ಸಂತಾನ ಗೋಪಾಲ ಸ್ತೋತ್ರ

|| ಸಂತಾನಗೋಪಾಲಸ್ತೋತ್ರಂ ||

ಶ್ರೀಶಂ ಕಮಲಪತ್ರಾಕ್ಷಂ ದೇವಕೀನಂದನಂ ಹರಿಂ |
ಸುತಸಂಪ್ರಾಪ್ತಯೇ ಕೃಷ್ಣಂ ನಮಾಮಿ ಮಧುಸೂದನಂ || 1 ||

ನಮಾಮ್ಯಹಂ ವಾಸುದೇವಂ ಸುತಸಂಪ್ರಾಪ್ತಯೇ ಹರಿಂ |
ಯಶೋದಾಂಕಗತಂ ಬಾಲಂ ಗೋಪಾಲಂ ನಂದನಂದನಂ || 2 ||

ಅಸ್ಮಾಕಂ ಪುತ್ರಲಾಭಾಯ ಗೋವಿಂದಂ ಮುನಿವಂದಿತಂ |
ನಮಾಮ್ಯಹಂ ವಾಸುದೇವಂ ದೇವಕೀನಂದನಂ ಸದಾ || 3 ||

ಗೋಪಾಲಂ ಡಿಂಭಕಂ ವಂದೇ ಕಮಲಾಪತಿಮಚ್ಯುತಂ |
ಪುತ್ರಸಂಪ್ರಾಪ್ತಯೇ ಕೃಷ್ಣಂ ನಮಾಮಿ ಯದುಪುಂಗವಂ || 4 ||

ಪುತ್ರಕಾಮೇಷ್ಟಿಫಲದಂ ಕಂಜಾಕ್ಷಂ ಕಮಲಾಪತಿಂ |
ದೇವಕೀನಂದನಂ ವಂದೇ ಸುತಸಂಪ್ರಾಪ್ತಯೇ ಮಮ || 5 ||

ಪದ್ಮಾಪತೇ ಪದ್ಮನೇತ್ರ ಪದ್ಮನಾಭ ಜನಾರ್ದನ |
ದೇಹಿ ಮೇ ತನಯಂ ಶ್ರೀಶ ವಾಸುದೇವ ಜಗತ್ಪತೇ || 6 ||

ಯಶೋದಾಂಕಗತಂ ಬಾಲಂ ಗೋವಿಂದಂ ಮುನಿವಂದಿತಂ |
ಅಸ್ಮಾಕಂ ಪುತ್ರ ಲಾಭಾಯ ನಮಾಮಿ ಶ್ರೀಶಮಚ್ಯುತಂ || 7 ||

ಶ್ರೀಪತೇ ದೇವದೇವೇಶ ದೀನಾರ್ತಿಹರಣಾಚ್ಯುತ |
ಗೋವಿಂದ ಮೇ ಸುತಂ ದೇಹಿ ನಮಾಮಿ ತ್ವಾಂ ಜನಾರ್ದನ || 8 ||

ಭಕ್ತಕಾಮದ ಗೋವಿಂದ ಭಕ್ತಂ ರಕ್ಷ ಶುಭಪ್ರದ |
ದೇಹಿ ಮೇ ತನಯಂ ಕೃಷ್ಣ ರುಕ್ಮಿಣೀವಲ್ಲಭ ಪ್ರಭೋ || 9 ||

ರುಕ್ಮಿಣೀನಾಥ ಸರ್ವೇಶ ದೇಹಿ ಮೇ ತನಯಂ ಸದಾ |
ಭಕ್ತಮಂದಾರ ಪದ್ಮಾಕ್ಷ ತ್ವಾಮಹಂ ಶರಣಂ ಗತಃ || 10 ||

ದೇವಕೀಸುತ ಗೋವಿಂದ ವಾಸುದೇವ ಜಗತ್ಪತೇ |
ದೇಹಿ ಮೇ ತನಯಂ ಕೃಷ್ಣ ತ್ವಾಮಹಂ ಶರಣಂ ಗತಃ || 11 ||

ವಾಸುದೇವ ಜಗದ್ವಂದ್ಯ ಶ್ರೀಪತೇ ಪುರುಷೋತ್ತಮ |
ದೇಹಿ ಮೇ ತನಯಂ ಕೃಷ್ಣ ತ್ವಾಮಹಂ ಶರಣಂ ಗತಃ || 12 ||

ಕಂಜಾಕ್ಷ ಕಮಲಾನಾಥ ಪರಕಾರುಣಿಕೋತ್ತಮ |
ದೇಹಿ ಮೇ ತನಯಂ ಕೃಷ್ಣ ತ್ವಾಮಹಂ ಶರಣಂ ಗತಃ || 13 ||

ಲಕ್ಷ್ಮೀಪತೇ ಪದ್ಮನಾಭ ಮುಕುಂದ ಮುನಿವಂದಿತ |
ದೇಹಿ ಮೇ ತನಯಂ ಕೃಷ್ಣ ತ್ವಾಮಹಂ ಶರಣಂ ಗತಃ || 14 ||

ಕಾರ್ಯಕಾರಣರೂಪಾಯ ವಾಸುದೇವಾಯ ತೇ ಸದಾ |
ನಮಾಮಿ ಪುತ್ರಲಾಭಾರ್ಥಂ ಸುಖದಾಯ ಬುಧಾಯ ತೇ || 15 ||

ರಾಜೀವನೇತ್ರ ಶ್ರೀರಾಮ ರಾವಣಾರೇ ಹರೇ ಕವೇ |
ತುಭ್ಯಂ ನಮಾಮಿ ದೇವೇಶ ತನಯಂ ದೇಹಿ ಮೇ ಹರೇ || 16 ||

ಅಸ್ಮಾಕಂ ಪುತ್ರಲಾಭಾಯ ಭಜಾಮಿ ತ್ವಾಂ ಜಗತ್ಪತೇ |
ದೇಹಿ ಮೇ ತನಯಂ ಕೃಷ್ಣ ವಾಸುದೇವ ರಮಾಪತೇ || 17 ||

ಶ್ರೀಮಾನಿನೀಮಾನಚೋರ ಗೋಪೀವಸ್ತ್ರಾಪಹಾರಕ |
ದೇಹಿ ಮೇ ತನಯಂ ಕೃಷ್ಣ ವಾಸುದೇವ ಜಗತ್ಪತೇ || 18 ||

ಅಸ್ಮಾಕಂ ಪುತ್ರಸಂಪ್ರಾಪ್ತಿಂ ಕುರುಷ್ವ ಯದುನಂದನ |
ರಮಾಪತೇ ವಾಸುದೇವ ಮುಕುಂದ ಮುನಿವಂದಿತ || 19 ||

ವಾಸುದೇವ ಸುತಂ ದೇಹಿ ತನಯಂ ದೇಹಿ ಮಾಧವ |
ಪುತ್ರಂ ಮೇ ದೇಹಿ ಶ್ರೀಕೃಷ್ಣ ವತ್ಸಂ ದೇಹಿ ಮಹಾಪ್ರಭೋ || 20 ||

ಡಿಂಭಕಂ ದೇಹಿ ಶ್ರೀಕೃಷ್ಣ ಆತ್ಮಜಂ ದೇಹಿ ರಾಘವ |
ಭಕ್ತಮಂದಾರ ಮೇ ದೇಹಿ ತನಯಂ ನಂದನಂದನ || 21 ||

ನಂದನಂ ದೇಹಿ ಮೇ ಕೃಷ್ಣ ವಾಸುದೇವ ಜಗತ್ಪತೇ |
ಕಮಲಾನಾಥ ಗೋವಿಂದ ಮುಕುಂದ ಮುನಿವಂದಿತ || 22 ||

ಅನ್ಯಥಾ ಶರಣಂ ನಾಸ್ತಿ ತ್ವಮೇವ ಶರಣಂ ಮಮ |
ಸುತಂ ದೇಹಿ ಶ್ರಿಯಂ ದೇಹಿ ಶ್ರಿಯಂ ಪುತ್ರಂ ಪ್ರದೇಹಿ ಮೇ || 23 ||

ಯಶೋದಾಸ್ತನ್ಯಪಾನಜ್ಞಂ ಪಿಬಂತಂ ಯದುನಂದನಂ |
ವಂದೇಽಹಂ ಪುತ್ರಲಾಭಾರ್ಥಂ ಕಪಿಲಾಕ್ಷಂ ಹರಿಂ ಸದಾ || 24 ||

ನಂದನಂದನ ದೇವೇಶ ನಂದನಂ ದೇಹಿ ಮೇ ಪ್ರಭೋ |
ರಮಾಪತೇ ವಾಸುದೇವ ಶ್ರಿಯಂ ಪುತ್ರಂ ಜಗತ್ಪತೇ || 25 ||

ಪುತ್ರಂ ಶ್ರಿಯಂ ಶ್ರಿಯಂ ಪುತ್ರಂ ಪುತ್ರಂ ಮೇ ದೇಹಿ ಮಾಧವ |
ಅಸ್ಮಾಕಂ ದೀನವಾಕ್ಯಸ್ಯ ಅವಧಾರಯ ಶ್ರೀಪತೇ || 26 ||

ಗೋಪಾಲ ಡಿಂಭ ಗೋವಿಂದ ವಾಸುದೇವ ರಮಾಪತೇ |
ಅಸ್ಮಾಕಂ ಡಿಂಭಕಂ ದೇಹಿ ಶ್ರಿಯಂ ದೇಹಿ ಜಗತ್ಪತೇ || 27 ||

ಮದ್ವಾಂಛಿತಫಲಂ ದೇಹಿ ದೇವಕೀನಂದನಾಚ್ಯುತ |
ಮಮ ಪುತ್ರಾರ್ಥಿತಂ ಧನ್ಯಂ ಕುರುಷ್ವ ಯದುನಂದನ || 28 ||

ಯಾಚೇಽಹಂ ತ್ವಾಂ ಶ್ರಿಯಂ ಪುತ್ರಂ ದೇಹಿ ಮೇ ಪುತ್ರಸಂಪದಂ |
ಭಕ್ತಚಿಂತಾಮಣೇ ರಾಮ ಕಲ್ಪವೃಕ್ಷ ಮಹಾಪ್ರಭೋ || 29 ||

ಆತ್ಮಜಂ ನಂದನಂ ಪುತ್ರಂ ಕುಮಾರಂ ಡಿಂಭಕಂ ಸುತಂ |
ಅರ್ಭಕಂ ತನಯಂ ದೇಹಿ ಸದಾ ಮೇ ರಘುನಂದನ || 30 ||

ವಂದೇ ಸಂತಾನಗೋಪಾಲಂ ಮಾಧವಂ ಭಕ್ತಕಾಮದಂ |
ಅಸ್ಮಾಕಂ ಪುತ್ರಸಂಪ್ರಾಪ್ತ್ಯೈ ಸದಾ ಗೋವಿಂದಮಚ್ಯುತಂ || 31 ||

ಓಂಕಾರಯುಕ್ತಂ ಗೋಪಾಲಂ ಶ್ರೀಯುಕ್ತಂ ಯದುನಂದನಂ |
ಕ್ಲೀಂಯುಕ್ತಂ ದೇವಕೀಪುತ್ರಂ ನಮಾಮಿ ಯದುನಾಯಕಂ || 32 ||

ವಾಸುದೇವ ಮುಕುಂದೇಶ ಗೋವಿಂದ ಮಾಧವಾಚ್ಯುತ |
ದೇಹಿ ಮೇ ತನಯಂ ಕೃಷ್ಣ ರಮಾನಾಥ ಮಹಾಪ್ರಭೋ || 33 ||

ರಾಜೀವನೇತ್ರ ಗೋವಿಂದ ಕಪಿಲಾಕ್ಷ ಹರೇ ಪ್ರಭೋ |
ಸಮಸ್ತಕಾಮ್ಯವರದ ದೇಹಿ ಮೇ ತನಯಂ ಸದಾ || 34 ||

ಅಬ್ಜಪದ್ಮನಿಭಂ ಪದ್ಮವೃಂದರೂಪ ಜಗತ್ಪತೇ |
ದೇಹಿ ಮೇ ವರಸತ್ಪುತ್ರಂ ರಮಾನಾಯಕ ಮಾಧವ || 35 ||

ನಂದಪಾಲ ಧರಾಪಾಲ ಗೋವಿಂದ ಯದುನಂದನ |
ದೇಹಿ ಮೇ ತನಯಂ ಕೃಷ್ಣ ರುಕ್ಮಿಣೀವಲ್ಲಭ ಪ್ರಭೋ || 36 ||

ದಾಸಮಂದಾರ ಗೋವಿಂದ ಮುಕುಂದ ಮಾಧವಾಚ್ಯುತ |
ಗೋಪಾಲ ಪುಂಡರೀಕಾಕ್ಷ ದೇಹಿ ಮೇ ತನಯಂ ಶ್ರಿಯಂ || 37 ||

ಯದುನಾಯಕ ಪದ್ಮೇಶ ನಂದಗೋಪವಧೂಸುತ |
ದೇಹಿ ಮೇ ತನಯಂ ಕೃಷ್ಣ ಶ್ರೀಧರ ಪ್ರಾಣನಾಯಕ || 38 ||

ಅಸ್ಮಾಕಂ ವಾಂಛಿತಂ ದೇಹಿ ದೇಹಿ ಪುತ್ರಂ ರಮಾಪತೇ |
ಭಗವನ್ ಕೃಷ್ಣ ಸರ್ವೇಶ ವಾಸುದೇವ ಜಗತ್ಪತೇ || 39 ||

ರಮಾಹೃದಯಸಂಭಾರಸತ್ಯಭಾಮಾಮನಃ ಪ್ರಿಯ |
ದೇಹಿ ಮೇ ತನಯಂ ಕೃಷ್ಣ ರುಕ್ಮಿಣೀವಲ್ಲಭ ಪ್ರಭೋ || 40 ||

ಚಂದ್ರಸೂರ್ಯಾಕ್ಷ ಗೋವಿಂದ ಪುಂಡರೀಕಾಕ್ಷ ಮಾಧವ |
ಅಸ್ಮಾಕಂ ಭಾಗ್ಯಸತ್ಪುತ್ರಂ ದೇಹಿ ದೇವ ಜಗತ್ಪತೇ || 41 ||

ಕಾರುಣ್ಯರೂಪ ಪದ್ಮಾಕ್ಷ ಪದ್ಮನಾಭಸಮರ್ಚಿತ |
ದೇಹಿ ಮೇ ತನಯಂ ಕೃಷ್ಣ ದೇವಕೀನಂದನಂದನ || 42 ||

ದೇವಕೀಸುತ ಶ್ರೀನಾಥ ವಾಸುದೇವ ಜಗತ್ಪತೇ |
ಸಮಸ್ತಕಾಮಫಲದ ದೇಹಿ ಮೇ ತನಯಂ ಸದಾ || 43 ||

ಭಕ್ತಮಂದಾರ ಗಂಭೀರ ಶಂಕರಾಚ್ಯುತ ಮಾಧವ |
ದೇಹಿ ಮೇ ತನಯಂ ಗೋಪಬಾಲವತ್ಸಲ ಶ್ರೀಪತೇ || 44 ||

ಶ್ರೀಪತೇ ವಾಸುದೇವೇಶ ದೇವಕೀಪ್ರಿಯನಂದನ |
ಭಕ್ತಮಂದಾರ ಮೇ ದೇಹಿ ತನಯಂ ಜಗತಾಂ ಪ್ರಭೋ || 45 ||

ಜಗನ್ನಾಥ ರಮಾನಾಥ ಭೂಮಿನಾಥ ದಯಾನಿಧೇ |
ವಾಸುದೇವೇಶ ಸರ್ವೇಶ ದೇಹಿ ಮೇ ತನಯಂ ಪ್ರಭೋ || 46 ||

ಶ್ರೀನಾಥ ಕಮಲಪತ್ರಾಕ್ಷ ವಾಸುದೇವ ಜಗತ್ಪತೇ |
ದೇಹಿ ಮೇ ತನಯಂ ಕೃಷ್ಣ ತ್ವಾಮಹಂ ಶರಣಂ ಗತಃ || 47 ||

ದಾಸಮಂದಾರ ಗೋವಿಂದ ಭಕ್ತಚಿಂತಾಮಣೇ ಪ್ರಭೋ |
ದೇಹಿ ಮೇ ತನಯಂ ಕೃಷ್ಣ ತ್ವಾಮಹಂ ಶರಣಂ ಗತಃ || 48 ||

ಗೋವಿಂದ ಪುಂಡರೀಕಾಕ್ಷ ರಮಾನಾಥ ಮಹಾಪ್ರಭೋ |
ದೇಹಿ ಮೇ ತನಯಂ ಕೃಷ್ಣ ತ್ವಾಮಹಂ ಶರಣಂ ಗತಃ || 49 ||

ಶ್ರೀನಾಥ ಕಮಲಪತ್ರಾಕ್ಷ ಗೋವಿಂದ ಮಧುಸೂದನ |
ಮತ್ಪುತ್ರಫಲಸಿದ್ಧ್ಯರ್ಥಂ ಭಜಾಮಿ ತ್ವಾಂ ಜನಾರ್ದನ || 50 ||

ಸ್ತನ್ಯಂ ಪಿಬಂತಂ ಜನನೀಮುಖಾಂಬುಜಂ ವಿಲೋಕ್ಯ ಮಂದಸ್ಮಿತಮುಜ್ಜ್ವಲಾಂಗಂ |
ಸ್ಪೃಶಂತಮನ್ಯಸ್ತನಮಂಗುಲೀಭಿರ್ವಂದೇ ಯಶೋದಾಂಕಗತಂ ಮುಕುಂದಂ || 51 ||

ಯಾಚೇಽಹಂ ಪುತ್ರಸಂತಾನಂ ಭವಂತಂ ಪದ್ಮಲೋಚನ |
ದೇಹಿ ಮೇ ತನಯಂ ಕೃಷ್ಣ ತ್ವಾಮಹಂ ಶರಣಂ ಗತಃ || 52 ||

ಅಸ್ಮಾಕಂ ಪುತ್ರಸಂಪತ್ತೇಶ್ಚಿಂತಯಾಮಿ ಜಗತ್ಪತೇ |
ಶೀಘ್ರಂ ಮೇ ದೇಹಿ ದಾತವ್ಯಂ ಭವತಾ ಮುನಿವಂದಿತ || 53 ||

ವಾಸುದೇವ ಜಗನ್ನಾಥ ಶ್ರೀಪತೇ ಪುರುಷೋತ್ತಮ |
ಕುರು ಮಾಂ ಪುತ್ರದತ್ತಂ ಚ ಕೃಷ್ಣ ದೇವೇಂದ್ರಪೂಜಿತ || 54 ||

ಕುರು ಮಾಂ ಪುತ್ರದತ್ತಂ ಚ ಯಶೋದಾಪ್ರಿಯನಂದನಂ |
ಮಹ್ಯಂ ಚ ಪುತ್ರಸಂತಾನಂ ದಾತವ್ಯಂ ಭವತಾ ಹರೇ || 55 ||

ವಾಸುದೇವ ಜಗನ್ನಾಥ ಗೋವಿಂದ ದೇವಕೀಸುತ |
ದೇಹಿ ಮೇ ತನಯಂ ರಾಮ ಕೌಶಲ್ಯಾಪ್ರಿಯನಂದನ || 56 ||

ಪದ್ಮಪತ್ರಾಕ್ಷ ಗೋವಿಂದ ವಿಷ್ಣೋ ವಾಮನ ಮಾಧವ |
ದೇಹಿ ಮೇ ತನಯಂ ಸೀತಾಪ್ರಾಣನಾಯಕ ರಾಘವ || 57 ||

ಕಂಜಾಕ್ಷ ಕೃಷ್ಣ ದೇವೇಂದ್ರಮಂಡಿತ ಮುನಿವಂದಿತ |
ಲಕ್ಷ್ಮಣಾಗ್ರಜ ಶ್ರೀರಾಮ ದೇಹಿ ಮೇ ತನಯಂ ಸದಾ || 58 ||

ದೇಹಿ ಮೇ ತನಯಂ ರಾಮ ದಶರಥಪ್ರಿಯನಂದನ |
ಸೀತಾನಾಯಕ ಕಂಜಾಕ್ಷ ಮುಚುಕುಂದವರಪ್ರದ || 59 ||

ವಿಭೀಷಣಸ್ಯ ಯಾ ಲಂಕಾ ಪ್ರದತ್ತಾ ಭವತಾ ಪುರಾ |
ಅಸ್ಮಾಕಂ ತತ್ಪ್ರಕಾರೇಣ ತನಯಂ ದೇಹಿ ಮಾಧವ || 60 ||

ಭವದೀಯಪದಾಂಭೋಜೇ ಚಿಂತಯಾಮಿ ನಿರಂತರಂ |
ದೇಹಿ ಮೇ ತನಯಂ ಸೀತಾಪ್ರಾಣವಲ್ಲಭ ರಾಘವ || 61 ||

ರಾಮ ಮತ್ಕಾಮ್ಯವರದ ಪುತ್ರೋತ್ಪತ್ತಿಫಲಪ್ರದ |
ದೇಹಿ ಮೇ ತನಯಂ ಶ್ರೀಶ ಕಮಲಾಸನವಂದಿತ || 62 ||

ರಾಮ ರಾಘವ ಸೀತೇಶ ಲಕ್ಷ್ಮಣಾನುಜ ದೇಹಿ ಮೇ |
ಭಾಗ್ಯವತ್ಪುತ್ರಸಂತಾನಂ ದಶರಥಾತ್ಮಜ ಶ್ರೀಪತೇ || 63 ||

ದೇವಕೀಗರ್ಭಸಂಜಾತ ಯಶೋದಾಪ್ರಿಯನಂದನ |
ದೇಹಿ ಮೇ ತನಯಂ ರಾಮ ಕೃಷ್ಣ ಗೋಪಾಲ ಮಾಧವ || 64 ||

ಕೃಷ್ಣ ಮಾಧವ ಗೋವಿಂದ ವಾಮನಾಚ್ಯುತ ಶಂಕರ |
ದೇಹಿ ಮೇ ತನಯಂ ಶ್ರೀಶ ಗೋಪಬಾಲಕನಾಯಕ || 65 ||

ಗೋಪಬಾಲ ಮಹಾಧನ್ಯ ಗೋವಿಂದಾಚ್ಯುತ ಮಾಧವ |
ದೇಹಿ ಮೇ ತನಯಂ ಕೃಷ್ಣ ವಾಸುದೇವ ಜಗತ್ಪತೇ || 66 ||

ದಿಶತು ದಿಶತು ಪುತ್ರಂ ದೇವಕೀನಂದನೋಽಯಂ
ದಿಶತು ದಿಶತು ಶೀಘ್ರಂ ಭಾಗ್ಯವತ್ಪುತ್ರಲಾಭಂ |
ದಿಶತು ದಿಶತು ಶ್ರೀಶೋ ರಾಘವೋ ರಾಮಚಂದ್ರೋ
ದಿಶತು ದಿಶತು ಪುತ್ರಂ ವಂಶ ವಿಸ್ತಾರಹೇತೋಃ || 67 ||

ದೀಯತಾಂ ವಾಸುದೇವೇನ ತನಯೋ ಮತ್ಪ್ರಿಯಃ ಸುತಃ |
ಕುಮಾರೋ ನಂದನಃ ಸೀತಾನಾಯಕೇನ ಸದಾ ಮಮ || 68 ||

ರಾಮ ರಾಘವ ಗೋವಿಂದ ದೇವಕೀಸುತ ಮಾಧವ |
ದೇಹಿ ಮೇ ತನಯಂ ಶ್ರೀಶ ಗೋಪಬಾಲಕನಾಯಕ || 69 ||

ವಂಶವಿಸ್ತಾರಕಂ ಪುತ್ರಂ ದೇಹಿ ಮೇ ಮಧುಸೂದನ |
ಸುತಂ ದೇಹಿ ಸುತಂ ದೇಹಿ ತ್ವಾಮಹಂ ಶರಣಂ ಗತಃ || 70 ||

ಮಮಾಭೀಷ್ಟಸುತಂ ದೇಹಿ ಕಂಸಾರೇ ಮಾಧವಾಚ್ಯುತ |
ಸುತಂ ದೇಹಿ ಸುತಂ ದೇಹಿ ತ್ವಾಮಹಂ ಶರಣಂ ಗತಃ || 71 ||

ಚಂದ್ರಾರ್ಕಕಲ್ಪಪರ್ಯಂತಂ ತನಯಂ ದೇಹಿ ಮಾಧವ |
ಸುತಂ ದೇಹಿ ಸುತಂ ದೇಹಿ ತ್ವಾಮಹಂ ಶರಣಂ ಗತಃ || 72 ||

ವಿದ್ಯಾವಂತಂ ಬುದ್ಧಿಮಂತಂ ಶ್ರೀಮಂತಂ ತನಯಂ ಸದಾ |
ದೇಹಿ ಮೇ ತನಯಂ ಕೃಷ್ಣ ದೇವಕೀನಂದನ ಪ್ರಭೋ || 73 ||

ನಮಾಮಿ ತ್ವಾಂ ಪದ್ಮನೇತ್ರ ಸುತಲಾಭಾಯ ಕಾಮದಂ |
ಮುಕುಂದಂ ಪುಂಡರೀಕಾಕ್ಷಂ ಗೋವಿಂದಂ ಮಧುಸೂದನಂ || 74 ||

ಭಗವನ್ ಕೃಷ್ಣ ಗೋವಿಂದ ಸರ್ವಕಾಮಫಲಪ್ರದ |
ದೇಹಿ ಮೇ ತನಯಂ ಸ್ವಾಮಿಂಸ್ತ್ವಾಮಹಂ ಶರಣಂ ಗತಃ || 75 ||

ಸ್ವಾಮಿಂಸ್ತ್ವಂ ಭಗವನ್ ರಾಮ ಕೃಷ್ಣ ಮಾಧವ ಕಾಮದ |
ದೇಹಿ ಮೇ ತನಯಂ ನಿತ್ಯಂ ತ್ವಾಮಹಂ ಶರಣಂ ಗತಃ || 76 ||

ತನಯಂ ದೇಹಿ ಗೋವಿಂದ ಕಂಜಾಕ್ಷ ಕಮಲಾಪತೇ |
ಸುತಂ ದೇಹಿ ಸುತಂ ದೇಹಿ ತ್ವಾಮಹಂ ಶರಣಂ ಗತಃ || 77 ||

ಪದ್ಮಾಪತೇ ಪದ್ಮನೇತ್ರ ಪ್ರದ್ಯುಮ್ನ ಜನಕ ಪ್ರಭೋ |
ಸುತಂ ದೇಹಿ ಸುತಂ ದೇಹಿ ತ್ವಾಮಹಂ ಶರಣಂ ಗತಃ || 78 ||

ಶಂಖಚಕ್ರಗದಾಖಡ್ಗಶಾರ್ಂಗಪಾಣೇ ರಮಾಪತೇ |
ದೇಹಿ ಮೇ ತನಯಂ ಕೃಷ್ಣ ತ್ವಾಮಹಂ ಶರಣಂ ಗತಃ || 79 ||

ನಾರಾಯಣ ರಮಾನಾಥ ರಾಜೀವಪತ್ರಲೋಚನ |
ಸುತಂ ಮೇ ದೇಹಿ ದೇವೇಶ ಪದ್ಮಪದ್ಮಾನುವಂದಿತ || 80 ||

ರಾಮ ರಾಘವ ಗೋವಿಂದ ದೇವಕೀವರನಂದನ |
ರುಕ್ಮಿಣೀನಾಥ ಸರ್ವೇಶ ನಾರದಾದಿಸುರಾರ್ಚಿತ || 81 ||

ದೇವಕೀಸುತ ಗೋವಿಂದ ವಾಸುದೇವ ಜಗತ್ಪತೇ |
ದೇಹಿ ಮೇ ತನಯಂ ಶ್ರೀಶ ಗೋಪಬಾಲಕನಾಯಕ || 82 ||

ಮುನಿವಂದಿತ ಗೋವಿಂದ ರುಕ್ಮಿಣೀವಲ್ಲಭ ಪ್ರಭೋ |
ದೇಹಿ ಮೇ ತನಯಂ ಕೃಷ್ಣ ತ್ವಾಮಹಂ ಶರಣಂ ಗತಃ || 83 ||

ಗೋಪಿಕಾರ್ಜಿತಪಂಕೇಜಮರಂದಾಸಕ್ತಮಾನಸ |
ದೇಹಿ ಮೇ ತನಯಂ ಕೃಷ್ಣ ತ್ವಾಮಹಂ ಶರಣಂ ಗತಃ || 84 ||

ರಮಾಹೃದಯಪಂಕೇಜಲೋಲ ಮಾಧವ ಕಾಮದ |
ಮಮಾಭೀಷ್ಟಸುತಂ ದೇಹಿ ತ್ವಾಮಹಂ ಶರಣಂ ಗತಃ || 85 ||

ವಾಸುದೇವ ರಮಾನಾಥ ದಾಸಾನಾಂ ಮಂಗಲಪ್ರದ |
ದೇಹಿ ಮೇ ತನಯಂ ಕೃಷ್ಣ ತ್ವಾಮಹಂ ಶರಣಂ ಗತಃ || 86 ||

ಕಲ್ಯಾಣಪ್ರದ ಗೋವಿಂದ ಮುರಾರೇ ಮುನಿವಂದಿತ |
ದೇಹಿ ಮೇ ತನಯಂ ಕೃಷ್ಣ ತ್ವಾಮಹಂ ಶರಣಂ ಗತಃ || 87 ||

ಪುತ್ರಪ್ರದ ಮುಕುಂದೇಶ ರುಕ್ಮಿಣೀವಲ್ಲಭ ಪ್ರಭೋ |
ದೇಹಿ ಮೇ ತನಯಂ ಕೃಷ್ಣ ತ್ವಾಮಹಂ ಶರಣಂ ಗತಃ || 88 ||

ಪುಂಡರೀಕಾಕ್ಷ ಗೋವಿಂದ ವಾಸುದೇವ ಜಗತ್ಪತೇ |
ದೇಹಿ ಮೇ ತನಯಂ ಕೃಷ್ಣ ತ್ವಾಮಹಂ ಶರಣಂ ಗತಃ || 89 ||

ದಯಾನಿಧೇ ವಾಸುದೇವ ಮುಕುಂದ ಮುನಿವಂದಿತ |
ದೇಹಿ ಮೇ ತನಯಂ ಕೃಷ್ಣ ತ್ವಾಮಹಂ ಶರಣಂ ಗತಃ || 90 ||

ಪುತ್ರಸಂಪತ್ಪ್ರದಾತಾರಂ ಗೋವಿಂದಂ ದೇವಪೂಜಿತಂ |
ವಂದಾಮಹೇ ಸದಾ ಕೃಷ್ಣಂ ಪುತ್ರ ಲಾಭ ಪ್ರದಾಯಿನಂ || 91 ||

ಕಾರುಣ್ಯನಿಧಯೇ ಗೋಪೀವಲ್ಲಭಾಯ ಮುರಾರಯೇ |
ನಮಸ್ತೇ ಪುತ್ರಲಾಭಾಯ ದೇಹಿ ಮೇ ತನಯಂ ವಿಭೋ || 92 ||

ನಮಸ್ತಸ್ಮೈ ರಮೇಶಾಯ ರುಕ್ಮಿಣೀವಲ್ಲಭಾಯ ತೇ |
ದೇಹಿ ಮೇ ತನಯಂ ಶ್ರೀಶ ಗೋಪಬಾಲಕನಾಯಕ || 93 ||

ನಮಸ್ತೇ ವಾಸುದೇವಾಯ ನಿತ್ಯಶ್ರೀಕಾಮುಕಾಯ ಚ |
ಪುತ್ರದಾಯ ಚ ಸರ್ಪೇಂದ್ರಶಾಯಿನೇ ರಂಗಶಾಯಿನೇ || 94 ||

ರಂಗಶಾಯಿನ್ ರಮಾನಾಥ ಮಂಗಲಪ್ರದ ಮಾಧವ |
ದೇಹಿ ಮೇ ತನಯಂ ಶ್ರೀಶ ಗೋಪಬಾಲಕನಾಯಕ || 95 ||

ದಾಸಸ್ಯ ಮೇ ಸುತಂ ದೇಹಿ ದೀನಮಂದಾರ ರಾಘವ |
ಸುತಂ ದೇಹಿ ಸುತಂ ದೇಹಿ ಪುತ್ರಂ ದೇಹಿ ರಮಾಪತೇ || 96 ||

ಯಶೋದಾತನಯಾಭೀಷ್ಟಪುತ್ರದಾನರತಃ ಸದಾ |
ದೇಹಿ ಮೇ ತನಯಂ ಕೃಷ್ಣ ತ್ವಾಮಹಂ ಶರಣಂ ಗತಃ || 97 ||

ಮದಿಷ್ಟದೇವ ಗೋವಿಂದ ವಾಸುದೇವ ಜನಾರ್ದನ |
ದೇಹಿ ಮೇ ತನಯಂ ಕೃಷ್ಣ ತ್ವಾಮಹಂ ಶರಣಂ ಗತಃ || 98 ||

ನೀತಿಮಾನ್ ಧನವಾನ್ ಪುತ್ರೋ ವಿದ್ಯಾವಾಂಶ್ಚ ಪ್ರಜಾಯತೇ |
ಭಗವಂಸ್ತ್ವತ್ಕೃಪಾಯಾಶ್ಚ ವಾಸುದೇವೇಂದ್ರಪೂಜಿತ || 99 ||

ಯಃ ಪಠೇತ್ ಪುತ್ರಶತಕಂ ಸೋಽಪಿ ಸತ್ಪುತ್ರವಾನ್ ಭವೇತ್ |
ಶ್ರೀವಾಸುದೇವಕಥಿತಂ ಸ್ತೋತ್ರರತ್ನಂ ಸುಖಾಯ ಚ || 100 ||

ಜಪಕಾಲೇ ಪಠೇನ್ನಿತ್ಯಂ ಪುತ್ರಲಾಭಂ ಧನಂ ಶ್ರಿಯಂ |
ಐಶ್ವರ್ಯಂ ರಾಜಸಮ್ಮಾನಂ ಸದ್ಯೋ ಯಾತಿ ನ ಸಂಶಯಃ || 101 ||