ಶ್ರೀ ರಾಧಾ ಕವಚ

ಮಹೇಶ್ವರ ಉವಾಚ |
ಶ್ರೀಜಗನ್ಮಂಗಲಸ್ಯಾಸ್ಯ ಕವಚಸ್ಯ ಪ್ರಜಾಪತಿಃ || 1 ||

ಋಷಿಶ್ಛಂದೋಽಸ್ಯ ಗಾಯತ್ರೀ ದೇವೀ ರಾಸೇಶ್ವರೀ ಸ್ವಯಂ |
ಶ್ರೀಕೃಷ್ಣಭಕ್ತಿಸಂಪ್ರಾಪ್ತೌ ವಿನಿಯೋಗಃ ಪ್ರಕೀರ್ತಿತಃ || 2 ||

ಶಿಷ್ಯಾಯ ಕೃಷ್ಣಭಕ್ತಾಯ ಬ್ರಾಹ್ಮಣಾಯ ಪ್ರಕಾಶಯೇತ್ |
ಶಠಾಯ ಪರಶಿಷ್ಯಾಯ ದತ್ತ್ವಾ ಮೃತ್ಯುಮವಾಪ್ನುಯಾತ್ || 3 ||

ರಾಜ್ಯಂ ದೇಯಂ ಶಿರೋ ದೇಯಂ ನ ದೇಯಂ ಕವಚಂ ಪ್ರಿಯೇ |
ಕಂಠೇ ಧೃತಮಿದಂ ಭಕ್ತ್ಯಾ ಕೃಷ್ಣೇನ ಪರಮಾತ್ಮನಾ || 4 ||

ಮಯಾ ದೃಷ್ಟಂ ಚ ಗೋಲೋಕೇ ಬ್ರಹ್ಮಣಾ ವಿಷ್ಣುನಾ ಪುರಾ |
ಓಂ ರಾಧೇತಿ ಚತುರ್ಥ್ಯಂತಂ ವಹ್ನಿಜಾಯಾಂತಮೇವ ಚ || 5 ||

ಕೃಷ್ಣೇನೋಪಾಸಿತೋ ಮಂತ್ರಃ ಕಲ್ಪವೃಕ್ಷಃ ಶಿರೋಽವತು |
ಓಂ ಹ್ರೀಂ ಶ್ರೀಂ ರಾಧಿಕಾಙೇಂತಂ ವಹ್ನಿಜಾಯಾಂತಮೇವ ಚ || 6 ||

ಕಪಾಲಂ ನೇತ್ರಯುಗ್ಮಂ ಚ ಶ್ರೋತ್ರಯುಗ್ಮಂ ಸದಾವತು |
ಓಂ ರಾಂ ಹ್ರೀಂ ಶ್ರೀಂ ರಾಧಿಕೇತಿ ಙೇಂತಂ ವಹ್ನಿಜಾಯಾಂತಮೇವ ಚ || 7 ||

ಮಸ್ತಕಂ ಕೇಶಸಂಘಾಂಶ್ಚ ಮಂತ್ರರಾಜಃ ಸದಾವತು |
ಓಂ ರಾಂ ರಾಧೇತಿ ಚತುರ್ಥ್ಯಂತಂ ವಹ್ನಿಜಾಯಾಂತಮೇವ ಚ || 8 ||

ಸರ್ವಸಿದ್ಧಿಪ್ರದಃ ಪಾತು ಕಪೋಲಂ ನಾಸಿಕಾಂ ಮುಖಂ |
ಕ್ಲೀಂ ಶ್ರೀಂ ಕೃಷ್ಣಪ್ರಿಯಾಙೇಂತಂ ಕಂಠಂ ಪಾತು ನಮೋಽಂತಕಂ || 9 ||

ಓಂ ರಾಂ ರಾಸೇಶ್ವರೀಙೇಂತಂ ಸ್ಕಂಧಂ ಪಾತು ನಮೋಽಂತಕಂ |
ಓಂ ರಾಂ ರಾಸವಿಲಾಸಿನ್ಯೈ ಸ್ವಾಹಾ ಪೃಷ್ಠಂ ಸದಾವತು || 10 ||

ವೃಂದಾವನವಿಲಾಸಿನ್ಯೈ ಸ್ವಾಹಾ ವಕ್ಷಃ ಸದಾವತು |
ತುಲಸೀವನವಾಸಿನ್ಯೈ ಸ್ವಾಹಾ ಪಾತು ನಿತಂಬಕಂ || 11 ||

ಕೃಷ್ಣಪ್ರಾಣಾಧಿಕಾಙೇಂತಂ ಸ್ವಾಹಾಂತಂ ಪ್ರಣವಾದಿಕಂ |
ಪಾದಯುಗ್ಮಂ ಚ ಸರ್ವಾಂಗಂ ಸಂತತಂ ಪಾತು ಸರ್ವತಃ || 12 ||

ರಾಧಾ ರಕ್ಷತು ಪ್ರಾಚ್ಯಾಂ ಚ ವಹ್ನೌ ಕೃಷ್ಣಪ್ರಿಯಾವತು |
ದಕ್ಷೇ ರಾಸೇಶ್ವರೀ ಪಾತು ಗೋಪೀಶಾ ನೈರೃತೇಽವತು || 13 ||

ಪಶ್ಚಿಮೇ ನಿರ್ಗುಣಾ ಪಾತು ವಾಯವ್ಯೇ ಕೃಷ್ಣಪೂಜಿತಾ |
ಉತ್ತರೇ ಸಂತತಂ ಪಾತು ಮೂಲಪ್ರಕೃತಿರೀಶ್ವರೀ || 14 ||

ಸರ್ವೇಶ್ವರೀ ಸದೈಶಾನ್ಯಾಂ ಪಾತು ಮಾಂ ಸರ್ವಪೂಜಿತಾ |
ಜಲೇ ಸ್ಥಲೇ ಚಾಂತರಿಕ್ಷೇ ಸ್ವಪ್ನೇ ಜಾಗರಣೇ ತಥಾ || 15 ||

ಮಹಾವಿಷ್ಣೋಶ್ಚ ಜನನೀ ಸರ್ವತಃ ಪಾತು ಸಂತತಂ |
ಕವಚಂ ಕಥಿತಂ ದುರ್ಗೇ ಶ್ರೀಜಗನ್ಮಂಗಲಂ ಪರಂ || 16 ||

ಯಸ್ಮೈ ಕಸ್ಮೈ ನ ದಾತವ್ಯಂ ಗೂಢಾದ್ ಗೂಢತರಂ ಪರಂ |
ತವ ಸ್ನೇಹಾನ್ಮಯಾಖ್ಯಾತಂ ಪ್ರವಕ್ತವ್ಯಂ ನ ಕಸ್ಯಚಿತ್ || 17 ||

ಗುರುಮಭ್ಯರ್ಚ್ಯ ವಿಧಿವದ್ ವಸ್ತ್ರಾಲಂಕಾರಚಂದನೈಃ |
ಕಂಠೇ ವಾ ದಕ್ಷಿಣೇ ಬಾಹೌ ಧೃತ್ವಾ ವಿಷ್ಣುಸಮೋ ಭವೇತ್ || 18 ||

ಶತಲಕ್ಷಜಪೇನೈವ ಸಿದ್ಧಂ ಚ ಕವಚಂ ಭವೇತ್ |
ಯದಿ ಸ್ಯಾತ್ ಸಿದ್ಧಕವಚೋ ನ ದಗ್ಧೋ ವಹ್ನಿನಾ ಭವೇತ್ || 19 ||

ಏತಸ್ಮಾತ್ ಕವಚಾದ್ ದುರ್ಗೇ ರಾಜಾ ದುರ್ಯೋಧನಃ ಪುರಾ |
ವಿಶಾರದೋ ಜಲಸ್ತಂಭೇ ವಹ್ನಿಸ್ತಂಭೇ ಚ ನಿಶ್ಚಿತಂ || 20 ||

ಮಯಾ ಸನತ್ಕುಮಾರಾಯ ಪುರಾ ದತ್ತಂ ಚ ಪುಷ್ಕರೇ |
ಸೂರ್ಯಪರ್ವಣಿ ಮೇರೌ ಚ ಸ ಸಾಂದೀಪನಯೇ ದದೌ || 21 ||

ಬಲಾಯ ತೇನ ದತ್ತಂ ಚ ದದೌ ದುರ್ಯೋಧನಾಯ ಸಃ |
ಕವಚಸ್ಯ ಪ್ರಸಾದೇನ ಜೀವನ್ಮುಕ್ತೋ ಭವೇನ್ನರಃ || 22 ||

ನಿತ್ಯಂ ಪಠತಿ ಭಕ್ತ್ಯೇದಂ ತನ್ಮಂತ್ರೋಪಾಸಕಶ್ಚ ಯಃ |
ವಿಷ್ಣುತುಲ್ಯೋ ಭವೇನ್ನಿತ್ಯಂ ರಾಜಸೂಯಫಲಂ ಲಭೇತ್ || 23 ||

ಸ್ನಾನೇನ ಸರ್ವತೀರ್ಥಾನಾಂ ಸರ್ವದಾನೇನ ಯತ್ಫಲಂ |
ಸರ್ವವ್ರತೋಪವಾಸೇ ಚ ಪೃಥಿವ್ಯಾಶ್ಚ ಪ್ರದಕ್ಷಿಣೇ || 24 ||

ಸರ್ವಯಜ್ಞೇಷು ದೀಕ್ಷಾಯಾಂ ನಿತ್ಯಂ ಚ ಸತ್ಯರಕ್ಷಣೇ |
ನಿತ್ಯಂ ಶ್ರೀಕೃಷ್ಣಸೇವಾಯಾಂ ಕೃಷ್ಣನೈವೇದ್ಯಭಕ್ಷಣೇ || 25 ||

ಪಾಠೇ ಚತುರ್ಣಾಂ ವೇದಾನಾಂ ಯತ್ಫಲಂ ಚ ಲಭೇನ್ನರಃ |
ಯತ್ಫಲಂ ಲಭತೇ ನೂನಂ ಪಠನಾತ್ ಕವಚಸ್ಯ ಚ || 26 ||

ರಾಜದ್ವಾರೇ ಶ್ಮಶಾನೇ ಚ ಸಿಂಹವ್ಯಾಘ್ರಾನ್ವಿತೇ ವನೇ |
ದಾವಾಗ್ನೌ ಸಂಕಟೇ ಚೈವ ದಸ್ಯುಚೌರಾನ್ವಿತೇ ಭಯೇ || 27 ||

ಕಾರಾಗಾರೇ ವಿಪದ್ಗ್ರಸ್ತೇ ಘೋರೇ ಚ ದೃಢಬಂಧನೇ |
ವ್ಯಾಧಿಯುಕ್ತೋ ಭವೇನ್ಮುಕ್ತೋ ಧಾರಣಾತ್ ಕವಚಸ್ಯ ಚ || 28 ||

ಇತ್ಯೇತತ್ಕಥಿತಂ ದುರ್ಗೇ ತವೈವೇದಂ ಮಹೇಶ್ವರಿ |
ತ್ವಮೇವ ಸರ್ವರೂಪಾ ಮಾಂ ಮಾಯಾ ಪೃಚ್ಛಸಿ ಮಾಯಯಾ || 29 ||

ಶ್ರೀನಾರಾಯಣ ಉವಾಚ |
ಇತ್ಯುಕ್ತ್ವಾ ರಾಧಿಕಾಖ್ಯಾನಂ ಸ್ಮಾರಂ ಚ ಮಾಧವಂ |
ಪುಲಕಾಂಕಿತಸರ್ವಾಂಗಃ ಸಾಶ್ರುನೇತ್ರೋ ಬಭೂವ ಸಃ || 30 ||

ನ ಕೃಷ್ಣಸದೃಶೋ ದೇವೋ ನ ಗಂಗಾಸದೃಶೀ ಸರಿತ್ |
ನ ಪುಷ್ಕರಸಮಂ ತೀರ್ಥಂ ನಾಶ್ರಮೋ ಬ್ರಾಹ್ಮಣಾತ್ ಪರಃ || 31 ||

ಪರಮಾಣುಪರಂ ಸೂಕ್ಷ್ಮಂ ಮಹಾವಿಷ್ಣೋಃ ಪರೋ ಮಹಾನ್ |
ನಭ ಪರಂ ಚ ವಿಸ್ತೀರ್ಣಂ ಯಥಾ ನಾಸ್ತ್ಯೇವ ನಾರದ || 32 ||

ತಥಾ ನ ವೈಷ್ಣವಾದ್ ಜ್ಞಾನೀ ಯೋಗೀಂದ್ರಃ ಶಂಕರಾತ್ ಪರಃ |
ಕಾಮಕ್ರೋಧಲೋಭಮೋಹಾ ಜಿತಾಸ್ತೇನೈವ ನಾರದ || 33 ||

ಸ್ವಪ್ನೇ ಜಾಗರಣೇ ಶಶ್ವತ್ ಕೃಷ್ಣಧ್ಯಾನರತಃ ಶಿವಃ |
ಯಥಾ ಕೃಷ್ಣಸ್ತಥಾ ಶಂಭುರ್ನ ಭೇದೋ ಮಾಧವೇಶಯೋಃ || 34 ||

ಯಥಾ ಶಂಭುರ್ವೈಷ್ಣವೇಷು ಯಥಾ ದೇವೇಷು ಮಾಧವಃ |
ತಥೇದಂ ಕವಚಂ ವತ್ಸ ಕವಚೇಷು ಪ್ರಶಸ್ತಕಂ || 35 ||

ಇತಿ ಶ್ರೀಬ್ರಹ್ಮವೈವರ್ತೇ ಶ್ರೀರಾಧಿಕಾಕವಚಂ ಸಂಪೂರ್ಣಂ |