ಶ್ರೀ ವೇಂಕಟೇಶ್ವರ ಸುಪ್ರಭಾತಂ

|| ಶ್ರೀಃ ||ಅಥ ಶ್ರೀವೇಂಕಟೇಶಸುಪ್ರಭಾತಂ||

ಕೌಸಲ್ಯಾ ಸುಪ್ರಜಾ ರಾಮ ಪೂರ್ವಾ ಸಂಧ್ಯಾ ಪ್ರವರ್ತತೇ
ಉತ್ತಿಷ್ಠ ನರಶಾರ್ದೂಲ ಕರ್ತವ್ಯಂ ದೈವಮಾಹ್ನಿಕಂ || 1 ||

ಉತ್ತಿಷ್ಠೋತ್ತಿಷ್ಠ ಗೋವಿಂದ ಉತ್ತಿಷ್ಠ ಗರುಡಧ್ವಜ |
ಉತ್ತಿಷ್ಠ ಕಮಲಾಕಾಂತ ತ್ರೈಲೋಕ್ಯಂ ಮಂಗಲಂ ಕುರು || 2 ||

ಮಾತಸ್ಸಮಸ್ತಜಗತಾಂ ಮಧುಕೈಟಭಾರೇಃ
ವಕ್ಷೋವಿಹಾರಿಣಿ ಮನೋಹರದಿವ್ಯಮೂರ್ತೇ |
ಶ್ರೀಸ್ವಾಮಿನಿ ಶ್ರಿತಜನ-ಪ್ರಿಯದಾನಶೀಲೇ
ಶ್ರೀವೇಂಕಟೇಶದಯಿತೇ ತವ ಸುಪ್ರಭಾತಂ || 3 ||

ತವ ಸುಪ್ರಭಾತಮರವಿಂದಲೋಚನೇ ಭವತು ಪ್ರಸನ್ನ-ಮುಖಚಂದ್ರ-ಮಂಡಲೇ |
ವಿಧಿಶಂಕರೇಂದ್ರ-ವನಿತಾಭಿರರ್ಚಿತೇ ವೃಷಶೈಲನಾಥದಯಿತೇ ದಯಾನಿಧೇ || 4 ||

ಅತ್ರ್ಯಾದಿಸಪ್ತಋಷಯಸ್ಸಮುಪಾಸ್ಯ ಸಂಧ್ಯಾ-
-ಮಾಕಾಶಸಿಂಧುಕಮಲಾನಿ ಮನೋಹರಾಣಿ |
ಆದಾಯ ಪಾದಯುಗಮರ್ಚಯಿತುಂ ಪ್ರಪನ್ನಾಃ
ಶೇಷಾದ್ರಿಶೇಖರವಿಭೋ ತವ ಸುಪ್ರಭಾತಂ || 5 ||

ಪಂಚಾನನಾಬ್ಜಭವ-ಷಣ್ಮುಖವಾಸವಾದ್ಯಾಃ
ತ್ರೈವಿಕ್ರಮಾದಿಚರಿತಂ ವಿಬುಧಾಃ ಸ್ತುವಂತಿ |
ಭಾಷಾಪತಿಃ ಪಠತಿ ವಾಸರಶುದ್ಧಿಮಾರಾತ್
ಶೇಷಾದ್ರಿಶೇಖರವಿಭೋ ತವ ಸುಪ್ರಭಾತಂ || 6 ||

ಈಷತ್ಪ್ರಫುಲ್ಲ-ಸರಸೀರುಹ-ನಾರಿಕೇಲ-
-ಪೂಗದ್ರುಮಾದಿ-ಸುಮನೋಹರ-ಪಾಲಿಕಾನಾಂ |
ಆವಾತಿ ಮಂದಮನಿಲಃ ಸಹ ದಿವ್ಯಗಂಧೈಃ
ಶೇಷಾದ್ರಿಶೇಖರವಿಭೋ ತವ ಸುಪ್ರಭಾತಂ || 7 ||

ಉನ್ಮೀಲ್ಯ ನೇತ್ರಯುಗಮುತ್ತಮ-ಪಂಜರಸ್ಥಾಃ
ಪಾತ್ರಾವಶಿಷ್ಟ-ಕದಲೀಫಲ-ಪಾಯಸಾನಿ |
ಭುಕ್ತ್ವಾ ಸಲೀಲಮಥ ಕೇಲಿಶುಕಾಃ ಪಠಂತಿ
ಶೇಷಾದ್ರಿಶೇಖರವಿಭೋ ತವ ಸುಪ್ರಭಾತಂ || 8 ||

ತಂತ್ರೀಪ್ರಕರ್ಷಮಧುರಸ್ವನಯಾ ವಿಪಂಚ್ಯಾ
ಗಾಯತ್ಯನಂತಚರಿತಂ ತವ ನಾರದೋಽಪಿ |
ಭಾಷಾಸಮಗ್ರಮಸಕೃತ್ಕರಚಾರರಮ್ಯಂ
ಶೇಷಾದ್ರಿಶೇಖರವಿಭೋ ತವ ಸುಪ್ರಭಾತಂ || 9 ||

ಭೃಂಗಾವಲೀ ಚ ಮಕರಂದ-ರಸಾನುವಿದ್ಧ-
-ಝಂಕಾರಗೀತ-ನಿನದೈಃ ಸಹ ಸೇವನಾಯ |
ನಿರ್ಯಾತ್ಯುಪಾಂತ-ಸರಸೀ-ಕಮಲೋದರೇಭ್ಯಃ
ಶೇಷಾದ್ರಿಶೇಖರವಿಭೋ ತವ ಸುಪ್ರಭಾತಂ || 10 ||

ಯೋಷಾಗಣೇನ ವರದಧ್ನಿವಿಮಥ್ಯಮಾನೇ
ಘೋಷಾಲಯೇಷು ದಧಿಮಂಥನತೀವ್ರಘೋಷಾಃ |
ರೋಷಾತ್ಕಲಿಂ ವಿದಧತೇ ಕಕುಭಶ್ಚ ಕುಂಭಾಃ
ಶೇಷಾದ್ರಿಶೇಖರವಿಭೋ ತವ ಸುಪ್ರಭಾತಂ || 11 ||

ಪದ್ಮೇಶಮಿತ್ರಶತಪತ್ರ-ಗತಾಲಿವರ್ಗಾಃ
ಹರ್ತುಂ ಶ್ರಿಯಂ ಕುವಲಯಸ್ಯ ನಿಜಾಂಗಲಕ್ಷ್ಮ್ಯಾ |
ಭೇರೀನಿನಾದಮಿವ ಬಿಭ್ರತಿ ತೀವ್ರನಾದಂ
ಶೇಷಾದ್ರಿಶೇಖರವಿಭೋ ತವ ಸುಪ್ರಭಾತಂ || 12 ||

ಶ್ರೀಮನ್ನಭೀಷ್ಟ-ವರದಾಖಿಲಲೋಕ-ಬಂಧೋ
ಶ್ರೀಶ್ರೀನಿವಾಸ-ಜಗದೇಕದಯೈಕಸಿಂಧೋ |
ಶ್ರೀದೇವತಾಗೃಹಭುಜಾಂತರ-ದಿವ್ಯಮೂರ್ತೇ
ಶ್ರೀವೇಂಕಟಾಚಲಪತೇ ತವ ಸುಪ್ರಭಾತಂ || 13 ||

ಶ್ರೀಸ್ವಾಮಿಪುಷ್ಕರಿಣಿಕಾಪ್ಲವನಿರ್ಮಲಾಂಗಾಃ
ಶ್ರೇಯೋಽರ್ಥಿನೋ ಹರ-ವಿರಿಂಚಿ-ಸನಂದನಾದ್ಯಾಃ |
ದ್ವಾರೇ ವಸಂತಿ ವರವೇತ್ರ-ಹತೋತ್ತಮಾಂಗಾಃ
ಶ್ರೀವೇಂಕಟಾಚಲಪತೇ ತವ ಸುಪ್ರಭಾತಂ || 14 ||

ಶ್ರೀಶೇಷಶೈಲ-ಗರುಡಾಚಲ-ವೇಂಕಟಾದ್ರಿ-
-ನಾರಾಯಣಾದ್ರಿ-ವೃಷಭಾದ್ರಿ-ವೃಷಾದ್ರಿ-ಮುಖ್ಯಾಂ |
ಆಖ್ಯಾಂ ತ್ವದೀಯ ವಸತೇರನಿಶಂ ವದಂತಿ
ಶ್ರೀವೇಂಕಟಾಚಲಪತೇ ತವ ಸುಪ್ರಭಾತಂ || 15 ||

ಸೇವಾಪರಾಃ ಶಿವಸುರೇಶ-ಕೃಶಾನುಧರ್ಮ-
-ರಕ್ಷೋಂಬುನಾಥ-ಪವಮಾನ-ಧನಾಧಿನಾಥಾಃ |
ಬದ್ಧಾಂಜಲಿ-ಪ್ರವಿಲಸನ್ನಿಜ-ಶೀರ್ಷದೇಶಾಃ
ಶ್ರೀವೇಂಕಟಾಚಲಪತೇ ತವ ಸುಪ್ರಭಾತಂ || 16 ||

ಧಾಟೀಷು ತೇ ವಿಹಗರಾಜ-ಮೃಗಾಧಿರಾಜ-
-ನಾಗಾಧಿರಾಜ-ಗಜರಾಜ-ಹಯಾಧಿರಾಜಾಃ |
ಸ್ವಸ್ವಾಧಿಕಾರ-ಮಹಿಮಾಧಿಕಮರ್ಥಯಂತೇ
ಶ್ರೀವೇಂಕಟಾಚಲಪತೇ ತವ ಸುಪ್ರಭಾತಂ || 17 ||

ಸೂರ್ಯೇಂದುಭೌಮ-ಬುಧವಾಕ್ಪತಿ-ಕಾವ್ಯಸೌರಿ-
-ಸ್ವರ್ಭಾನುಕೇತುದಿವಿಷತ್ಪರಿಷತ್ಪ್ರಧಾನಾಃ |
ತ್ವದ್ದಾಸದಾಸಚರಮಾವಧಿ-ದಾಸದಾಸಾಃ
ಶ್ರೀವೇಂಕಟಾಚಲಪತೇ ತವ ಸುಪ್ರಭಾತಂ || 18 ||

ತ್ವತ್ಪಾದ-ಧೂಲಿಭರಿತ-ಸ್ಫುರಿತೋತ್ತಮಾಂಗಾಃ
ಸ್ವರ್ಗಾಪವರ್ಗ-ನಿರಪೇಕ್ಷ-ನಿಜಾಂತರಂಗಾಃ |
ಕಲ್ಪಾಗಮಾಕಲನಯಾಕುಲತಾಂ ಲಭಂತೇ
ಶ್ರೀವೇಂಕಟಾಚಲಪತೇ ತವ ಸುಪ್ರಭಾತಂ || 19 ||

ತ್ವದ್ಗೋಪುರಾಗ್ರಶಿಖರಾಣಿ ನಿರೀಕ್ಷಮಾಣಾಃ
ಸ್ವರ್ಗಾಪವರ್ಗಪದವೀಂ ಪರಮಾಂ ಶ್ರಯಂತಃ |
ಮರ್ತ್ಯಾ ಮನುಷ್ಯಭುವನೇ ಮತಿಮಾಶ್ರಯಂತೇ
ಶ್ರೀವೇಂಕಟಾಚಲಪತೇ ತವ ಸುಪ್ರಭಾತಂ || 20 ||

ಶ್ರೀಭೂಮಿನಾಯಕ ದಯಾದಿಗುಣಾಮೃತಾಬ್ಧೇ
ದೇವಾಧಿದೇವ ಜಗದೇಕಶರಣ್ಯಮೂರ್ತೇ |
ಶ್ರೀಮನ್ನನಂತ ಗರುಡಾದಿಭಿರರ್ಚಿತಾಂಘ್ರೇ
ಶ್ರೀವೇಂಕಟಾಚಲಪತೇ ತವ ಸುಪ್ರಭಾತಂ || 21 ||

ಶ್ರೀಪದ್ಮನಾಭ ಪುರುಷೋತ್ತಮ ವಾಸುದೇವ
ವೈಕುಂಠ ಮಾಧವ ಜನಾರ್ದನ ಚಕ್ರಪಾಣೇ |
ಶ್ರೀವತ್ಸಚಿಹ್ನ ಶರಣಾಗತಪಾರಿಜಾತ
ಶ್ರೀವೇಂಕಟಾಚಲಪತೇ ತವ ಸುಪ್ರಭಾತಂ || 22 ||

ಕಂದರ್ಪದರ್ಪ ಹರಸುಂದರ ದಿವ್ಯಮೂರ್ತೇ
ಕಾಂತಾಕುಚಾಂಬುರುಹ ಕುಟ್ಮಲ ಲೋಲದೃಷ್ಟೇ |
ಕಲ್ಯಾಣನಿರ್ಮಲಗುಣಾಕರ ದಿವ್ಯಕೀರ್ತೇ
ಶ್ರೀವೇಂಕಟಾಚಲಪತೇ ತವ ಸುಪ್ರಭಾತಂ || 23 ||

ಮೀನಾಕೃತೇ ಕಮಠ ಕೋಲ ನೃಸಿಂಹ ವರ್ಣಿನ್
ಸ್ವಾಮಿನ್ ಪರಶ್ವಧತಪೋಧನ ರಾಮಚಂದ್ರ |
ಶೇಷಾಂಶರಾಮ ಯದುನಂದನ ಕಲ್ಕಿರೂಪ
ಶ್ರೀವೇಂಕಟಾಚಲಪತೇ ತವ ಸುಪ್ರಭಾತಂ || 24 ||

ಏಲಾ ಲವಂಗ ಘನಸಾರ ಸುಗಂಧಿ ತೀರ್ಥಂ
ದಿವ್ಯಂ ವಿಯತ್ಸರಿತಿ ಹೇಮಘಟೇಷು ಪೂರ್ಣಂ |
ಧೃತ್ವಾಽಽದ್ಯ ವೈದಿಕ ಶಿಖಾಮಣಯಃ ಪ್ರಹೃಷ್ಟಾಃ
ತಿಷ್ಠಂತಿ ವೇಂಕಟಪತೇ ತವ ಸುಪ್ರಭಾತಂ || 25 ||

ಭಾಸ್ವಾನುದೇತಿ ವಿಕಚಾನಿ ಸರೋರುಹಾಣಿ
ಸಂಪೂರಯಂತಿ ನಿನದೈಃ ಕಕುಭೋ ವಿಹಂಗಾಃ |
ಶ್ರೀವೈಷ್ಣವಾಸ್ಸತತಮರ್ಥಿತ ಮಂಗಲಾಸ್ತೇ
ಧಾಮಾಽಽಶ್ರಯಂತಿ ತವ ವೇಂಕಟ ಸುಪ್ರಭಾತಂ || 26 ||

ಬ್ರಹ್ಮಾದಯಃ ಸುರವರಾಸ್ಸಮಹರ್ಷಯಸ್ತೇ
ಸಂತಸ್ಸನಂದನ ಮುಖಾಸ್ತ್ವಥ ಯೋಗಿವರ್ಯಾಃ |
ಧಾಮಾಂತಿಕೇ ತವ ಹಿ ಮಂಗಲವಸ್ತು ಹಸ್ತಾಃ
ಶ್ರೀವೇಂಕಟಾಚಲಪತೇ ತವ ಸುಪ್ರಭಾತಂ || 27 ||

ಲಕ್ಷ್ಮೀನಿವಾಸ ನಿರವದ್ಯಗುಣೈಕಸಿಂಧೋ
ಸಂಸಾರ ಸಾಗರ ಸಮುತ್ತರಣೈಕಸೇತೋ |
ವೇದಾಂತವೇದ್ಯನಿಜವೈಭವ ಭಕ್ತಭೋಗ್ಯ
ಶ್ರೀವೇಂಕಟಾಚಲಪತೇ ತವ ಸುಪ್ರಭಾತಂ || 28 ||

ಇತ್ಥಂ ವೃಷಾಚಲಪತೇರಿಹ ಸುಪ್ರಭಾತಂ
ಯೇ ಮಾನವಾಃ ಪ್ರತಿದಿನಂ ಪಠಿತುಂ ಪ್ರವೃತ್ತಾಃ |
ತೇಷಾಂ ಪ್ರಭಾತಸಮಯೇ ಸ್ಮೃತಿರಂಗಭಾಜಾಂ
ಪ್ರಜ್ಞಾಂ ಪರಾರ್ಥಸುಲಭಾಂ ಪರಮಾಂ ಪ್ರಸೂತೇ || 29 ||ಇತಿ ಶ್ರೀವೇಂಕಟೇಶ-ಸುಪ್ರಭಾತಂ||