ಶ್ರೀ ಪ್ರತ್ಯಂಗಿರಾ ಕವಚಂ (ಜಗನ್ಮಂಗಳಕಂ)

ಶ್ರೀ ಪ್ರತ್ಯಂಗಿರಾ ಕವಚಂ (ಜಗನ್ಮಂಗಳಕಂ)

ಶ್ರೀದೇವ್ಯುವಾಚ .
ದೇವ ದೇವ ಮಹಾದೇವ ಸರ್ವಜ್ಞ ಕರುಣಾನಿಧೇ .
ಪ್ರತ್ಯಂಗಿರಾಯಾಃ ಕವಚಂ ಸರ್ವರಕ್ಷಾಕರಂ ನೃಣಾಂ ..1..

ಜಗನ್ಮಂಗಳಕಂ ನಾಮ ಪ್ರಸಿದ್ಧಂ ಭುವನತ್ರಯೇ .
ಸರ್ವರಕ್ಷಾಕರಂ ನೄಣಾಂ ರಹಸ್ಯಮಪಿ ತದ್ವದ ..2..

ಶ್ರೀಶಿವ ಉವಾಚ .
ಶೃಣು ಕಳ್ಯಾಣಿ ವಕ್ಷ್ಯಾಮಿ ಕವಚಂ ಶತ್ರುನಿಗ್ರಹಂ .
ಪರಪ್ರೇಷಿತಕೃತ್ಯಾದಿ ತಂತ್ರಶಲ್ಯಾದಿಭಕ್ಷಣಂ ..3..

ಮಹಾಭಿಚಾರಶಮನಂ ಸರ್ವಕಾರ್ಯಪ್ರದಂ ನೃಣಾಂ .
ಪರಸೇನಾಸಮೂಹೇ ಚ ರಾಜ್ಞಾಮುದ್ದಿಶ್ಯ ಮಂಡಲಾತ್ ..4..

ಜಪಮಾತ್ರೇಣ ದೇವೇಶಿ ಸಮ್ಯಗುಚ್ಚಾಟನಂ ಭವೇತ್ .
ಸರ್ವತಂತ್ರಪ್ರಶಮನಂ ಕಾರಾಗೃಹವಿಮೋಚನಂ ..5..

ಕ್ಷಯಾಪಸ್ಮಾರಕುಷ್ಠಾದಿ ತಾಪಜ್ವರನಿವಾರಣಂ .
ಪುತ್ರದಂ ಧನದಂ ಶ್ರೀದಂ ಪುಣ್ಯದಂ ಪಾಪನಾಶನಂ ..6..

ವಶ್ಯಪ್ರದಂ ಮಹಾರಾಜ್ಞಾಂ ವಿಶೇಷಾಚ್ಛತ್ರುನಾಶನಂ .
ಸರ್ವರಕ್ಷಾಕರಂ ಶೂನ್ಯಗ್ರಹಪೀಡಾವಿನಾಶನಂ ..7..

ಬಿಂದುತ್ರಿಕೋಣಂ ತ್ವಥ ಪಂಚಕೋಣಂ
ದಳಾಷ್ಟಕಂ ಷೋಡಶಪತ್ರಯುಕ್ತಂ .
ಮಹೀಪುರೇಣಾವೃತಮಂಬುಜಾಕ್ಷೀ
ಲಿಖೇನ್ಮನೋರಂಜನಮಗ್ರತೋಪಿ ..8..

ಮಹೀಪುರಾತ್ವೂರ್ವಮೇವ ದ್ವಾತ್ರಿಂಶತ್ಪತ್ರಮಾಲಿಖೇತ್ .
ಅಂತರೇ ಭೂಪುರಂ ಲೇಖ್ಯಂ ಕೋಣಾಗ್ರೇ ಕ್ಷಾಂ ಸಮಾಲಿಖೇತ್ ..9..

ಭದ್ರಕಾಳೀಮನುಂ ಲೇಖ್ಯಂ ಮಂತ್ರಂ ಪ್ರತ್ಯಂಗಿರಾತ್ಮಕಂ .
ಭದ್ರಕಾಳ್ಯುಕ್ತಮಾರ್ಗೇಣ ಪೂಜ್ಯಾಂ ಪ್ರತ್ಯಂಗಿರಾಂ ಶಿವಾಂ ..10..

ರಕ್ತಪುಷ್ಪೈಃ ಸಮಭ್ಯರ್ಚ್ಯ ಕವಚಂ ಜಪಮಾಚರೇತ್ .
ಸಕೃತ್ಪಠನಮಾತ್ರೇಣ ಸರ್ವಶತ್ರೂನ್ ವಿನಾಶಯೇತ್ ..11..

ಶತ್ರವಶ್ಚ ಪಲಾಯಂ ತೇ ತಸ್ಯ ದರ್ಶನಮಾತ್ರತಃ .
ಮಾಸಮಾತ್ರಂ ಜಪೇದ್ದೇವಿ ಸರ್ವಶತ್ರೂನ್ ವಿನಾಶಯೇತ್ ..12..

ಅಥ ಕವಚಂ –
ಯಾಂ ಕಲ್ಪಯಂತೀ ಪ್ರದಿಶಂ ರಕ್ಷೇತ್ಕಾಳೀ ತ್ವಥರ್ವಣೀ .
ರಕ್ಷೇತ್ಕರಾಳಾತ್ವಾಗ್ನೇಯ್ಯಾಂ ಸದಾ ಮಾಂ ಸಿಂಹವಾಹಿನೀ ..13..

ಯಾಮ್ಯಾಂ ದಿಶಂ ಸದಾ ರಕ್ಷೇತ್ಕಕ್ಷಜ್ವಾಲಾಸ್ವರೂಪಿಣೀ .
ನೈರೃತ್ಯಾಂ ರಕ್ಷತು ಸದಾ ಮಾಸ್ಮಾನೃಚ್ಛೋ ಅನಾಗಸಃ ..14..

ವಾರುಣ್ಯಾಂ ರಕ್ಷತು ಮಮ ಪ್ರಜಾಂ ಚ ಪುರುಷಾರ್ಥಿನೀ .
ವಾಯವ್ಯಂ ರಕ್ಷಾತು ಸದಾ ಯಾತುಧಾನ್ಯೋ ಮಮಾಖಿಲಾಃ ..15..

ದಂಷ್ಟ್ರಾಕರಾಳವದನಾ ಕೌಬೇರ್ಯಾಂ ಬಡಬನಲಾ .
ಈಶಾನ್ಯಾಂ ಮೇ ಸದಾ ರಕ್ಷೇದ್ವೀರಾಂಶ್ಚಾನ್ಯಾನ್ನಿಬರ್ಹಯ ..16..

ಉಗ್ರಾ ರಕ್ಷೇದಧೋಭಾಗೇ ಮಾಯಾಮಂತ್ರಸ್ವರೂಪಿಣೀ .
ಊರ್ಧ್ವಂ ಕಪಾಲಿನೀ ರಕ್ಷೇತ್ ಕ್ಷಂ ಹ್ರೀಂ ಹುಂ ಫಟ್ ಸ್ವರೂಪಿಣೀ ..17..

ಅಧೋ ಮೇ ವಿದಶಂ ರಕ್ಷೇತ್ಕುರುಕುಳ್ಲಾ ಕಪಾಲಿನೀ .
ವಿಪ್ರಚಿತ್ತಾ ಸದಾ ರಕ್ಷೇತ್ ದಿವಾರಾತ್ರಂ ವಿರೋಧಿನೀ ..18..

ಕುರುಕುಳ್ಲಾ ತು ಮೇ ಪುತ್ರಾನ್ ಬಾಂಧವಾನುಗ್ರರೂಪಿಣೀ .
ಪ್ರಭಾದೀಪ್ತ ಗೃಹಾ ರಕ್ಷೇತ್ ಮಾತಾಪುತ್ರಾನ್ ಸಮಾತೃಕಾನ್ ..19..

ಸ್ವಭೃತ್ಯಾನ್ ಮೇ ಸದಾ ರಕ್ಷೇತ್ಪಾಯಾತ್ ಸಾ ಮೇ ಪಶೂನ್ ಸದಾ .
ಅಜಿತಾ ಮೇ ಸದಾ ರಕ್ಷೇದಪರಾಜಿತ ಕಾಮದಾ ..20..

ಕೃತ್ಯಾ ರಕ್ಷೇತ್ಸದಾಪ್ರಾಣಾನ್ ತ್ರಿನೇತ್ರಾ ಕಾಳರಾತ್ರಿಕಾ .
ಫಾಲಂ ಪಾತು ಮಹಾಕ್ರೂರಾ ಪಿಂಗಕೇಶೀ ಶಿರೋರುಹಾನ್ ..21..

ಭ್ರುವೌ ಮೇ ಕ್ರೂರವದನಾ ಪಾಯಾಚ್ಚಂಡೀ ಪ್ರಚಂಡಿಕಾ .
ಶ್ರೋತ್ರಯೋರ್ಯುಗಳಂ ಪಾತು ತದಾ ಮೇ ಶಂಖಕುಂಡಲಾ ..22..

ಪ್ರೇತಚಿತ್ಯಾಸನಾ ದೇವೀ ಪಾಯಾನ್ನೇತ್ರಯುಗ್ಮಂ ಮಮ .
ಮಮ ನಾಸಾಪುಟದ್ವಂದ್ವಂ ಬ್ರಹ್ಮರೋಚಿಷ್ಣ್ವಮಿತ್ರಹಾ ..23..

ಕಪೋಲಂ ಮೇ ಸದಾ ಪಾತು ಭೃಗವಶ್ಚಾಪ ಸೇಧಿರೇ .
ಊರ್ಧ್ವೋಷ್ಠಂ ತು ಸದಾ ಪಾತು ರಥಸ್ಯೇವ ವಿಭುರ್ಧಿಯಾ ..24..

ಅಧರೋಷ್ಠಂ ಸದಾ ಪಾತು ಆಜ್ಞಾತಸ್ತೇ ವಶೋ ಜನಃ .
ದಂತಪಂಕ್ತಿದ್ವಯಂ ಪಾತು ಬ್ರಹ್ಮರೂಪಾ ಕರಾಳಿನೀ ..25..

ವಾಚಂ ವಾಗೀಶ್ವರೀ ರಕ್ಷೇದ್ರಸನಾಂ ಜನನೀ ಮಮ .
ಚುಬುಕಂ ಪಾತು ಮೇಂದ್ರಾಣೀ ತನೂಂ ಋಚ್ಛಸ್ವ ಹೇಳಿಕಾ ..26..

ಕರ್ಣಸ್ಥಾನಂ ಮಮ ಸದಾ ರಕ್ಷತಾಂ ಕಂಬುಕಂಧರಾ .
ಕಂಠಧ್ವನಿಂ ಸದಾ ಪಾತು ನಾದಬ್ರಹ್ಮಮಯೀ ಮಮ ..27..

ಜಠರಂ ಮೇಂಗಿರಃ ಪುತ್ರೀ ಮೇ ವಕ್ಷಃ ಪಾತು ಕಾಂಚನೀ .
ಪಾತು ಮೇ ಭುಜಯೋರ್ಮೂಲಂ ಜಾತವೇದಸ್ವರೂಪಿಣೀ ..28..

ದಕ್ಷಿಣಂ ಮೇ ಭುಜಂ ಪಾತು ಸತತಂ ಕಾಳರಾತ್ರಿಕಾ .
ವಾಮಂ ಭುಜಂ ವಾಮಕೇಶೀ ಪರಾಯಂತೀ ಪರಾವತೀ ..29..

ಪಾತು ಮೇ ಕೂರ್ಪರದ್ವಂದ್ವಂ ಮನಸ್ತತ್ವಾಭಿಧಾ ಸತೀ .
ವಾಚಂ ವಾಗೀಶ್ವರೀ ರಕ್ಷೇದ್ರಸನಾಂ ಜನನೀ ಮಮ ..30..

ವಜ್ರೇಶ್ವರೀ ಸದಾ ಪಾತು ಪ್ರಕೋಷ್ಠಯುಗಳಂ ಮಮ .
ಮಣಿದ್ವಯಂ ಸದಾ ಪಾತು ಧೂಮ್ರಾ ಶತ್ರುಜಿಘಾಂಸಯಾ ..31..

ಪಾಯಾತ್ಕರತಲದ್ವಂದ್ವಂ ಕದಂಬವನವಾಸಿನೀ .
ವಾಮಪಾಣ್ಯಂಗುಳೀ ಪಾತು ಹಿನಸ್ತಿ ಪರಶಾಸನಂ ..32..

ಸವ್ಯಪಾಣ್ಯಂಗುಳೀ ಪಾತು ಯದವೈಷಿ ಚತುಷ್ಪದೀ .
ನಾಭಿಂ ನಿತ್ಯಾ ಸದಾ ಪಾತು ಜ್ವಾಲಾಭೈರವರೂಪಿಣೀ ..33..

ಪಂಚಾಸ್ಯಪೀಠನಿಲಯಾ ಪಾತು ಮೇ ಪಾರ್ಶ್ವಯೋರ್ಯುಗಂ .
ಪೃಷ್ಠಂ ಪ್ರಜ್ಞೇಶ್ವರೀ ಪಾತು ಕಟಿಂ ಪೃಥುನಿತಂಬಿನೀ ..34..

ಗುಹ್ಯಮಾನಂದರೂಪಾವ್ಯಾದಂಡಂ ಬ್ರಹ್ಮಾಂಡನಾಯಕೀ .
ಪಾಯಾನ್ಮಮ ಗುದಸ್ಥಾನಮಿಂದುಮೌಳಿಮನಃ ಶುಭಾ ..35..

ಬೀಜಂ ಮಮ ಸದಾ ಪಾತು ದುರ್ಗಾ ದುರ್ಗಾರ್ತಿಹಾರಿಣೀ .
ಊರೂ ಮೇ ಪಾತು ಕ್ಷಾಂತಾತ್ಮಾ ತ್ವಂ ಪ್ರತ್ಯಸ್ಯ ಸ್ವಮೃತ್ಯವೇ ..36..

ವನದುರ್ಗಾ ಸದಾ ಪಾತು ಜಾನುನೀ ವನವಾಸಿನೀ .
ಜಂಘಿಕಾಂಡದ್ವಯಂ ಪಾತು ಯಶ್ಚಜಾಮೀಶ ಪಾತು ನಃ ..37..

ಗುಲ್ಫಯೋರ್ಯುಗಳಂ ಪಾತು ಯೋಽಸ್ಮಾಂದ್ವೇಷ್ಟಿ ವಧಸ್ವ ತಂ .
ಪದದ್ವಂದ್ವಂ ಸದಾವ್ಯಾನ್ಮೇ ಪದಾವಿಸ್ಫಾರ್ಯ ತಚ್ಛಿರಃ ..38..

ಅಭಿಪ್ರೇಹಿ ಸಹಸ್ರಾಕ್ಷಂ ಪಾದಯೋರ್ಯುಗಳಂ ಮಮ .
ಪಾಯಾನ್ಮಮ ಪದದ್ವಂದ್ವಂ ದಹನ್ನಗ್ನಿರಿವ ಹ್ರದಂ ..39..

ಸರ್ವಾಂಗಂ ಸರ್ವದಾ ಪಾತು ಸರ್ವಪ್ರಕೃತಿರೂಪಿಣೀ .
ಮಂತ್ರಂ ಪ್ರತ್ಯಂಗಿರಾ ದೇವೀ ಕೃತ್ಯಾಶ್ಚ ಸಹೃದೋ ಸುಹೃತ್ ..40..

ಪರಾಭಿಚಾರಕೃತ್ಯಾತ್ಮ ಸಮಿದ್ಧಂ ಜಾತವೇದಸಂ .
ಪರಪ್ರೇಷಿತಶಲ್ಯಾತ್ಮೇ ತಮಿತೋ ನಾಶಯಾಮಸಿ ..41..

ವೃಕ್ಷಾದಿ ಪ್ರತಿರೂಪಾತ್ಮಾ ಶಿವಂ ದಕ್ಷಿಣತಃ ಕೃಧಿ .
ಅಭಯಂ ಸತತಂ ಪಶ್ಚಾದ್ಭದ್ರಮುತ್ತರತೋ ಗೃಹೇ ..42..

ಭೂತಪ್ರೇತಪಿಶಾಚಾದ್ಯಾನ್ ಪ್ರೇಷಿತಾನ್ ಜಹಿ ಮಾಂ ಪ್ರತಿ .
ಭೂತಪ್ರೇತಪಿಶಾಚಾದಿ ಪರತಂತ್ರವಿನಾಶಿನೀ ..43..

ಪರಾಭಿಚಾರಶಮನೀ ಧಾರಣಾತ್ಸರ್ವಸಿದ್ಧಿದಾಂ .
ಭೂರ್ಜಪತ್ರೇ ಸ್ವರ್ಣಪತ್ರೇ ಲಿಖಿತ್ವಾ ಧಾರಯೇದ್ಯದಿ ..44..

ಸರ್ವಸಿದ್ಧಿಮವಾಪ್ನೋತಿ ಸರ್ವತ್ರ ವಿಜಯೀ ಭವೇತ್ .
ಏಕಾವೃತ್ತಿಂ ಜಪೇದ್ದೇವಿ ಸರ್ವಋಗ್ಜಪದಾ ಭವೇತ್ ..45..

ಭದ್ರಕಾಳೀ ಪ್ರಸನ್ನಾಽಭೂದಭೀಷ್ಟಫಲದಾ ಭವೇತ್ .
ಬಂದೀಗೃಹೇ ಸಪ್ತರಾತ್ರಂ ಚೋರದ್ರವ್ಯೇಽಷ್ಟರಾತ್ರಕಂ ..46..

ಮಹಾಜ್ವರೇ ಸಪ್ತರಾತ್ರಂ ಉಚ್ಚಾಟೇ ಮಾಸಮಾತ್ರಕಂ .
ಮಹಾವ್ಯಾಧಿನಿವೃತ್ತಿಃ ಸ್ಯಾನ್ಮಂಡಲಂ ಜಪಮಾಚರೇತ್ ..47..

ಪುತ್ರಕಾರ್ಯೇ ಮಾಸಮಾತ್ರಂ ಮಹಾಶತ್ರುತ್ವಮಂಡಲಾತ್ .
ಯುದ್ಧಕಾರ್ಯೇ ಮಂಡಲಂ ಸ್ಯಾದ್ಧಾರ್ಯಂ ಸರ್ವೇಷು ಕರ್ಮಸು ..48..

ಅಸ್ಮಿನ್ಯಜ್ಞೇ ಸಮಾವಾಹ್ಯ ರಕ್ತಪುಷ್ಪೈಃ ಸಮರ್ಚಯೇತ್ .
ನತ್ವಾ ನ ಕುರ್ತು ಮರ್ಹಾಸಿ ಇಷುರೂಪೇ ಗೃಹಾತ್ಸದಾ ..49..

ಶಾಸ್ತಾಲಯೇ ಚತುಷ್ಪಥೇ ಸ್ವಗೃಹೇ ಗೇಹಳೀಸ್ಥಲೇ .
ನಿಖನೇದ್ಯಂ ತ್ರಿಶಲ್ಯಾದಿ ತದರ್ಥಂ ಪ್ರಾಪಯಾಶುಮೇ ..50..

ಮಾಸೋಚ್ಛಿಷ್ಟಶ್ಚ ದ್ವಿಪದಮೇತತ್ಕಿಂಚಿಚ್ಚತುಷ್ಪದಂ .
ಮಾಜ್ಞಾತಿರನುಜಾನಸ್ಯಾನ್ಮಾಸಾವೇಶಿ ಪ್ರವೇಶಿನಃ ..51..

ಬಲೇ ಸ್ವಪ್ನಸ್ಥಲೇ ರಕ್ಷೇದ್ಯೋ ಮೇ ಪಾಪಂ ಚಿಕೀರ್ಷತಿ .
ಆಪಾದಮಸ್ತಕಂ ರಕ್ಷೇತ್ತಮೇವ ಪ್ರತಿಧಾವತು ..52..

ಪ್ರತಿಸರ ಪ್ರತಿಧಾವ ಕುಮಾರೀವ ಪಿತುರ್ಗೃಹಂ .
ಮೂರ್ಧಾನಮೇಷಾಂ ಸ್ಫೋಟಯ ವಧಾಮ್ಯೇಷಾಂ ಕುಲೇ ಜಹೀ ..53..

ಯೇ ಮೇ ಮನಸಾ ವಾಚಾ ಯಶ್ಚ ಪಾಪಂ ಚಿಕೀರ್ಷತಿ .
ತತ್ಸರ್ವಂ ರಕ್ಷತಾಂ ದೇವೀ ಜಹಿ ಶತ್ರೂನ್ ಸದಾ ಮಮ ..54..

ಖಟ್ ಫಟ್ ಜಹಿ ಮಹಾಕೃತ್ಯೇ ವಿಧೂಮಾಗ್ನಿ ಸಮಪ್ರಭೇ .
ದೇವಿ ದೇವಿ ಮಹಾದೇವಿ ಮಮ ಶತ್ರೂನ್ವಿನಾಶಯ ..55..

ತ್ರಿಕಾಲಂ ರಕ್ಷ ಮಾಂ ದೇವಿ ಪಠತಾಂ ಪಾಪನಾಶನಂ .
ಸರ್ವಶತ್ರುಕ್ಷಯಕರಂ ಸರ್ವವ್ಯಾಧಿವಿನಾಶನಂ ..56..

ಇದಂ ತು ಕವಚಂ ಜ್ಞಾತ್ವಾ ಜಪೇತ್ಪ್ರತ್ಯಂಗಿರಾ ಋಚಂ .
ಶತಲಕ್ಷಂ ಪ್ರಜಪ್ತ್ವಾಪಿ ತಸ್ಯ ವಿದ್ಯಾ ನ ಸಿಧ್ಯತಿ ..57..

ಮಂತ್ರಸ್ವರೂಪಕವಚಮೇಕಕಾಲಂ ಪಠೇದ್ಯದಿ .
ಭದ್ರಕಾಳೀ ಪ್ರಸನ್ನಾತ್ಮಾ ಸರ್ವಭೀಷ್ಟಂ ದದಾತಿ ಹಿ ..58..

ಮಹಾಪನ್ನೋ ಮಹಾರೋಗೀ ಮಹಾಗ್ರಂಥ್ಯಾದಿಪೀಡಿನೇ .
ಕವಚಂ ಪ್ರಥಮಂ ಜಪ್ತ್ವಾ ಪಶ್ಚಾದೃಗ್ಜಪಮಾಚರೇತ್ ..59..

ಪಕ್ಷಮಾತ್ರಾತ್ ಸರ್ವರೋಗಾ ನಶ್ಯಂತ್ಯೇವ ಹಿ ನಿಶ್ಚಯಂ .
ಮಹಾಧನಪ್ರದಂ ಪುಂಸಾಂ ಮಹಾದುಃಸ್ವಪ್ನನಾಶನಂ ..60..

ಸರ್ವಮಂಗಳದಂ ನಿತ್ಯಂ ವಾಂಛಿತಾರ್ಥಫಲಪ್ರದಂ .
ಕೃತ್ಯಾದಿ ಪ್ರೇಷಿತೇ ಗ್ರಸ್ತೇ ಪುರಸ್ತಾಜ್ಜುಹುಯಾದ್ಯದಿ ..61..

ಪ್ರೇಷಿತಂ ಪ್ರಾಪ್ಯ ಝಡಿತಿ ವಿನಾಶಂ ಪ್ರದದಾತಿ ಹಿ .
ಸ್ವಗೃಹ್ಯೋಕ್ತವಿಧಾನೇನ ಪ್ರತಿಷ್ಠಾಪ್ಯ ಹೂತಾಶನಂ ..62..

ತ್ರಿಕೋಣಕುಂಡೇ ಚಾವಾಹ್ಯ ಷೋಡಶೈರುಪಚಾರತಃ .
ಯೋ ಮೇ ಕರೋತಿ ಮಂತ್ರೇಣ ಖಟ್ ಫಟ್ ಜಹೀತಿ ಮಂತ್ರತಃ ..63..

ಹುನೇದಯುತಮಾತ್ರೇಣ ಯಂತ್ರಸ್ಯ ಪುರತೋ ದ್ವಿಜಃ .
ಕ್ಷಣಾದಾವೇಶಮಾಪ್ನೋತಿ ಭೂತಗ್ರಸ್ತಕಳೇಬರೇ ..64..

ವಿಭೀತಕಮಪಾಮಾರ್ಗಂ ವಿಷವೃಕ್ಷಸಮುದ್ಭವಂ .
ಗುಳೂಚೀಂ ವಿಕತಂ ಕಾಂತಮಂಕೋಲಂ ನಿಂಬವೃಕ್ಷಕಂ ..65..

ತ್ರಿಕಟುಂ ಸರ್ಷಪಂ ಶಿಗ್ರುಂ ಲಶುನಂ ಭ್ರಾಮಕಂ ಫಲಂ .
ಪಂಚ ಋಗ್ಭಿಃ ಸುಸಂಪಾದ್ಯ ಆಚಾರ್ಯಸಹಿತಃ ಶುಚಿಃ ..66..

ದಿನಮೇಕ ಸಹಸ್ರಂ ತು ಹುನೇದ್ಧ್ಯಾನ ಪುರಃ ಸರಃ .
ಸರ್ವಾರಿಷ್ಟಃ ಸರ್ವಶಾಂತಿಃ ಭವಿಷ್ಯತಿ ನ ಸಂಶಯಃ ..67..

ಶತ್ರುಕೃತ್ಯೇ ಚೈವಮೇವ ಹುನೇದ್ಯದಿ ಸಮಾಹಿತಃ .
ಸ ಶತ್ರುರ್ಮಿತ್ರಪುತ್ರಾದಿಯುಕ್ತೋ ಯಮಪುರೀಂ ವ್ರಜೇತ್ ..68..

ಬ್ರಹ್ಮಾಽಪಿ ರಕ್ಷಿತುಂ ನೈವ ಶಕ್ತಿಃ ಪ್ರತಿನಿವರ್ತನೇ .
ಮಹತ್ಕಾರ್ಯಸಮಾಯೋಗೇ ಏವಮೇವಂ ಸಮಾಚರೇತ್ ..69..

ತತ್ಕಾರ್ಯಂ ಸಫಲಂ ಪ್ರಾಪ್ಯ ವಾಂಛಿತಾನ್ ಲಭತೇ ಸುಧೀಃ .
ಇದಂ ರಹಸ್ಯಂ ದೇವೇಶಿ ಮಂತ್ರಯುಕ್ತಂ ತವಾನಘೇ ..70..

ಶಿಷ್ಯಾಯ ಭಕ್ತಿಯುಕ್ತಾಯ ವಕ್ತವ್ಯಂ ನಾನ್ಯಮೇವ ಹಿ .
ನಿಕುಂಭಿಳಾಮಿಂದ್ರಜಿತಾ ಕೃತಂ ಜಯ ರಿಪುಕ್ಷಯೇ ..71..

ಇತಿ ಶ್ರೀಮಹಾಲಕ್ಷ್ಮೀತಂತ್ರೇ ಪ್ರತ್ಯಕ್ಷಸಿದ್ಧಿಪ್ರದೇ ಉಮಾಮಹೇಶ್ವರ ಸಂವಾದೇ ಶ್ರೀ ಶಂಕರೇಣ ವಿರಚಿತೇ ಶ್ರೀ ಪ್ರತ್ಯಂಗಿರಾ ಕವಚಂ..