ಶ್ರೀ ಆರ್ತತ್ರಾಣಪರಾಯಣ ನಾರಾಯಣ ಸ್ತೋತ್ರಂ

ಶ್ರೀ ಆರ್ತತ್ರಾಣಪರಾಯಣ ನಾರಾಯಣ ಸ್ತೋತ್ರಂ

ಪ್ರಹ್ಲಾದ ಪ್ರಭುರಸ್ತಿ ಚೇತ್ತವ ಹರಿಃ ಸರ್ವತ್ರ ಮೇ ದರ್ಶಯ
ಸ್ತಂಭೇ ಚೈನಮಿತಿ ಬ್ರುವಂತಮಸುರಂ ತತ್ರಾವಿರಾಸೀದ್ಧರಿಃ |
ವಕ್ಷಸ್ತಸ್ಯ ವಿದಾರಯನ್ನಿಜನಖೈರ್ವಾತ್ಸಲ್ಯಮಾವೇದಯ-
-ನ್ನಾರ್ತತ್ರಾಣಪರಾಯಣಃ ಸ ಭಗವಾನ್ ನಾರಾಯಣೋ ಮೇ ಗತಿಃ || 1 ||

ಶ್ರೀರಾಮಾತ್ರ ವಿಭೀಷಣೋಽಯಮಧುನಾ ತ್ವಾರ್ತೋ ಭಯಾದಾಗತಃ
ಸುಗ್ರೀವಾನಯ ಪಾಲಯೇಽಹಮಧುನಾ ಪೌಲಸ್ತ್ಯಮೇವಾಗತಂ |
ಏವಂ ಯೋಽಭಯಮಸ್ಯ ಸರ್ವವಿದಿತಂ ಲಂಕಾಧಿಪತ್ಯಂ ದದಾ-
-ವಾರ್ತತ್ರಾಣಪರಾಯಣಃ ಸ ಭಗವಾನ್ ನಾರಾಯಣೋ ಮೇ ಗತಿಃ || 2 ||

ನಕ್ರಗ್ರಸ್ತಪದಂ ಸಮುದ್ಯತಕರಂ ಬ್ರಹ್ಮೇಶ ದೇವೇಶ ಮಾಂ
ಪಾಹೀತಿ ಪ್ರಚುರಾರ್ತರಾವಕರಿಣಂ ದೇವೇಶ ಶಕ್ತೀಶ ಚ |
ಮಾ ಶೋಚೇತಿ ರರಕ್ಷ ನಕ್ರವದನಾಂಚಕ್ರಶ್ರಿಯಾ ತತ್ಕ್ಷಣಾ-
-ದಾರ್ತತ್ರಾಣಪರಾಯಣಃ ಸ ಭಗವಾನ್ ನಾರಾಯಣೋ ಮೇ ಗತಿಃ || 3 ||

ಹಾ ಕೃಷ್ಣಾಚ್ಯುತ ಹಾ ಕೃಪಾಜಲನಿಧೇ ಹಾ ಪಾಂಡವಾನಾಂ ಗತೇ
ಕ್ವಾಸಿ ಕ್ವಾಸಿ ಸುಯೋಧನಾದವಗತಾಂ ಹಾ ರಕ್ಷ ಮಾಂ ದ್ರೌಪದೀಂ |
ಇತ್ಯುಕ್ತೋಽಕ್ಷಯವಸ್ತ್ರರಕ್ಷಿತತನುಂ ಯೋರಕ್ಷದಾಪದ್ಗಣಾ-
-ದಾರ್ತತ್ರಾಣಪರಾಯಣಃ ಸ ಭಗವಾನ್ ನಾರಾಯಣೋ ಮೇ ಗತಿಃ || 4 ||

ಯತ್ಪಾದಾಬ್ಜನಖೋದಕಂ ತ್ರಿಜಗತಾಂ ಪಾಪೌಘವಿಧ್ವಸನಂ
ಯನ್ನಾಮಾಮೃತಪೂರಣಂ ಚ ಪಿಬತಾಂ ಸಂತಾಪಸಂಹಾರಕಂ |
ಪಾಷಾಣಶ್ಚ ಯದಂಘ್ರಿತೋ ನಿಜವಧೂರೂಪಂ ಮುನೇರಾಪ್ತವಾ-
-ನಾರ್ತತ್ರಾಣಪರಾಯಣಃ ಸ ಭಗವಾನ್ ನಾರಾಯಣೋ ಮೇ ಗತಿಃ || 5 ||

ಯನ್ನಾಮಶ್ರುತಿಮಾತ್ರತೋಽಪರಿಮಿತಂ ಸಂಸಾರವಾರಾನ್ನಿಧಿಂ
ತ್ಯಕ್ತ್ವಾ ಗಚ್ಛತಿ ದುರ್ಜನೋಽಪಿ ಪರಮಂ ವಿಷ್ಣೋಃ ಪದಂ ಶಾಶ್ವತಂ |
ತನ್ನೈವಾದ್ಭುತಕಾರಣಂ ತ್ರಿಜಗತಾಂ ನಾಥಸ್ಯ ದಾಸೋಽಸ್ಮ್ಯಹ-
-ಮಾರ್ತತ್ರಾಣಪರಾಯಣಃ ಸ ಭಗವಾನ್ ನಾರಾಯಣೋ ಮೇ ಗತಿಃ || 6 ||

ಪಿತ್ರಾ ಭ್ರಾತರಮುತ್ತಮಾಂಕಗಮಿತಂ ಭಕ್ತೋತ್ತಮಂ ಯೋ ಧ್ರುವಂ
ದೃಷ್ಟ್ವಾ ತತ್ಸಮಮಾರುರುಕ್ಷುಮುದಿತಂ ಮಾತ್ರಾವಮಾನಂ ಗತಂ |
ಯೋಽದಾತ್ ತಂ ಶರಣಾಗತಂ ತು ತಪಸಾ ಹೇಮಾದ್ರಿಸಿಂಹಾಸನಂ
ಹ್ಯಾರ್ತತ್ರಾಣಪರಾಯಣಃ ಸ ಭಗವಾನ್ ನಾರಾಯಣೋ ಮೇ ಗತಿಃ || 7 ||

ನಾಥೇತಿ ಶ್ರುತಯೋ ನ ತತ್ತ್ವಮತಯೋ ಘೋಷಸ್ಥಿತಾ ಗೋಪಿಕಾ
ಜಾರಿಣ್ಯಃ ಕುಲಜಾತಿಧರ್ಮವಿಮುಖಾ ಅಧ್ಯಾತ್ಮಭಾವಂ ಯಯುಃ |
ಭಕ್ತಿರ್ಯಸ್ಯ ದದಾತಿ ಮುಕ್ತಿಮತುಲಾಂ ಜಾರಸ್ಯ ಯಃ ಸದ್ಗತಿ-
-ರ್ಹ್ಯಾರ್ತತ್ರಾಣಪರಾಯಣಃ ಸ ಭಗವಾನ್ ನಾರಾಯಣೋ ಮೇ ಗತಿಃ || 8 ||

ಕ್ಷುತ್ತೃಷ್ಣಾರ್ತಸಹಸ್ರಶಿಷ್ಯಸಹಿತಂ ದುರ್ವಾಸಸಂ ಕ್ಷೋಭಿತಂ
ದ್ರೌಪದ್ಯಾ ಭಯಭಕ್ತಿಯುಕ್ತಮನಸಾ ಶಾಕಂ ಸ್ವಹಸ್ತಾರ್ಪಿತಂ |
ಭುಕ್ತ್ವಾ ತರ್ಪಯದಾತ್ಮವೃತ್ತಿಮಖಿಲಾಮಾವೇದಯನ್ ಯಃ ಪುಮಾ-
-ನಾರ್ತತ್ರಾಣಪರಾಯಣಃ ಸ ಭಗವಾನ್ ನಾರಾಯಣೋ ಮೇ ಗತಿಃ || 9 ||

ಯೇನಾರಾಕ್ಷಿ ರಘೂತ್ತಮೇನ ಜಲಧೇಸ್ತೀರೇ ದಶಾಸ್ಯಾನುಜ-
-ಸ್ತ್ವಾಯಾತಂ ಶರಣಂ ರಘೂತ್ತಮ ವಿಭೋ ರಕ್ಷಾತುರಂ ಮಾಮಿತಿ |
ಪೌಲಸ್ತ್ಯೇನ ನಿರಾಕೃತೋಽಥ ಸದಸಿ ಭ್ರಾತ್ರಾ ಚ ಲಂಕಾಪುರೇ
ಹ್ಯಾರ್ತತ್ರಾಣಪರಾಯಣಃ ಸ ಭಗವಾನ್ ನಾರಾಯಣೋ ಮೇ ಗತಿಃ || 10 ||

ಯೇನಾವಾಹಿ ಮಹಾಹವೇ ವಸುಮತೀ ಸಂವರ್ತಕಾಲೇ ಮಹಾ-
-ಲೀಲಾಕ್ರೋಡವಪುರ್ಧರೇಣ ಹರಿಣಾ ನಾರಾಯಣೇನ ಸ್ವಯಂ |
ಯಃ ಪಾಪಿದ್ರುಮಸಂಪ್ರವರ್ತಮಚಿರಾದ್ಧತ್ತ್ವಾ ಚ ಯೋಽಗಾತ್ ಪ್ರಿಯಾ-
-ಮಾರ್ತತ್ರಾಣಪರಾಯಣಃ ಸ ಭಗವಾನ್ ನಾರಾಯಣೋ ಮೇ ಗತಿಃ || 11 ||

ಯೋದ್ಧಾಸೌ ಭುವನತ್ರಯೇ ಮಧುಪತಿರ್ಭರ್ತಾ ನರಾಣಾಂ ಬಲೇ
ರಾಧಾಯಾ ಅಕರೋದ್ರತೇ ರತಿಮನಃಪೂರ್ತಿಂ ಸುರೇಂದ್ರಾನುಜಃ |
ಯೋ ವಾ ರಕ್ಷತಿ ದೀನಪಾಂಡುತನಯಾನ್ನಾಥೇತಿ ಭೀತಿಂ ಗತಾ-
-ನಾರ್ತತ್ರಾಣಪರಾಯಣಃ ಸ ಭಗವಾನ್ ನಾರಾಯಣೋ ಮೇ ಗತಿಃ || 12 ||

ಯಃ ಸಾಂದೀಪಿನಿದೇಶತಶ್ಚ ತನಯಂ ಲೋಕಾಂತರಾತ್ ಸನ್ನತಂ
ಚಾನೀಯ ಪ್ರತಿಪಾದ್ಯ ಪುತ್ರಮರಣಾದುಜ್ಜೃಂಭಮಾಣಾರ್ತಯೇ |
ಸಂತೋಷಂ ಜನಯನ್ನಮೇಯಮಹಿಮಾ ಪುತ್ರಾರ್ಥಸಂಪಾದನಾ-
-ದಾರ್ತತ್ರಾಣಪರಾಯಣಃ ಸ ಭಗವಾನ್ ನಾರಾಯಣೋ ಮೇ ಗತಿಃ || 13 ||

ಯನ್ನಾಮಸ್ಮರಣಾದಘೌಘಸಹಿತೋ ವಿಪ್ರಃ ಪುರಾಽಜಾಮಿಲಃ
ಪ್ರಾಣಾನ್ಮುಕ್ತಿಮಶೇಷಿತಾಮನು ಚ ಯಃ ಪಾಪೌಘತಾಪಾರ್ತಿಯುಕ್ |
ಸದ್ಯೋ ಭಾಗವತೋತ್ತಮಾತ್ಮನಿ ಮತಿಂ ಪ್ರಾಪಾಂಬರೀಷಾಭಿಧ-
-ಶ್ಚಾರ್ತತ್ರಾಣಪರಾಯಣಃ ಸ ಭಗವಾನ್ ನಾರಾಯಣೋ ಮೇ ಗತಿಃ || 14 ||

ಯೋರಕ್ಷದ್ವಸನಾದಿನಿತ್ಯರಹಿತಂ ವಿಪ್ರಂ ಕುಚೈಲಾಭಿಧಂ
ದೀನಾದೀನಚಕೋರಪಾಲನಪರಃ ಶ್ರೀಶಂಖಚಕ್ರೋಜ್ಜ್ವಲಃ |
ತಜ್ಜೀರ್ಣಾಂಬರಮುಷ್ಟಿಪಾತ್ರಪೃಥುಕಾನಾದಾಯ ಭುಕ್ತ್ವಾ ಕ್ಷಣಾ-
-ದಾರ್ತತ್ರಾಣಪರಾಯಣಃ ಸ ಭಗವಾನ್ ನಾರಾಯಣೋ ಮೇ ಗತಿಃ || 15 ||

ಯತ್ಕಲ್ಯಾಣಗುಣಾಭಿರಾಮಮಮಲಂ ಮಂತ್ರಾಣಿ ಸಂಶಿಕ್ಷತೇ
ಯತ್ಸಂಶೇತಿಪತಿಪ್ರತಿಷ್ಠಿತಮಿದಂ ವಿಶ್ವಂ ವದತ್ಯಾಗಮಃ |
ಯೋ ಯೋಗೀಂದ್ರಮನಃಸರೋರುಹತಮಃಪ್ರಧ್ವಂಸವಿದ್ಭಾನುಮಾ-
-ನಾರ್ತತ್ರಾಣಪರಾಯಣಃ ಸ ಭಗವಾನ್ ನಾರಾಯಣೋ ಮೇ ಗತಿಃ || 16 ||

ಕಾಳಿಂದೀಹೃದಯಾಭಿರಾಮಪುಲಿನೇ ಪುಣ್ಯೇ ಜಗನ್ಮಂಗಳೇ
ಚಂದ್ರಾಂಭೋಜವಟೇ ಪುಟೇ ಪರಿಸರೇ ಧಾತ್ರಾ ಸಮಾರಾಧಿತೇ |
ಶ್ರೀರಂಗೇ ಭುಜಗೇಂದ್ರಭೋಗಶಯನೇ ಶೇತೇ ಸದಾ ಯಃ ಪುಮಾ-
-ನಾರ್ತತ್ರಾಣಪರಾಯಣಃ ಸ ಭಗವಾನ್ ನಾರಾಯಣೋ ಮೇ ಗತಿಃ || 17 ||

ವಾತ್ಸಲ್ಯಾದಭಯಪ್ರದಾನಸಮಯಾದಾರ್ತಾರ್ತಿನಿರ್ವಾಪಣಾ-
-ದೌದಾರ್ಯಾದಘಶೋಷಣಾದಗಣಿತಶ್ರೇಯಃ ಪದಪ್ರಾಪಣಾತ್ |
ಸೇವ್ಯಃಶ್ರೀಪತಿರೇವ ಸರ್ವಜಗತಾಮೇತೇ ಹಿ ತತ್ಸಾಕ್ಷಿಣಃ
ಪ್ರಹ್ಲಾದಶ್ಚ ವಿಭೀಷಣಶ್ಚ ಕರಿರಾಟ್ ಪಾಂಚಾಲ್ಯಹಲ್ಯಾಧ್ರುವಃ || 18 ||

ಇತಿ ಶ್ರೀಮಚ್ಛಂಕರಾಚಾರ್ಯ ವಿರಚಿತಂ ಶ್ರೀ ಆರ್ತತ್ರಾಣಪರಾಯಣ ನಾರಾಯಣ ಸ್ತೋತ್ರಂ ||