ಶ್ರೀ ವೈಕುಂಠ ಗದ್ಯಂ

ಶ್ರೀ ವೈಕುಂಠ ಗದ್ಯಂ

ಯಾಮುನಾರ್ಯಸುಧಾಂಭೋಧಿಮವಗಾಹ್ಯ ಯಥಾಮತಿ |
ಆದಾಯ ಭಕ್ತಿಯೋಗಾಖ್ಯಂ ರತ್ನಂ ಸಂದರ್ಶಯಾಮ್ಯಹಂ ||

ಸ್ವಾಧೀನ ತ್ರಿವಿಧಚೇತನಾಚೇತನಸ್ವರೂಪಸ್ಥಿತಿ ಪ್ರವೃತ್ತಿಭೇದಂ, ಕ್ಲೇಶ ಕರ್ಮಾದ್ಯಶೇಷದೋಷಾಸಂಸ್ಪೃಷ್ಟಂ, ಸ್ವಾಭಾವಿಕಾನವಧಿಕಾತಿಶಯ ಜ್ಞಾನಬಲೈಶ್ವರ್ಯವೀರ್ಯಶಕ್ತಿತೇಜಃ ಪ್ರಭೃತ್ಯಸಂಖ್ಯೇಯ ಕಲ್ಯಾಣಗುಣಗಣೌಘ ಮಹಾರ್ಣವಂ, ಪರಮಪುರುಷಂ, ಭಗವಂತಂ, ನಾರಾಯಣಂ, ಸ್ವಾಮಿತ್ವೇನ ಸುಹೃತ್ವೇನ ಗುರುತ್ವೇನ ಚ ಪರಿಗೃಹ್ಯ ಐಕಾಂತಿಕಾತ್ಯಂತಿಕ ತತ್ಪಾದಾಂಬುಜದ್ವಯ ಪರಿಚರ್ಯೈಕಮನೋರಥಃ, ತತ್ಪ್ರಾಪ್ತಯೇ ಚ ತತ್ಪಾದಾಂಬುಜದ್ವಯ ಪ್ರಪತ್ತೇರನ್ಯನ್ನ ಮೇ ಕಲ್ಪಕೋಟಿಸಹಸ್ರೇಣಾಪಿ ಸಾಧನಮಸ್ತೀತಿ ಮನ್ವಾನಃ, ತಸ್ಯೈವ ಭಗವತೋ ನಾರಾಯಣಸ್ಯ ಅಖಿಲಸತ್ತ್ವದಯೈಕಸಾಗರಸ್ಯ ಅನಾಲೋಚಿತ ಗುಣಗುಣಾಖಂಡ ಜನಾನುಕೂಲಾಮರ್ಯಾದ ಶೀಲವತಃ, ಸ್ವಾಭಾವಿಕಾನವಧಿಕಾತಿಶಯ ಗುಣವತ್ತಯಾ ದೇವತಿರ್ಯಙ್ಮನುಷ್ಯಾದ್ಯಖಿಲಜನ ಹೃದಯಾನಂದನಸ್ಯ ಆಶ್ರಿತವಾತ್ಸಲ್ಯೈಕಜಲಧೇಃ ಭಕ್ತಜನಸಂಶ್ಲೇಷೈಕಭೋಗಸ್ಯ ನಿತ್ಯಜ್ಞಾನಕ್ರಿಯೈಶ್ವರ್ಯಾದಿ ಭೋಗಸಾಮಗ್ರೀಸಮೃದ್ಧಸ್ಯ, ಮಹಾವಿಭೂತೇಃ, ಶ್ರೀಮಚ್ಚರಣಾರವಿಂದಯುಗಳಂ ಅನನ್ಯಾತ್ಮಸಂಜೀವನೇನ ತದ್ಗತಸರ್ವಭಾವೇನ ಶರಣಮನುವ್ರಜೇತ್ | ತತಶ್ಚ ಪ್ರತ್ಯಹಮಾತ್ಮೋಜ್ಜೀವನಾಯೈವಮನುಸ್ಮರೇತ್ | ಚತುರ್ದಶಭುವನಾತ್ಮಕಂ ಅಂಡಂ, ದಶಗುಣಿತೋತ್ತರಂ ಚ ಆವರಣಸಪ್ತಕಂ, ಸಮಸ್ತಂ ಕಾರ್ಯಕಾರಣ(ಜಾತ)ಮತೀತ್ಯ, ವರ್ತಮಾನೇ ಪರಮವ್ಯೋಮಶಬ್ದಾಭಿಧೇಯೇ, ಬ್ರಹ್ಮಾದೀನಾಂ ವಾಙ್ಮನಸಾಽಗೋಚರೇ, ಶ್ರೀಮತಿ ವೈಕುಂಠೇ ದಿವ್ಯಲೋಕೇ, ಸನಕವಿಧಿಶಿವಾದಿಭಿರಪಿ ಅಚಿಂತ್ಯಸ್ವಭಾವೈಶ್ವರ್ಯೈಃ, ನಿತ್ಯಸಿದ್ಧೈರನಂತೈರ್ಭಗವದಾನುಕೂಲ್ಯೈಕ ಭೋಗೈರ್ದಿವ್ಯಪುರುಷೈಃ ಮಹಾತ್ಮಭಿಃ ಆಪೂರಿತೇ, ತೇಷಾಮಪಿ ಇಯತ್ಪರಿಮಾಣಂ, ಇಯದೈಶ್ವರ್ಯಂ, ಈದೃಶಸ್ವಭಾವಮಿತಿ ಪರಿಚ್ಛೇತ್ತುಮಯೋಗ್ಯೇ, ದಿವ್ಯಾವರಣಶತಸಹಸ್ರಾವೃತೇ, ದಿವ್ಯಕಲ್ಪಕತರೂಪಶೋಭಿತೇ, ದಿವ್ಯೋದ್ಯಾನ ಶತಸಹಸ್ರಕೋಟಿಭಿರಾವೃತೇ, ಅತಿಪ್ರಮಾಣೇ ದಿವ್ಯಾಯತನೇ, ಕಸ್ಮಿಂಶ್ಚಿದ್ವಿಚಿತ್ರ ದಿವ್ಯರತ್ನಮಯ ದಿವ್ಯಾಸ್ಥಾನಮಂಡಪೇ, ದಿವ್ಯರತ್ನಸ್ತಂಭ ಶತಸಹಸ್ರಕೋಟಿಭಿರುಪಶೋಭಿತೇ,
ದಿವ್ಯನಾನಾರತ್ನಕೃತಸ್ಥಲ ವಿಚಿತ್ರಿತೇ, ದಿವ್ಯಾಲಂಕಾರಾಲಂಕೃತೇ, ಪರಿತಃ ಪತಿತೈಃ ಪತಮಾನೈಃ ಪಾದಪಸ್ಥೈಶ್ಚ ನಾನಾಗಂಧವರ್ಣೈರ್ದಿವ್ಯಪುಷ್ಪೈಃ ಶೋಭಮಾನೈರ್ದಿವ್ಯಪುಷ್ಪೋಪವನೈರುಪಶೋಭಿತೇ, ಸಂಕೀರ್ಣಪಾರಿಜಾತಾದಿ ಕಲ್ಪದ್ರುಮೋಪಶೋಭಿತೈಃ, ಅಸಂಕೀರ್ಣೈಶ್ಚ ಕೈಶ್ಚಿದಂತಸ್ಸ್ಥಪುಷ್ಪರತ್ನಾದಿನಿರ್ಮಿತ ದಿವ್ಯಲೀಲಾಮಂಡಪ ಶತಸಹಸ್ರೋಪಶೋಭಿತೈಃ, ಸರ್ವದಾಽನುಭೂಯಮಾನೈರಪ್ಯಪೂರ್ವವದಾಶ್ಚರ್ಯಮಾವಹದ್ಭಿಃ ಕ್ರೀಡಾಶೈಲ ಶತಸಹಸ್ರೈರಲಂಕೃತೈಃ, ಕೈಶ್ಚಿನ್ನಾರಾಯಣದಿವ್ಯಲೀಲಾಽಸಾಧಾರಣೈಃ, ಕೈಶ್ಚಿತ್ಪದ್ಮವನಾಲಯಾ ದಿವ್ಯಲೀಲಾಽಸಾಧಾರಣೈಃ, ಸಾಧಾರಣೈಶ್ಚ ಕೈಶ್ಚಿತ್ ಶುಕಶಾರಿಕಾಮಯೂರಕೋಕಿಲಾದಿಭಿಃ ಕೋಮಲಕೂಜಿತೈರಾಕುಲೈಃ, ದಿವ್ಯೋದ್ಯಾನ ಶತಸಹಸ್ರೈರಾವೃತೇ, ಮಣಿಮುಕ್ತಾಪ್ರವಾಲ ಕೃತಸೋಪಾನೈಃ, ದಿವ್ಯಾಮಲಾಮೃತರಸೋದಕೈಃ, ದಿವ್ಯಾಂಡಜವರೈಃ, ಅತಿರಮಣೀಯದರ್ಶನೈಃ ಅತಿಮನೋಹರಮಧುರಸ್ವರೈಃ ಆಕುಲೈಃ, ಅಂತಸ್ಥ ಮುಕ್ತಾಮಯ ದಿವ್ಯಕ್ರೀಡಾಸ್ಥಾನೋಪಶೋಭಿತೈಃ ದಿವ್ಯಸೌಗಂಧಿಕವಾಪೀಶತಸಹಸ್ರೈಃ, ದಿವ್ಯರಾಜಹಂಸಾವಳೀವಿರಾಜಿತೈರಾವೃತೇ, ನಿರಸ್ತಾತಿಶಯಾನಂದೈಕರಸತಯಾ ಚಾನಂತ್ಯಾಚ್ಚ ಪ್ರವಿಷ್ಟಾನುನ್ಮಾದಯದ್ಭಿಃ ಕ್ರೀಡೋದ್ದೇಶೈರ್ವಿರಾಜಿತೇ, ತತ್ರ ತತ್ರ ಕೃತ ದಿವ್ಯಪುಷ್ಪಪರ್ಯಂಕೋಪಶೋಭಿತೇ, ನಾನಾಪುಷ್ಪಾಸವಾಸ್ವಾದ ಮತ್ತಭೃಂಗಾವಲೀಭಿಃ ಉದ್ಗೀಯಮಾನ ದಿವ್ಯಗಾಂಧರ್ವೇಣಾಪೂರಿತೇ, ಚಂದನಾಗರುಕರ್ಪೂರ ದಿವ್ಯಪುಷ್ಪಾವಗಾಹಿ ಮಂದಾನಿಲಾಸೇವ್ಯಮಾನೇ, ಮಧ್ಯೇ ಪುಷ್ಪಸಂಚಯ ವಿಚಿತ್ರಿತೇ, ಮಹತಿ ದಿವ್ಯಯೋಗಪರ್ಯಂಕೇ ಅನಂತಭೋಗಿನಿ, ಶ್ರೀಮದ್ವೈಕುಂಠೈಶ್ವರ್ಯಾದಿ ದಿವ್ಯಲೋಕಂ ಆತ್ಮಕಾಂತ್ಯಾ ವಿಶ್ವಮಾಪ್ಯಾಯಯಂತ್ಯಾ ಶೇಷ ಶೇಷಾಶನಾದಿ ಸರ್ವಪರಿಜನಂ ಭಗವತಸ್ತತ್ತದವಸ್ಥೋಚಿತ ಪರಿಚರ್ಯಾಯಾಂ ಆಜ್ಞಾಪಯಂತ್ಯಾ, ಶೀಲರೂಪಗುಣ ವಿಲಾಸಾದಿಭಿಃ ಆತ್ಮಾನುರೂಪಯಾ ಶ್ರಿಯಾ ಸಹಾಸೀನಂ, ಪ್ರತ್ಯಗ್ರೋನ್ಮೀಲಿತ ಸರಸಿಜಸದೃಶ ನಯನಯುಗಳಂ, ಸ್ವಚ್ಛನೀಲಜೀಮೂತಸಂಕಾಶಂ, ಅತ್ಯುಜ್ಜ್ವಲಪೀತವಾಸಸಂ, ಸ್ವಯಾ ಪ್ರಭಯಾಽತಿನಿರ್ಮಲಯಾ ಅತಿಶೀತಲಯಾ ಅತಿಕೋಮಲಯಾ ಸ್ವಚ್ಛಮಾಣಿಕ್ಯಾಭಯಾ ಕೃತ್ಸ್ನಂ ಜಗದ್ಭಾಸಯಂತಂ,
ಅಚಿಂತ್ಯದಿವ್ಯಾದ್ಭುತ ನಿತ್ಯಯೌವನ ಸ್ವಭಾವಲಾವಣ್ಯಮಯಾಮೃತಸಾಗರಂ, ಅತಿಸೌಕುಮಾರ್ಯಾದಿ ಈಷತ್ ಪ್ರಸ್ವಿನ್ನವದಾಲಕ್ಷ್ಯಮಾಣ ಲಲಾಟಫಲಕ ದಿವ್ಯಾಲಕಾವಲೀವಿರಾಜಿತಂ, ಪ್ರಬುದ್ಧಮುಗ್ಧಾಂಬುಜ ಚಾರುಲೋಚನಂ, ಸವಿಭ್ರಮಭ್ರೂಲತಂ, ಉಜ್ಜ್ವಲಾಧರಂ, ಶುಚಿಸ್ಮಿತಂ, ಕೋಮಲಗಂಡಂ, ಉನ್ನಸಂ, ಉದಗ್ರಪೀನಾಂಸ ವಿಲಂಬಿಕುಂಡಲಾಲಕಾವಲೀ ಬಂಧುರ ಕಂಬುಕಂಧರಂ, ಪ್ರಿಯಾವತಂಸೋತ್ಪಲ ಕರ್ಣಭೂಷಣಶ್ಲಥಾಲಕಾಬಂಧ ವಿಮರ್ದಶಂಸಿಭಿಃ ಚತುರ್ಭಿರಾಜಾನುವಿಲಂಬಿಭಿರ್ಭುಜೈರ್ವಿರಾಜಿತಂ, ಅತಿಕೋಮಲ ದಿವ್ಯರೇಖಾಲಂಕೃತಾತಾಮ್ರಕರತಲಂ, ದಿವ್ಯಾಂಗುಳೀಯಕವಿರಾಜಿತಂ, ಅತಿಕೋಮಲ ದಿವ್ಯನಖಾವಳೀವಿರಾಜಿತಂ, ಅತಿರಕ್ತಾಂಗುಲೀಭಿರಲಂಕೃತಂ, ತತ್ಕ್ಷಣೋನ್ಮೀಲಿತ ಪುಂಡರೀಕ ಸದೃಶಚರಣಯುಗಳಂ, ಅತಿಮನೋಹರ ಕಿರೀಟಮಕುಟ ಚೂಡಾವತಂಸ ಮಕರಕುಂಡಲ ಗ್ರೈವೇಯಕ ಹಾರ ಕೇಯೂರ ಕಟಕ ಶ್ರೀವತ್ಸ ಕೌಸ್ತುಭ ಮುಕ್ತಾದಾಮೋದರಬಂಧನ ಪೀತಾಂಬರ ಕಾಂಚೀಗುಣ ನೂಪುರಾದಿಭಿರತ್ಯಂತ ಸುಖಸ್ಪರ್ಶೈಃ ದಿವ್ಯಗಂಧೈರ್ಭೂಷಣೈರ್ಭೂಷಿತಂ, ಶ್ರೀಮತ್ಯಾ ವೈಜಯಂತ್ಯಾ ವನಮಾಲಯಾ ವಿರಾಜಿತಂ, ಶಂಖಚಕ್ರಗದಾಽಸಿ ಶಾರ್ಙ್ಗಾದಿ ದಿವ್ಯಾಯುಧೈಃ ಸೇವ್ಯಮಾನಂ, ಸ್ವಸಂಕಲ್ಪಮಾತ್ರಾವಕ್ಲುಪ್ತ ಜಗಜ್ಜನ್ಮಸ್ಥಿತಿಧ್ವಂಸಾದಿಕೇ ಶ್ರೀಮತಿ ವಿಷ್ವಕ್ಸೇನೇ ನ್ಯಸ್ತ ಸಮಸ್ತಾತ್ಮೈಶ್ವರ್ಯಂ, ವೈನತೇಯಾದಿಭಿಃ ಸ್ವಭಾವತೋ ನಿರಸ್ತ ಸಮಸ್ತ ಸಾಂಸಾರಿಕ ಸ್ವಭಾವೈಃ ಭಗವತ್ಪರಿಚರ್ಯಾಕರಣ ಯೋಗ್ಯೈರ್ಭಗವತ್ಪರಿಚರ್ಯೈಕಭೋಗೈ-ರ್ನಿತ್ಯಸಿದ್ಧೈರನಂತೈಃ ಯಥಾ ಯೋಗಂ ಸೇವ್ಯಮಾನಂ, ಆತ್ಮಭೋಗೇನ ಅನನುಸಂಹಿತಪರಾದಿಕಾಲ ದಿವ್ಯಾಮಲ ಕೋಮಲಾವಲೋಕನೇನ ವಿಶ್ವಮಾಹ್ಲಾದಯಂತಂ, ಈಷದುನ್ಮೀಲಿತ ಮುಖಾಂಬುಜೋದರವಿನಿರ್ಗತೇನ ದಿವ್ಯಾನನಾರವಿಂದ ಶೋಭಾಜನನೇನ ದಿವ್ಯಗಾಂಭೀರ್ಯೌದಾರ್ಯ ಸೌಂದರ್ಯ ಮಾಧುರ್ಯಾದ್ಯನವಧಿಕ ಗುಣಗಣವಿಭೂಷಿತೇನ, ಅತಿಮನೋಹರ ದಿವ್ಯಭಾವಗರ್ಭೇಣ ದಿವ್ಯಲೀಲಾಽಽಲಾಪಾಮೃತೇನ ಅಖಿಲಜನ ಹೃದಯಾಂತರಾಣ್ಯಾಪೂರಯಂತಂ ಭಗವಂತಂ ನಾರಾಯಣಂ ಧ್ಯಾನಯೋಗೇನ ದೃಷ್ಟ್ವಾ, ತತೋ ಭಗವತೋ ನಿತ್ಯಸ್ವಾಮ್ಯಮಾತ್ಮನೋ ನಿತ್ಯದಾಸ್ಯಂ ಚ ಯಥಾವಸ್ಥಿತಮನುಸಂಧಾಯ, ಕದಾಽಹಂ ಭಗವಂತಂ ನಾರಾಯಣಂ, ಮಮ ಕುಲನಾಥಂ, ಮಮ ಕುಲದೈವತಂ, ಮಮ ಕುಲಧನಂ, ಮಮ ಭೋಗ್ಯಂ, ಮಮ ಮಾತರಂ, ಮಮ ಪಿತರಂ, ಮಮ ಸರ್ವಂ ಸಾಕ್ಷಾತ್ಕರವಾಣಿ ಚಕ್ಷುಷಾ |
ಕದಾಽಹಂ ಭಗವತ್ಪಾದಾಂಬುಜದ್ವಯಂ ಶಿರಸಾ ಸಂಗ್ರಹೀಷ್ಯಾಮಿ | ಕದಾಽಹಂ ಭಗವತ್ಪಾದಾಂಬುಜದ್ವಯ ಪರಿಚರ್ಯಾಽಽಶಯಾ ನಿರಸ್ತಸಮಸ್ತೇತರ ಭೋಗಾಶಃ, ಅಪಗತ ಸಮಸ್ತ ಸಾಂಸಾರಿಕಸ್ವಭಾವಃ ತತ್ಪಾದಾಂಬುಜದ್ವಯಂ ಪ್ರವೇಕ್ಷ್ಯಾಮಿ | ಕದಾಽಹಂ ಭಗವತ್ಪಾದಾಂಬುಜದ್ವಯ ಪರಿಚರ್ಯಾಕರಣಯೋಗ್ಯ-ಸ್ತದೇಕಭೋಗಸ್ತತ್ಪಾದೌ ಪರಿಚರಿಷ್ಯಾಮಿ | ಕದಾ ಮಾಂ ಭಗವಾನ್ ಸ್ವಕೀಯಯಾ ಅತಿಶೀತಲಯಾ ದೃಶಾ ಅವಲೋಕ್ಯ, ಸ್ನಿಗ್ಧಗಂಭೀರಮಧುರಯಾ ಗಿರಾ ಪರಿಚರ್ಯಾಯಾಂ ಆಜ್ಞಾಪಯಿಷ್ಯತಿ, ಇತಿ ಭಗವತ್ಪರಿಚರ್ಯಾಯಾಮಾಶಾಂ ವರ್ಧಯಿತ್ವಾ ತಯೈವಾಽಶಯಾ ತತ್ಪ್ರಸಾದೋಪಬೃಂಹಿತಯಾ ಭಗವಂತಮುಪೇತ್ಯ, ದೂರಾದೇವ ಭಗವಂತಂ ಶೇಷಭೋಗೇ ಶ್ರಿಯಾ ಸಹಾಸೀನಂ ವೈನತೇಯಾದಿಭಿಃ ಸೇವ್ಯಮಾನಂ, ಸಮಸ್ತಪರಿವಾರಾಯ ಶ್ರೀಮತೇ ನಾರಾಯಣಾಯ ನಮಃ, ಇತಿ ಪ್ರಣಮ್ಯ ಉತ್ಥಾಯೋತ್ಥಾಯ ಪುನಃ ಪುನಃ ಪ್ರಣಮ್ಯ ಅತ್ಯಂತ ಸಾಧ್ವಸವಿನಯಾವನತೋ ಭೂತ್ವಾ, ಭಗವತ್ಪಾರಿಷದಗಣನಾಯಕೈರ್ದ್ವಾರಪಾಲೈಃ ಕೃಪಯಾ ಸ್ನೇಹಗರ್ಭಯಾ ದೃಶಾಽವಲೋಕಿತಃ ಸಮ್ಯಗಭಿವಂದಿತೈಸ್ತೈಸ್ತೈರೇವಾನುಮತೋ ಭಗವಂತಮುಪೇತ್ಯ, ಶ್ರೀಮತಾ ಮೂಲಮಂತ್ರೇಣ ಮಾಮೈಕಾಂತಿಕಾತ್ಯಂತಿಕ ಪರಿಚರ್ಯಾಕರಣಾಯ ಪರಿಗೃಹ್ಣೀಷ್ವ ಇತಿ ಯಾಚಮಾನಃ ಪ್ರಣಮ್ಯಾತ್ಮಾನಂ ಭಗವತೇ ನಿವೇದಯೇತ್ |
ತತೋ ಭಗವತಾ ಸ್ವಯಮೇವಾತ್ಮಸಂಜೀವನೇನ ಅಮರ್ಯಾದಶೀಲವತಾ ಅತಿಪ್ರೇಮಾನ್ವಿತೇನ ಅವಲೋಕನೇನಾವಲೋಕ್ಯ ಸರ್ವದೇಶ ಸರ್ವಕಾಲ ಸರ್ವಾವಸ್ಥೋಚಿತಾತ್ಯಂತಶೇಷಭಾವಾಯ ಸ್ವೀಕೃತೋಽನುಜ್ಞಾತಶ್ಚ ಅತ್ಯಂತಸಾಧ್ವಸವಿನಯಾವನತಃ ಕಿಂಕುರ್ವಾಣಃ ಕೃತಾಂಜಲಿಪುಟೋ ಭಗವಂತಮುಪಾಸೀತ | ತತಶ್ಚಾನುಭೂಯಮಾನ ಭಾವವಿಶೇಷಃ ನಿರತಿಶಯಪ್ರೀತ್ಯಾಽನ್ಯತ್ಕಿಂಚಿತ್ಕರ್ತುಂ ದ್ರಷ್ಟುಂ ಸ್ಮರ್ತುಮಶಕ್ತಃ ಪುನರಪಿ ಶೇಷಭಾವಮೇವ ಯಾಚಮಾನೋ ಭಗವಂತಮೇವಾವಿಚ್ಛಿನ್ನಸ್ರೋತೋರೂಪೇಣಾವಲೋಕನೇನ ಅವಲೋಕಯನ್ನಾಸೀತ | ತತೋ ಭಗವತಾ ಸ್ವಯಮೇವಾತ್ಮಸಂಜೀವನೇನಾವಲೋಕನೇನಾವಲೋಕ್ಯ ಸಸ್ಮಿತಮಾಹೂಯ ಸಮಸ್ತಕ್ಲೇಶಾಪಹಂ ನಿರತಿಶಯಸುಖಾವಹಮಾತ್ಮೀಯಂ, ಶ್ರೀಮತ್ಪಾದಾರವಿಂದಯುಗಳಂ ಶಿರಸಿ ಕೃತಂ ಧ್ಯಾತ್ವಾ, ಅಮೃತಸಾಗರಾಂತರ್ನಿಮಗ್ನಸರ್ವಾವಯವಃ ಸುಖಮಾಸೀತ |

ಲಕ್ಷ್ಮೀಪತೇರ್ಯತಿಪತೇಶ್ಚ ದಯೈಕಧಾಮ್ನೋಃ
ಯೋಽಸೌ ಪುರಾ ಸಮಜನಿಷ್ಟ ಜಗದ್ಧಿತಾರ್ಥಂ |
ಪ್ರಾಪ್ಯಂ ಪ್ರಕಾಶಯತು ನಃ ಪರಮಂ ರಹಸ್ಯಂ
ಸಂವಾದ ಏಷ ಶರಣಾಗತಿ ಮಂತ್ರಸಾರಃ ||

ಇತಿ ಶ್ರೀಭಗವದ್ರಾಮಾನುಜವಿರಚಿತೇ ಶ್ರೀವೈಕುಂಠಗದ್ಯಂ |