ಶ್ರೀ ಶಿವ ಮಾನಸಿಕ ಪೂಜಾ ಸ್ತೋತ್ರಂ

ಶ್ರೀ ಶಿವ ಮಾನಸಿಕ ಪೂಜಾ ಸ್ತೋತ್ರಂ

ಅನುಚಿತಮನುಲಪಿತಂ ಮೇ ತ್ವಯಿ ಶಂಭೋ ಶಿವ ತದಾಗಸಶ್ಶಾಂತ್ಯೈ |
ಅರ್ಚಾಂ ಕಥಮಪಿ ವಿಹಿತಾಮಂಗೀಕುರು ಸರ್ವಮಂಗಲೋಪೇತ || 1 ||

ಧ್ಯಾಯಾಮಿ ಕಥಮಿವ ತ್ವಾಂ ಧೀವರ್ತ್ಮವಿದೂರ ದಿವ್ಯಮಹಿಮಾನಂ |
ಆವಾಹನಂ ವಿಭೋಸ್ತೇ ದೇವಾಗ್ರ್ಯ ಭವೇತ್ಪ್ರಭೋ ಕುತಃ ಸ್ಥಾನಾತ್ || 2 ||

ಕಿಯದಾಸನಂ ಪ್ರಕಲ್ಪ್ಯಂ ಕೃತಾಸನಸ್ಯೇಹ ಸರ್ವತೋಽಪಿ ಸಹ |
ಪಾದ್ಯಂ ಕುತೋಽರ್ಘ್ಯಮಪಿ ವಾ ಪಾದ್ಯಂ ಸರ್ವತ್ರಪಾಣಿಪಾದಸ್ಯ || 3 ||

ಆಚಮನಂ ತೇ ಸ್ಯಾದಧಿಭಗವನ್ ತೇ ಸರ್ವತೋಮುಖಸ್ಯ ಕಥಂ |
ಮಧುಪರ್ಕೋ ವಾ ಕಥಮಿಹ ಮಧುವೈರಿಣಿ ದರ್ಶಿತಪ್ರಸಾದಸ್ಯ || 4 ||

ಸ್ನಾನೇನ ಕಿಂ ವಿಧೇಯಂ ಸಲಿಲಕೃತೇನೇಹ ನಿತ್ಯಶುದ್ಧಸ್ಯ |
ವಸ್ತ್ರೇಣಾಪಿ ನ ಕಾರ್ಯಂ ದೇವಾಧಿಪತೇ ದಿಗಂಬರಸ್ಯೇಹ || 5 ||

ಸ್ಫುರತಿ ಹಿ ಸರ್ಪಾಭರಣಂ ಸರ್ವಾಂಗೇ ಸರ್ವಮಂಗಲಾಕಾರ |
ಅತಿವರ್ಣಾಶ್ರಮಿಣಸ್ತೇಽಸ್ತ್ಯುಪವೀತೇನೇಹ ಕಶ್ಚಿದುತ್ಕರ್ಷಃ || 6 ||

ಗಂಧವತೀ ಹಿ ತನುಸ್ತೇ ಗಂಧಾಃ ಕಿಂ ನೇಶ ಪೌನರುಕ್ತಾಯ |
ಪುಷ್ಕಲಫಲದಾತಾರಂ ಪುಷ್ಕರಕುಸುಮೇನ ಪೂಜಯಾಮಿ ತ್ವಾಂ || 7 ||

ಶಮಧನಮೂಲಧನಂ ತ್ವಾಂ ಸಕಲೇಶ್ವರ ಭವಸಿ ಧೂಪಿತಃ ಕೇನ |
ದೀಪಃ ಕಥಂ ಶಿಖಾವಾನ್ ದೀಪ್ಯೇತ ಪುರಃ ಸ್ವಯಂಪ್ರಕಾಶಸ್ಯ || 8 ||

ಅಮೃತಾತ್ಮಕಮಪಿ ಭಗವನ್ನಶನಂ ಕಿನ್ನಾಮ ನಿತ್ಯತೃಪ್ತಸ್ಯ |
ತ್ವಯ್ಯಾಮ್ರೇಡಿತಮೇತತ್ತಾಂಬೂಲಂ ಯದಿಹ ಸುಮುಖರಾಗಾಯ || 9 ||

ಉಪಹಾರೀಭೂಯಾದಿದಮುಮೇಶ ಯನ್ಮೇ ವಿಚೇಷ್ಟಿತಮಶೇಷಂ |
ನೀರಾಜಯಾಮಿ ತಮಿಮಂ ನಾನಾತ್ಮಾನಂ ಸಹಾಖಿಲೈಃ ಕರಣೈಃ || 10 ||

ಸುಮನಶ್ಶೇಖರ ಭವ ತೇ ಸುಮನೋಽಞ್ಜಲಿರೇಷ ಕೋ ಭವೇಚ್ಛಂಭೋ |
ಛತ್ರಂ ದ್ಯುಮನ್ ದ್ಯುಮಾರ್ಧನ್ ಚಾಮರಮಪಿ ಕಿಂ ಜಿತಶ್ರಮಸ್ಯ ತವ || 11 ||

ನೃತ್ಯಂ ಪ್ರಥತಾಂ ಕಥಮಿವ ನಾಥ ತವಾಗ್ರೇ ಮಹಾನಟಸ್ಯೇಹ |
ಗೀತಂ ಕಿಂ ಪುರವೈರಿನ್ ಗೀತಾಗಮಮೂಲದೇಶಿಕಸ್ಯ ಪುರಃ || 12 ||

ವಾದ್ಯಂ ಡಮರು ಭೃತಸ್ತೇ ವಾದಯಿತುಂ ತೇ ಪುರೋಽಸ್ತಿ ಕಾ ಶಕ್ತಿಃ |
ಅಪರಿಚ್ಛಿನ್ನಸ್ಯ ಭವೇದಖಿಲೇಶ್ವರ ಕಃ ಪ್ರದಕ್ಷಿಣವಿಧಿಸ್ತೇ || 13 ||

ಸ್ಯುಸ್ತೇ ನಮಾಂಸಿ ಕಥಮಿವ ಶಂಕರ ಪರಿತೋಽಪಿ ವಿದ್ಯಮಾನಸ್ಯ |
ವಾಚಾಮಗೋಚರೇ ತ್ವಯಿ ವಾಕ್ಪ್ರಸರೋ ಮೇ ಕಥಂ ಸುಸಂಭವತು || 14 ||

ನಿತ್ಯಾನಂದಾಯ ನಮೋ ನಿರ್ಮಲವಿಜ್ಞಾನವಿಗ್ರಹಾಯ ನಮಃ |
ನಿರವಧಿಕರುಣಾಯ ನಮೋ ನಿರವಧಿವಿಭವಾಯ ತೇಜಸೇಽಸ್ತು ನಮಃ || 15 ||

ಸರಸಿಜವಿಪಕ್ಷಚೂಡಃ ಸಗರತನೂಜನ್ಮಸುಕೃತಮೂರ್ಧಾಽಸೌ |
ದೃಕ್ಕೂಲಂಕಷಕರುಣೋ ದೃಷ್ಟಿಪಥೇ ಮೇಽಸ್ತು ಧವಲಿಮಾ ಕೋಽಪಿ || 16 ||

ಜಗದಾಧಾರಶರಾಸಂ ಜಗದುತ್ಪಾದಪ್ರವೀಣಯಂತಾರಂ |
ಜಗದವನಕರ್ಮಠಶರಂ ಜಗದುದ್ಧಾರಂ ಶ್ರಯಾಮಿ ಚಿತ್ಸಾರಂ || 17 ||

ಕುವಲಯಸಹಯುಧ್ವಗಲೈಃ ಕುಲಗಿರಿಕೂಟಸ್ಥಕವಚಿತಾರ್ಧಾಂಗೈಃ |
ಕಲುಷವಿದೂರೈಶ್ಚೇತಃ ಕಬಲಿತಮೇತತ್ಕೃಪಾರಸೈಃ ಕಿಂಚಿತ್ || 18 ||

ವಸನವತೇಕತ್ಕೃತ್ತ್ಯಾ ವಾಸವತೇ ರಜತಶೈಲಶಿಖರೇಣ |
ವಲಯವತೇ ಭೋಗಭೃತಾ ವನಿತಾರ್ಧಾಂಗಾಯ ವಸ್ತುನೇಽಸ್ತು ನಮಃ || 19 ||

ಸರಸಿಜಕುವಲಯ-ಜಾಗರಸಂವೇಶನ ಜಾಗರೂಕಲೋಚನತಃ |
ಸಕೃದಪಿ ನಾಹಂ ಜಾನೇ ಸುತರಾಂತಂ ಭಾಷ್ಯಕಾರಮಂಜೀರಾತ್ || 20 ||

ಆಪಾಟಲಜೂಟಾನಾ-ಮಾನೀಲಚ್ಛಾಯಕಂಧರಾ-ಸೀಮ್ನಾಂ |
ಆಪಾಂಡುವಿಗ್ರಹಾಣಾಮಾದ್ರುಹಿಣಂ ಕಿಂಕರಾ ವಯಂ ಮಹಸಾಂ || 21 ||

ಮುಷಿತಸ್ಮರಾವಲೇಪೇ ಮುನಿತನಯಾಯುರ್ವದಾನ್ಯಪದಪದ್ಮೇ |
ಮಹಸಿ ಮನೋ ರಮತಾಂ ಮೇ ಮನಸಿ ದಯಾಪೂರಮೇದುರಾಪಾಂಗೇ || 22 ||

ಶರ್ಮಣಿ ಜಗತಾಂ ಗಿರಿಜಾನರ್ಮಣಿ ಸಪ್ರೇಮಹೃದಯಪರಿಪಾಕೇ |
ಬ್ರಹ್ಮಣಿ ವಿನಮದ್ರಕ್ಷಣಕರ್ಮಣಿ ತಸ್ಮಿನ್ನುದೇತು ಭಕ್ತಿರ್ಮೇ || 23 ||

ಕಸ್ಮಿನ್ನಪಿ ಸಮಯೇ ಮಮ ಕಂಠಚ್ಛಾಯಾವಿಧೂತಕಾಲಾಭ್ರಂ |
ಅಸ್ತು ಪುರೋ ವಸ್ತು ಕಿಮಪ್ಯರ್ಧಾಂಗೇದರಮುನ್ಮಿಷನ್ನಿಟಲಂ || 24 ||

ಜಟಿಲಾಯ ಮೌಲಿಭಾಗೇ ಜಲಧರ ನೀಲಾಯ ಕಂಧರಾಭೋಗೇ |
ಧವಲಾಯ ವಪುಷಿ ನಿಖಿಲೇ ಧಾಮ್ನೇಸ್ಸ್ಯಾನ್ಮಾನಸೇ ನಮೋವಾಕಃ || 25 ||

ಅಕರವಿರಾಜತ್ಸುಮೃಗೈ-ರವೃಷತುರಂಗೈ-ರಮೌಲಿಧೃತಗಂಗೈಃ |
ಅಕೃತಮನೋಭವಭಂಗೈರಲಮನ್ಯೈರ್ಜಗತಿ ದೈವತಂ ಮನ್ಯೈಃ || 26 ||

ಕಸ್ಮೈ ವಚ್ಮಿ ದಶಾಂ ಮೇ ಕಸ್ಯೇದೃಗ್ಘೃದಯಮಸ್ತಿ ಶಕ್ತಿರ್ವಾ |
ಕಸ್ಯ ಬಲಂ ಚೋದ್ಧರ್ತುಂ ಕ್ಲೇಶಾತ್ತ್ವಾಮಂತರಾ ದಯಾಸಿಂಧೋ || 27 ||

ಯಾಚೇ ಹ್ಯನಭಿನವಂ ತೇ ಚಂದ್ರಕಲೋತ್ತಂಸ ಕಿಂಚಿದಪಿ ವಸ್ತು |
ಮಹ್ಯಂ ಪ್ರದೇಹಿ ಭಗವನ್ ಮದೀಯಮೇವ ಸ್ವರೂಪಮಾನಂದಂ || 28 ||

ಭಗವನ್ಬಾಲತಯಾ ವಾಽಭಕ್ತ್ಯಾ ವಾಽಪ್ಯಾಪದಾಕುಲತಯಾ ವಾ |
ಮೋಹಾವಿಷ್ಟತಯಾ ವಾ ಮಾಽಸ್ತು ಚ ತೇ ಮನಸಿ ಯದ್ದುರುಕ್ತಂ ಮೇ || 29 ||

ಯದಿ ವಿಶ್ವಾಧಿಕತಾ ತೇ ಯದಿ ನಿಗಮಾಗಮಪುರಾಣಯಾಥಾರ್ಥ್ಯಂ |
ಯದಿ ವಾ ಭಕ್ತೇಷು ದಯಾ ತದಿಹ ಮಹೇಶಾಶು ಪೂರ್ಣಕಾಮಸ್ಸ್ಯಾಂ || 30 ||

ಇತಿ ಶಿವಾನಂದಾವಧೂತರಚಿತ ಶಿವಮಾನಸಿಕಪೂಜಾಸ್ತೋತ್ರಂ |