Sri Mahalakshmi Dandakam

maṃdāramālāṃcitakeśabhārāṃ maṃdākinīnirjharagaurahārāṃ |
vṛṃdārikāvaṃditakīrtipārāṃ vaṃdāmahe māṃ kṛtasadvihārāṃ ||1||

jaya dugdhābdhitanaye jaya nārāyaṇapriye |
jaya hairaṇyavalaye jaya velāpurāśraye ||2||

jaya jaya janayitri velāpurābhyaṃtaraprasphuratsphāra-
saudhāṃcitodārasālāṃtarāgārakhelanmurārātipārśvasthite |
klṛptaviśvasthite |
citraratnajvaladratnasānūpamapratnasauvarṇa
koṭīrakāṃticchaṭācitritācchāṃbare | devi divyāṃbare |
phullasanmallikāmālikāprollasannīlabhogīśabhogapratīkāśa-
veṇyardhacaṃdrālike | valgunīlālake | keśasaurabhyalobha-
bhramatsthūlajaṃbūphalābhālimālāsamākarṣaṇehotpatanmauli-
vaiḍūryasaṃdarśa natrastalīlāśukālokajātasmite | devajātastute |
īśvarīśekharībhūtasomasmayotsādanābhyutsukatvacchiraḥsaṃśrita-
prāptanityodayabraghnaśaṃkākarasvarṇakoṭīrasaṃdarśanānaṃditasvīya-
tātāṃkakārohaṇābhīpsulabdhāṃtikārkātma-
jānirjharāśaṃkanīyāṃtakastūrikācitrake | vārdhirāṭputrike |
mānmathaśyāmalekṣvātmadhanvākṛtisnigdhamugdhādbhuta-
bhrūlatā cālanārabdhalokālinirmāṇarakṣiṇyasaṃhāralīle'male |
sarvade komale | svaprabhānyakkṛte svānugaśrutyadhaḥkāriṇīkāṃti-
nīlotpale bādhituṃ vāgatābhyāṃ śravaḥsannidhiṃ locanābhyāṃ
bhṛśaṃ bhūṣite | maṃjusaṃbhāṣite | kiṃcidudbuddhacāṃpeya-
puṣpapratīkāśanāsāsthitasthūlamuktāphale |
dattabhaktaughavāṃchāphale | śoṇabiṃbapravālādharadyotavidyota-
mānollasaddāḍimībījarājipratīkāśadaṃtāvale |
gatyadhaḥ klṛptadaṃtāvale |
tvatpatipreritatvaṣṭasṛṣṭādbhutātīddhabhasmāsuratrasta
durgāśivatrāṇasaṃtuṣṭataddattaśītāṃśurekhāyugātmatvasaṃbhāvanā-
yogyamuktāmayaprollasatkuṃḍale | pālitākhaṃḍale ||1||

ayi suruciranavyadūrvādalabhrāṃtiniṣpādakaprollasatkaṃṭha-
bhūṣānibaddhāyatānarghyagārutmatāṃśuprajāpātyasāraṃga-
nārīsthirasthāpakāścaryakṛddivyamādhuryagītojjvale | maṃjumuktāvale |
aṃgadaprotadeveṃdranīlopalatviṭchaṭāśyāmalībhūtacolojjvalasthūla-
hemārgalākāradorvallike | phullasanmallike | ūrmikāsaṃcayasyūta
śoṇopalaśrīpravṛddhāruṇacchāyamṛdvaṃgulīpallave |
lālitānaṃdakṛtsallave | divyarekhāṃkuśāṃbhojacakradhva-
jādyaṃkarājatkare | saṃpadekākare |
kaṃkaṇaśreṇikābaddharatnaprabhājālacitrībhavatpadmayugma-
sphuratpaṃcaśākhadvaye | gūḍhapuṇyāśaye | matpadābjopakaṃṭhe
catuḥpūruṣārthā vasaṃtyatra māmāśrayaṃ kurvate tān pradāsyāmi
dāsāya cetyarthakaṃ tvanmanoniṣṭhabhāvaṃ jaganmaṃgalaṃ sūcayad vā
varābhītimudrādvayā vyaṃjayasyaṃgapāṇidvayenāṃbike | padmapatrāṃbake |
cārugaṃbhīrakaṃdarpakelyarthanābhīsarastīrasauvarṇa-
sopānarekhāgatottuṃgavakṣojanāmāṃkitasvarṇaśaila-
dvayārohaṇārtheṃdranīlopalābaddhasūkṣmādhva-
saṃbhāvanāyogyasadromarājyāḍhyadehe rame | kā gatiḥ śrīrame |
niṣkanakṣatramālāsadṛkṣābhanakṣatramālāpravālasragekāvalī-
mukhyabhūṣāviśeṣaprabhācitritācchottarāsaṃgasaṃchinnavakṣoruhe
. caṃcalāgauri he |
kelikālakvaṇatkiṃkiṇīśreṇikāyuktasauvarṇakāṃcīnibaddha-
sphuratspaṣṭanīvyāḍhyaśuklāṃbare | bhāsitāśāṃbare |
puṃḍarīkākṣavakṣaḥsthalīcarcitānarghyapāṭīrapaṃkāṃkitānaṃga-
nikṣepakuṃbhastane | prasphuradgostane ||2||

gurunibiḍanitaṃbabiṃbākṛtidrāvitāśītaruksyaṃdanaprotacaṃdrāvale-
potkare | svarṇavidyutkare | bhoḥ prayacchāmi te citraratnormikāṃ
māmikāṃ sādarādehyado madhyamaṃ bhūṣayādyaitayā draṣṭumicchāmyahaṃ
sādhviti tvatpatipreritāyāṃ mudā pāṇinādāya dhṛtvā rahaḥ
keśavaṃ līlayānaṃdayaḥ saptakīvāsti te | saptalokīstute |
citrarocirmahāmekhalāmaṃḍitānaṃtaratnasphurattoraṇālaṃkṛta-
ślakṣṇakaṃdarpakāṃtāraraṃbhātarudvaṃdvasaṃbhāvanīyoruyugme rame |
saṃpadaṃ dehi me | padmarāgopalādarśabiṃbaprabhācchāyasusnigdhajānu
|||| dvaye śobhane caṃdrabiṃbānane |
śaṃbarārātijaitraprayāṇotsavāraṃbhajṛṃbhanmahā-
kāhalīḍaṃbarasvarṇatūṇīrajaṃghe śubhe | śāradārkaprame |
haṃsarājakvaṇaddhaṃsabiṃbasphuraddhaṃsakālaṃkṛtaspaṣṭa-
lekhāṃkuśāṃbhojacakradhvaja-vyaṃjanālaṃkṛtaśrīpade |
tvāṃ bhaje saṃpade | namravṛṃdārikāśekharībhūtasauvarṇa-
koṭīraratnāvalīdīpikārājinīrājitottuṃgagāṃgeya-
siṃhāsanāstīrṇasauvarṇabiṃdvaṃkasaurabhyasaṃpannatalpasthite |
saṃtatasvaḥsthite | ceṭikādattakarpūrakhaṃḍānvitaśvetavīṭīdarādāna-
līlācaladdorlate | daivatairarcite | ratnatāṭaṃkakeyūrahārāvalī-
mukhyabhūṣācchaṭāraṃjitānekadāsīsabhāveṣṭite | devatābhiṣṭute |
pārśvayugmollasaccāmaragrāhiṇīpaṃcaśākhāṃbujādhūta-
jṛṃbhadraṇatkaṃkaṇābhiṣṭutābhīśusaccāmarābhyāṃ mudā cījyase |
karmaṭhairijyase | maṃjumaṃjīrakāṃcyurmikākaṃkaṇaśreṇi-
keyūrahārāvalī- kuṃḍalīmaulināsāmaṇidyotite | bhaktasaṃjīvite ||3||

jaladharagataśītavātārditā cārunīraṃdhradevālayāṃtargatā vidyudeṣā
hi kiṃ bhūtale'pi svamāhālyasaṃdarśanārthaṃ kṣamāmāsthitā
kalpavalyeva kiṃ ghasramātrollasaṃtaṃ raviṃ rātrimātrollasaṃtaṃ vidhuṃ
saṃvidhāya svato veghasātuṣṭacittena sṛṣṭā sadāpyullasaṃtī
mahādivyatejomayī divyapāṃcālikā veti sadbhiḥ sadā tavaryase | tvāṃ
bhaje me bhava śreyase | pūrvakadvāraniṣṭhena nṛtyadvarākāraraṃbhā-
divārāṃganāśreṇigītāmṛtākarṇanāyatta-
cittāmarārādhitenoccakairbhārgavīṃdreṇa saṃbhāvite | no samā
devatā devi te | dakṣiṇadvāraniṣṭhena saccitraguptādiyuktena
vaivasvatenārcyase | yogibhirbhāvyase | paścimadvārabhājā bhṛśaṃ
pāśinā svarṇedī- mukhyanadyanviteneḍyase | sādaraṃ pūjyase |
uttaradvāraniṣṭhena yakṣottamairnamrakoṭīrajūṭairmanohāribhī
rājarājena bhaktena saṃbhāvyase | yogibhiḥ pūjyase | lakṣmi
padmālaye bhārgavi śrīrame lokamātaḥ samudreśakanye'cyutapreyasi
||||. svarṇaśobhe ca me ceṃdire viṣṇuvakṣaḥ sthite
pāhi pāhīti yaḥ prātarutthāya bhaktyā yuto nauti so'yaṃ naraḥ
saṃpadaṃ prāpya vidyotate | bhūṣaṇadyotite | divya
kāruṇyadṛṣṭyāśu māṃ paśya me divyakāruṇyadṛṣṭyāśu
māṃ paśya me divyakāruṇyadṛṣṭyāśu māṃ paśya me | māṃ kimarthaṃ
sadopekṣase nekṣase tvatpadābjaṃ vinā nāsti me'nyā gatiḥ saṃpadaṃ dehi
me saṃpadaṃ dehi me saṃpadaṃ dehi me | tvatpadābjaṃ prapanno'smyahaṃ
sarvadā tvaṃ prasannā satī pāhi māṃ pāhi māṃ pāhi māṃ padmahaste
trilokeśvariṃ prārthaye tvāmahaṃ devi tubhyaṃ namo devi tubhyaṃ namo
devi tubhyaṃ namaḥ ||satriṣaṣṭyuttaraśataragaṇāḍhyaścaturdalaḥ |
mahālakṣmīdaṃḍako'yaṃ kṛtaḥ keśavasūriṇā ||

iti keśavasūrikṛtaḥ mahālakṣmīdaṃḍakaḥ saṃpūrṇaḥ |
stotrasamuccayaḥ 2 (85)