Tripurasundari Manasa Puja Stotram

Shree tripurasundaree maanasapoojaa stotram'

Mama na bhajanashaktih' paadayoste na bhakti-
-rna cha vishayaviraktirdhyaanayoge na saktih' |
Iti manasi sadaaham' chintayannaadyashakte
Ruchiravachanapushpairarchanam' sanchinomi || 1 ||

Vyaaptam' haat'akavigrahairjalacharairaarood'hadevavrajaih'
Potairaakulitaantaram' manidharairbhoomeedharairbhooshitam |
Aaraktaamri'tasindhumuddhurachaladvicheechayavyaakula-
-vyomaanam' parichintya santatamaho chetah' kri'taartheebhava || 2 ||

Tasminnujjvalaratnajaalavilasatkaantichchhat'aabhih' sphut'am'
Kurvaanam' viyadindrachaapanichayairaachchhaaditam' sarvatah' |
Uchchaih'shri'nganishannadivyavanitaabri'ndaananaprollasa-
-dgeetaakarnananishchalaakhilamri'gam' dveepam' namaskurmahe || 3 ||

Jaateechampakapaat'alaadisumanah'saurabhyasambhaavitam'
Hreenkaaradhvanikant'hakokilakuhooprollaasichootadrumam |
Aavirbhootasugandhichandanavanam' dri'sht'ipriyam' nandanam'
Chanchachchanchalachanchareekachat'ulam' chetashchiram' chintaya || 4 ||

Paripatitaparaagaih' paat'alakshonibhaago
Vikasitakusumochchaih' peetachandraarkarashmih' |
Alishukapikaraajeekoojitaih' shrotrahaaree
Sphuratu hri'di madeeye noonamudyaanaraajah' || 5 ||

Ramyadvaarapuraprachaaratamasaam' sam'haarakaariprabha
Sphoorjattoranabhaarahaarakamahaavistaarahaaradyute |
Kshoneemand'alahemahaaravilasatsam'saarapaaraprada
Prodyadbhaktamanovihaara kanakapraakaara tubhyam' namah' || 6 ||

Udyatkaantikalaapakalpitanabhah'sphoorjadvitaanaprabhah'
Satkri'shnaagarudhoopavaasitaviyatkaasht'haantare vishrutah' |
Sevaayaatasamastadaivataganairaasevyamaano'nisham'
So'yam' shreemanimand'apo'navaratam' machchetasi dyotataam || 7 ||

Kvaapi prodbhat'apadmaraagakiranavraatena sandhyaayitam'
Kutraapi sphut'avisphuranmarakatadyutyaa tamisraayitam |
Madhyaalambivishaalamauktikaruchaa jyotsnaayitam' kutrachi-
-nmaatah' shreemanimandiram' tava sadaa vandaamahe sundaram || 8 ||

Uttungaalayavisphuranmarakataprodyatprabhaamand'alaa-
-nyaalokyaankuritotsavairnavatri'naakeernasthaleeshankayaa |
Neeto vaajibhirutpatham' bata rathah' sootena tigmadyute-
-rvalgaavalgitahastamastashikharam' kasht'airitah' praapyate || 9 ||

Manisadanasamudyatkaantidhaaraanurakte
Viyati charamasandhyaashankino bhaanurathyaah' |
Shithilitagatakupyatsootahunkaaranaadaih'
Kathamapi manigehaaduchchakairuchchalanti || 10 ||

Bhaktyaa kim' nu samarpitaani bahudhaa ratnaani paathodhinaa
Kim' vaa rohanaparvatena sadanam' yairvishvakarmaakarot |
Aa jnyaatam' girije kat'aakshakalayaa noonam' tvayaa toshite
Shambhau nri'tyati naagaraajaphaninaa keernaa manishrenayah' || 11 ||

Vidooramuktavaahanairvinamramaulimand'alai-
-rnibaddhahastasamput'aih' prayatnasam'yatendriyaih' |
Virinchivishnushankaraadibhirmudaa tavaambike
Prateekshyamaananirgamo vibhaati ratnamand'apah' || 12 ||

Dhvananmri'dangakaahalah' prageetakim'nareeganah'
Pranri'ttadivyakanyakah' pravri'ttamangalakramah' |
Prakri'sht'asevakavrajah' prahri'sht'abhaktamand'alo
Mude mamaastu santatam' tvadeeyaratnamand'apah' || 13 ||

Praveshanirgamaakulaih' svakri'tyaraktamaanasai-
-rbahih'sthitaamaraavaleevidheeyamaanabhaktibhih' |
Vichitravastrabhooshanairupetamanganaajanaih'
Sadaa karotu mangalam' mameha ratnamand'apah' || 14 ||

Suvarnaratnabhooshitairvichitravastradhaaribhi-
-rgri'heetahemayasht'ibhirniruddhasarvadaivataih' |
Asankhyasundareejanaih' purasthitairadhisht'hito
Madeeyametu maanasam' tvadeeyatungatoranah' || 15 ||

Indraadeem'shcha digeeshvaraansahapareevaaraanatho saayudhaa-
-nyoshidroopadharaansvadikshu nihitaansanchintya hri'tpankaje |
Shankhe shreevasudhaarayaa vasumateeyuktam' cha padmam' smara-
-nkaamam' naumi ratipriyam' sahacharam' preetyaa vasantam' bhaje || 16 ||

Gaayanteeh' kalaveenayaatimadhuram' hunkaaramaatanvatee-
-rdvaaraabhyaasakri'tasthiteeriha sarasvatyaadikaah' poojayan |
Dvaare naumi madonmadam' suraganaadheesham' madenonmadaam'
Maatangeemasitaambaraam' parilasanmuktaavibhooshaam' bhaje || 17 ||

Kastoorikaashyaamalakomalaangeem'
Kaadambareepaanamadaalasaangeem |
Vaamastanaalingitaratnaveenaam'
Maatangakanyaam' manasaa smaraami || 18 ||

Vikeernachikurotkare vigalitaambaraad'ambare
Madaakulitalochane vimalabhooshanodbhaasini |
Tiraskarini taavakam' charanapankajam' chintaya-
-nkaromi pashumand'aleemalikamohadugdhaashayaam || 19 ||

Pramattavaaruneerasairvighoornamaanalochanaah'
Prachand'adaityasoodanaah' pravisht'abhaktamaanasaah' |
Upod'hakajjalachchhavichchhat'aaviraajivigrahaah'
Kapaalashooladhaarineeh' stuve tvadeeyadootikaah' || 20 ||

Sphoorjannavyayavaankuropalasitaabhogaih' purah' sthaapitai-
-rdeepodbhaasisharaavashobhitamukhaih' kumbhairnavaih' shobhinaa |
Svarnaabaddhavichitraratnapat'aleechanchatkapaat'ashriyaa
Yuktam' dvaarachatusht'ayena girije vande maneemandiram || 21 ||

Aasteernaarunakambalaasanayutam' pushpopahaaraanvitam'
Deeptaanekamanipradeepasubhagam' raajadvitaanottamam |
Dhoopodgaarisugandhisambhramamiladbhri'ngaavaleegunjitam'
Kalyaanam' vitanotu me'navaratam' shreemand'apaabhyantaram || 22 ||

Kanakarachite panchapretaasanena viraajite
Maniganachite raktashvetaambaraastaranottame |
Kusumasurabhau talpe divyopadhaanasukhaavahe
Hri'dayakamale praadurbhootaam' bhaje paradevataam || 23 ||

Sarvaangasthitiramyarooparuchiraam' praatah' samabhyutthitaam'
Jri'mbhaamanjumukhaambujaam' madhumadavyaaghoornadakshitrayaam |
Sevaayaatasamastasam'nidhisakheeh' sam'maanayanteem' dri'shaa
Sampashyanparadevataam' paramaho manye kri'taartham' januh' || 24 ||

Uchchaistoranavartivaadyanivahadhvaane samujjri'mbhite
Bhaktairbhoomivilagnamaulibhiralam' dand'apranaame kri'te |
Naanaaratnasamoohanaddhakathanasthaaleesamudbhaasitaam'
Praataste parikalpayaami girije neeraajanaamujjvalaam || 25 ||

Paadyam' te parikalpayaami padayorarghyam' tathaa hastayoh'
Saudheebhirmadhuparkamamba madhuram' dhaaraabhiraasvaadaya |
Toyenaachamanam' vidhehi shuchinaa gaangena matkalpitam'
Saasht'aangam' pranipaatameeshadayite dri'sht'yaa kri'taarthee kuru || 26 ||

Maatah' pashya mukhaambujam' suvimale datte mayaa darpane
Devi sveekuru dantadhaavanamidam' gangaajalenaanvitam |
Suprakshaalitamaananam' virachayansnigdhaambarapronchhanam'
Draagangeekuru tattvamamba madhuram' taamboolamaasvaadaya || 27 ||

Nidhehi manipaadukopari padaambujam' majjanaa-
-layam' vraja shanaih' sakheekri'takaraambujaalambanam |
Maheshi karunaanidhe tava dri'gantapaatotsukaa-
-nvilokaya manaagamoonubhayasam'sthitaandaivataan || 28 ||

Hemaratnavaranena vesht'itam'
Vistri'taarunavitaanashobhitam |
Sajjasarvaparichaarikaajanam'
Pashya majjanagri'ham' mano mama || 29 ||

Kanakakalashajaalasphaat'ikasnaanapeet'haa-
-dyupakaranavishaalam' gandhamattaalimaalam |
Sphuradarunavitaanam' manjugandharvagaanam'
Paramashivamahele majjanaagaaramehi || 30 ||

Peenottungapayodharaah' parilasatsampoornachandraananaa
Ratnasvarnavinirmitaah' parilasatsookshmaambarapraavri'taah' |
Hemasnaanaghat'eestathaa mri'dupat'eerudvartanam' kausumam'
Tailam' kankatikam' kareshu dadhateervande'mba te daasikaah' || 31 ||

Tatra sphaat'ikapeet'hametya shanakairuttaaritaalankri'ti-
-rneechairujjhitakanchukoparihitaaraktottareeyaambaraa |
Veneebandhamapaasya kankatikayaa keshaprasaadam' manaa-
-kkurvaanaa paradevataa bhagavatee chitte mama dyotataam || 32 ||

Abhyangam' girije gri'haana mri'dunaa tailena sampaaditam'
Kaashmeerairagarudravairmalayajairudvartanam' kaaraya |
Geete kim'narakaamineebhirabhito vaadye mudaa vaadite
Nri'tyanteemiha pashya devi purato divyaanganaamand'aleem || 33 ||

Kri'taparikarabandhaastungapeenastanaad'hyaa
Maninivahanibaddhaa hemakumbheerdadhaanaah' |
Surabhisalilaniryadgandhalubdhaalimaalaah'
Savinayamupatasthuh' sarvatah' snaanadaasyah' || 34 ||

Udgandhairagarudravaih' surabhinaa kastoorikaavaarinaa
Sphoorjatsaurabhayakshakardamajalaih' kaashmeeraneerairapi |
Pushpaambhobhirasheshateerthasalilaih' karpoorapaathobharaih'
Snaanam' te parikalpayaami girije bhaktyaa tadangeekuru || 35 ||

Pratyangam' parimaarjayaami shuchinaa vastrena sampronchhanam'
Kurve keshakalaapamaayatataram' dhoopottamairdhoopitam |
Aaleebri'ndavinirmitaam' yavanikaamaasthaapya ratnaprabham'
Bhaktatraanapare maheshagri'hini snaanaambaram' muchyataam || 36 ||

Peetam' te parikalpayaami nibid'am' chand'aatakam' chand'ike
Sookshmam' snigdhamureekurushva vasanam' sindoorapooraprabham |
Muktaaratnavichitrahemarachanaachaaruprabhaabhaasvaram'
Neelam' kanchukamarpayaami girishapraanapriye sundari || 37 ||

Vilulitachikurena chchhaaditaam'sapradeshe
Maninikaraviraajatpaadukaanyastapaade |
Sulalitamavalambya draaksakheemam'sadeshe
Girishagri'hini bhooshaamant'apaaya prayaahi || 38 ||

Lasatkanakakut't'imasphuradamandamuktaavalee-
-samullasitakaantibhih' kalitashakrachaapavraje |
Mahaabharanamand'ape nihitahemasim'haasanam'
Sakheejanasamaavri'tam' samadhitisht'ha kaatyaayani || 39 ||

Snigdham' kankatikaamukhena shanakaih' sam'shodhya keshotkaram'
Seemantam' virachayya chaaru vimalam' sindoorarekhaanvitam |
Muktaabhirgrathitaalakaam' manichitaih' sauvarnasootraih' sphut'am'
Praante mauktikaguchchhakopalatikaam' grathnaami veneemimaam || 40 ||

Vilambiveneebhujagottamaanga-
-sphuranmanibhraantimupaanayantam |
Svarochishollaasitakeshapaasham'
Maheshi chood'aamanimarpayaami || 41 ||

Tvaamaashrayadbhih' kabareetamisrai-
-rbandeekri'tam' draagiva bhaanubimbam |
Mri'd'aani chood'aamanimaadadhaanam'
Vandaamahe taavakamuttamaangam || 42 ||

Svamadhyanaddhahaat'akasphuranmaniprabhaakulam'
Vilambimauktikachchhat'aaviraajitam' samantatah' |
Nibaddhalakshachakshushaa bhavena bhoori bhaavitam'
Samarpayaami bhaasvaram' bhavaani phaalabhooshanam || 43 ||

Meenaambhoruhakhanjareet'asushamaavistaaravismaarake
Kurvaane kila kaamavairimanasah' kandarpabaanaprabhaam |
Maadhveepaanamadaarune'tichapale deerghe dri'gambhoruhe
Devi svarnashalaakayorjitamidam' divyaanjanam' deeyataam || 44 ||

Madhyasthaarunaratnakaantiruchiraam' muktaamugodbhaasitaam'
Daivaadbhaargavajeevamadhyagaraverlakshmeemadhah' kurvateem |
Utsiktaadharabimbakaantivisarairbhaumeebhavanmauktikaam'
Maddattaamurareekurushva girije naasaavibhooshaamimaam || 45 ||

Ud'ukri'tapariveshaspardhayaa sheetabhaano-
-riva virachitadehadvandvamaadityabimbam |
Arunamanisamudyatpraantavibhraajimuktam'
Shravasi parinidhehi svarnataat'ankayugmam || 46 ||

Marakatavarapadmaraagaheero-
-tthitagulikaatritayaavanaddhamadhyam |
Vitatavimalamauktikam' cha
Kant'haabharanamidam' girije samarpayaami || 47 ||

Naanaadeshasamutthitairmaniganaprodyatprabhaamand'ala-
-vyaaptairaabharanairviraajitagalaam' muktaachchhat'aalankri'taam |
Madhyasthaarunaratnakaantiruchiraam' praantasthamuktaaphala-
-vraataamamba chatushkikaam' parashive vakshah'sthale sthaapaya || 48 ||

Anyonyam' plaavayantee satataparichalatkaantikallolajaalaih'
Kurvaanaa majjadantah'karanavimalataam' shobhiteva trivenee |
Muktaabhih' padmaraagairmarakatamanibhirnirmitaa deepyamaanai-
-rnityam' haaratrayee te parashivarasike chetasi dyotataam' nah' || 49 ||

Karasarasijanaale visphuratkaantijaale
Vilasadamalashobhe chanchadeeshaakshilobhe |
Vividhamanimayookhodbhaasitam' devi durge
Kanakakat'akayugmam' baahuyugme nidhehi || 50 ||

Vyaalambamaanasitapat't'akaguchchhashobhi
Sphoorjanmaneeghat'itahaaravirochamaanam |
Maatarmaheshamahile tava baahumoole
Keyoorakadvayamidam' viniveshayaami || 51 ||

Vitatanijamayookhairnirmitaamindraneelai-
-rvijitakamalanaalaaleenamattaalimaalaam |
Maniganakhachitaabhyaam' kankanaabhyaamupetaam'
Kalaya valayaraajeem' hastamoole maheshi || 52 ||

Neelapat't'amri'duguchchhashobhitaa-
-baddhanaikamanijaalamanjulaam |
Arpayaami valayaatpurah'sare
Visphuratkanakataitri'paalikaam || 53 ||

Aalavaalamiva pushpadhanvanaa
Baalavidrumalataasu nirmitam |
Anguleeshu vinidheeyataam' shanai-
-ranguleeyakamidam' madarpitam || 54 ||

Vijitaharamanobhoomattamaatangakumbha-
-sthalavilulitakoojatkinkineejaalatulyaam |
Aviratakalanadaireeshacheto haranteem'
Vividhamaninibaddhaam' mekhalaamarpayaami || 55 ||

Vyaalambamaanavaramauktikaguchchhashobhi
Vibhraajihaat'akaput'advayarochamaanam |
Hemnaa vinirmitamanekamaniprabandham'
Neeveenibandhanagunam' vinivedayaami || 56 ||

Vinihatanavalaakshaapankabaalaatapaughe
Marakatamaniraajeemanjumanjeeraghoshe |
Arunamanisamudyatkaantidhaaraavichitra-
-stava charanasaroje ham'sakah' preetimetu || 57 ||

Nibaddhashitipat't'akapravaraguchchhasam'shobhitaam'
Kalakvanitamanjulaam' girishachittasam'mohaneem |
Amandamanimand'aleevimalakaantikimmeeritaam'
Nidhehi padapankaje kanakaghunghuroomambike || 58 ||

Visphuratsahajaraagaranjite
Shinjitena kalitaam' sakheejanaih' |
Padmaraagamaninoopuradvayee-
-marpayaami tava paadapankaje || 59 ||

Padaambujamupaasitum' parigatena sheetaam'shunaa
Kri'taam' tanuparamparaamiva dinaantaraagaarunaam |
Maheshi navayaavakadravabharena shoneekri'taam'
Namaami nakhamand'aleem' charanapankajasthaam' tava || 60 ||

Aaraktashvetapeetasphuradurukusumaishchitritaam' pat't'asootrai-
-rdevastreebhih' prayatnaadagarusamuditairdhoopitaam' divyadhoopaih' |
Udyadgandhaandhapushpandhayanivahasamaarabdhajhaankaarageetaam'
Chanchatkahlaaramaalaam' parashivarasike kant'hapeet'he'rpayaami || 61 ||

Gri'haana paramaamri'tam' kanakapaatrasam'sthaapitam'
Samarpaya mukhaambuje vimalaveet'ikaamambike |
Vilokaya mukhaambujam' mukuramand'ale nirmale
Nidhehi manipaadukopari padaambujam' sundari || 62 ||

Aalambya svasakheem' karena shanakaih' sim'haasanaadutthitaa
Koojanmandamaraalamanjulagatiprollaasibhooshaambaraa |
Aanandapratipaadakairupanishadvaakyaih' stutaa vedhasaa
Machchitte sthirataamupaitu girijaa yaantee sabhaamand'apam || 63 ||

Chalantyaamambaayaam' prachalati samaste parijane
Savegam' sam'yaate kanakalatikaalankri'tibhare |
Samantaaduttaalasphuritapadasampaatajanitai-
-rjhanatkaaraistaarairjhanajhanitamaaseenmanigri'ham || 64 ||

Chanchadvetrakaraabhirangavilasadbhooshaambaraabhih' puro-
-yaanteebhih' parichaarikaabhiramaravraate samutsaarite |
Ruddhe nirjarasundareebhirabhitah' kakshaantare nirgatam'
Vande nanditashambhu nirmalachidaanandaikaroopam' mahah' || 65 ||

Vedhaah' paadatale patatyayamasau vishnurnamatyagratah'
Shambhurdehi dri'ganchalam' surapatim' doorasthamaalokaya |
Ityevam' parichaarikaabhirudite sam'maananaam' kurvatee
Dri'gdvandvena yathochitam' bhagavatee bhooyaadvibhootyai mama || 66 ||

Mandam' chaaranasundareebhirabhito yaanteebhirutkant'hayaa
Naamochchaaranapoorvakam' pratidisham' pratyekamaaveditaan |
Vegaadakshipatham' gataansuraganaanaalokayantee shanai-
-rditsantee charanaambujam' pathi jagatpaayaanmaheshapriyaa || 67 ||

Agre kechana paarshvayoh' katipaye pri'sht'he pare prasthitaa
Aakaashe samavasthitaah' katipaye dikshu sthitaashchaapare |
Sam'mardam' shanakairapaasya purato dand'apranaamaanmuhuh'
Kurvaanaah' katichitsuraa girisute dri'kpaatamichchhanti te || 68 ||

Agre gaayati kim'naree kalapadam' gandharvakaantaah' shanai-
-raatodyaani cha vaadayanti madhuram' savyaapasavyasthitaah' |
Koojannoopuranaadamanju purato nri'tyanti divyaanganaa
Gachchhantah' paritah' stuvanti nigamastutyaa virinchyaadayah' || 69 ||

Kasmaichitsuchiraadupaasitamahaamantraughasiddhim' kramaa-
-dekasmai bhavanih'spri'haaya paramaanandasvaroopaam' gatim |
Anyasmai vishayaanuraktamanase deenaaya duh'khaapaham'
Dravyam' dvaarasamaashritaaya dadateem' vandaamahe sundareem || 70 ||

Namreebhooya kri'taanjaliprakat'itapremaprasannaanane
Mandam' gachchhati sam'nidhau savinayaatsotkant'hamoghatraye |
Naanaamantraganam' tadarthamakhilam' tatsaadhanam' tatphalam'
Vyaachakshaanamudagrakaanti kalaye yatkinchidaadyam' mahah' || 71 ||

Tava dahanasadri'kshaireekshanaireva chakshu-
-rnikhilapashujanaanaam' bheeshayadbheeshanaasyam |
Kri'tavasati pareshapreyasi dvaari nityam'
Sharabhamithunamuchchairbhaktiyukto nato'smi || 72 ||

Kalpaante sarasaikadaasamuditaanekaarkatulyaprabhaam'
Ratnastambhanibaddhakaanchanagunasphoorjadvitaanottamaam |
Karpooraagarugarbhavartikalikaapraaptapradeepaavaleem'
Shreechakraakri'timullasanmaniganaam' vandaamahe vedikaam || 73 ||

Svasthaanasthitadevataaganavri'te bindau mudaa sthaapitam'
Naanaaratnaviraajihemavilasatkaantichchhat'aadurdinam |
Chanchatkausumatoolikaasanayutam' kaameshvaraadhisht'hitam'
Nityaanandanidaanamamba satatam' vande cha sim'haasanam || 74 ||

Vadadbhirabhito mudaa jaya jayeti bri'ndaarakaih'
Kri'taanjaliparamparaa vidadhati kri'taarthaa dri'shaa |
Amandamanimand'aleekhachitahemasim'haasanam'
Sakheejanasamaavri'tam' samadhitisht'ha daakshaayani || 75 ||

Karpooraadikavastujaatamakhilam' sauvarnabhri'ngaarakam'
Taamboolasya karand'akam' manimayam' chailaanchalam' darpanam |
Visphoorjanmanipaaduke cha dadhateeh' sim'haasanasyaabhita-
-stisht'hanteeh' parichaarikaastava sadaa vandaamahe sundari || 76 ||

Tvadamalavapurudyatkaantikallolajaalaih'
Sphut'amiva dadhateebhirbaahuvikshepaleelaam |
Muhurapi cha vidhoote chaamaragraahineebhih'
Sitakarakarashubhre chaamare chaalayaami || 77 ||

Praantasphuradvimalamauktikaguchchhajaalam'
Chanchanmahaamanivichitritahemadand'am |
Udyatsahasrakaramand'alachaaru hema-
-chchhatram' maheshamahile viniveshayaami || 78 ||

Udyattaavakadehakaantipat'aleesindoorapooraprabhaa-
-shoneebhootamudagralohitamanichchhedaanukaarichchhavi |
Dooraadaadaranirmitaanjaliput'airaalokyamaanam' sura-
-vyoohaih' kaanchanamaatapatramatulam' vandaamahe sundaram || 79 ||

Santusht'aam' paramaamri'tena vilasatkaameshvaraankasthitaam'
Pushpaughairabhipoojitaam' bhagavateem' tvaam' vandamaanaa mudaa |
Sphoorjattaavakadeharashmikalanaapraaptasvaroopaabhidaah'
Shreechakraavaranasthitaah' savinayam' vandaamahe devataah' || 80 ||

Aadhaarashaktyaadikamaakalayya
Madhye samastaadhikayogineem' cha |
Mitreshanaathaadikamatra naatha-
-chatusht'ayam' shailasute nato'smi || 81 ||

Tripuraasudhaarnavaasana-
-maarabhya tripuramaalinee yaavat |
Aavaranaasht'akasam'sthita-
-maasanashat'kam' namaami parameshi || 82 ||

Eeshaane ganapam' smaraami vicharadvighnaandhakaarachchhidam'
Vaayavye vat'ukam' cha kajjalaruchim' vyaalopaveetaanvitam |
Nairri'tye mahishaasurapramathineem' durgaam' cha sampoojaya-
-nnaagneye'khilabhaktarakshanaparam' kshetraadhinaatham' bhaje || 83 ||

Ud'yaanajaalandharakaamaroopa-
-peet'haanimaanpoornagiriprasaktaan |
Trikonadakshaagrimasavyabhaaga-
-madhyasthitaansiddhikaraannamaami || 84 ||

Lokeshah' pri'thiveepatirnigadito vishnurjalaanaam' prabhu-
-stejonaatha umaapatishcha marutaameeshastathaa cheshvarah' |
Aakaashaadhipatih' sadaashiva iti pretaabhidhaamaagataa-
-netaam'shchakrabahih'sthitaansuraganaanvandaamahe saadaram || 85 ||

Taaraanaathakalaapraveshanigamavyaajaadgataasupratham'
Trailokye tithishu pravartitakalaakaasht'haadikaalakramam |
Ratnaalankri'tichitravastralalitam' kaameshvareepoorvakam'
Nityaashod'ashakam' namaami lasitam' chakraatmanorantare || 86 ||

Hri'di bhaavitadaivatam' prayatnaa-
-bhyupadeshaanugri'heetabhaktasangham |
Svagurukramasanjnyachakraraaja-
-sthitamoghatrayamaanato'smi moordhnaa || 87 ||

Hri'dayamatha shirah' shikhaakhilaadye
Kavachamatho nayanatrayam' cha devi |
Munijanaparichintitam' tathaastram'
Sphuratu sadaa hri'daye shad'angametat || 88 ||

Trailokyamohanamiti prathite tu chakre
Chanchadvibhooshanaganatripuraadhivaase |
Rekhaatraye sthitavateeranimaadisiddhee-
-rmudraa namaami satatam' prakat'aabhidhaastaah' || 89 ||

Sarvaashaaparipoorake vasudaladvandvena vibhraajite
Visphoorjantripureshvareenivasatau chakre sthitaa nityashah' |
Kaamaakarshanikaadayo maniganabhraajishnudivyaambaraa
Yoginyah' pradishantu kaankshitaphalam' vikhyaataguptaabhidhaah' || 90 ||

Maheshi vasubhirdalairlasati sarvasankshobhane
Vibhooshanaganasphurantripurasundareesadmani |
Anangakusumaadayo vividhabhooshanodbhaasitaa
Dishantu mama kaankshitam' tanutaraashcha guptaabhidhaah' || 91 ||

Lasadyugadri'shaarake sphurati sarvasaubhaagyade
Shubhaabharanabhooshitatripuravaasineemandire |
Sthitaa dadhatu mangalam' subhagasarvasankshobhinee-
-mukhaah' sakalasiddhayo viditasampradaayaabhidhaah' || 92 ||

Bahirdashaare sarvaarthasaadhake tripuraashrayaah' |
Kulakaulaabhidhaah' paantu sarvasiddhipradaayikaah' || 93 ||

Antah'shobhidashaarake'tilalite sarvaadirakshaakare
Maalinyaa tripuraadyayaa virachitaavaase sthitam' nityashah' |
Naanaaratnavibhooshanam' maniganabhraajishnu divyaambaram'
Sarvajnyaadikashaktibri'ndamanisham' vande nigarbhaabhidham || 94 ||

Sarvarogahare'sht'aare tripuraasiddhayaanvite |
Rahasyayogineernityam' vashinyaadyaa namaamyaham || 95 ||

Chootaashokavikaasiketakarajah'prodbhaasineelaambuja-
-prasphoorjannavamallikaasamuditaih' pushpaih' sharaannirmitaan |
Ramyam' pushpasharaasanam' sulalitam' paasham' tathaa chaankusham'
Vande taavakamaayudham' parashive chakraantaraale sthitam || 96 ||

Trikona uditaprabhe jagati sarvasiddhiprade
Yute tripurayaambayaa sthitavatee cha kaameshvaree |
Tanotu mama mangalam' sakalasharma vajreshvaree
Karotu bhagamaalinee sphuratu maamake chetasi || 97 ||

Sarvaanandamaye samastajagataamaakaankshite baindave
Bhairavyaa tripuraadyayaa virachitaavaase sthitaa sundaree |
Aanandollasitekshanaa maniganabhraajishnubhooshaambaraa
Visphoorjadvadanaa paraapararahah' saa paatu maam' yoginee || 98 ||

Ullasatkanakakaantibhaasuram'
Saurabhasphuranavaasitaambaram |
Dooratah' parihri'tam' madhuvratai-
-rarpayaami tava devi champakam || 99 ||

Vairamuddhatamapaasya shambhunaa
Mastake vinihitam' kalaachchhalaat |
Gandhalubdhamadhupaashritam' sadaa
Ketakeekusumamarpayaami te || 100 ||

Choorneekri'tam' draagiva padmajena
Tvadaananaspardhisudhaam'shubimbam |
Samarpayaami sphut'amanjalistham'
Vikaasijaateekusumotkaram' te || 101 ||

Agarubahaladhoopaajasrasaurabhyaramyaam'
Marakatamaniraajeeraajihaarisragaabhaam |
Dishi vidishi visarpadgandhalubdhaalimaalaam'
Vakulakusumamaalaam' kant'hapeet'he'rpayaami || 102 ||

Eenkaarordhvagabinduraananamadhobindudvayam' cha stanau
Trailokye gurugamyametadakhilam' haardam' cha rekhaatmakam |
Ittham' kaamakalaatmikaam' bhagavateemantah' samaaraadhaya-
-nnaanandaambudhimajjane pralabhataamaanandathum' sajjanah' || 103 ||

Dhoopam' te'garusambhavam' bhagavati prollaasigandhoddhuram'
Deepam' chaiva nivedayaami mahasaa haardaandhakaarachchhidam |
Rajasvarnavinirmiteshu paritah' paatreshu sam'sthaapitam'
Naivedyam' vinivedayaami paramaanandaatmike sundari || 104 ||

Jaateekorakatulyamodanamidam' sauvarnapaatre sthitam'
Shuddhaannam' shuchi mudgamaashachanakodbhootaatathaa soopakaah' |
Praajyam' maahishamaajyamuttamamidam' haiyangaveenam' pri'tha-
-kpaatreshu pratipaaditam' parashive tatsarvamangeekuru || 105 ||

Shimbeesooranashaakabimbabri'hateekooshmaand'akoshaatakee-
-vri'ntaakaani pat'olakaani mri'dunaa sam'saadhitaanyagninaa |
Sampannaani cha vesavaaravisarairdivyaani bhaktyaa kri'taa-
-nyagre te vinivedayaami girije sauvarnapaatravraje || 106 ||

Nimbookaardrakachootakandakadaleekaushaatakeekarkat'ee-
-dhaatreebilvakareerakairvirachitaanyaanandachidvigrahe |
Raajeebhih' kat'utailasaindhavaharidraabhih' sthitaanpaataye
Sandhaanaani nivedayaami girije bhooriprakaaraani te || 107 ||

Sitayaanchitalad'd'ukavrajaa-
-nmri'dupoopaanmri'dulaashcha poorikaah' |
Paramaannamidam' cha paarvati
Pranayena pratipaadayaami te || 108 ||

Dugdhametadanale susaadhitam'
Chandramand'alanibham' tathaa dadhi |
Phaanitam' shikharineem' sitaasitaam'
Sarvamamba vinivedayaami te || 109 ||

Agre te vinivedya sarvamamitam' naivedyamangeekri'tam'
Jnyaatvaa tattvachatusht'ayam' prathamato manye sutri'ptaam' tatah' |
Deveem' tvaam' parishisht'amamba kanakaamatreshu sam'sthaapitam'
Shaktibhyah' samupaahaaraami sakalam' deveshi shambhupriye || 110 ||

Vaamena svarnapaatreemanupamaparamaannena poornaam' dadhaanaa-
-manyena svarnadarveem' nijajanahri'dayaabheesht'adaam' dhaarayanteem |
Sindooraaraktavastraam' vividhamanilasadbhooshanaam' mechakaangeem'
Tisht'hanteemagrataste madhumadamuditaamannapoornaam' namaami || 111 ||

Panktyopavisht'aanparitastu chakram'
Shaktyaa svayaalingitavaamabhaagaan |
Sarvopachaaraih' paripoojya bhaktyaa
Tavaambike paarishadaannamaami || 112 ||

Paramaamri'tamattasundaree-
-ganamadhyasthitamarkabhaasuram |
Paramaamri'taghoornitekshanam'
Kimapi jyotirupaasmahe param || 113 ||

Dri'shyate tava mukhaambujam' shive
Shrooyate sphut'amanaahatadhvanih' |
Archane tava giraamagochare
Na prayaati vishayaantaram' manah' || 114 ||

Tvanmukhaambujavilokanollasa-
-tpremanishchalavilochanadvayeem |
Unmaneemupagataam' sabhaamimaam'
Bhaavayaami parameshi taavakeem || 115 ||

Chakshuh' pashyatu neha kinchana param' ghraanam' na vaa jighratu
Shrotram' hanta shri'notu na tvagapi na sparsham' samaalambataam |
Jihvaa vettu na vaa rasam' mama param' yushmatsvaroopaamri'te
Nityaanandavighoornamaananayane nityam' mano majjatu || 116 ||

Yastvaam' pashyati paarvati pratidinam' dhyaanena tejomayeem'
Manye sundari tattvametadakhilam' vedeshu nisht'haam' gatam |
Yastasminsamaye tavaarchanavidhaavaanandasaandraashayo
Yaato'ham' tadabhinnataam' parashive so'yam' prasaadastava || 117 ||

Ganaadhinaatham' vat'ukam' cha yogineeh'
Kshetraadhinaatham' cha vidikchatusht'aye |
Sarvopachaaraih' paripoojya bhaktito
Nivedayaamo balimuktayuktibhih' || 118 ||

Veenaamupaante khalu vaadayantyai
Nivedya shesham' khalu sheshikaayai |
Sauvarnabhri'ngaaravinirgatena
Jalena shuddhaachamanam' vidhehi || 119 ||

Taamboolam' vinivedayaami vilasatkarpoorakastoorikaa-
-jaateepoogalavangachoornakhadirairbhaktyaa samullaasitam |
Sphoorjadratnasamudgakapranihitam' sauvarnapaatre sthitai-
-rdeepairujjvalamannachoornarachitairaaraartikam' gri'hyataam || 120 ||

Kaachidgaayati kim'naree kalapadam' vaadyam' dadhaanorvashee
Rambhaa nri'tyati kelimanjulapadam' maatah' purastaattava |
Kri'tyam' projjhya surastriyo madhumadavyaaghoornamaanekshanam'
Nityaanandasudhaambudhim' tava mukham' pashyanti dri'shyanti cha || 121 ||

Taamboolodbhaasivaktraistvadamalavadanaalokanollaasinetrai-
-shchakrasthaih' shaktisanghaih' parihri'tavishayaasangamaakarnyamaanam |
Geetajnyaabhih' prakaamam' madhurasamadhuram' vaaditam' kim'nareebhi-
-rveenaajhankaaranaadam' kalaya parashivaanandasandhaanahetoh' || 122 ||

Archaavidhau jnyaanalavo'pi doore
Doore tadaapaadakavastujaatam |
Pradakshineekri'tya tato'rchanam' te
Panchopachaaraatmakamarpayaami || 123 ||

Yathepsitamanogataprakat'itopachaaraarchitaam'
Nijaavaranadevataaganavri'taam' sureshasthitaam |
Kri'taanjaliput'o muhuh' kalitabhoomirasht'aangakai-
-rnamaami bhagavatyaham' tripurasundari traahi maam || 124 ||

Vijnyapteeravadhehi me sumahataa yatnena te sam'nidhim'
Praaptam' maamiha kaandisheekamadhunaa maatarna dooreekuru |
Chittam' tvatpadabhaavane vyabhichareddri'gvaakcha me jaatu che-
-ttatsaumye svagunairbadhaana na yathaa bhooyo vinirgachchhati || 125 ||

Kvaaham' mandamatih' kva chedamakhilairekaantabhaktaih' stutam'
Dhyaatam' devi tathaapi te svamanasaa shreepaadukaapoojanam |
Kaadaachitkamadeeyachintanavidhau santusht'ayaa sharmadam'
Stotram' devatayaa tayaa prakat'itam' manye madeeyaanane || 126 ||

Nityaarchanamidam' chitte bhaavyamaanam' sadaa mayaa |
Nibaddham' vividhaih' padyairanugri'hnaatu sundaree || 127 ||

Iti shreematparamaham'saparivraajakaachaaryasya shreegovindabhagavatpoojyapaadashishyasya shreemachchhankarabhagavatah' kri'tau tripurasundaree maanasapoojaa stotram |