ಶ್ರೀ ದತ್ತಾತ್ರೇಯ ವಜ್ರ ಕವಚಂ

ಶ್ರೀ ದತ್ತಾತ್ರೇಯ ವಜ್ರ ಕವಚಂ

ಶ್ರೀ ಗಣೇಶಾಯ ನಮಃ |
ಶ್ರೀ ದತ್ತಾತ್ರೇಯಾಯ ನಮಃ |
ಋಷಯ ಊಚುಃ |
ಕಥಂ ಸಂಕಲ್ಪಸಿದ್ಧಿಃ ಸ್ಯಾದ್ವೇದವ್ಯಾಸ ಕಲೌ ಯುಗೇ |
ಧರ್ಮಾರ್ಥಕಾಮಮೋಕ್ಷಾಣಾಂ ಸಾಧನಂ ಕಿಮುದಾಹೃತಂ || 1||

ವ್ಯಾಸ ಉವಾಚ |
ಶೃಣ್ವಂತುಋಷಯಃ ಸರ್ವೇ ಶೀಘ್ರಂ ಸಂಕಲ್ಪಸಾಧನಂ |
ಸಕೃದುಚ್ಚಾರಮಾತ್ರೇಣ ಭೋಗಮೋಕ್ಷಪ್ರದಾಯಕಂ || 2||

ಗೌರೀಶೃಂಗೇ ಹಿಮವತಃ ಕಲ್ಪವೃಕ್ಷೋಪಶೋಭಿತಂ |
ದೀಪ್ತೇ ದಿವ್ಯಮಹಾರತ್ನಹೇಮಮಂಡಪಮಧ್ಯಗಂ || 3||

ರತ್ನಸಿಂಹಾಸನಾಸಿನಂ ಪ್ರಸನ್ನಂ ಪರಮೇಶ್ವರಂ |
ಮಂದಸ್ಮಿತಮುಖಾಂಭೋಜಂ ಶಂಕರಂ ಪ್ರಾಹ ಪಾರ್ವತೀ || 4||

ಶ್ರೀದೇವ್ಯುವಾಚ |
ದೇವದೇವ ಮಹಾದೇವ ಲೋಕಶಂಕರ ಶಂಕರ |
ಮಂತ್ರಜಾಲಾನಿ ಸರ್ವಾಣಿ ಯಂತ್ರಜಾಲಾನಿ ಕೃತ್ಸ್ನಶಃ || 5||

ತಂತ್ರಜಾಲಾನ್ಯನೇಕಾನಿ ಮಯಾ ತ್ವತ್ತಃ ಶ್ರುತಾನಿ ವೈ |
ಇದಾನೀಂ ದ್ರಷ್ಟುಮಿಚ್ಛಾಮಿ ವಿಶೇಷೇಣ ಮಹೀತಲಂ || 6||

ಇತ್ಯುದೀರಿತಮಾಕರ್ಣ್ಯ ಪಾರ್ವತ್ಯಾ ಪರಮೇಶ್ವರಃ |
ಕರೇಣಾಮೃಜ್ಯ ಸಂತೋಷಾತ್ಪಾರ್ವತೀಂ ಪ್ರತ್ಯಭಾಷತ || 7||

ಮಯೇದಾನೀಂ ತ್ವಯಾ ಸಾರ್ಧಂ ವೃಷಮಾರುಹ್ಯ ಗಮ್ಯತೇ |
ಇತ್ಯುಕ್ತ್ವಾ ವೃಷಮಾರುಹ್ಯ ಪಾರ್ವತ್ಯಾ ಸಹ ಶಂಕರಃ || 8||

ಯಯೌ ಭೂಮಂಡಲಂ ದ್ರಷ್ಟುಂ ಗೌರ್ಯಾಶ್ಚಿತ್ರಾಣಿ ದರ್ಶಯನ್ |
ಕ್ವಚಿತ್ ವಿಂಧ್ಯಾಚಲಪ್ರಾಂತೇ ಮಹಾರಣ್ಯೇ ಸುದುರ್ಗಮೇ || 9||

ತತ್ರ ವ್ಯಾಹರ್ತುಮಾಯಾಂತಂ ಭಿಲ್ಲಂ ಪರಶುಧಾರಿಣಂ |
ವರ್ಧ್ಯಮಾನಂ ಮಹಾವ್ಯಾಘ್ರಂ ನಖದಂಷ್ಟ್ರಾಭಿರಾವೃತಂ || 10||

ಅತೀವ ಚಿತ್ರಚಾರಿತ್ರ್ಯಂ ವಜ್ರಕಾಯಸಮಾಯುತಂ |
ಅಪ್ರಯತ್ನಮನಾಯಾಸಮಖಿಲಂ ಸುಖಮಾಸ್ಥಿತಂ || 11||

ಪಲಾಯಂತಂ ಮೃಗಂ ಪಶ್ಚಾದ್ವ್ಯಾಘ್ರೋ ಭೀತ್ಯಾ ಪಲಾಯಿತಃ |
ಏತದಾಶ್ಚರ್ಯಮಾಲೋಕ್ಯ ಪಾರ್ವತೀ ಪ್ರಾಹ ಶಂಕರಂ || 12||

ಶ್ರೀಪಾರ್ವತ್ಯುವಾಚ |
ಕಿಮಾಶ್ಚರ್ಯಂ ಕಿಮಾಶ್ಚರ್ಯಮಗ್ರೇ ಶಂಭೋ ನಿರೀಕ್ಷ್ಯತಾಂ |
ಇತ್ಯುಕ್ತಃ ಸ ತತಃ ಶಂಭುರ್ದೃಷ್ಟ್ವಾ ಪ್ರಾಹ ಪುರಾಣವಿತ್ || 13||

ಶ್ರೀಶಂಕರ ಉವಾಚ |
ಗೌರಿ ವಕ್ಷ್ಯಾಮಿ ತೇ ಚಿತ್ರಮವಾಙ್ಮಾನಸಗೋಚರಂ |
ಅದೃಷ್ಟಪೂರ್ವಮಸ್ಮಾಭಿರ್ನಾಸ್ತಿ ಕಿಂಚನ್ನ ಕುತ್ರಚಿತ್ || 14||

ಮಯಾ ಸಮ್ಯಕ್ ಸಮಾಸೇನ ವಕ್ಷ್ಯತೇ ಶೃಣು ಪಾರ್ವತಿ |
ಅಯಂ ದೂರಶ್ರವಾ ನಾಮ ಭಿಲ್ಲಃ ಪರಮಧಾರ್ಮಿಕಃ || 15||

ಸಮಿತ್ಕುಶಪ್ರಸೂನಾನಿ ಕಂದಮೂಲಫಲಾದಿಕಂ |
ಪ್ರತ್ಯಹಂ ವಿಪಿನಂ ಗತ್ವಾ ಸಮಾದಾಯ ಪ್ರಯಾಸತಃ || 16||

ಪ್ರಿಯೇ ಪೂರ್ವಂ ಮುನೀಂದ್ರೇಭ್ಯಃ ಪ್ರಯಚ್ಛತಿ ನ ವಾಂಛತಿ |
ತೇಽಪಿ ತಸ್ಮಿನ್ನಪಿ ದಯಾಂ ಕುರ್ವತೇ ಸರ್ವಮೌನಿನಃ || 17||

ದಲಾದನೋ ಮಹಾಯೋಗೀ ವಸನ್ನೇವ ನಿಜಾಶ್ರಮೇ |
ಕದಾಚಿದಸ್ಮರತ್ ಸಿದ್ಧಂ ದತ್ತಾತ್ರೇಯಂ ದಿಗಂಬರಂ || 18||

ದತ್ತಾತ್ರೇಯಃ ಸ್ಮರ್ತೃಗಾಮೀ ಚೇತಿಹಾಸಂ ಪರೀಕ್ಷಿತುಂ |
ತತ್ಕ್ಷಣಾತ್ಸೋಽಪಿ ಯೋಗೀಂದ್ರೋ ದತ್ತಾತ್ರೇಯಃ ಸಮುತ್ಥಿತಃ || 19||

ತಂ ದೃಷ್ಟ್ವಾಽಽಶ್ಚರ್ಯತೋಷಾಭ್ಯಾಂ ದಲಾದನಮಹಾಮುನಿಃ |
ಸಂಪೂಜ್ಯಾಗ್ರೇ ನಿಷೀದಂತಂ ದತ್ತಾತ್ರೇಯಮುವಾಚ ತಂ || 20||

ಮಯೋಪಹೂತಃ ಸಂಪ್ರಾಪ್ತೋ ದತ್ತಾತ್ರೇಯ ಮಹಾಮುನೇ |
ಸ್ಮರ್ತೃಗಾಮೀ ತ್ವಮಿತ್ಯೇತತ್ ಕಿಂವದಂತೀ ಪರೀಕ್ಷಿತುಂ || 21||

ಮಯಾದ್ಯ ಸಂಸ್ಮೃತೋಽಸಿ ತ್ವಮಪರಾಧಂ ಕ್ಷಮಸ್ವ ಮೇ |
ದತ್ತಾತ್ರೇಯೋ ಮುನಿಂ ಪ್ರಾಹ ಮಮ ಪ್ರಕೃತಿರೀದೃಶೀ || 22||

ಅಭಕ್ತ್ಯಾ ವಾ ಸುಭಕ್ತ್ಯಾ ವಾ ಯಃ ಸ್ಮರೇನ್ಮಾಮನನ್ಯಧೀಃ |
ತದಾನೀಂ ತಮುಪಾಗತ್ಯ ದದಾಮಿ ತದಭೀಪ್ಸಿತಂ || 23||

ದತ್ತಾತ್ರೇಯೋ ಮುನಿಂ ಪ್ರಾಹ ದಲಾದನಮುನೀಶ್ವರಂ |
ಯದಿಷ್ಟಂ ತದ್ವೃಣೀಷ್ವ ತ್ವಂ ಯತ್ ಪ್ರಾಪ್ತೋಽಹಂ ತ್ವಯಾ ಸ್ಮೃತಃ || 24||

ದತ್ತಾತ್ರೇಯಂ ಮುನಿಃ ಪ್ರಾಹ ಮಯಾ ಕಿಮಪಿ ನೋಚ್ಯತೇ |
ತ್ವಚ್ಚಿತ್ತೇ ಯತ್ಸ್ಥಿತಂ ತನ್ಮೇ ಪ್ರಯಚ್ಛ ಮುನಿಪುಂಗವ || 25||

ಶ್ರೀದತ್ತಾತ್ರೇಯ ಉವಾಚ |
ಮಮಾಸ್ತಿ ವಜ್ರಕವಚಂ ಗೃಹಾಣೇತ್ಯವದನ್ಮುನಿಂ |
ತಥ್ಯೇತ್ಯಂಗೀಕೃತವತೇ ದಲಾದನಮುನಯೇ ಮುನಿಃ || 26||

ಸ್ವವಜ್ರಕವಚಂ ಪ್ರಾಹ ಋಷಿಚ್ಛಂದಃಪುರಃಸರಂ |
ನ್ಯಾಸಂ ಧ್ಯಾನಂ ಫಲಂ ತತ್ರ ಪ್ರಯೋಜನಮಶೇಷತಃ || 27||

ಅಸ್ಯ ಶ್ರೀದತ್ತಾತ್ರೇಯವಜ್ರಕವಚಸ್ತೋತ್ರಮಂತ್ರಸ್ಯ,
ಕಿರಾತರೂಪೀ ಮಹಾರುದ್ರ ಋಷಿಃ, ಅನುಷ್ಟುಪ್ ಛಂದಃ,
ಶ್ರೀದತ್ತಾತ್ರೇಯೋ ದೇವತಾ, ದ್ರಾಂ ಬೀಜಂ, ಆಂ ಶಕ್ತಿಃ,
ಕ್ರೌಂ ಕೀಲಕಂ, ಓಂ ಆತ್ಮನೇ ನಮಃ | ಓಂ ದ್ರೀಂ ಮನಸೇ ನಮಃ |
ಓಂ ಆಂ ದ್ರೀಂ ಶ್ರೀಂ ಸೌಃ ಓಂ ಕ್ಲಾಂ ಕ್ಲೀಂ ಕ್ಲೂಂ ಕ್ಲೈಂ ಕ್ಲೌಂ ಕ್ಲಃ |
ಶ್ರೀದತ್ತಾತ್ರೇಯಪ್ರಸಾದಸಿದ್ಧ್ಯರ್ಥೇ ಜಪೇ ವಿನಿಯೋಗಃ ||

ಅಥ ಕರನ್ಯಾಸಃ |
ಓಂ ದ್ರಾಂ ಅಂಗುಷ್ಠಾಭ್ಯಾಂ ನಮಃ |
ಓಂ ದ್ರೀಂ ತರ್ಜನೀಭ್ಯಾಂ ನಮಃ |
ಓಂ ದ್ರೂಂ ಮಧ್ಯಮಾಭ್ಯಾಂ ನಮಃ |
ಓಂ ದ್ರೈಂ ಅನಾಮಿಕಾಭ್ಯಾಂ ನಮಃ |
ಓಂ ದ್ರೌಂ ಕನಿಷ್ಠಿಕಾಭ್ಯಾಂ ನಮಃ |
ಓಂ ದ್ರಃ ಕರತಲಕರಪೃಷ್ಠಾಭ್ಯಾಂ ನಮಃ ||

ಅಥ ಹೃದಯಾದಿನ್ಯಾಸಃ |
ಓಂ ದ್ರಾಂ ಹೃದಯಾಯ ನಮಃ |
ಓಂ ದ್ರೀಂ ಶಿರಸೇ ಸ್ವಾಹಾ |
ಓಂ ದ್ರೂಂ ಶಿಖಾಯೈ ವಷಟ್ |
ಓಂ ದ್ರೈಂ ಕವಚಾಯ ಹುಂ |
ಓಂ ದ್ರೌಂ ನೇತ್ರತ್ರಯಾಯ ವೌಷಟ್ |
ಓಂ ದ್ರಃ ಅಸ್ತ್ರಾಯ ಫಟ್ |
ಓಂ ಭೂರ್ಭುವಃಸ್ವರೋಮಿತಿ ದಿಗ್ಬಂಧಃ ||

ಅಥ ಧ್ಯಾನಂ |
ಜಗದಂಕುರಕಂದಾಯ ಸಚ್ಚಿದಾನಂದಮೂರ್ತಯೇ |
ದತ್ತಾತ್ರೇಯಾಯ ಯೋಗೀಂದ್ರಚಂದ್ರಾಯ ಪರಮಾತ್ಮನೇ || 1||

ಕದಾ ಯೋಗೀ ಕದಾ ಭೋಗೀ ಕದಾ ನಗ್ನಃ ಪಿಶಾಚವತ್ |
ದತ್ತಾತ್ರೇಯೋ ಹರಿಃ ಸಾಕ್ಷಾದ್ಭುಕ್ತಿಮುಕ್ತಿಪ್ರದಾಯಕಃ || 2||

ವಾರಾಣಸೀಪುರಸ್ನಾಯೀ ಕೋಲ್ಹಾಪುರಜಪಾದರಃ |
ಮಾಹುರೀಪುರಭಿಕ್ಷಾಶೀ ಸಹ್ಯಶಾಯೀ ದಿಗಂಬರ || 3||

ಇಂದ್ರನೀಲಸಮಾಕಾರಶ್ಚಂದ್ರಕಾಂತಿಸಮದ್ಯುತಿಃ |
ವೈಡುರ್ಯಸದೃಶಸ್ಫೂರ್ತಿಶ್ಚಲತ್ಕಿಂಚಿಜ್ಜಟಾಧರಃ || 4||

ಸ್ನಿಗ್ಧಧಾವಲ್ಯಯುಕ್ತಾಕ್ಷೋಽತ್ಯಂತನೀಲಕನೀನಿಕಃ |
ಭ್ರೂವಕ್ಷಃಶ್ಮಶ್ರುನೀಲಾಂಕಃ ಸಶಾಂಕಸದೃಶಾನನಃ || 5||

ಹಾಸನಿರ್ಜಿತನೀಹಾರಃ ಕಂಠನಿರ್ಜಿತಕಂಬುಕಃ |
ಮಾಂಸಲಾಂಸೋ ದೀರ್ಘಬಾಹುಃ ಪಾಣಿನಿರ್ಜಿತಪಲ್ಲವಃ || 6||

ವಿಶಾಲಪೀನವಕ್ಷಾಶ್ಚ ತಾಮ್ರಪಾಣಿರ್ದಲೋದರಃ |
ಪೃಥುಲಶ್ರೋಣಿಲಲಿತೋ ವಿಶಾಲಜಘನಸ್ಥಲಃ || 7||

ರಂಭಾಸ್ತಂಭೋಪಮಾನೋರುರ್ಜಾನುಪೂರ್ವೈಕಜಂಘಕಃ |
ಗೂಢಗುಲ್ಫಃ ಕೂರ್ಮಪೃಷ್ಠೋಲಸತ್ಪಾದೋಷರಿಸ್ಥಲಃ || 8||

ರಕ್ತಾರವಿಂದಸದೃಶರಮಣೀಯಪದಾಧರಃ |
ಚರ್ಮಾಂಬರಧರೋ ಯೋಗೀ ಸ್ಮರ್ತೃಗಾಮೀ ಕ್ಷಣೇ ಕ್ಷಣೇ || 9||

ಜ್ಞಾನೋಪದೇಶನೀರತೋ ವಿಪದ್ಧರಣದೀಕ್ಷಿತಃ |
ಸಿದ್ಧಾಸನಸಮಾಸೀನ ಋಜುಕಾಯೋ ಹಸನ್ಮುಖಃ || 10||

ವಾಮಹಸ್ತೇನ ವರದೋ ದಕ್ಷಿಣೇನಾಭಯಂಕರಃ |
ಬಾಲೋನ್ಮತ್ತಪಿಶಾಚೀಭಿಃ ಕ್ವಚಿದ್ಯುಕ್ತಃ ಪರೀಕ್ಷಿತಃ || 11||

ತ್ಯಾಗೀ ಭೋಗೀ ಮಹಾಯೋಗೀ ನಿತ್ಯಾನಂದೋ ನಿರಂಜನಃ |
ಸರ್ವರೂಪೀ ಸರ್ವದಾತಾ ಸರ್ವಗಃ ಸರ್ವಕಾಮದಃ || 12||

ಭಸ್ಮೋದ್ಧೂಲಿತಸರ್ವಾಂಗೋ ಮಹಾಪಾತಕನಾಶನಃ |
ಭುಕ್ತಿಪ್ರದೋ ಮುಕ್ತಿದಾತಾ ಜೀವನ್ಮುಕ್ತೋ ನ ಸಂಶಯಃ || 13||

ಏವಂ ಧ್ಯಾತ್ವಾಽನನ್ಯಚಿತ್ತೋ ಮದ್ವಜ್ರಕವಚಂ ಪಠೇತ್ |
ಮಾಮೇವ ಪಶ್ಯನ್ಸರ್ವತ್ರ ಸ ಮಯಾ ಸಹ ಸಙ್ಚರೇತ್ || 14||

ದಿಗಂಬರಂ ಭಸ್ಮಸುಗಂಧಲೇಪನಂ ಚಕ್ರಂ ತ್ರಿಶೂಲಂ ಡಮರುಂ ಗದಾಯುಧಂ |
ಪದ್ಮಾಸನಂ ಯೋಗಿಮುನೀಂದ್ರವಂದಿತಂ ದತ್ತೇತಿ ನಾಮಸ್ಮರಣೇನ ನಿತ್ಯಂ || 15||

(ಅಥ ಪಂಚೋಪಚಾರೈಃ ಸಂಪೂಜ್ಯ ಓಂ ದ್ರಾಂ ಇತಿ ಅಷ್ಟೋತ್ತರಶತವಾರಂ ಜಪೇತ್)
ಓಂ ದ್ರಾಂ |

ಅಥ ಕವಚಂ |
ಓಂ ದತ್ತಾತ್ರೇಯಃ ಶಿರಃ ಪಾತು ಸಹಸ್ರಾಬ್ಜೇಷು ಸಂಸ್ಥಿತಃ |
ಭಾಲಂ ಪಾತ್ವಾನಸೂಯೇಯಶ್ಚಂದ್ರಮಂಡಲಮಧ್ಯಗಃ || 1||

ಕೂರ್ಚಂ ಮನೋಮಯಃ ಪಾತು ಹಂ ಕ್ಷಂ ದ್ವಿದಲಪದ್ಮಭೂಃ |
ಜ್ಯೋತಿರೂಪೋಽಕ್ಷಿಣೀ ಪಾತು ಪಾತು ಶಬ್ದಾತ್ಮಕಃ ಶ್ರುತೀ || 2||

ನಾಸಿಕಾಂ ಪಾತು ಗಂಧಾತ್ಮಾ ಮುಖಂ ಪಾತು ರಸಾತ್ಮಕಃ |
ಜಿಹ್ವಾಂ ವೇದಾತ್ಮಕಃ ಪಾತು ದಂತೋಷ್ಠೌ ಪಾತು ಧಾರ್ಮಿಕಃ || 3||

ಕಪೋಲಾವತ್ರಿಭೂಃ ಪಾತು ಪಾತ್ವಶೇಷಂ ಮಮಾತ್ವವಿತ್ |
ಸ್ವರಾತ್ಮಾ ಷೋಡಶಾರಾಬ್ಜಸ್ಥಿತಃ ಸ್ವಾತ್ಮಾಽವತಾದ್ಗಲಂ || 4||

ಸ್ಕಂಧೌ ಚಂದ್ರಾನುಜಃ ಪಾತು ಭುಜೌ ಪಾತು ಕೃತಾದಿಭೂಃ |
ಜತ್ರುಣೀ ಶತ್ರುಜಿತ್ ಪಾತು ಪಾತು ವಕ್ಷಃಸ್ಥಲಂ ಹರಿಃ || 5||

ಕಾದಿಠಾಂತದ್ವಾದಶಾರಪದ್ಮಗೋ ಮರುದಾತ್ಮಕಃ |
ಯೋಗೀಶ್ವರೇಶ್ವರಃ ಪಾತು ಹೃದಯಂ ಹೃದಯಸ್ಥಿತಃ || 6||

ಪಾರ್ಶ್ವೇ ಹರಿಃ ಪಾರ್ಶ್ವವರ್ತೀ ಪಾತು ಪಾರ್ಶ್ವಸ್ಥಿತಃ ಸ್ಮೃತಃ |
ಹಠಯೋಗಾದಿಯೋಗಜ್ಞಃ ಕುಕ್ಷೀ ಪಾತು ಕೃಪಾನಿಧಿಃ || 7||

ಡಕಾರಾದಿಫಕಾರಾಂತದಶಾರಸರಸೀರುಹೇ |
ನಾಭಿಸ್ಥಲೇ ವರ್ತಮಾನೋ ನಾಭಿಂ ವಹ್ನ್ಯಾತ್ಮಕೋಽವತು || 8||

ವಹ್ನಿತತ್ವಮಯೋ ಯೋಗೀ ರಕ್ಷತಾನ್ಮಣಿಪೂರಕಂ |
ಕಟಿಂ ಕಟಿಸ್ಥಬ್ರಹ್ಮಾಂಡವಾಸುದೇವಾತ್ಮಕೋಽವತು || 9||

ಬಕಾರಾದಿಲಕಾರಾಂತಷಟ್ಪತ್ರಾಂಬುಜಬೋಧಕಃ | (ವಕ್ರಾದಿ)
ಜಲತತ್ವಮಯೋ ಯೋಗೀ ಸ್ವಾಧಿಷ್ಠಾನಂ ಮಮಾವತು || 10||

ಸಿದ್ಧಾಸನಸಮಾಸೀನ ಊರೂ ಸಿದ್ಧೇಶ್ವರೋಽವತು |
ವಾದಿಸಾಂತಚತುಷ್ಪತ್ರಸರೋರುಹನಿಬೋಧಕಃ || 11||

ಮೂಲಾಧಾರಂ ಮಹೀರೂಪೋ ರಕ್ಷತಾದ್ವೀರ್ಯನಿಗ್ರಹೀ |
ಪೃಷ್ಠಂ ಚ ಸರ್ವತಃ ಪಾತು ಜಾನ್ಯುನ್ಯಸ್ತಕರಾಂಬುಜಃ || 12||

ಜಂಘೇ ಪಾತ್ವವಧೂತೇಂದ್ರಃ ಪಾತ್ವಂಘ್ರೀ ತೀರ್ಥಪಾವನಃ |
ಸರ್ವಾಂಗಂ ಪಾತು ಸರ್ವಾತ್ಮಾ ರೋಮಾಣ್ಯವತು ಕೇಶವಃ || 13||

ಚರ್ಮ ಚರ್ಮಾಂಬರಃ ಪಾತು ರಕ್ತಂ ಭಕ್ತಿಪ್ರಿಯೋಽವತು |
ಮಾಂಸಂ ಮಾಂಸಕರಃ ಪಾತು ಮಜ್ಜಾಂ ಮಜ್ಜಾತ್ಮಕೋಽವತು || 14||

ಅಸ್ಥೀನಿ ಸ್ಥಿರಧೀಃ ಪಾಯಾನ್ಮೇಧಾಂ ವೇಧಾಃ ಪ್ರಪಾಲಯೇತ್ |
ಶುಕ್ರಂ ಸುಖಕರಃ ಪಾತು ಚಿತ್ತಂ ಪಾತು ದೃಢಾಕೃತಿಃ || 15||

ಮನೋಬುದ್ಧಿಮಹಂಕಾರಂ ಹೃಷೀಕೇಶಾತ್ಮಕೋಽವತು |
ಕರ್ಮೇಂದ್ರಿಯಾಣಿ ಪಾತ್ವೀಶಃ ಪಾತು ಜ್ಞಾನೇಂದ್ರಿಯಾಣ್ಯಜಃ || 16||

ಬಂಧೂನ್ ಬಂಧೂತ್ತಮಃ ಪಾಯಾಚ್ಛತ್ರುಭ್ಯಃ ಪಾತು ಶತ್ರುಜಿತ್ |
ಗೃಹಾರಾಮಧನಕ್ಷೇತ್ರಪುತ್ರಾದೀಂಛಂಕರೋಽವತು || 17||

ಭಾರ್ಯಾಂ ಪ್ರಕೃತಿವಿತ್ ಪಾತು ಪಶ್ವಾದೀನ್ಪಾತು ಶಾರ್ಙ್ಗಭೃತ್ |
ಪ್ರಾಣಾನ್ಪಾತು ಪ್ರಧಾನಜ್ಞೋ ಭಕ್ಷ್ಯಾದೀನ್ಪಾತು ಭಾಸ್ಕರಃ || 18||

ಸುಖಂ ಚಂದ್ರಾತ್ಮಕಃ ಪಾತು ದುಃಖಾತ್ ಪಾತು ಪುರಾಂತಕಃ |
ಪಶೂನ್ಪಶೂಪತಿಃ ಪಾತು ಭೂತಿಂ ಭೂತೇಶ್ವರೋ ಮಮ || 19||

ಪ್ರಾಚ್ಯಾಂ ವಿಷಹರಃ ಪಾತು ಪಾತ್ವಾಗ್ನೇಯ್ಯಾಂ ಮಖಾತ್ಮಕಃ |
ಯಾಮ್ಯಾಂ ಧರ್ಮಾತ್ಮಕಃ ಪಾತು ನೈರೃತ್ಯಾಂ ಸರ್ವವೈರಿಹೃತ್ || 20||

ವರಾಹಃ ಪಾತು ವಾರುಣ್ಯಾಂ ವಾಯವ್ಯಾಂ ಪ್ರಾಣದೋಽವತು |
ಕೌಬೇರ್ಯಾಂ ಧನದಃ ಪಾತು ಪಾತ್ವೈಶಾನ್ಯಾಂ ಮಹಾಗುರುಃ || 21||

ಊರ್ಧ್ವಂ ಪಾತು ಮಹಾಸಿದ್ಧಃ ಪಾತ್ವಧಸ್ತಾಜ್ಜಟಾಧರಃ |
ರಕ್ಷಾಹೀನಂ ತು ಯತ್ಸ್ಥಾನಂ ರಕ್ಷತ್ವಾದಿಮುನೀಶ್ವರಃ || 22||

ಓಂ ದ್ರಾಂ | ಮಾಲಾಮಂತ್ರಜಪಃ |
(ಪುನಃ) 
ಅಥ ಕರನ್ಯಾಸಃ |
ಓಂ ದ್ರಾಂ ಅಂಗುಷ್ಠಾಭ್ಯಾಂ ನಮಃ |
ಓಂ ದ್ರೀಂ ತರ್ಜನೀಭ್ಯಾಂ ನಮಃ |
ಓಂ ದ್ರೂಂ ಮಧ್ಯಮಾಭ್ಯಾಂ ನಮಃ |
ಓಂ ದ್ರೈಂ ಅನಾಮಿಕಾಭ್ಯಾಂ ನಮಃ |
ಓಂ ದ್ರೌಂ ಕನಿಷ್ಠಿಕಾಭ್ಯಾಂ ನಮಃ |
ಓಂ ದ್ರಃ ಕರತಲಕರಪೃಷ್ಠಾಭ್ಯಾಂ ನಮಃ ||

ಅಥ ಹೃದಯಾದಿನ್ಯಾಸಃ |
ಓಂ ದ್ರಾಂ ಹೃದಯಾಯ ನಮಃ |
ಓಂ ದ್ರೀಂ ಶಿರಸೇ ಸ್ವಾಹಾ |
ಓಂ ದ್ರೂಂ ಶಿಖಾಯೈ ವಷಟ್ |
ಓಂ ದ್ರೈಂ ಕವಚಾಯ ಹುಂ |
ಓಂ ದ್ರೌಂ ನೇತ್ರತ್ರಯಾಯ ವೌಷಟ್ |
ಓಂ ದ್ರಃ ಅಸ್ತ್ರಾಯ ಫಟ್ |
ಓಂ ಭೂರ್ಭುವಃಸ್ವರೋಮಿತಿ ದಿಗ್ಬಂಧಃ ||

ಏತನ್ಮೇ ವಜ್ರಕವಚಂ ಯಃ ಪಠೇಚ್ಛೃಣುಯಾದಪಿ |
ವಜ್ರಕಾಯಶ್ಚಿರಂಜೀವೀ ದತ್ತಾತ್ರೇಯೋಽಹಮಬ್ರುವಂ || 23||

ತ್ಯಾಗೀ ಭೋಗೀ ಮಹಾಯೋಗೀ ಸುಖದುಃಖವಿವರ್ಜಿತಃ |
ಸರ್ವತ್ರಸಿದ್ಧಸಂಕಲ್ಪೋ ಜೀವನ್ಮುಕ್ತೋಽದ್ಯ ವರ್ತತೇ || 24||

ಇತ್ಯುಕ್ತ್ವಾಂತರ್ದಧೇ ಯೋಗೀ ದತ್ತಾತ್ರೇಯೋ ದಿಗಂಬರಃ |
ದಲಾದನೋಽಪಿ ತಜ್ಜಪ್ತ್ವಾ ಜೀವನ್ಮುಕ್ತಃ ಸ ವರ್ತತೇ || 25||

ಭಿಲ್ಲೋ ದೂರಶ್ರವಾ ನಾಮ ತದಾನೀಂ ಶ್ರುತವಾದಿನಂ |
ಸಕೃಚ್ಛ್ರವಣಮಾತ್ರೇಣ ವಜ್ರಾಂಗೋಽಭವದಪ್ಯಸೌ || 26||

ಇತ್ಯೇತದ್ವಜ್ರಕವಚಂ ದತ್ತಾತ್ರೇಯಸ್ಯ ಯೋಗಿನಃ |
ಶ್ರುತ್ವಾಶೇಷಂ ಶಂಭುಮುಖಾತ್ ಪುನರಪ್ಯಾಹ ಪಾರ್ವತೀ || 27||

ಪಾರ್ವತ್ಯುವಾಚ |
ಏತತ್ಕವಚಮಾಹಾತ್ಮ್ಯಂ ವದ ವಿಸ್ತರತೋ ಮಮ |
ಕುತ್ರ ಕೇನ ಕದಾ ಜಾಪ್ಯಂ ಕಿಂ ಯಜಾಪ್ಯಂ ಕಥಂ ಕಥಂ || 28||

ಉವಾಚ ಶಂಭುಸ್ತತ್ಸರ್ವಂ ಪಾರ್ವತ್ಯಾ ವಿನಯೋದಿತಂ |
ಶ್ರೀಶಿವ ಉವಾಚ |
ಶ್ರುಣು ಪಾರ್ವತಿ ವಕ್ಷ್ಯಾಮಿ ಸಮಾಹಿತಮನಾವಿಲಂ || 29||

ಧರ್ಮಾರ್ಥಕಾಮಮೋಕ್ಷಾಣಾಮಿದಮೇವ ಪರಾಯಣಂ |
ಹಸ್ತ್ಯಶ್ವರಥಪಾದಾತಿಸರ್ವೈಶ್ವರ್ಯಪ್ರದಾಯಕಂ || 30||

ಪುತ್ರಮಿತ್ರಕಲತ್ರಾದಿಸರ್ವಸಂತೋಷಸಾಧನಂ |
ವೇದಶಾಸ್ತ್ರಾದಿವಿದ್ಯಾನಾಂ ನಿಧಾನಂ ಪರಮಂ ಹಿ ತತ್ || 31||

ಸಂಗೀತಶಾಸ್ತ್ರಸಾಹಿತ್ಯಸತ್ಕವಿತ್ವವಿಧಾಯಕಂ |
ಬುದ್ಧಿವಿದ್ಯಾಸ್ಮೃತಿಪ್ರಜ್ಞಾಮತಿಪ್ರೌಢಿಪ್ರದಾಯಕಂ || 32||

ಸರ್ವಸಂತೋಷಕರಣಂ ಸರ್ವದುಃಖನಿವಾರಣಂ |
ಶತ್ರು ಸಂಹಾರಕಂ ಶೀಘ್ರಂ ಯಶಃಕೀರ್ತಿವಿವರ್ಧನಂ || 33||

ಅಷ್ಟಸಂಖ್ಯಾ ಮಹಾರೋಗಾಃ ಸನ್ನಿಪಾತಾಸ್ತ್ರಯೋದಶ |
ಷಣ್ಣವತ್ಯಕ್ಷಿರೋಗಾಶ್ಚ ವಿಂಶತಿರ್ಮೇಹರೋಗಕಾಃ || 34||

ಅಷ್ಟಾದಶ ತು ಕುಷ್ಠಾನಿ ಗುಲ್ಮಾನ್ಯಷ್ಟವಿಧಾನ್ಯಪಿ |
ಅಶೀತಿರ್ವಾತರೋಗಾಶ್ಚ ಚತ್ವಾರಿಶತ್ತು ಪೈತ್ತಿಕಾಃ || 35||

ವಿಂಶತಿಶ್ಲೇಷ್ಮರೋಗಾಶ್ಚ ಕ್ಷಯಚಾತುರ್ಥಿಕಾದಯಃ |
ಮಂತ್ರಯಂತ್ರಕುಯೋಗಾದ್ಯಾಃ ಕಲ್ಪತಂತ್ರಾದಿನಿರ್ಮಿತಾಃ || 36||

ಬ್ರಹ್ಮರಾಕ್ಷಸವೇತಾಲಕೂಷ್ಮಾಂಡಾದಿಗ್ರಹೋದ್ಭವಾಃ |
ಸಂಗಜಾಃ ದೇಶಕಾಲಸ್ಥಾಸ್ತಾಪತ್ರಯಸಮುತ್ಥಿತಾಃ || 37||

ನವಗ್ರಹಸಮುದ್ಭೂತಾ ಮಹಾಪಾತಕಸಂಭವಾಃ |
ಸರ್ವೇ ರೋಗಾಃ ಪ್ರಣಶ್ಯಂತಿ ಸಹಸ್ರಾವರ್ತನಾದ್ಧ್ರುವಂ || 38||

ಅಯುತಾವೃತ್ತಿಮಾತ್ರೇಣ ವಂಧ್ಯಾ ಪುತ್ರವತೀ ಭವೇತ್ |
ಅಯುತದ್ವಿತಯಾವೃತ್ತ್ಯಾ ಹ್ಯಪಮೃತ್ಯುಜಯೋ ಭವೇತ್ || 39||

ಅಯುತತ್ರಿತಯಾಚ್ಚೈವ ಖೇಚರತ್ವಂ ಪ್ರಜಾಯತೇ |
ಸಹಸ್ರಾದಯುತಾದರ್ವಾಕ್ ಸರ್ವಕಾರ್ಯಾಣಿ ಸಾಧಯೇತ್ || 40||

ಲಕ್ಷಾವೃತ್ಯಾ ಕಾರ್ಯಸಿದ್ಧಿರ್ಭವೇತ್ಯೇವ ನ ಸಂಶಯಃ || 41||

ವಿಷವೃಕ್ಷಸ್ಯ ಮೂಲೇಷು ತಿಷ್ಠನ್ ವೈ ದಕ್ಷಿಣಾಮುಖಃ |
ಕುರುತೇ ಮಾಸಮಾತ್ರೇಣ ವೈರಿಣಂ ವಿಕಲೇಂದ್ರಿಯಂ || 42||

ಔದುಂಬರತರೋರ್ಮೂಲೇ ವೃದ್ಧಿಕಾಮೇನ ಜಾಪ್ಯತೇ |
ಶ್ರೀವಕ್ಷಮೂಲೇ ಶ್ರೀಕಾಮೀ ತಿಂತಿಣೀ ಶಾಂತಿಕರ್ಮಣಿ || 43||

ಓಜಸ್ಕಾಮೋಽಶ್ವತ್ಥಮೂಲೇ ಸ್ತ್ರೀಕಾಮೈಃ ಸಹಕಾರಕೇ |
ಜ್ಞಾನಾರ್ಥೀ ತುಲಸೀಮೂಲೇ ಗರ್ಭಗೇಹೇ ಸುತಾರ್ಥಿಭಿಃ || 44||

ಧನಾರ್ಥಿಭಿಸ್ತು ಸುಕ್ಷೇತ್ರೇ ಪಶುಕಾಮೈಸ್ತು ಗೋಷ್ಠಕೇ |
ದೇವಾಲಯೇ ಸರ್ವಕಾಮೈಸ್ತತ್ಕಾಲೇ ಸರ್ವದರ್ಶಿತಂ || 45||

ನಾಭಿಮಾತ್ರಜಲೇ ಸ್ಥಿತ್ವಾ ಭಾನುಮಾಲೋಕ್ಯ ಯೋ ಜಪೇತ್ |
ಯುದ್ಧೇ ವಾ ಶಾಸ್ತ್ರವಾದೇ ವಾ ಸಹಸ್ರೇಣ ಜಯೋ ಭವೇತ್ || 46||

ಕಂಠಮಾತ್ರೇ ಜಲೇ ಸ್ಥಿತ್ವಾ ಯೋ ರಾತ್ರೌ ಕವಚಂ ಪಠೇತ್ |
ಜ್ವರಾಪಸ್ಮಾರಕುಷ್ಠಾದಿತಾಪಜ್ವರನಿವಾರಣಂ || 47||

ಯತ್ರ ಯತ್ಸ್ಯಾತ್ಸ್ಥಿರಂ ಯದ್ಯತ್ಪ್ರಸನ್ನಂ ತನ್ನಿವರ್ತತೇ |
ತೇನ ತತ್ರ ಹಿ ಜಪ್ತವ್ಯಂ ತತಃ ಸಿದ್ಧಿರ್ಭವೇದ್ಧ್ರುವಂ || 48||

ಇತ್ಯುಕ್ತ್ವಾನ್ ಚ ಶಿವೋ ಗೌರ್ಯೇ ರಹಸ್ಯಂ ಪರಮಂ ಶುಭಂ |
ಯಃ ಪಠೇತ್ ವಜ್ರಕವಚಂ ದತ್ತಾತ್ರೇಯೋಸಮೋ ಭವೇತ್ || 49||

ಏವಂ ಶಿವೇನ ಕಥಿತಂ ಹಿಮವತ್ಸುತಾಯೈ
     ಪ್ರೋಕ್ತಂ ದಲಾದಮುನಯೇಽತ್ರಿಸುತೇನಪೂರ್ವಂ |
ಯಃ ಕೋಽಪಿ ವಜ್ರಕವಚಂ ಪಠತೀಹ ಲೋಕೇ
     ದತ್ತೋಪಮಶ್ಚರತಿ ಯೋಗಿವರಶ್ಚಿರಾಯುಃ || 50||

|| ಇತಿ ಶ್ರೀರುದ್ರಯಾಮಲೇ ಹಿಮವತ್ಖಂಡೇ ಮಂತ್ರಶಾಸ್ತ್ರೇ ಉಪಾಸನಾಖಂಡೇ
ಶಿವವಿಜಯಸಿದ್ಧಾಂತೇ ಉಮಾಮಹೇಶ್ವರಸಂವಾದೇ
ಶ್ರೀದತ್ತಾತ್ರೇಯವಜ್ರಕವಚಸ್ತೋತ್ರಂ ಸಂಪೂರ್ಣಂ ||

|| ಶ್ರೀದತ್ತಾತ್ರೇಯಾರ್ಪಣಮಸ್ತು ||