Samba Panchashika

Saambapanchaashikaa

Pushnan devaanamri'tavisarairindumaasraavya samyag
Bhaabhih' svaabhee rasayati rasam' yah' param' nityameva |
Ksheenam' ksheenam' punarapi cha tam' poorayatyevameedri'g
Dolaaleelollasitahri'dayam' naumi chidbhaanumekam ||

Shabdaarthatvavivartamaanaparamajyoteerucho gopate-
-rudgeetho'bhyuditah' puro'runatayaa yasya trayeemand'alam |
Bhaasyadvarnapadakrameritatamah' saptasvaraashvairviya-
-dvidyaasyandanamunnayanniva namastasmai parabrahmane || 1 ||

Omityantarnadati niyatam' yah' pratipraani shabdo
Vaanee yasmaatprasarati paraa shabdatanmaatragarbhaa |
Praanaapaanau vahati cha samau yo mitho graasasaktau
Dehastham' tam' sapadi paramaadityamaadyam' prapadye || 2 ||

Yastvakchakshuh'shravanarasanaaghraanapaanyanghrivaanee-
-paayoopasthasthitirapi manobuddhyahankaaramoortih' |
Tisht'hatyantarbahirapi jagadbhaasayandvaadashaatmaa
Maartand'am' tam' sakalakaranaadhaaramekam' prapadye || 3 ||

Yaa saa mitraavarunasadanaaduchcharanto trishasht'im'
Varnaanatra prakat'akaranaih' praanasangaatprasootaan |
Taam' pashyanteem' prathamamuditaam' madhyamaam' buddhisam'sthaam'
Vaacham' vaktre karanavishadaam' vaikhareem' cha prapadye || 4 ||

Oordhvaadhah'sthaanyatanubhuvanaanyantaraa sam'nivisht'aa
Naanaanaad'iprasavagahanaa sarvabhootaantarasthaa |
Praanaapaanagrasananirataih' praapyate brahmanaad'ee
Saa nah' shvetaa bhavatu paramaadityamoortih' prasannaa || 5 ||

Na brahmaand'avyavahitapathaa naatisheetoshnaroopaa
No vaa naktandivagamamitaa'taapaneeyaaparaahuh' |
Vaikunt'heeyaa tanuriva rave raajate mand'alasthaa
Saa nah' shvetaa bhavatu paramaadityamoortih' prasannaa || 6 ||

Yatraarood'ham' trigunavapushi brahma tadbinduroopam'
Yogeendraanaam' yadapi paramam' bhaati nirvaanamaargah' |
Trayyaadhaarah' pranava iti yanmand'alam' chand'arashme-
-rantah' sookshmam' bahirapi bri'hanmuktaye'ham' prapannah' || 7 ||

Yasminsomah' surapitri'narairanvaham' peeyamaanah'
Ksheenah' ksheenah' pravishati yato vardhate chaapi bhooyah' |
Yasminvedaa madhuni saraghaakaaravadbhaanti chaagre
Tachchand'aam'shoramitamamri'tam' mand'alastham' prapadye || 8 ||

Aindreemaashaam' pri'thukavapushaa poorayitvaa kramena
Kraantaah' sapta prakat'aharinaa yena paadena lokaah' |
Kri'tvaa dhvaantam' vigalitabalivyakti paataalaleenam'
Vishvaalokah' sa jayati ravih' sattvamevordhvarashmih' || 9 ||

Dhyaatvaa brahma prathamamatanu praanamoole nadantam'
Dri'sht'vaa chaantah' pranavamukharam' vyaahri'teeh' samyaguktvaa |
Yattadvede taditi saviturbrahmanoktam' varenyam'
Tadbhargaakhyam' kimapi paramam' dhaamagarbham' prapadye || 10 ||

Tvaam' stoshyaami stutibhiriti me yastu bhedagraho'yam'
Saivaavidyaa tadapi sutaraam' tadvinaashaaya yuktah' |
Staumyevaaham' trividhamuditam' sthoolasookshmam' param' vaa
Vidyopaayah' para iti budhairgeeyate khalvavidyaa || 11 ||

Yo'naadyanto'pyatanuraguno'noraneeyaanmaheeyaa-
-nvishvaakaarah' saguna iti vaa kalpanaakalpitaangah' |
Naanaabhootaprakri'tivikri'teerdarshayanbhaati yo vaa
Tasmai tasmai bhavatu paramaaditya nityam' namaste || 12 ||

Tattvaakhyaane tvayi munijanaah' neti neti bruvantah'
Shraantaah' samyaktvamiti na cha taireedri'sho veti choktah' |
Tasmaattubhyam' nama iti vachomaatramevaasmi vachmi
Praayo yasmaatprasarati taraam' bhaaratee jnyaanagarbhaa || 13 ||

Sarvaangeenah' sakalavapushaamantare yo'ntaraatmaa
Tisht'hankaasht'he dahana iva no dri'shyase yuktishoonyaih' |
Yashcha praanaaranishu niyatairmathyamaanaasu sadbhi-
-rdri'shyam' jyotirbhavasi paramaaditya tasmai namaste || 14 ||

Stotaa stutyah' stutiriti bhavaankartri'karmakriyaatmaa
Kreed'atyekastava nutividhaavasvatantrastato'ham |
Yadvaa vachmi pranayasubhagam' gopate tachcha tathyam'
Tvatto hyanyatkimiva jagataam' vidyate tanmri'shaa syaat || 15 ||

Jnyaanam' naantah'karanarahitam' vidyate'smadvidhaanaam'
Tvam' chaatyantam' sakalakaranaagocharatvaadachintyah' |
Dhyaanaateetastvamiti na vinaa bhaktiyogena labhya-
-stasmaadbhaktim' sharanamamri'tapraaptaye'ham' prapannah' || 16 ||

Haardam' hanti prathamamuditaa yaa tamah' sam'shritaanaam'
Sattvodrekaattadanu cha rajah' karmayogakramena |
Svabhyastaa cha prathayatitaraam' sattvameva prapannaa
Nirvaanaaya vrajati shaminaam' te'rka bhaktistrayeeva || 17 ||

Taamaasaadya shriyamiva gri'he kaamadhenum' pravaase
Dhvaante bhaatim' dhri'timiva vane yojane brahmanaad'im |
Naavam' chaasminvishamavishayagraahasam'saarasindhau
Gachchheyam' te paramamamri'tam' yanna sheetam' na choshnam || 18 ||

Agneeshomaavakhilajagatah' kaaranam' tau mayookhaih'
Sargaadaane sri'jasi bhagavanhraasavri'ddhikramena |
Taavevaantarvishuvati samau juhvataamaatmavahnau
Dvaavapyastam' nayasi yugapanmuktaye bhaktibhaajaam || 19 ||

Sthoolatvam' te prakri'tigahanam' naiva lakshyam' hyanantam'
Sookshmatvam' vaa tadapi sadasadvyaktyabhaavaadachintyam |
Dhyaayaameettham' kathamaviditam' tvaamanaadyantamanta-
-stasmaadarka pranayini mayi svaatmanaiva praseeda || 20 ||

Yattadvedyam' kimapi paramam' shabdatattvam' tvamanta-
-statsadvyaktim' jigamishu shanairlaati maatraa kalaah' khe |
Avyaktena pranavavapushaa bindunaadoditam' sa-
-chchhabdabrahmochcharati karanavyanjitam' vaachakam' te || 21 ||

Praatah'sandhyaarunakiranabhaagri'ngmayam' raajasam' ya-
-nmadhye chaapi jvaladiva yajuh' shuklabhaah' saattvikam' vaa |
Saayam' saamaastamitakiranam' yattamollaasi roopam'
Saahnah' sargasthitilayavidhaavaakri'tiste trayeeva || 22 ||

Ye paataalodadhimuninagadveepalokaadhibeeja-
-chchhandobhootasvaramukhanadatsaptasaptim' prapannaah' |
Ye chaikaashvam' niravayavavaagbhaavamaatraadhirood'ham'
Te tvaameva svaragunakalaavarjitam' yaantyanashvam || 23 ||

Divyam' jyotih' salilapavanaih' poorayitvaa trilokee-
-mekeebhootam' punarapi cha tatsaaramaadaaya gobhih' |
Antarleeno vishasi vasudhaam' tadgatah' sooyase'nnam'
Tachcha praanaam'stvamiti jagataam' praanabhri'tsoorya aatmaa || 24 ||

Agneeshomau prakri'tipurushau bindunaadau cha nityau
Praanaapaanaavapi dinanishe ye cha satyaanri'te dve |
Dharmaadharmau sadasadubhayam' yo'ntaraaveshya yogee
Vartetaatmanyuparatamatirnirgunam' tvaam' vishetsah' || 25 ||

Garbhaadhaanaprasavavidhaye suptayorindubhaasaa
Saapatnyenaabhimukhamiva khe kaantayormadhyasam'sthah' |
Dyaavaapri'thvyorvadanakamale gomukhairbodhayitvaa
Paryaayenaapibasi bhagavan shad'rasaasvaadalolah' || 26 ||

Somam' poornaamri'tamiva charum' tejasaa saadhayitvaa
Kri'tvaa tenaanalamukhajagattarparnam' vaishvadevam |
Aamaavasyam' vighasamiva khe tatkalaasheshamashnan
Brahmaand'aantargri'hapatiriva svaatmayaagam' karoshi || 27 ||

Kri'tvaa naktandinamiva jagadbeejamaavyaktikam' ya-
-ttatraivaantardinakara tathaa braahmamanyattato'lpam |
Daivam' pitryam' kramaparigatam' maanusham' chaalpamalpam'
Kurvankakurvankalayasi jagatpanchadhaavartanaabhih' || 28 ||

Tattvaaloke tapana sudine ye param' samprabuddhaah'
Ye vaa chittopashamarajaneeyoganidraamupetaah' |
Te'horaatroparamaparamaanandasandhyaasu sauram'
Bhittvaa jyotih' paramaparamam' yaanti nirvaanasanjnyam || 29 ||

Aabrahmedam' navamiva jagajjangamasthaavaraantam'
Sarge sarge visri'jasi rave gobhirudriktasomaih' |
Deeptaih' pratyaaharasi cha laye tadyathaayoni bhooyah'
Sargaantaadau prakat'avibhavaam' darshayanrashmileelaam || 30 ||

Shritvaa nityopachitamuchitam' brahmatejah' prakaasham'
Roopam' sargasthitilayamuchaa sarvabhooteshu madhye |
Antevaasishviva sugurunaa yah' parokshah' prakri'tyaa
Pratyaksho'sau jagati bhavataa darshitah' svaatmanaatmaa || 31 ||

Lokaah' sarve vapushi niyatam' te sthitaastvam' cha teshaa-
-mekaikasminyugapadaguno vishvahetorguneeva |
Itthambhoote bhavati bhagavanna tvadanyo'smi satyam'
Kim' tu jnyastvam' paramapurusho'ham' prakri'tyaiva chaajnyah' || 32 ||

Sankalpechchhaadyakhilakaranapraanavaanyo varenyaah'
Sampannaa me tvadabhinavanaajjanma chedam' sharanyam |
Manye chaastam' jigamishu shanaih' punyapaapadvayam' ta-
-dbhaktishraddhe tava charanayoranyathaa no bhavetaam || 33 ||

Satyam' bhooyo jananamarane tvatprapanneshu na sta-
-statraapyekam' tava nutiphalam' janma yaache tadittham |
Trailokyeshah' shama iva parah' punyakaayo'pyayonih'
Sam'saaraabdhau plava iva jagattaaranaaya sthirah' syaam || 34 ||

Saushumnena tvamamri'tapathenaitya sheetaam'shubhaavam'
Pushnaasyagre suranarapitree'n shaantabhaabhih' kalaabhih' |
Pashchaadambho vishasi vividhaashchaushadheestadgato'pi
Preenaasyevam' tribhuvanamataste jaganmitrataarka || 35 ||

Mandaakraante tamasi bhavataa naatha doshaavasaane
Naantarleenaa mama matiriyam' gaad'hanidraam' jahaati |
Tasmaadastangamitatamasaa padmineevaatmabhaasaa
Saureetyeshaa dinakara param' neeyataamaashu bodham || 36 ||

Yena graaseekri'tamiva jagatsarvamaaseettadastam'
Dhvaantam' neetvaa punarapi vibho taddayaaghraatachittah' |
Dhatse naktandinamapi gatee shuklakri'shne vibhajya
Traataa tasmaadbhava paribhave dushkri'te me'pi bhaano || 37 ||

Aasam'saaropachitasadasatkarmabandhaashritaanaa-
-maadhivyaadhiprajanamaranakshutpipaasaarditaanaam |
Mithyaajnyaanaprabalatamasaa naatha chaandheekri'taanaam'
Tvam' nastraataa bhava karunayaa yatra tatra sthitaanaam || 38 ||

Satyaasatyaskhalitavachasaam' shauchalajjojjhitaanaa-
-majnyaanaanaamaphalasaphalapraarthanaakaataraanaam |
Sarvaavasthaasvakhilavishayaabhyastakautoohalaanaam'
Tvam' nastraataa bhava pitri'tayaa bhogalolaarbhakaanaam || 39 ||

Yaavaddeham' jarayati jaraa naantakaadetya dootee
No vaa bheemastriphanabhujagaakaaradurvaarapaashah' |
Gaad'ham' kant'he lagati sahasaa jeevitam' lelihaana-
-staavadbhaktaabhayada sadayam' shreyase nah' praseeda || 40 ||

Vishvapraanagrasanarasanaat'opakopapragalbham'
Mri'tyorvaktram' dahananayanoddaamadam'sht'raakaraalam |
Yaavadri'sht'vaa vrajati na bhiyaa panchataamesha kaaya-
-staavannityaamri'tamaya rave paahi nah' kaandisheekaan || 41 ||

Shabdaakaaram' viyadiva vapuste yajuh'saamadhaamnah'
Saptachchhandaam'syapi cha turagaa ri'ngmayam' mand'alam' cha |
Evam' sarvashrutimayatayaa maddayaanugrahaadvaa
Kshipram' mattah' kri'panakarunaakrandamaakarnayemam || 42 ||

Naasham' naasmachcharanasharanaa yaantyapi grasyamaanaa
Devairittham' sitamiva yasho darshayansvam' trilokyaam |
Manye somam' kshatatanumamaagarbhavri'ddhyaa vivasvan
Shuklachchhaayaam' nayasi shanakaih' svaam' sushumnaam'shubhaasaa || 43 ||

Aastaam' janmaprabhri'ti bhavatah' sevanam' taddhi loke
Vaachyam' kenaaparimitaphalam' bhuktimuktiprakaaram |
Jyotirmaatram' smri'tipathamito jeevitaante'pi bhaasva-
-nnirvaanaaya prabhavasi sataam' tena te kah' samo'nyah' || 44 ||

Apratyakshatridashabhajanaadyatparoksham' phalam' ta-
-tpum'saam' yuktam' bhavati hi samam' kaaranenaiva kaaryam |
Pratyakshastvam' sakalajagataam' yatsamaksham' phalam' me
Yushmadbhakteh' samuchitamatastattu yaache yathaa tvaam || 45 ||

Ye chaarogyam' dishati bhagavaansevito'pyevamaahu-
-ste tattvajnyaa jagati subhagaa bhogayogapradhaanaah' |
Bhuktermukterapi cha jagataam' yachcha poornam' sukhaanaam'
Tasyaanyo'rkaadamri'tavapushah' ko hi naamaastu daataa || 46 ||

Hitvaa hitvaa guruchapalataamapyanekaannijaarthaa-
-nyairekaartheekri'tamiva bhavatsevanam' matpriyaartham |
Teshaamichchhaamyupakri'timaham' svendriyaanaam' priyaanaa-
-maadau tasmaanmama dinapate dehi tebhyah' prasaadam || 47 ||

Kim' tannaamochcharati vachanam' yasya nochchaarakastvam'
Kim' tadvaachyam' sakalavachasaam' vishvamoorte na yattvam |
Tasmaaduktam' yadapi tadapi tvannutau bhaktiyogaa-
-dasmaabhistadbhavatu bhagavam'stvatprasaadena dhanyam || 48 ||

Yaa panthaanam' dishati shishiraadyuttaram' devayaanam'
Yaa vaa kri'shnam' pitri'pathamatho dakshinam' praavri'd'aadyam |
Taabhyaamanyaa vishuvadabhijinmadhyamaa kri'tyashoonyaa
Dhanyaa kaashchitprakri'tipurushaavantaraa me'stu vri'ttih' || 49 ||

Sthitvaa kinchinmana iva pibansetubandhasya madhye
Praapyopeyam' dhri'vapadamatho vyaktamuddaalya taalu |
Satyaadoordhvam' kimapi paramam' vyoma somaagnishoonyam'
Gachchheyam' tvaam' surapitri'gatee chaantaraa brahmabhootah' || 50 ||

Sarvaatmatvam' savituriti yo vaangmanah'kaayabuddhyaa
Raagadveshopashamasamataayogamevaarurukshuh' |
Dharmaadharmagrasanarashanaamuktaye yuktiyuktaam'
Sa shreesaambah' stutimiti raveh' svaprashaantaam' chakaara || 51 ||

Bhaktishraddhaadyakhilataruneevallabhenedamuktam'
Shreesaambena prakat'agahanam' stotramadhyaatmagarbham |
Yah' saavitram' pat'hati niyatam' svaatmavatsarvalokaa-
-npashyanso'nte vrajati shukavanmand'alam' chand'arashmeh' || 52 ||

Iti paramarahasyashlokapanchaashadeshaa
Tapananavanapunyaa saagamabrahmacharchaa |
Haratu duritamasmadvarnitaakarnitaa vo
Dishatu cha shubhasiddhim' maatri'vadbhaktibhaajaam || 53 ||

Shreesvaatmasam'vidabhinnaroopashivaarpanamastu |
Samaaptam' chedam' saambapanchaashikaashaastram ||

Iti saambapraneetaa saambapanchaashikaa sampoornaa ||