ಶ್ರೀ ಮಹಾಲಕ್ಷ್ಮೀ ಸ್ತೋತ್ರಂ (ವಿಷ್ಣು ಪುರಾಣಾಂತರ್ಗತಂ)

ಶ್ರೀಗಣೇಶಾಯ ನಮಃ .
ಶ್ರೀಪರಾಶರ ಉವಾಚ
ಸಿಂಹಾಸನಗತಃ ಶಕ್ರಸ್ಸಂಪ್ರಾಪ್ಯ ತ್ರಿದಿವಂ ಪುನಃ .
ದೇವರಾಜ್ಯೇ ಸ್ಥಿತೋ ದೇವೀಂ ತುಷ್ಟಾವಾಬ್ಜಕರಾಂ ತತಃ ..1..

ಇಂದ್ರ ಉವಾಚ
ನಮಸ್ಯೇ ಸರ್ವಲೋಕಾನಾಂ ಜನನೀಮಬ್ಜಸಂಭವಾಂ . var  ಸರ್ವಭೂತಾನಾಂ
ಶ್ರಿಯಮುನ್ನಿದ್ರಪದ್ಮಾಕ್ಷೀಂ ವಿಷ್ಣುವಕ್ಷಃಸ್ಥಲಸ್ಥಿತಾಂ ..2..

ಪದ್ಮಾಲಯಾಂ ಪದ್ಮಕರಾಂ ಪದ್ಮಪತ್ರನಿಭೇಕ್ಷಣಾಂ
ವಂದೇ ಪದ್ಮಮುಖೀಂ ದೇವೀಂ ಪದ್ಮನಾಭಪ್ರಿಯಾಮಹಂ ..3..

ತ್ವಂ ಸಿದ್ಧಿಸ್ತ್ವಂ ಸ್ವಧಾ ಸ್ವಾಹಾ ಸುಧಾ ತ್ವಂ ಲೋಕಪಾವನೀ .
ಸಂಧ್ಯಾ ರಾತ್ರಿಃ ಪ್ರಭಾ ಭೂತಿರ್ಮೇಧಾ ಶ್ರದ್ಧಾ ಸರಸ್ವತೀ ..4..

ಯಜ್ಞವಿದ್ಯಾ ಮಹಾವಿದ್ಯಾ ಗುಹ್ಯವಿದ್ಯಾ ಚ ಶೋಭನೇ .
ಆತ್ಮವಿದ್ಯಾ ಚ ದೇವಿ ತ್ವಂ ವಿಮುಕ್ತಿಫಲದಾಯಿನೀ ..5..

ಆನ್ವೀಕ್ಷಿಕೀ ತ್ರಯೀ ವಾರ್ತಾ ದಂಡನೀತಿಸ್ತ್ವಮೇವ ಚ .
ಸೌಮ್ಯಾಸೌಮ್ಯೈರ್ಜಗದ್ರೂಪೈಸ್ತ್ವಯೈತದ್ದೇವಿ ಪೂರಿತಂ ..6..

ಕಾ ತ್ವನ್ಯಾ ತ್ವಾಮೃತೇ ದೇವಿ ಸರ್ವಯಜ್ಞಮಯಂ ವಪುಃ .
ಅಧ್ಯಾಸ್ತೇ ದೇವದೇವಸ್ಯ ಯೋಗಚಿಂತ್ಯಂ ಗದಾಭೃತಃ ..7..

ತ್ವಯಾ ದೇವಿ ಪರಿತ್ಯಕ್ತಂ ಸಕಲಂ ಭುವನತ್ರಯಂ .
ವಿನಷ್ಟಪ್ರಾಯಮಭವತ್ತ್ವಯೇದಾನೀಂ ಸಮೇಧಿತಂ ..8..

ದಾರಾಃ ಪುತ್ರಾಸ್ತಥಾಽಽಗಾರಸುಹೃದ್ಧಾನ್ಯಧನಾದಿಕಂ .
ಭವತ್ಯೇತನ್ಮಹಾಭಾಗೇ ನಿತ್ಯಂ ತ್ವದ್ವೀಕ್ಷಣಾನ್ನೃಣಾಂ ..9..

ಶರೀರಾರೋಗ್ಯಮೈಶ್ವರ್ಯಮರಿಪಕ್ಷಕ್ಷಯಃ ಸುಖಂ .
ದೇವಿ ತ್ವದ್ದೃಷ್ಟಿದೃಷ್ಟಾನಾಂ ಪುರುಷಾಣಾಂ ನ ದುರ್ಲಭಂ ..10..

ತ್ವಮಂಬಾ ಸರ್ವಭೂತಾನಾಂ ದೇವದೇವೋ ಹರಿಃ ಪಿತಾ . var  ತ್ವಂ ಮಾತಾ ಸರ್ವಲೋಕಾನಾಂ
ತ್ವಯೈತದ್ವಿಷ್ಣುನಾ ಚಾಂಬ ಜಗದ್ವ್ಯಾಪ್ತಂ ಚರಾಚರಂ ..11..

ಮಾ ನಃ ಕೋಶಸ್ತಥಾ ಗೋಷ್ಠಂ ಮಾ ಗೃಹಂ ಮಾ ಪರಿಚ್ಛದಂ .
ಮಾ ಶರೀರಂ ಕಲತ್ರಂ ಚ ತ್ಯಜೇಥಾಃ ಸರ್ವಪಾವನಿ ..12..

ಮಾ ಪುತ್ರಾನ್ಮಾ ಸುಹೃದ್ವರ್ಗಾನ್ಮಾ ಪಶೂನ್ಮಾ ವಿಭೂಷಣಂ .
ತ್ಯಜೇಥಾ ಮಮ ದೇವಸ್ಯ ವಿಷ್ಣೋರ್ವಕ್ಷಃಸ್ಥಲಾಶ್ರಯೇ ..13..

ಸತ್ತ್ವೇನ ಸತ್ಯಶೌಚಾಭ್ಯಾಂ ತಥಾ ಶೀಲಾದಿಭಿರ್ಗುಣೈಃ .
ತ್ಯಜ್ಯಂತೇ ತೇ ನರಾಃ ಸದ್ಯಃ ಸಂತ್ಯಕ್ತಾ ಯೇ ತ್ವಯಾಽಮಲೇ ..14..

ತ್ವಯಾಽವಲೋಕಿತಾಃ ಸದ್ಯಃ ಶೀಲಾದ್ಯೈರಖಿಲೈರ್ಗುಣೈಃ .
ಕುಲೈಶ್ವರ್ಯೈಶ್ಚ ಪೂಜ್ಯಂತೇ ಪುರುಷಾ ನಿರ್ಗುಣಾ ಅಪಿ ..15..

ಸ ಶ್ಲಾಘ್ಯಃ ಸ ಗುಣೀ ಧನ್ಯಃ ಸ ಕುಲೀನಃ ಸ ಬುದ್ಧಿಮಾನ್ .
ಸ ಶೂರಃ ಸ ಚ ವಿಕ್ರಾಂತೋ ಯಸ್ತ್ವಯಾ ದೇವಿ ವೀಕ್ಷಿತಃ ..16..

ಸದ್ಯೋ ವೈಗುಣ್ಯಮಾಯಾಂತಿ ಶೀಲಾದ್ಯಾಃ ಸಕಲಾ ಗುಣಾಃ .
ಪರಾಂಗಮುಖೀ ಜಗದ್ಧಾತ್ರೀ ಯಸ್ಯ ತ್ವಂ ವಿಷ್ಣುವಲ್ಲಭೇ ..17..

ನ ತೇ ವರ್ಣಯಿತುಂ ಶಕ್ತಾ ಗುಣಾಂಜಿಹ್ವಾಽಪಿ ವೇಧಸಃ .
ಪ್ರಸೀದ ದೇವಿ ಪದ್ಮಾಕ್ಷಿ ಮಾಽಸ್ಮಾಂಸ್ತ್ಯಾಕ್ಷೀಃ ಕದಾಚನ ..18..

ಶ್ರೀಪರಾಶರ ಉವಾಚ
ಏವಂ ಶ್ರೀಃ ಸಂಸ್ತುತಾ ಸಮ್ಯಕ್ ಪ್ರಾಹ ಹೃಷ್ಟಾ ಶತಕ್ರತುಂ .
ಶೃಣ್ವತಾಂ ಸರ್ವದೇವಾನಾಂ ಸರ್ವಭೂತಸ್ಥಿತಾ ದ್ವಿಜ ..19..

ಶ್ರೀರುವಾಚ
ಪರಿತುಷ್ಟಾಸ್ಮಿ ದೇವೇಶ ಸ್ತೋತ್ರೇಣಾನೇನ ತೇ ಹರೇ .
ವರಂ ವೃಣೀಷ್ವ ಯಸ್ತ್ವಿಷ್ಟೋ ವರದಾಽಹಂ ತವಾಗತಾ ..20..

ಇಂದ್ರ ಉವಾಚ
ವರದಾ ಯದಿಮೇದೇವಿ ವರಾರ್ಹೋ ಯದಿ ವಾಽಪ್ಯಹಂ .
ತ್ರೈಲೋಕ್ಯಂ ನ ತ್ವಯಾ ತ್ಯಾಜ್ಯಮೇಷ ಮೇಽಸ್ತು ವರಃ ಪರಃ ..21..

ಸ್ತೋತ್ರೇಣ ಯಸ್ತಥೈತೇನ ತ್ವಾಂ ಸ್ತೋಷ್ಯತ್ಯಬ್ಧಿಸಂಭವೇ .
ಸ ತ್ವಯಾ ನ ಪರಿತ್ಯಾಜ್ಯೋ ದ್ವಿತೀಯೋಽಸ್ತು ವರೋ ಮಮ ..22..

ಶ್ರೀರುವಾಚ
ತ್ರೈಲೋಕ್ಯಂ ತ್ರಿದಶಶ್ರೇಷ್ಠ ನ ಸಂತ್ಯಕ್ಷ್ಯಾಮಿ ವಾಸವ .
ದತ್ತೋ ವರೋ ಮಯಾಽಯಂ ತೇ ಸ್ತೋತ್ರಾರಾಧನತುಷ್ಟಯಾ ..23..

ಯಶ್ಚ ಸಾಯಂ ತಥಾ ಪ್ರಾತಃ ಸ್ತೋತ್ರೇಣಾನೇನ ಮಾನವಃ .
ಸ್ತೋಷ್ಯತೇ ಚೇನ್ನ ತಸ್ಯಾಹಂ ಭವಿಷ್ಯಾಮಿ ಪರಾಂಗ್ಮುಖೀ ..24..

ಶ್ರೀಪಾರಾಶರ ಉವಾಚ
ಏವಂ ವರಂ ದದೌ ದೇವೀ ದೇವರಾಜಾಯ ವೈ ಪುರಾ .
ಮೈತ್ರೇಯ ಶ್ರೀರ್ಮಹಾಭಾಗಾ ಸ್ತೋತ್ರಾರಾಧನತೋಷಿತಾ ..25..

ಭೃಗೋಃ ಖ್ಯಾತ್ಯಾಂ ಸಮುತ್ಪನ್ನಾ ಶ್ರೀಃ ಪೂರ್ವಮುದಧೇಃ ಪುನಃ .
ದೇವದಾನವಯತ್ನೇನ ಪ್ರಸೂತಾಽಮೃತಮಂಥನೇ ..26..

ಏವಂ ಯದಾ ಜಗತ್ಸ್ವಾಮೀ ದೇವರಾಜೋ ಜನಾರ್ದನಃ .
ಅವತಾರಃ ಕರೋತ್ಯೇಷಾ ತದಾ ಶ್ರೀಸ್ತತ್ಸಹಾಯಿನೀ ..27..

ಪುನಶ್ಚಪದ್ಮಾ ಸಂಭೂತಾ ಯದಾಽದಿತ್ಯೋಽಭವದ್ಧರಿಃ .
ಯದಾ ಚ ಭಾರ್ಗವೋ ರಾಮಸ್ತದಾಭೂದ್ಧರಣೀತ್ವಿಯಂ ..28..

ರಾಘವತ್ವೇಽಭವತ್ಸೀತಾ ರುಕ್ಮಿಣೀ ಕೃಷ್ಣಜನ್ಮನಿ .
ಅನ್ಯೇಷು ಚಾವತಾರೇಷು ವಿಷ್ಣೋರೇಖಾಽನಪಾಯಿನೀ ..29..

ದೇವತ್ವೇ ದೇವದೇಹೇಯಂ ಮಾನುಷತ್ವೇ ಚ ಮಾನುಷೀ .
ವಿಷ್ಣೋರ್ದೇಹಾನುರುಪಾಂ ವೈ ಕರೋತ್ಯೇಷಾಽಽತ್ಮನಸ್ತನುಂ ..30..

ಯಶ್ಚೈತಶೃಣುಯಾಜ್ಜನ್ಮ ಲಕ್ಷ್ಮ್ಯಾ ಯಶ್ಚ ಪಠೇನ್ನರಃ .
ಶ್ರಿಯೋ ನ ವಿಚ್ಯುತಿಸ್ತಸ್ಯ ಗೃಹೇ ಯಾವತ್ಕುಲತ್ರಯಂ ..31..

ಪಠ್ಯತೇ ಯೇಷು ಚೈವರ್ಷೇ ಗೃಹೇಷು ಶ್ರೀಸ್ತವಂ ಮುನೇ .
ಅಲಕ್ಷ್ಮೀಃ ಕಲಹಾಧಾರಾ ನ ತೇಷ್ವಾಸ್ತೇ ಕದಾಚನ ..32..

ಏತತ್ತೇ ಕಥಿತಂ ಬ್ರಹ್ಮನ್ಯನ್ಮಾಂ ತ್ವಂ ಪರಿಪೃಚ್ಛಸಿ .
ಕ್ಷೀರಾಬ್ಧೌ ಶ್ರೀರ್ಯಥಾ ಜಾತಾ ಪೂರ್ವಂ ಭೃಗುಸುತಾ ಸತೀ ..33..

ಇತಿ ಸಕಲವಿಭೂತ್ಯವಾಪ್ತಿಹೇತುಃ ಸ್ತುತಿರಿಯಮಿಂದ್ರಮುಖೋದ್ಗತಾ ಹಿ ಲಕ್ಷ್ಮ್ಯಾಃ .
ಅನುದಿನಮಿಹ ಪಠ್ಯತೇ ನೃಭಿರ್ಯೈರ್ವಸತಿ ನ ತೇಷು ಕದಾಚಿದಪ್ಯಲಕ್ಷ್ಮೀಃ ..34..

..ಇತಿ ಶ್ರೀವಿಷ್ಣುಪುರಾಣೇ ಮಹಾಲಕ್ಷ್ಮೀ ಸ್ತೋತ್ರಂ ಸಂಪೂರ್ಣಂ ..