಲಿಖಿತ್ವಾ ಸ್ವರ್ಣಪಾತ್ರೇ ವೈ ಪೂಜಾಕಾಲೇ ತು ಸಾಧಕಃ |
ಮೂರ್ಧ್ನಿಂ ಧಾರ್ಯ ಪ್ರಯತ್ನೇನ ವಿದ್ಯಾರತ್ನಂ ಪ್ರಪೂಜಯೇತ್ || 39 ||

ಇತಿ ಶ್ರೀ ಕಾಳೀ ಜಗನ್ಮಂಗಳ ಕವಚ ಸ್ತೋತ್ರಂ |