Sri Maha Ganapati Sahasranama Stotram

vyāsa uvāca |
kathaṃ nāmnāṃ sahasraṃ svaṃ gaṇeśa upadiṣṭavān |
śivāya tanmamācakṣva lokānugrahatatpara || 1 ||

brahmovāca |
devadevaḥ purārātiḥ puratrayajayodyame |
anarcanādgaṇeśasya jāto vighnākulaḥ kila || 2 ||

manasā sa vinirdhārya tatastadvighnakāraṇaṃ |
mahāgaṇapatiṃ bhaktyā samabhyarcya yathāvidhi || 3 ||

vighnapraśamanopāyamapṛcchadaparājitaḥ |
saṃtuṣṭaḥ pūjayā śaṃbhormahāgaṇapatiḥ svayaṃ || 4 ||

sarvavighnaikaharaṇaṃ sarvakāmaphalapradaṃ |
tatastasmai svakaṃ nāmnāṃ sahasramidamabravīt || 5 ||

asya śrīmahāgaṇapati sahasranāmamālāmaṃtrasya mahāgaṇapati ṛṣiḥ anuṣṭup chaṃdaḥ śrīmahāgaṇapatirdevatā gaṃ bījaṃ huṃ śaktiḥ svāhā kīlakaṃ śrīmahāgaṇapati prasādasiddhyarthe jape viniyogaḥ |

dhyānaṃ |
gajavadanamaciṃtyaṃ tīkṣṇadaṃṣṭraṃ trinetraṃ
bṛhadudaramaśeṣaṃ bhūtirājaṃ purāṇaṃ |
amaravarasupūjyaṃ raktavarṇaṃ sureśaṃ
paśupatisutamīśaṃ vighnarājaṃ namāmi ||

stotraṃ |
oṃ gaṇeśvaro gaṇakrīḍo gaṇanātho gaṇādhipaḥ |
ekadaṃṣṭro vakratuṃḍo gajavaktro mahodaraḥ || 1 ||

laṃbodaro dhūmravarṇo vikaṭo vighnanāyakaḥ |
sumukho durmukho buddho vighnarājo gajānanaḥ || 2 ||

bhīmaḥ pramoda āmodaḥ surānaṃdo madotkaṭaḥ |
heraṃbaḥ śaṃbaraḥ śaṃbhurlaṃbakarṇo mahābalaḥ || 3 ||

naṃdano'laṃpaṭo'bhīrurmeghanādo gaṇaṃjayaḥ |
vināyako virūpākṣo dhīraśūro varapradaḥ || 4 ||

mahāgaṇapatirbuddhipriyaḥ kṣipraprasādanaḥ |
rudrapriyo gaṇādhyakṣa umāputro'ghanāśanaḥ || 5 ||

kumāragururīśānaputro mūṣakavāhanaḥ |
siddhipriyaḥ siddhipatiḥ siddhaḥ siddhivināyakaḥ || 6 ||

avighnastuṃburuḥ siṃhavāhano mohinīpriyaḥ |
kaṭaṃkaṭo rājaputraḥ śālakaḥ sammito'mitaḥ || 7 ||

kūṣmāṃḍasāmasaṃbhūtirdurjayo dhūrjayo jayaḥ |
bhūpatirbhuvanapatirbhūtānāṃpatiravyayaḥ || 8 || [bhuvaneśāno]

viśvakartā viśvamukho viśvarūpo nidhirghṛṇiḥ |
kaviḥ kavīnāmṛṣabho brahmaṇyo brahmaṇaspatiḥ || 9 ||

jyeṣṭharājo nidhipatirnidhipriyapatipriyaḥ |
hiraṇmayapurāṃtaḥsthaḥ sūryamaṃḍalamadhyagaḥ || 10 ||

karāhatidhvastasiṃdhusalilaḥ pūṣadaṃtabhit |
umāṃkakelikutukī muktidaḥ kulapālanaḥ || 11 ||

kirīṭī kuṃḍalī hārī vanamālī manomayaḥ |
vaimukhyahatadaityaśrīḥ pādāhatijitakṣitiḥ || 12 ||

sadyojātasvarṇamuṃjamekhalī durnimittahṛt |
duḥsvapnahṛtprasahano guṇī nādapratiṣṭhitaḥ || 13 ||

surūpaḥ sarvanetrādhivāso vīrāsanāśrayaḥ |
pītāṃbaraḥ khaṃḍaradaḥ khaṃḍeṃdukṛtaśekharaḥ || 14 ||

citrāṃkaśyāmadaśano phālacaṃdraścaturbhujaḥ |
yogādhipastārakasthaḥ puruṣo gajakarṇakaḥ || 15 ||

gaṇādhirājo vijayasthiro gajapatidhvajī |
devadevaḥ smaraprāṇadīpako vāyukīlakaḥ || 16 ||

vipaścidvarado nādonnādabhinnabalāhakaḥ |
varāharadano mṛtyuṃjayo vyāghrājināṃbaraḥ || 17 ||

icchāśaktidharo devatrātā daityavimardanaḥ |
śaṃbhuvaktrodbhavaḥ śaṃbhukopahā śaṃbhuhāsyabhūḥ || 18 ||

śaṃbhutejāḥ śivāśokahārī gaurīsukhāvahaḥ |
umāṃgamalajo gaurītejobhūḥ svardhunībhavaḥ || 19 ||

yajñakāyo mahānādo girivarṣmā śubhānanaḥ |
sarvātmā sarvadevātmā brahmamūrdhā kakupchrutiḥ || 20 ||

brahmāṃḍakuṃbhaścidvyomaphālaḥ satyaśiroruhaḥ |
jagajjanmalayonmeṣanimeṣo'gnyarkasomadṛk || 21 ||

girīṃdraikarado dharmādharmoṣṭhaḥ sāmabṛṃhitaḥ |
graharkṣadaśano vāṇījihvo vāsavanāsikaḥ || 22 ||

kulācalāṃsaḥ somārkaghaṃṭo rudraśirodharaḥ |
nadīnadabhujaḥ sarpāṃgul̤īkastārakānakhaḥ || 23 ||

bhrūmadhyasaṃsthitakaro brahmavidyāmadotkaṭaḥ |
vyomanābhiḥ śrīhṛdayo merupṛṣṭho'rṇavodaraḥ || 24 ||

kukṣisthayakṣagaṃdharvarakṣaḥkinnaramānuṣaḥ |
pṛthvīkaṭiḥ sṛṣṭiliṃgaḥ śailorurdasrajānukaḥ || 25 ||

pātāl̤ajaṃgho munipātkālāṃguṣṭhastrayītanuḥ |
jyotirmaṃḍalalāṃgūlo hṛdayālānaniścalaḥ || 26 ||

hṛtpadmakarṇikāśāliviyatkelisarovaraḥ |
sadbhaktadhyānanigaḍaḥ pūjāvārīnivāritaḥ || 27 ||

pratāpī kaśyapasuto gaṇapo viṣṭapī balī |
yaśasvī dhārmikaḥ svojāḥ prathamaḥ prathameśvaraḥ || 28 ||

ciṃtāmaṇidvīpapatiḥ kalpadrumavanālayaḥ |
ratnamaṃḍapamadhyastho ratnasiṃhāsanāśrayaḥ || 29 ||

tīvrāśirodhṛtapado jvālinīmaulilālitaḥ |
naṃdānaṃditapīṭhaśrīrbhogadābhūṣitāsanaḥ || 30 ||

sakāmadāyinīpīṭhaḥ sphuradugrāsanāśrayaḥ |
tejovatīśiroratnaṃ satyānityāvataṃsitaḥ || 31 ||

savighnanāśinīpīṭhaḥ sarvaśaktyaṃbujāśrayaḥ |
lipipadmāsanādhāro vahnidhāmatrayāśrayaḥ || 32 ||

unnataprapado gūḍhagulphaḥ saṃvṛttapārṣṇikaḥ |
pīnajaṃghaḥ śliṣṭajānuḥ sthūloruḥ pronnamatkaṭiḥ || 33 ||

nimnanābhiḥ sthūlakukṣiḥ pīnavakṣā bṛhadbhujaḥ |
pīnaskaṃdhaḥ kaṃbukaṃṭho laṃboṣṭho laṃbanāsikaḥ || 34 ||

bhagnavāmaradastuṃgasavyadaṃto mahāhanuḥ |
hrasvanetratrayaḥ śūrpakarṇo nibiḍamastakaḥ || 35 ||

stabakākārakuṃbhāgro ratnamaul̤irniraṃkuśaḥ |
sarpahārakaṭīsūtraḥ sarpayajñopavītavān || 36 ||

sarpakoṭīrakaṭakaḥ sarpagraiveyakāṃgadaḥ |
sarpakakṣyodarābaṃdhaḥ sarparājottarīyakaḥ || 37 ||

rakto raktāṃbaradharo raktamālyavibhūṣaṇaḥ |
raktekṣaṇo raktakaro raktatālvoṣṭhapallavaḥ || 38 ||

śvetaḥ śvetāṃbaradharaḥ śvetamālyavibhūṣaṇaḥ |
śvetātapatraruciraḥ śvetacāmaravījitaḥ || 39 ||

sarvāvayavasaṃpūrṇasarvalakṣaṇalakṣitaḥ |
sarvābharaṇaśobhāḍhyaḥ sarvaśobhāsamanvitaḥ || 40 ||

sarvamaṃgal̤amāṃgal̤yaḥ sarvakāraṇakāraṇaṃ |
sarvadaikakaraḥ śārṅgī bījāpūrī gadādharaḥ || 41 ||

ikṣucāpadharaḥ śūlī cakrapāṇiḥ sarojabhṛt |
pāśī dhṛtotpalaḥ śālīmaṃjarībhṛt svadaṃtabhṛt || 42 ||

kalpavallīdharo viśvābhayadaikakaro vaśī |
akṣamālādharo jñānamudrāvān mudgarāyudhaḥ || 43 ||

pūrṇapātrī kaṃbudharo vidhṛtālisamudgakaḥ |
mātuluṃgadharaścūtakalikābhṛtkuṭhāravān || 44 ||

puṣkarasthasvarṇaghaṭīpūrṇaratnābhivarṣakaḥ |
bhāratīsuṃdarīnātho vināyakaratipriyaḥ || 45 ||

mahālakṣmīpriyatamaḥ siddhalakṣmīmanoramaḥ |
ramārameśapūrvāṃgo dakṣiṇomāmaheśvaraḥ || 46 ||

mahīvarāhavāmāṃgo ratikaṃdarpapaścimaḥ |
āmodamodajananaḥ sapramodapramodanaḥ || 47 ||

samedhitasamṛddhaśrīrṛddhisiddhipravartakaḥ |
dattasaumukhyasumukhaḥ kāṃtikaṃdal̤itāśrayaḥ || 48 ||

madanāvatyāśritāṃghriḥ kṛttadaurmukhyadurmukhaḥ |
vighnasaṃpallavopaghnasevonnidramadadravaḥ || 49 ||

vighnakṛnnighnacaraṇo drāviṇīśaktisatkṛtaḥ |
tīvrāprasannanayano jvālinīpālitaikadṛk || 50 ||

mohinīmohano bhogadāyinīkāṃtimaṃḍitaḥ |
kāminīkāṃtavaktraśrīradhiṣṭhitavasuṃdharaḥ || 51 ||

vasuṃdharāmadonnaddhamahāśaṃkhanidhiprabhuḥ |
namadvasumatīmaulimahāpadmanidhiprabhuḥ || 52 ||

sarvasadgurusaṃsevyaḥ śociṣkeśahṛdāśrayaḥ |
īśānamūrdhā deveṃdraśikhā pavananaṃdanaḥ || 53 ||

agrapratyagranayano divyāstrāṇāṃprayogavit |
airāvatādisarvāśāvāraṇāvaraṇapriyaḥ || 54 ||

vajrādyastraparīvāro gaṇacaṃḍasamāśrayaḥ |
jayājayaparīvāro vijayāvijayāvahaḥ || 55 ||

ajitārcitapādābjo nityānityāvataṃsitaḥ |
vilāsinīkṛtollāsaḥ śauṃḍīsauṃdaryamaṃḍitaḥ || 56 ||

anaṃtānaṃtasukhadaḥ sumaṃgal̤asumaṃgal̤aḥ |
icchāśaktijñānaśaktikriyāśaktiniṣevitaḥ || 57 ||

subhagāsaṃśritapado lalitālalitāśrayaḥ |
kāminīkāmanaḥ kāmamālinīkel̤ilālitaḥ || 58 ||

sarasvatyāśrayo gaurīnaṃdanaḥ śrīniketanaḥ |
guruguptapado vācāsiddho vāgīśvarīpatiḥ || 59 ||

nalinīkāmuko vāmārāmo jyeṣṭhāmanoramaḥ |
raudrīmudritapādābjo huṃbījastuṃgaśaktikaḥ || 60 ||

viśvādijananatrāṇaḥ svāhāśaktiḥ sakīlakaḥ |
amṛtābdhikṛtāvāso madaghūrṇitalocanaḥ || 61 ||

ucchiṣṭagaṇa ucchiṣṭagaṇeśo gaṇanāyakaḥ |
sārvakālikasaṃsiddhirnityaśaivo digaṃbaraḥ || 62 ||

anapāyo'naṃtadṛṣṭiraprameyo'jarāmaraḥ |
anāvilo'pratiratho hyacyuto'mṛtamakṣaraṃ || 63 ||

apratarkyo'kṣayo'jayyo'nādhāro'nāmayo'malaḥ |
amoghasiddhiradvaitamaghoro'pramitānanaḥ || 64 ||

anākāro'bdhibhūmyagnibalaghno'vyaktalakṣaṇaḥ |
ādhārapīṭha ādhāra ādhārādheyavarjitaḥ || 65 ||

ākhuketana āśāpūraka ākhumahārathaḥ |
ikṣusāgaramadhyastha ikṣubhakṣaṇalālasaḥ || 66 ||

ikṣucāpātirekaśrīrikṣucāpaniṣevitaḥ |
iṃdragopasamānaśrīriṃdranīlasamadyutiḥ || 67 ||

iṃdīvaradalaśyāmaḥ iṃdumaṃḍalanirmalaḥ |
idhmapriya iḍābhāga iḍādhāmeṃdirāpriyaḥ || 68 ||

ikṣvākuvighnavidhvaṃsī itikartavyatepsitaḥ |
īśānamaulirīśāna īśānasuta ītihā || 69 ||

īṣaṇātrayakalpāṃta īhāmātravivarjitaḥ |
upeṃdra uḍubhṛnmauliruṃḍerakabalipriyaḥ || 70 ||

unnatānana uttuṃgaḥ udāratridaśāgraṇīḥ |
ūrjasvānūṣmalamada ūhāpohadurāsadaḥ || 71 ||

ṛgyajuḥsāmasaṃbhūtirṛddhisiddhipravartakaḥ |
ṛjucittaikasulabhaḥ ṛṇatrayavimocakaḥ || 72 ||

luptavighnaḥ svabhaktānāṃ luptaśaktiḥ suradviṣāṃ |
luptaśrīrvimukhārcānāṃ lūtāvisphoṭanāśanaḥ || 73 ||

ekārapīṭhamadhyasthaḥ ekapādakṛtāsanaḥ |
ejitākhiladaityaśrīredhitākhilasaṃśrayaḥ || 74 ||

aiśvaryanidhiraiśvaryamaihikāmuṣmikapradaḥ |
airammadasamonmeṣaḥ airāvatanibhānanaḥ || 75 ||

oṃkāravācya oṃkāra ojasvānoṣadhīpatiḥ |
audāryanidhirauddhatyadhurya aunnatyanisvanaḥ || 76 ||

aṃkuśaḥsuranāgānāmaṃkuśaḥsuravidviṣāṃ |
aḥsamastavisargāṃtapadeṣuparikīrtitaḥ || 77 ||

kamaṃḍaludharaḥ kalpaḥ kapardī kalabhānanaḥ |
karmasākṣī karmakartā karmākarmaphalapradaḥ || 78 ||

kadaṃbagolakākāraḥ kūṣmāṃḍagaṇanāyakaḥ |
kāruṇyadehaḥ kapilaḥ kathakaḥ kaṭisūtrabhṛt || 79 ||

kharvaḥ khaḍgapriyaḥ khaḍgakhātāṃtasthaḥ khanirmalaḥ |
khalvāṭaśṛṃganilayaḥ khaṭvāṃgī khadurāsadaḥ || 80 ||

guṇāḍhyo gahano gastho gadyapadyasudhārṇavaḥ |
gadyagānapriyo garjo gītagīrvāṇapūrvajaḥ || 81 ||

guhyācārarato guhyo guhyāgamanirūpitaḥ |
guhāśayo guhābdhistho gurugamyo gurorguruḥ || 82 ||

ghaṃṭāghargharikāmālī ghaṭakuṃbho ghaṭodaraḥ |
caṃḍaścaṃḍeśvarasuhṛccaṃḍīśaścaṃḍavikramaḥ || 83 ||

carācarapatiściṃtāmaṇicarvaṇalālasaḥ |
chaṃdaśchaṃdovapuśchaṃdodurlakṣyaśchaṃdavigrahaḥ || 84 ||

jagadyonirjagatsākṣī jagadīśo jaganmayaḥ |
japo japaparo japyo jihvāsiṃhāsanaprabhuḥ || 85 ||

jhalajjhalollasaddānajhaṃkāribhramarākulaḥ |
ṭaṃkārasphārasaṃrāvaṣṭaṃkārimaṇinūpuraḥ || 86 ||

ṭhadvayīpallavāṃtaḥsthasarvamaṃtraikasiddhidaḥ |
ḍiṃḍimuṃḍo ḍākinīśo ḍāmaro ḍiṃḍimapriyaḥ || 87 ||

ḍhakkāninādamudito ḍhauko ḍhuṃḍhivināyakaḥ |
tattvānāṃ paramaṃ tattvaṃ tattvaṃ padanirūpitaḥ || 88 ||

tārakāṃtarasaṃsthānastārakastārakāṃtakaḥ |
sthāṇuḥ sthāṇupriyaḥ sthātā sthāvaraṃ jaṃgamaṃ jagat || 89 ||

dakṣayajñapramathano dātā dānavamohanaḥ |
dayāvān divyavibhavo daṃḍabhṛddaṃḍanāyakaḥ || 90 ||

daṃtaprabhinnābhramālo daityavāraṇadāraṇaḥ |
daṃṣṭrālagnadvipaghaṭo devārthanṛgajākṛtiḥ || 91 ||

dhanadhānyapatirdhanyo dhanado dharaṇīdharaḥ |
dhyānaikaprakaṭo dhyeyo dhyānaṃ dhyānaparāyaṇaḥ || 92 ||

naṃdyo naṃdipriyo nādo nādamadhyapratiṣṭhitaḥ |
niṣkal̤o nirmalo nityo nityānityo nirāmayaḥ || 93 ||

paraṃ vyoma paraṃ dhāma paramātmā paraṃ padaṃ |
parātparaḥ paśupatiḥ paśupāśavimocakaḥ || 94 ||

pūrṇānaṃdaḥ parānaṃdaḥ purāṇapuruṣottamaḥ |
padmaprasannanayanaḥ praṇatā'jñānamocanaḥ || 95 ||

pramāṇapratyayātītaḥ praṇatārtinivāraṇaḥ |
phalahastaḥ phaṇipatiḥ phetkāraḥ phāṇitapriyaḥ || 96 ||

bāṇārcitāṃghriyugal̤o bālakel̤ikutūhalī |
brahma brahmārcitapado brahmacārī bṛhaspatiḥ || 97 ||

bṛhattamo brahmaparo brahmaṇyo brahmavitpriyaḥ |
bṛhannādāgryacītkāro brahmāṃḍāvalimekhalaḥ || 98 ||

bhrūkṣepadattalakṣmīko bhargo bhadro bhayāpahaḥ |
bhagavān bhaktisulabho bhūtido bhūtibhūṣaṇaḥ || 99 ||

bhavyo bhūtālayo bhogadātā bhrūmadhyagocaraḥ |
maṃtro maṃtrapatirmaṃtrī madamattamanoramaḥ || 100 ||

mekhalāvān maṃdagatirmatimatkamalekṣaṇaḥ |
mahābalo mahāvīryo mahāprāṇo mahāmanāḥ || 101 ||

yajño yajñapatiryajñagoptā yajñaphalapradaḥ |
yaśaskaro yogagamyo yājñiko yājakapriyaḥ || 102 ||

raso rasapriyo rasyo raṃjako rāvaṇārcitaḥ |
rakṣorakṣākaro ratnagarbho rājyasukhapradaḥ || 103 ||

lakṣyaṃ lakṣaprado lakṣyo layastho laḍḍukapriyaḥ |
lānapriyo lāsyaparo lābhakṛllokaviśrutaḥ || 104 ||

vareṇyo vahnivadano vaṃdyo vedāṃtagocaraḥ |
vikartā viśvataścakṣurvidhātā viśvatomukhaḥ || 105 ||

vāmadevo viśvanetā vajrivajranivāraṇaḥ |
viśvabaṃdhanaviṣkaṃbhādhāro viśveśvaraprabhuḥ || 106 ||

śabdabrahma śamaprāpyaḥ śaṃbhuśaktigaṇeśvaraḥ |
śāstā śikhāgranilayaḥ śaraṇyaḥ śikharīśvaraḥ || 107 ||

ṣaḍṛtukusumasragvī ṣaḍādhāraḥ ṣaḍakṣaraḥ |
saṃsāravaidyaḥ sarvajñaḥ sarvabheṣajabheṣajaṃ || 108 ||

sṛṣṭisthitilayakrīḍaḥ surakuṃjarabhedanaḥ |
siṃdūritamahākuṃbhaḥ sadasadvyaktidāyakaḥ || 109 ||

sākṣī samudramathanaḥ svasaṃvedyaḥ svadakṣiṇaḥ |
svataṃtraḥ satyasaṃkalpaḥ sāmagānarataḥ sukhī || 110 ||

haṃso hastipiśācīśo havanaṃ havyakavyabhuk |
havyo hutapriyo harṣo hṛllekhāmaṃtramadhyagaḥ || 111 ||

kṣetrādhipaḥ kṣamābhartā kṣamāparaparāyaṇaḥ |
kṣiprakṣemakaraḥ kṣemānaṃdaḥ kṣoṇīsuradrumaḥ || 112 ||

dharmaprado'rthadaḥ kāmadātā saubhāgyavardhanaḥ |
vidyāprado vibhavado bhuktimuktiphalapradaḥ || 113 ||

ābhirūpyakaro vīraśrīprado vijayapradaḥ |
sarvavaśyakaro garbhadoṣahā putrapautradaḥ || 114 ||

medhādaḥ kīrtidaḥ śokahārī daurbhāgyanāśanaḥ |
prativādimukhastaṃbho ruṣṭacittaprasādanaḥ || 115 ||

parābhicāraśamano duḥkhabhaṃjanakārākaḥ |
lavastruṭiḥ kalā kāṣṭhā nimeṣastatparaḥ kṣaṇaḥ || 116 ||

ghaṭī muhūrtaṃ praharo divānaktamaharniśaṃ |
pakṣo māso'yanaṃ varṣaṃ yugaṃ kalpo mahālayaḥ || 117 ||

rāśistārā tithiryogo vāraḥ karaṇamaṃśakaṃ |
lagnaṃ horā kālacakraṃ meruḥ saptarṣayo dhruvaḥ || 118 ||

rāhurmaṃdaḥ kavirjīvo budho bhaumaḥ śaśī raviḥ |
kālaḥ sṛṣṭiḥ sthitirviśvaṃ sthāvaraṃ jaṃgamaṃ ca yat || 119 ||

bhūrāpo'gnirmarudvyomāhaṃkṛtiḥ prakṛtiḥ pumān |
brahmā viṣṇuḥ śivo rudraḥ īśaḥ śaktiḥ sadāśivaḥ || 120 ||

tridaśāḥ pitaraḥ siddhā yakṣā rakṣāṃsi kinnarāḥ |
sādhyā vidyādharā bhūtā manuṣyāḥ paśavaḥ khagāḥ || 121 ||

samudrāḥ saritaḥ śailāḥ bhūtaṃ bhavyaṃ bhavodbhavaḥ |
sāṃkhyaṃ pātaṃjalaṃ yogaḥ purāṇāni śrutiḥ smṛtiḥ || 122 ||

vedāṃgāni sadācāro mīmāṃsā nyāyavistaraḥ |
āyurvedo dhanurvedo gāṃdharvaṃ kāvyanāṭakaṃ || 123 ||

vaikhānasaṃ bhāgavataṃ sātvataṃ pāṃcarātrakaṃ |
śaivaṃ pāśupataṃ kālāmukhaṃ bhairavaśāsanaṃ || 124 ||

śāktaṃ vaināyakaṃ sauraṃ jainamārhatasaṃhitā |
sadasadvyaktamavyaktaṃ sacetanamacetanaṃ || 125 ||

baṃdho mokṣaḥ sukhaṃ bhogo'yogaḥ satyamaṇurmahān |
svasti huṃ phaṭ svadhā svāhā śrauṣaḍvauṣaḍvaṣaṇṇamaḥ || 126 ||

jñānaṃ vijñānamānaṃdo bodhaḥ saṃvicchamo yamaḥ |
eka ekākṣarādhāraḥ ekākṣaraparāyaṇaḥ || 127 ||

ekāgradhīrekavīraḥ ekānekasvarūpadhṛk |
dvirūpo dvibhujo dvyakṣo dvirado dvīparakṣakaḥ || 128 ||

dvaimāturo dvivadano dvaṃdvātīto dvayātigaḥ |
tridhāmā trikarastretā trivargaphaladāyakaḥ || 129 ||

triguṇātmā trilokādistriśaktīśastrilocanaḥ |
caturbāhuścaturdaṃtaścaturātmā caturmukhaḥ || 130 ||

caturvidhopāyamayaścaturvarṇāśramāśrayaḥ |
caturvidhavacovṛttiparivṛttipravartakaḥ || 131 ||

caturthīpūjanaprītaścaturthītithisaṃbhavaḥ |
paṃcākṣarātmā paṃcātmā paṃcāsyaḥ paṃcakṛtyakṛt || 132 ||

paṃcādhāraḥ paṃcavarṇaḥ paṃcākṣaraparāyaṇaḥ |
paṃcatālaḥ paṃcakaraḥ paṃcapraṇavabhāvitaḥ || 133 ||

paṃcabrahmamayasphūrtiḥ paṃcāvaraṇavāritaḥ |
paṃcabhakṣyapriyaḥ paṃcabāṇaḥ paṃcaśivātmakaḥ || 134 ||

ṣaṭkoṇapīṭhaḥ ṣaṭcakradhāmā ṣaḍgraṃthibhedakaḥ |
ṣaḍadhvadhvāṃtavidhvaṃsī ṣaḍaṃgulamahāhradaḥ || 135 ||

ṣaṇmukhaḥ ṣaṇmukhabhrātā ṣaṭchaktiparivāritaḥ |
ṣaḍvairivargavidhvaṃsī ṣaḍūrmibhayabhaṃjanaḥ || 136 ||

ṣaṭtarkadūraḥ ṣaṭkarmanirataḥ ṣaḍrasāśrayaḥ |
saptapātālacaraṇaḥ saptadvīporumaṃḍalaḥ || 137 ||

saptasvarlokamukuṭaḥ saptasaptivarapradaḥ |
saptāṃgarājyasukhadaḥ saptarṣigaṇamaṃḍitaḥ || 138 ||

saptacchaṃdonidhiḥ saptahotā saptasvarāśrayaḥ |
saptābdhikelikāsāraḥ saptamātṛniṣevitaḥ || 139 ||

saptacchaṃdomodamadaḥ saptacchaṃdomakhaprabhuḥ |
aṣṭamūrtidhyeyamūrtiraṣṭaprakṛtikāraṇaṃ || 140 ||

aṣṭāṃgayogaphalabhūraṣṭapatrāṃbujāsanaḥ |
aṣṭaśaktisamṛddhaśrīraṣṭaiśvaryapradāyakaḥ || 141 ||

aṣṭapīṭhopapīṭhaśrīraṣṭamātṛsamāvṛtaḥ |
aṣṭabhairavasevyo'ṣṭavasuvaṃdyo'ṣṭamūrtibhṛt || 142 ||

aṣṭacakrasphuranmūrtiraṣṭadravyahaviḥpriyaḥ |
navanāgāsanādhyāsī navanidhyanuśāsitā || 143 ||

navadvārapurādhāro navādhāraniketanaḥ |
navanārāyaṇastutyo navadurgāniṣevitaḥ || 144 ||

navanāthamahānātho navanāgavibhūṣaṇaḥ |
navaratnavicitrāṃgo navaśaktiśirodhṛtaḥ || 145 ||

daśātmako daśabhujo daśadikpativaṃditaḥ |
daśādhyāyo daśaprāṇo daśeṃdriyaniyāmakaḥ || 146 ||

daśākṣaramahāmaṃtro daśāśāvyāpivigrahaḥ |
ekādaśādibhīrudraiḥstuta ekādaśākṣaraḥ || 147 ||

dvādaśoddaṃḍadordaṃḍo dvādaśāṃtaniketanaḥ |
trayodaśābhidābhinnaviśvedevādhidaivataṃ || 148 ||

caturdaśeṃdravaradaścaturdaśamanuprabhuḥ |
caturdaśādividyāḍhyaścaturdaśajagatprabhuḥ || 149 ||

sāmapaṃcadaśaḥ paṃcadaśīśītāṃśunirmalaḥ |
ṣoḍaśādhāranilayaḥ ṣoḍaśasvaramātṛkaḥ || 150 ||

ṣoḍaśāṃtapadāvāsaḥ ṣoḍaśeṃdukal̤ātmakaḥ |
kal̤āsaptadaśī saptadaśaḥ saptadaśākṣaraḥ || 151 ||

aṣṭādaśadvīpapatiraṣṭādaśapurāṇakṛt |
aṣṭādaśauṣadhīsṛṣṭiraṣṭādaśavidhismṛtaḥ || 152 ||

aṣṭādaśalipivyaṣṭisamaṣṭijñānakovidaḥ |
ekaviṃśaḥpumānekaviṃśatyaṃgul̤ipallavaḥ || 153 ||

caturviṃśatitattvātmā paṃcaviṃśākhyapūruṣaḥ |
saptaviṃśatitāreśaḥ saptaviṃśatiyogakṛt || 154 ||

dvātriṃśadbhairavādhīśaścatustriṃśanmahāhradaḥ |
ṣaṭtriṃśattattvasaṃbhūtiraṣṭatriṃśatkal̤ātanuḥ || 155 ||

namadekonapaṃcāśanmarudvarganirargal̤aḥ |
paṃcāśadakṣaraśreṇī paṃcāśadrudravigrahaḥ || 156 ||

paṃcāśadviṣṇuśaktīśaḥ paṃcāśanmātṛkālayaḥ |
dvipaṃcāśadvapuḥśreṇī triṣaṣṭyakṣarasaṃśrayaḥ || 157 ||

catuḥṣaṣṭyarṇanirṇetā catuḥṣaṣṭikal̤ānidhiḥ |
catuḥṣaṣṭimahāsiddhayoginībṛṃdavaṃditaḥ || 158 ||

aṣṭaṣaṣṭimahātīrthakṣetrabhairavabhāvanaḥ |
caturnavatimaṃtrātmā ṣaṇṇavatyadhikaprabhuḥ || 159 ||

śatānaṃdaḥ śatadhṛtiḥ śatapatrāyatekṣaṇaḥ |
śatānīkaḥ śatamakhaḥ śatadhārāvarāyudhaḥ || 160 ||

sahasrapatranilayaḥ sahasraphaṇabhūṣaṇaḥ |
sahasraśīrṣā puruṣaḥ sahasrākṣaḥ sahasrapāt || 161 ||

sahasranāmasaṃstutyaḥ sahasrākṣabalāpahaḥ |
daśasāhasraphaṇabhṛtphaṇirājakṛtāsanaḥ || 162 ||

aṣṭāśītisahasrādyamaharṣistotrayaṃtritaḥ |
lakṣādhīśapriyādhāro lakṣādhāramanomayaḥ || 163 ||

caturlakṣajapaprītaścaturlakṣaprakāśitaḥ |
caturaśītilakṣāṇāṃ jīvānāṃ dehasaṃsthitaḥ || 164 ||

koṭisūryapratīkāśaḥ koṭicaṃdrāṃśunirmalaḥ |
śivābhavādhyuṣṭakoṭivināyakadhuraṃdharaḥ || 165 ||

saptakoṭimahāmaṃtramaṃtritāvayavadyutiḥ |
trayastriṃśatkoṭisuraśreṇīpraṇatapādukaḥ || 166 ||

anaṃtanāmā'naṃtaśrīranaṃtā'naṃtasaukhyadaḥ |
iti vaināyakaṃ nāmnāṃ sahasramidamīritaṃ || 167 ||

idaṃ brāhme muhūrte vai yaḥ paṭhetpratyahaṃ naraḥ |
karasthaṃ tasya sakalamaihikāmuṣmikaṃ sukhaṃ || 168 ||

āyurārogyamaiśvaryaṃ dhairyaṃ śauryaṃ balaṃ yaśaḥ |
medhā prajñā dhṛtiḥ kāṃtiḥ saubhāgyamatirūpatā || 169 ||

satyaṃ dayā kṣamā śāṃtirdākṣiṇyaṃ dharmaśīlatā |
jagatsaṃyamanaṃ viśvasaṃvādo vādapāṭavaṃ || 170 ||

sabhāpāṃḍityamaudāryaṃ gāṃbhīryaṃ brahmavarcasaṃ |
aunnatyaṃ ca kulaṃ śīlaṃ pratāpo vīryamāryatā || 171 ||

jñānaṃ vijñānamāstikyaṃ sthairyaṃ viśvātiśāyitā |
dhanadhānyābhivṛddhiśca sakṛdasya japādbhavet || 172 ||

vaśyaṃ caturvidhaṃ nṛṇāṃ japādasya prajāyate |
rājño rājakalatrasya rājaputrasya maṃtriṇaḥ || 173 ||

japyate yasya vaśyārthaṃ sa dāsastasya jāyate |
dharmārthakāmamokṣāṇāmanāyāsena sādhanaṃ || 174 ||

śākinīḍākinīrakṣoyakṣoragabhayāpahaṃ |
sāmrājyasukhadaṃ caiva samastaripumardanaṃ || 175 ||

samastakalahadhvaṃsi dagdhabījaprarohaṇaṃ |
duḥkhapraśamanaṃ kruddhasvāmicittaprasādanaṃ || 176 ||

ṣaṭkarmāṣṭamahāsiddhitrikālajñānasādhanaṃ |
parakṛtyopaśamanaṃ paracakravimardanaṃ || 177 ||

saṃgrāmaraṃge sarveṣāmidamekaṃ jayāvahaṃ |
sarvavaṃdhyātvadoṣaghnaṃ garbharakṣaikakāraṇaṃ || 178 ||

paṭhyate pratyahaṃ yatra stotraṃ gaṇapateridaṃ |
deśe tatra na durbhikṣamītayo duritāni ca || 179 ||

na tadgṛhaṃ jahāti śrīryatrāyaṃ paṭhyate stavaḥ |
kṣayakuṣṭhapramehārśobhagaṃdaraviṣūcikāḥ || 180 ||

gulmaṃ plīhānamaśmānamatisāraṃ mahodaraṃ |
kāsaṃ śvāsamudāvartaṃ śūlaśokādisaṃbhavaṃ || 181 ||

śirorogaṃ vamiṃ hikkāṃ gaṃḍamālāmarocakaṃ |
vātapittakaphadvaṃdvatridoṣajanitajvaraṃ || 182 ||

āgaṃtuṃ viṣamaṃ śītamuṣṇaṃ caikāhikādikaṃ |
ityādyuktamanuktaṃ vā rogaṃ doṣādisaṃbhavaṃ || 183 ||

sarvaṃ praśamayatyāśu stotrasyāsya sakṛjjapāt |
sakṛtpāṭhena saṃsiddhiḥ strīśūdrapatitairapi || 184 ||

sahasranāmamaṃtro'yaṃ japitavyaḥ śubhāptaye |
mahāgaṇapateḥ stotraṃ sakāmaḥ prajapannidaṃ || 185 ||

icchitānsakalān bhogānupabhujyeha pārthivān |
manorathaphalairdivyairvyomayānairmanoramaiḥ || 186 ||

caṃdreṃdrabhāskaropeṃdrabrahmaśarvādisadmasu |
kāmarūpaḥ kāmagatiḥ kāmato vicaranniha || 187 ||

bhuktvā yathepsitānbhogānabhīṣṭān saha baṃdhubhiḥ |
gaṇeśānucaro bhūtvā mahāgaṇapateḥ priyaḥ || 188 ||

naṃdīśvarādisānaṃdīnaṃditaḥ sakalairgaṇaiḥ |
śivābhyāṃ kṛpayā putranirviśeṣaṃ ca lālitaḥ || 189 ||

śivabhaktaḥ pūrṇakāmo gaṇeśvaravarātpunaḥ |
jātismaro dharmaparaḥ sārvabhaumo'bhijāyate || 190 ||

niṣkāmastu japannityaṃ bhaktyā vighneśatatparaḥ |
yogasiddhiṃ parāṃ prāpya jñānavairāgyasaṃsthitaḥ || 191 ||

niraṃtaroditānaṃde paramānaṃdasaṃvidi |
viśvottīrṇe pare pāre punarāvṛttivarjite || 192 ||

līno vaināyake dhāmni ramate nityanirvṛtaḥ |
yo nāmabhirhunedetairarcayetpūjayennaraḥ || 193 ||

rājāno vaśyatāṃ yāṃti ripavo yāṃti dāsatāṃ |
maṃtrāḥ siddhyaṃti sarve'pi sulabhāstasyasiddhayaḥ || 194 ||

mūlamaṃtrādapi stotramidaṃ priyataraṃ mama |
nabhasye māsi śuklāyāṃ caturthyāṃ mama janmani || 195 ||

dūrvābhirnāmabhiḥ pūjāṃ tarpaṇaṃ vidhivaccaret |
aṣṭadravyairviśeṣeṇa juhuyādbhaktisaṃyutaḥ || 196 ||

tasyepsitāni sarvāṇi siddhyaṃtyatra na saṃśayaḥ |
idaṃ prajaptaṃ paṭhitaṃ pāṭhitaṃ śrāvitaṃ śrutaṃ || 197 ||

vyākṛtaṃ carcitaṃ dhyātaṃ vimṛṣṭamabhinaṃditaṃ |
ihāmutra ca sarveṣāṃ viśvaiśvaryapradāyakaṃ || 198 ||

svacchaṃdacāriṇāpyeṣa yenāyaṃ dhāryate stavaḥ |
sa rakṣyate śivodbhūtairgaṇairadhyuṣṭakoṭibhiḥ || 199 ||

pustake likhitaṃ yatra gṛhe stotraṃ prapūjayet |
tatra sarvottamā lakṣmīḥ sannidhatte niraṃtaraṃ || 200 ||

dānairaśeṣairakhilairvrataiśca
tīrthairaśeṣairakhilairmakhaiśca |
na tatphalaṃ viṃdati yadgaṇeśa-
sahasranāmnāṃ smaraṇena sadyaḥ || 201 ||

etannāmnāṃ sahasraṃ paṭhati dinamaṇau pratyahaṃ projjihāne
sāyaṃ madhyaṃdine vā triṣavaṇamathavā saṃtataṃ vā jano yaḥ |
sa syādaiśvaryadhuryaḥ prabhavati vacasāṃ kīrtimuccaistanoti
pratyūhaṃ haṃti viśvaṃ vaśayati suciraṃ vardhate putrapautraiḥ || 202 ||

akiṃcano'pi matprāpticiṃtako niyatāśanaḥ |
japettu caturo māsāngaṇeśārcanatatparaḥ || 203 ||

daridratāṃ samunmūlya saptajanmānugāmapi |
labhate mahatīṃ lakṣmīmityājñā pārameśvarī || 204 ||

āyuṣyaṃ vītarogaṃ kulamativimalaṃ saṃpadaścārtadānāḥ
kīrtirnityāvadātā bhaṇitirabhinavā kāṃtiravyādhibhavyā |
putrāḥ saṃtaḥ kalatraṃ guṇavadabhimataṃ yadyadetacca satyaṃ
nityaṃ yaḥ stotrametatpaṭhati gaṇapatestasya haste samastaṃ || 205 ||

gaṇaṃjayo gaṇapatirheraṃbo dharaṇīdharaḥ |
mahāgaṇapatirlakṣapradaḥ kṣipraprasādanaḥ || 206 ||

amoghasiddhiramito maṃtraściṃtāmaṇirnidhiḥ |
sumaṃgal̤o bījamāśāpūrako varadaḥ śivaḥ || 207 ||

kāśyapo naṃdano vācāsiddho ḍhuṃḍhivināyakaḥ |
modakairebhiratraikaviṃśatyā nāmabhiḥ pumān || 208 ||

yaḥ stauti madgatamanā mamārādhanatatparaḥ |
stuto nāmnāṃ sahasreṇa tenāhaṃ nātra saṃśayaḥ || 209 ||

namo namaḥ suravarapūjitāṃghraye
namo namo nirupamamaṃgal̤ātmane |
namo namo vipulapadaikasiddhaye
namo namaḥ karikalabhānanāya te || 210 ||

kiṃkiṇīgaṇaraṇitastavacaraṇaḥ
prakaṭitagurumaticaritaviśeṣaḥ |
madajalalaharīkalitakapolaḥ
śamayatu duritaṃ gaṇapatidevaḥ || 211 ||

iti śrīgaṇeśapurāṇe upāsanākhaṃḍe mahāgaṇapatiproktaṃ śrīmahāgaṇapati sahasranāmastotraṃ saṃpūrṇaṃ |