ಶ್ರೀ ಹನುಮತ್ ಸ್ತೋತ್ರಂ (ವಿಭೀಷಣ ಕೃತಂ)

ಶ್ರೀ ಹನುಮತ್ ಸ್ತೋತ್ರಂ (ವಿಭೀಷಣ ಕೃತಂ)

ನಮೋ ಹನುಮತೇ ತುಭ್ಯಂ ನಮೋ ಮಾರುತಸೂನವೇ |
ನಮಃ ಶ್ರೀರಾಮಭಕ್ತಾಯ ಶ್ಯಾಮಾಸ್ಯಾಯ ಚ ತೇ ನಮಃ || 1 ||

ನಮೋ ವಾನರವೀರಾಯ ಸುಗ್ರೀವಸಖ್ಯಕಾರಿಣೇ |
ಲಂಕಾವಿದಾಹನಾರ್ಥಾಯ ಹೇಲಾಸಾಗರತಾರಿಣೇ || 2 ||

ಸೀತಾಶೋಕವಿನಾಶಾಯ ರಾಮಮುದ್ರಾಧರಾಯ ಚ |
ರಾವಣಸ್ಯಕುಲಚ್ಛೇದಕಾರಿಣೇ ತೇ ನಮೋ ನಮಃ || 3 ||

ಮೇಘನಾದಮಖಧ್ವಂಸಕಾರಿಣೇ ತೇ ನಮೋ ನಮಃ |
ಅಶೋಕವನವಿಧ್ವಂಸಕಾರಿಣೇ ಭಯಹಾರಿಣೇ || 4 ||

ವಾಯುಪುತ್ರಾಯ ವೀರಾಯ ಹ್ಯಾಕಾಶೋದರಗಾಮಿನೇ |
ವನಪಾಲಶಿರಶ್ಛೇದಲಂಕಾಪ್ರಾಸಾದಭಂಜಿನೇ || 5 ||

ಜ್ವಲತ್ಕನಕವರ್ಣಾಯ ದೀರ್ಘಲಾಂಗೂಲಧಾರಿಣೇ |
ಸೌಮಿತ್ರಿ ಜಯದಾತ್ರೇ ಚ ರಾಮದೂತಾಯ ತೇ ನಮಃ || 6 ||

ಅಕ್ಷಸ್ಯ ವಧಕರ್ತ್ರೇ ಚ ಬ್ರಹ್ಮಪಾಶನಿವಾರಿಣೇ |
ಲಕ್ಷ್ಮಣಾಂಗಮಹಾಶಕ್ತಿಘಾತಕ್ಷತವಿನಾಶಿನೇ || 7 ||

ರಕ್ಷೋಘ್ನಾಯ ರಿಪುಘ್ನಾಯ ಭೂತಘ್ನಾಯ ಚ ತೇ ನಮಃ |
ಋಕ್ಷವಾನರವೀರೌಘಪ್ರಾಣದಾಯ ನಮೋ ನಮಃ || 8 ||

ಪರಸೈನ್ಯಬಲಘ್ನಾಯ ಶಸ್ತ್ರಾಸ್ತ್ರಘ್ನಾಯ ತೇ ನಮಃ |
ವಿಷಘ್ನಾಯ ದ್ವಿಷಘ್ನಾಯ ಜ್ವರಘ್ನಾಯ ಚ ತೇ ನಮಃ || 9 ||

ಮಹಾಭಯರಿಪುಘ್ನಾಯ ಭಕ್ತತ್ರಾಣೈಕಕಾರಿಣೇ |
ಪರಪ್ರೇರಿತಮಂತ್ರಾಣಾಂ ಯಂತ್ರಾಣಾಂ ಸ್ತಂಭಕಾರಿಣೇ || 10 ||

ಪಯಃಪಾಷಾಣತರಣಕಾರಣಾಯ ನಮೋ ನಮಃ |
ಬಾಲಾರ್ಕಮಂಡಲಗ್ರಾಸಕಾರಿಣೇ ಭವತಾರಿಣೇ || 11 ||

ನಖಾಯುಧಾಯ ಭೀಮಾಯ ದಂತಾಯುಧಧರಾಯ ಚ |
ರಿಪುಮಾಯಾವಿನಾಶಾಯ ರಾಮಾಜ್ಞಾಲೋಕರಕ್ಷಿಣೇ || 12 ||

ಪ್ರತಿಗ್ರಾಮಸ್ಥಿತಾಯಾಽಥ ರಕ್ಷೋಭೂತವಧಾರ್ಥಿನೇ |
ಕರಾಲಶೈಲಶಸ್ತ್ರಾಯ ದ್ರುಮಶಸ್ತ್ರಾಯ ತೇ ನಮಃ || 13 ||

ಬಾಲೈಕಬ್ರಹ್ಮಚರ್ಯಾಯ ರುದ್ರಮೂರ್ತಿಧರಾಯ ಚ |
ವಿಹಂಗಮಾಯ ಸರ್ವಾಯ ವಜ್ರದೇಹಾಯ ತೇ ನಮಃ || 14 ||

ಕೌಪೀನವಾಸಸೇ ತುಭ್ಯಂ ರಾಮಭಕ್ತಿರತಾಯ ಚ |
ದಕ್ಷಿಣಾಶಾಭಾಸ್ಕರಾಯ ಶತಚಂದ್ರೋದಯಾತ್ಮನೇ || 15 ||

ಕೃತ್ಯಾಕ್ಷತವ್ಯಥಘ್ನಾಯ ಸರ್ವಕ್ಲೇಶಹರಾಯ ಚ |
ಸ್ವಾಮ್ಯಾಜ್ಞಾಪಾರ್ಥಸಂಗ್ರಾಮಸಂಖ್ಯೇ ಸಂಜಯಧಾರಿಣೇ || 16 ||

ಭಕ್ತಾಂತದಿವ್ಯವಾದೇಷು ಸಂಗ್ರಾಮೇ ಜಯದಾಯಿನೇ |
ಕಿಲ್ಕಿಲಾಬುಬುಕೋಚ್ಚಾರಘೋರಶಬ್ದಕರಾಯ ಚ || 17 ||

ಸರ್ಪಾಗ್ನಿವ್ಯಾಧಿಸಂಸ್ತಂಭಕಾರಿಣೇ ವನಚಾರಿಣೇ |
ಸದಾ ವನಫಲಾಹಾರಸಂತೃಪ್ತಾಯ ವಿಶೇಷತಃ || 18 ||

ಮಹಾರ್ಣವಶಿಲಾಬದ್ಧಸೇತುಬಂಧಾಯ ತೇ ನಮಃ |
ವಾದೇ ವಿವಾದೇ ಸಂಗ್ರಾಮೇ ಭಯೇ ಘೋರೇ ಮಹಾವನೇ || 19 ||

ಸಿಂಹವ್ಯಾಘ್ರಾದಿಚೌರೇಭ್ಯಃ ಸ್ತೋತ್ರಪಾಠಾದ್ಭಯಂ ನ ಹಿ |
ದಿವ್ಯೇ ಭೂತಭಯೇ ವ್ಯಾಧೌ ವಿಷೇ ಸ್ಥಾವರಜಂಗಮೇ || 20 ||

ರಾಜಶಸ್ತ್ರಭಯೇ ಚೋಗ್ರೇ ತಥಾ ಗ್ರಹಭಯೇಷು ಚ |
ಜಲೇ ಸರ್ವೇ ಮಹಾವೃಷ್ಟೌ ದುರ್ಭಿಕ್ಷೇ ಪ್ರಾಣಸಂಪ್ಲವೇ || 21 ||

ಪಠೇತ್ ಸ್ತೋತ್ರಂ ಪ್ರಮುಚ್ಯೇತ ಭಯೇಭ್ಯಃ ಸರ್ವತೋ ನರಃ |
ತಸ್ಯ ಕ್ವಾಪಿ ಭಯಂ ನಾಸ್ತಿ ಹನುಮತ್ ಸ್ತವಪಾಠತಃ || 22 ||

ಸರ್ವದಾ ವೈ ತ್ರಿಕಾಲಂ ಚ ಪಠನೀಯಮಿದಂ ಸ್ತವಂ |
ಸರ್ವಾನ್ ಕಾಮಾನವಾಪ್ನೋತಿ ನಾತ್ರ ಕಾರ್ಯಾ ವಿಚಾರಣಾ || 23 ||

ವಿಭೀಷಣಕೃತಂ ಸ್ತೋತ್ರಂ ತಾರ್ಕ್ಷ್ಯೇಣ ಸಮುದೀರಿತಂ |
ಯೇ ಪಠಿಷ್ಯಂತಿ ಭಕ್ತ್ಯಾ ವೈ ಸಿದ್ಧಯಸ್ತತ್ಕರೇ ಸ್ಥಿತಾಃ || 24 ||

ಇತಿ ಶ್ರೀಸುದರ್ಶನಸಂಹಿತಾಯಾಂ ವಿಭೀಷಣಗರುಡಸಂವಾದೇ ವಿಭೀಷಣಪ್ರೋಕ್ತ ಹನುಮತ್ ಸ್ತೋತ್ರಂ ||