ಶ್ರೀ ವೀರಭದ್ರ ಕವಚಂ

ಓಂ ಅಸ್ಯ ಶ್ರೀ ವೀರಭದ್ರ ಕವಚ ಮಹಾಮಂತ್ರಸ್ಯ ಪಶುಪತಿ ಋಷಿಃ,
ಅನುಷ್ಟುಪ್ ಛಂದಃ, ಶ್ರೀ ಭದ್ರಕಾಳೀ ಸಮೇತ ವೀರಭದ್ರೋ ದೇವತಾ,
ಹ್ರಾಂ ಶಕ್ತಿಃ, ಕ್ಲೀಂ ಕೀಲಕಂ,
ಶ್ರೀ ಭದ್ರಕಾಳೀ ಸಮೇತ ವೀರಭದ್ರೇಶ್ವರ ಪ್ರಸಾದ ಸಿದ್ಧ್ಯರ್ಥೇ ಜಪೇ ವಿನಿಯೋಗಃ ||

ಕರನ್ಯಾಸಃ ||
ಓಂ ಹ್ರಾಂ ಯಾಂ ಅಂಗುಷ್ಠಾಭ್ಯಾಂ ನಮಃ |
ಓಂ ಹ್ರೀಂ ರಾಂ ತರ್ಜನೀಭ್ಯಾಂ ನಮಃ |
ಓಂ ಹ್ರೂಂ ಲಾಂ ಮಧ್ಯಮಾಭ್ಯಾಂ ನಮಃ |
ಓಂ ಹ್ರೈಂ ವಾಂ ಅನಾಮಿಕಾಭ್ಯಾಂ ನಮಃ |
ಓಂ ಹೌಂ ಶಾಂ ಕನಿಷ್ಠಿಕಾಭ್ಯಾಂ ನಮಃ |
ಓಂ ಹ್ರಃ ಷಾಂ ಕರತಲಕರಪೃಷ್ಠಾಭ್ಯಾಂ ನಮಃ ||

ಅಂಗನ್ಯಾಸಃ ||
ಓಂ ಹ್ರಾಂ ಸಾಂ ಹೃದಯಾಯ ನಮಃ |
ಓಂ ಹ್ರೀಂ ಳಾಂ ಶಿರಸೇ ಸ್ವಾಹಾ |
ಓಂ ಹ್ರೂಂ ಕ್ಷಾಂ ಶಿಖಾಯೈ ವಷಟ್ |
ಓಂ ಹ್ರೈಂ ಬ್ರಾಂ ಕವಚಾಯ ಹುಂ |
ಓಂ ಹ್ರೌಂ ದ್ರಾಂ ನೇತ್ರತ್ರಯಾಯ ವೌಷಟ್ |
ಓಂ ಹ್ರಃ ಕ್ಷಾಂ ಅಸ್ತ್ರಾಯ ಫಟ್ |
ಭೂರ್ಭುವಸ್ಸುವರೋಮಿತಿ ದಿಗ್ಬಂಧಃ ||

ಧ್ಯಾನಂ ||
ರುದ್ರಂ ರೌದ್ರಾವತಾರಂ ಹುತವಹನಯನಂ ಚೋರ್ಧ್ವಕೇಶಂ ಸುದಂಷ್ಟ್ರಂ
ವ್ಯೋಮಾಂಗಂ ಭೀಮರೂಪಂ ಕಿಣಿಕಿಣಿರಭಸಜ್ವಾಲಮಾಲಾವೃತಾಂಗಂ |
ಭೂತಪ್ರೇತಾಧಿನಾಥಂ ಕರಕಮಲಯುಗೇ ಖಡ್ಗಪಾತ್ರೇ ವಹಂತಂ
ವಂದೇ ಲೋಕೈಕವೀರಂ ತ್ರಿಭುವನವಿನುತಂ ಶ್ಯಾಮಲಂ ವೀರಭದ್ರಂ ||

ಅಥ ಕವಚಂ ||

ಲಲಾಟಂ ವೀರಭದ್ರೋ ವ್ಯಾಚ್ಚಕ್ಷುಷೀ ಚೋರ್ಧ್ವಕೇಶಭೃತ್ |
ಭ್ರೂಮಧ್ಯಂ ಭೂತನಾಥೋಽವ್ಯಾನ್ನಾಸಿಕಾಂ ವೀರವಿಗ್ರಹಃ || ೧ ||

ಕಪಾಲೀ ಕರ್ಣಯುಗಳಂ ಕಂಧರಂ ನೀಲಕಂಧರಃ |
ವದನಂ ಭದ್ರಕಾಳೀಶೋ ಚುಬುಕಂ ಚಂದ್ರಖಂಡಭೃತ್ || ೨ ||

ಕರೌ ಪಾಶಕರಃ ಪಾತು ಬಾಹೂ ಪಾತು ಮಹೇಶ್ವರಃ |
ಊರುಸ್ಥಲಂ ಚೋಗ್ರದಂಷ್ಟ್ರ ಆನಂದಾತ್ಮಾ ಹೃದಂಬುಜಂ || ೩ ||

ರುದ್ರಮೂರ್ತಿರ್ನಾಭಿಮಧ್ಯಂ ಕಟಿಂ ಮೇ ಪಾತು ಶೂಲಭೃತ್ |
ಮೂರ್ಧಾನಂ ಪಂಚಮೂರ್ಧಾ ವ್ಯಾನ್ನಿಟಲಂ ನಿರ್ಮಲೇಂದುಭೃತ್ || ೪ ||

ಕಪೋಲಯುಗ್ಮಂ ಕಾಪಾಲೀ ಜಿಹ್ವಾಂ ಮೇ ಜೀವನಾಯಕಃ |
ಸ್ವಸದ್ವಯಂ ಪಶುಪತಿರ್ಲಿಂಗಂ ಮೇ ಲಿಂಗರೂಪಧೃತ್ || ೫ ||

ಸರ್ವಾಂಗುಲೀಃ ಸರ್ವನಾಥೋ ನಖಾನ್ಮೇ ನಾಗಭೂಷಣಃ |
ಪಾರ್ಶ್ವಯುಗ್ಮಂ ಶಕ್ತಿಹಸ್ತೋ ಸರ್ವಾಂಗಂ ದೇವವಲ್ಲಭಃ || ೬ ||

ಸರ್ವಕಾರ್ಯೇಷು ಮಾಂ ಪಾಯಾದ್ಭದ್ರಕಾಳೀಮನೋಹರಃ |
ಬ್ರಹ್ಮರಾಕ್ಷಸಪೈಶಾಚಭೇತಾಳರಣಭೂಮಿಷು || ೭ ||

ಸರ್ವೇಶ್ವರಃ ಸದಾ ಪಾತು ಸರ್ವದೇವಮದಾಪಹಃ |
ಶೀತೋಷ್ಣಯೋಶ್ಚಾಂಧಕಾರೇ ನಿಮ್ನೋನ್ನತಭುವಿಸ್ಥಲೇ || ೮ ||

ಕಂಟಕೇಷ್ವಪಿ ದುರ್ಗೇಷು ಪರ್ವತೇಽಪಿ ಚ ದುರ್ಗಮೇ |
ಶಸ್ತ್ರಾಸ್ತ್ರಮುಖಭಲ್ಲೂಕವ್ಯಾಘ್ರಚೋರಭಯೇಷು ಚ || ೯ ||

ರಾಜಾದ್ಯುಪದ್ರವೇ ಚೈವ ಪಾಯಾಚ್ಚರಭರೂಪಧೃತ್ |
ಯ ಏತದ್ವೀರಭದ್ರಸ್ಯ ಕವಚಂ ಪಠತೇ ನರಃ || ೧೦ ||

ಸೋಽಪಮೃತ್ಯುಭಯಂ ಮುಕ್ತ್ವಾ ಸುಖಂ ಪ್ರಾಪ್ನೋತಿ ನಿಶ್ಚಯಂ |
ಮೋಕ್ಷಾರ್ಥೀ ಮೋಕ್ಷಮಾಪ್ನೋತಿ ಧನಾರ್ಥೀ ಲಭತೇ ಧನಂ || ೧೧ ||

ವಿದ್ಯಾರ್ಥೀ ಲಭತೇ ವಿದ್ಯಾಂ ಜಯಾರ್ಥೀ ಜಯಮಾಪ್ನುಯಾತ್ |
ದೇಹಾಂತೇ ಶಿವಸಾಯುಜ್ಯಮವಾಪ್ನೋತಿ ನ ಸಂಶಯಃ || ೧೨ ||

ಏತತ್ಕವಚಮೀಶಾನಿ ನ ದೇಯಂ ಯಸ್ಯ ಕಸ್ಯ ಚಿತ್ |
ಸಕುಲೀನಾಯ ಶಾಂತಾಯ ಶಿವಭಕ್ತಿರತಾಯ ಚ || ೧೩ ||

ಶಿಷ್ಯಾಯ ಗುರುಭಕ್ತಾಯ ದಾತವ್ಯಂ ಪರಮೇಶ್ವರೀ |
ತವ ಸ್ನೇಹಾನ್ಮಯಾ ಪ್ರೋಕ್ತಮೇತತ್ತೇ ಕವಚಂ ಮಹತ್ || ೧೪ ||

ಗೋಪನೀಯಂ ಪ್ರಯತ್ನೇನ ತ್ವಯೈವಂ ಕುಲಸುಂದರೀ || ೧೫ ||

ಇತಿ ಆಕಾಶಭೈರವಕಲ್ಪೇ ಶ್ರೀ ವೀರಭದ್ರ ಕವಚಂ ನಾಮ
ಚತ್ವಾರಿಂಶತ್ ಪಟಲಃ ||