ಶ್ರೀ ಶಿವ ಸ್ತವರಾಜಃ (ಬಾಣೇಶ್ವರ ಕವಚ ಸಹಿತಂ) - ಬ್ರಹ್ಮವೈವರ್ತ ಪುರಾಣಾಂತರ್ಗತಂ

ಶ್ರೀ ಶಿವ ಸ್ತವರಾಜಃ (ಬಾಣೇಶ್ವರ ಕವಚ ಸಹಿತಂ) - ಬ್ರಹ್ಮವೈವರ್ತ ಪುರಾಣಾಂತರ್ಗತಂ

ಓಂ ನಮೋ ಮಹಾದೇವಾಯ |

ಕವಚಂ
ಬಾಣಾಸುರ ಉವಾಚ |
ಮಹೇಶ್ವರ ಮಹಾಭಾಗ ಕವಚಂ ಯತ್ಪ್ರಕಾಶಿತಂ |
ಸಂಸಾರಪಾವನಂ ನಾಮ ಕೃಪಯಾ ಕಥಯ ಪ್ರಭೋ || 43 ||

ಮಹೇಶ್ವರ ಉವಾಚ |
ಶೃಣು ವಕ್ಷ್ಯಾಮಿ ಹೇ ವತ್ಸ ಕವಚಂ ಪರಮಾದ್ಭುತಂ |
ಅಹಂ ತುಭ್ಯಂ ಪ್ರದಾಸ್ಯಾಮಿ ಗೋಪನೀಯಂ ಸುದುರ್ಲಭಂ || 44 ||

ಪುರಾ ದುರ್ವಾಸಸೇ ದತ್ತಂ ತ್ರೈಲೋಕ್ಯವಿಜಯಾಯ ಚ |
ಮಮೈವೇದಂ ಚ ಕವಚಂ ಭಕ್ತ್ಯಾ ಯೋ ಧಾರಯೇತ್ಸುಧೀಃ || 45 ||

ಜೇತುಂ ಶಕ್ನೋತಿ ತ್ರೈಲೋಕ್ಯಂ ಭಗವನ್ನವಲೀಲಯಾ |
ಸಂಸಾರಪಾವನಸ್ಯಾಸ್ಯ ಕವಚಸ್ಯ ಪ್ರಜಾಪತಿಃ || 46 ||

ಋಷಿಶ್ಛಂದಶ್ಚ ಗಾಯತ್ರೀ ದೇವೋಽಹಂ ಚ ಮಹೇಶ್ವರಃ |
ಧರ್ಮಾರ್ಥಕಾಮಮೋಕ್ಷೇಷು ವಿನಿಯೋಗಃ ಪ್ರಕೀರ್ತಿತಃ || 47 ||

ಪಂಚಲಕ್ಷಜಪೇನೈವ ಸಿದ್ಧಿದಂ ಕವಚಂ ಭವೇತ್ |
ಯೋ ಭವೇತ್ಸಿದ್ಧಕವಚೋ ಮಮ ತುಲ್ಯೋ ಭವೇದ್ಭುವಿ |
ತೇಜಸಾ ಸಿದ್ಧಿಯೋಗೇನ ತಪಸಾ ವಿಕ್ರಮೇಣ ಚ || 48 ||

ಶಂಭುರ್ಮೇ ಮಸ್ತಕಂ ಪಾತು ಮುಖಂ ಪಾತು ಮಹೇಶ್ವರಃ |
ದಂತಪಂಕ್ತಿಂ ನೀಲಕಂಠೋಽಪ್ಯಧರೋಷ್ಠಂ ಹರಃ ಸ್ವಯಂ || 49 ||

ಕಂಠಂ ಪಾತು ಚಂದ್ರಚೂಡಃ ಸ್ಕಂಧೌ ವೃಷಭವಾಹನಃ |
ವಕ್ಷಃಸ್ಥಲಂ ನೀಲಕಂಠಃ ಪಾತು ಪೃಷ್ಠಂ ದಿಗಂಬರಃ || 50 ||

ಸರ್ವಾಂಗಂ ಪಾತು ವಿಶ್ವೇಶಃ ಸರ್ವದಿಕ್ಷು ಚ ಸರ್ವದಾ |
ಸ್ವಪ್ನೇ ಜಾಗರಣೇ ಚೈವ ಸ್ಥಾಣುರ್ಮೇ ಪಾತು ಸಂತತಂ || 51 ||

ಇತಿ ತೇ ಕಥಿತಂ ಬಾಣ ಕವಚಂ ಪರಮಾದ್ಭುತಂ |
ಯಸ್ಮೈ ಕಸ್ಮೈ ನ ದಾತವ್ಯಂ ಗೋಪನೀಯಂ ಪ್ರಯತ್ನತಃ || 52 ||

ಯತ್ಫಲಂ ಸರ್ವತೀರ್ಥಾನಾಂ ಸ್ನಾನೇನ ಲಭತೇ ನರಃ |
ತತ್ಫಲಂ ಲಭತೇ ನೂನಂ ಕವಚಸ್ಯೈವ ಧಾರಣಾತ್ || 53 ||

ಇದಂ ಕವಚಮಜ್ಞಾತ್ವಾ ಭಜೇನ್ಮಾಂ ಯಃ ಸುಮಂದಧೀಃ |
ಶತಲಕ್ಷಪ್ರಜಪ್ತೋಽಪಿ ನ ಮಂತ್ರಃ ಸಿದ್ಧಿದಾಯಕಃ || 54 ||

ಸೌತಿರುವಾಚ |
ಇದಂ ಚ ಕವಚಂ ಪ್ರೋಕ್ತಂ ಸ್ತೋತ್ರಂ ಚ ಶೃಣು ಶೌನಕ |
ಮಂತ್ರರಾಜಃ ಕಲ್ಪತರುರ್ವಸಿಷ್ಠೋ ದತ್ತವಾನ್ಪುರಾ || 55 ||

ಓಂ ನಮಃ ಶಿವಾಯ |

ಸ್ತವರಾಜಃ
ಬಾಣಾಸುರ ಉವಾಚ |
ವಂದೇ ಸುರಾಣಾಂ ಸಾರಂ ಚ ಸುರೇಶಂ ನೀಲಲೋಹಿತಂ |
ಯೋಗೀಶ್ವರಂ ಯೋಗಬೀಜಂ ಯೋಗಿನಾಂ ಚ ಗುರೋರ್ಗುರುಂ || 56 ||

ಜ್ಞಾನಾನಂದಂ ಜ್ಞಾನರೂಪಂ ಜ್ಞಾನಬೀಜಂ ಸನಾತನಂ |
ತಪಸಾಂ ಫಲದಾತಾರಂ ದಾತಾರಂ ಸರ್ವಸಂಪದಾಂ || 57||

ತಪೋರೂಪಂ ತಪೋಬೀಜಂ ತಪೋಧನಧನಂ ವರಂ |
ವರಂ ವರೇಣ್ಯಂ ವರದಮೀಡ್ಯಂ ಸಿದ್ಧಗಣೈರ್ವರೈಃ || 58 ||

ಕಾರಣಂ ಭುಕ್ತಿಮುಕ್ತೀನಾಂ ನರಕಾರ್ಣವತಾರಣಂ |
ಆಶುತೋಷಂ ಪ್ರಸನ್ನಾಸ್ಯಂ ಕರುಣಾಮಯಸಾಗರಂ || 59 ||

ಹಿಮಚಂದನ ಕುಂದೇಂದು ಕುಮುದಾಂಭೋಜ ಸನ್ನಿಭಂ |
ಬ್ರಹ್ಮಜ್ಯೋತಿಃ ಸ್ವರೂಪಂ ಚ ಭಕ್ತಾನುಗ್ರಹವಿಗ್ರಹಂ || 60 ||

ವಿಷಯಾಣಾಂ ವಿಭೇದೇನ ಬಿಭ್ರತಂ ಬಹುರೂಪಕಂ |
ಜಲರೂಪಮಗ್ನಿರೂಪ-ಮಾಕಾಶರೂಪಮೀಶ್ವರಂ || 61 ||

ವಾಯುರೂಪಂ ಚಂದ್ರರೂಪಂ ಸೂರ್ಯರೂಪಂ ಮಹತ್ಪ್ರಭುಂ |
ಆತ್ಮನಃ ಸ್ವಪದಂ ದಾತುಂ ಸಮರ್ಥಮವಲೀಲಯಾ || 62 ||

ಭಕ್ತಜೀವನಮೀಶಂ ಚ ಭಕ್ತಾನುಗ್ರಹಕಾರಕಂ |
ವೇದಾ ನ ಶಕ್ತಾ ಯಂ ಸ್ತೋತುಂ ಕಿಮಹಂ ಸ್ತೌಮಿ ತಂ ಪ್ರಭುಂ || 63 ||

ಅಪರಿಚ್ಛಿನ್ನಮೀಶಾನ-ಮಹೋವಾಙ್ಮನಸೋಃ ಪರಂ |
ವ್ಯಾಘ್ರಚರ್ಮಾಂಬರಧರಂ ವೃಷಭಸ್ಥಂ ದಿಗಂಬರಂ |
ತ್ರಿಶೂಲಪಟ್ಟಿಶಧರಂ ಸಸ್ಮಿತಂ ಚಂದ್ರಶೇಖರಂ || 64 ||

ಇತ್ಯುಕ್ತ್ವಾ ಸ್ತವರಾಜೇನ ನಿತ್ಯಂ ಬಾಣಃ ಸುಸಂಯತಃ |
ಪ್ರಾಣಮಚ್ಛಂಕರಂ ಭಕ್ತ್ಯಾ ದುರ್ವಾಸಾಶ್ಚ ಮುನೀಶ್ವರಃ || 65 ||

ಇದಂ ದತ್ತಂ ವಸಿಷ್ಠೇನ ಗಂಧರ್ವಾಯ ಪುರಾ ಮುನೇ |
ಕಥಿತಂ ಚ ಮಹಾಸ್ತೋತ್ರಂ ಶೂಲಿನಃ ಪರಮಾದ್ಭುತಂ || 66 ||

ಇದಂ ಸ್ತೋತ್ರಂ ಮಹಾಪುಣ್ಯಂ ಪಠೇದ್ಭಕ್ತ್ಯಾ ಚ ಯೋ ನರಃ |
ಸ್ನಾನಸ್ಯ ಸರ್ವತೀರ್ಥಾನಾಂ ಫಲಮಾಪ್ನೋತಿ ನಿಶ್ಚಿತಂ || 67 ||

ಅಪುತ್ರೋ ಲಭತೇ ಪುತ್ರಂ ವರ್ಷಮೇಕಂ ಶೃಣೋತಿ ಯಃ |
ಸಂಯತಶ್ಚ ಹವಿಷ್ಯಾಶೀ ಪ್ರಣಮ್ಯ ಶಂಕರಂ ಗುರುಂ || 68 ||

ಗಲತ್ಕುಷ್ಠೀ ಮಹಾಶೂಲೀ ವರ್ಷಮೇಕಂ ಶೃಣೋತಿ ಯಃ |
ಅವಶ್ಯಂ ಮುಚ್ಯತೇ ರೋಗಾದ್ವ್ಯಾಸವಾಕ್ಯಮಿತಿ ಶ್ರುತಂ || 69 ||

ಕಾರಾಗಾರೇಽಪಿ ಬದ್ಧೋ ಯೋ ನೈವ ಪ್ರಾಪ್ನೋತಿ ನಿರ್ವೃತಿಂ |
ಸ್ತೋತ್ರಂ ಶ್ರುತ್ವಾ ಮಾಸಮೇಕಂ ಮುಚ್ಯತೇ ಬಂಧನಾದ್ಧೃವಂ || 70 ||

ಭ್ರಷ್ಟರಾಜ್ಯೋ ಲಭೇದ್ರಾಜ್ಯಂ ಭಕ್ತ್ಯಾಮಾಸಂ ಶೃಣೋತಿ ಯಃ |
ಮಾಸಂ ಶ್ರುತ್ವಾ ಸಂಯತಶ್ಚ ಲಭೇದ್ಭ್ರಷ್ಟಧನೋ ಧನಂ || 71 ||

ಯಕ್ಷ್ಮಗ್ರಸ್ತೋ ವರ್ಷಮೇಕಮಾಸ್ತಿಕೋ ಯಃ ಶೃಣೋತಿ ಚೇತ್ |
ನಿಶ್ಚಿತಂ ಮುಚ್ಯತೇ ರೋಗಾಚ್ಛಂಕರಸ್ಯ ಪ್ರಸಾದತಃ || 72 ||

ಯಃ ಶೃಣೋತಿ ಸದಾ ಭಕ್ತ್ಯಾ ಸ್ತವರಾಜಮಿಮಂ ದ್ವಿಜಃ |
ತಸ್ಯಾಸಾಧ್ಯಂ ತ್ರಿಭುವನೇ ನಾಸ್ತಿ ಕಿಂಚಿಚ್ಚ ಶೌನಕ || 73 ||

ಕದಾಚಿದ್ಬಂಧುವಿಚ್ಛೇದೋ ನ ಭವೇತ್ತಸ್ಯ ಭಾರತೇ |
ಅಚಲಂ ಪರಮೈಶ್ವರ್ಯಂ ಲಭತೇ ನಾತ್ರ ಸಂಶಯಃ || 74 ||

ಸುಸಂಯತೋಽತಿ ಭಕ್ತ್ಯಾ ಚ ಮಾಸಮೇಕಂ ಶೃಣೋತಿ ಯಃ |
ಅಭಾರ್ಯೋ ಲಭತೇ ಭಾರ್ಯಾಂ ಸುವಿನೀತಾಂ ಸತೀಂ ವರಾಂ || 75 ||

ಮಹಾಮೂರ್ಖಶ್ಚ ದುರ್ಮೇಧಾ ಮಾಸಮೇಕಂ ಶೃಣೋತಿ ಯಃ |
ಬುದ್ಧಿಂ ವಿದ್ಯಾಂ ಚ ಲಭತೇ ಗುರೂಪದೇಶಮಾತ್ರತಃ || 76 ||

ಕರ್ಮದುಃಖೀ ದರಿದ್ರಶ್ಚ ಮಾಸಂ ಭಕ್ತ್ಯಾ ಶೃಣೋತಿ ಯಃ |
ಧ್ರುವಂ ವಿತ್ತಂ ಭವೇತ್ತಸ್ಯ ಶಂಕರಸ್ಯ ಪ್ರಸಾದತಃ || 77 ||

ಇಹ ಲೋಕೇ ಸುಖಂ ಭುಕ್ತ್ವಾ ಕೃತ್ವಾಕೀರ್ತಿಂ ಸುದುರ್ಲಭಾಂ |
ನಾನಾ ಪ್ರಕಾರ ಧರ್ಮಂ ಚ ಯಾತ್ಯಂತೇ ಶಂಕರಾಲಯಂ || 78 ||

ಪಾರ್ಷದಪ್ರವರೋ ಭೂತ್ವಾ ಸೇವತೇ ತತ್ರ ಶಂಕರಂ |
ಯಃ ಶೃಣೋತಿ ತ್ರಿಸಂಧ್ಯಂ ಚ ನಿತ್ಯಂ ಸ್ತೋತ್ರಮನುತ್ತಮಂ || 79 ||

ಇತಿ ಶ್ರೀಬ್ರಹ್ಮವೈವರ್ತೇ ಮಹಾಪುರಾಣೇ ಬ್ರಹ್ಮಖಂಡೇ ಸೌತಿಶೌನಕಸಂವಾದೇ ಶಂಕರಸ್ತೋತ್ರ ಕಥನಂ ನಾಮ ಏಕೋನವಿಂಶೋಧ್ಯಾಯಃ ||