ತ್ರೈಲೋಕ್ಯ ಮಂಗಲಾತ್ಮಕಂ ನಾಮ ಲಕ್ಷ್ಮೀಸ್ತೋತ್ರಂ

ಅಥ ತ್ರೈಲೋಕ್ಯ ಮಂಗಲಾತ್ಮಕಂ ನಾಮ ಲಕ್ಷ್ಮೀಸ್ತೋತ್ರಪ್ರಾರಂಭಃ .
   ನಮಃ ಕಲ್ಯಾಣದೇ ದೇವಿ ನಮೋಽಸ್ತು ಹರಿವಲ್ಲಭೇ .
   ನಮೋ ಭಕ್ತಪ್ರಿಯೇ ದೇವಿ ಲಕ್ಷ್ಮೀದೇವಿ ನಮೋಽಸ್ತು ತೇ ..1..

   ನಮೋ ಮಾಯಾಗೃಹೀತಾಂಗಿ ನಮೋಽಸ್ತು ಹರಿವಲ್ಲಭೇ .
   ಸರ್ವೇಶ್ವರಿ ನಮಸ್ತುಭ್ಯಂ ಲಕ್ಷ್ಮೀದೇವಿ ನಮೋಽಸ್ತು ತೇ ..2..

   ಮಹಾಮಾಯೇ ವಿಷ್ಣುಧರ್ಮಪತ್ನೀರೂಪೇ ಹರಿಪ್ರಿಯೇ .
   ವಾಂಛಾದಾತ್ರಿ ಸುರೇಶಾನಿ ಲಕ್ಷ್ಮೀದೇವಿ ನಮೋಽಸ್ತುತೇ ..3..

   ಉದ್ಯದ್ಭಾನುಸಹಸ್ರಾಭೇ ನಯನತ್ರಯಭೂಷಿತೇ .
   ರತ್ನಾಧಾರೇ ಸುರೇಶಾನಿ ಲಕ್ಷ್ಮೀದೇವಿ ನಮೋಽಸ್ತುತೇ ..4..

   ವಿಚಿತ್ರವಸನೇ ದೇವಿ ಭವದುಃಖವಿನಾಶಿನಿ .
   ಕುಚಭಾರನತೇ ದೇವಿ ! ಲಕ್ಷ್ಮೀದೇವಿ ನಮೋಽಸ್ತುತೇ ..5..

   ಸಾಧಕಾಭೀಷ್ಟದೇ ದೇವಿ ಅನ್ನದಾನರತೇಽನಘೇ .
   ವಿಷ್ಣ್ವಾನಂದಪ್ರದೇ ಮಾತರ್ಲಕ್ಷ್ಮೀದೇವಿ ನಮೋಽಸ್ತು ತೇ ..6..

   ಷಟ್ಕೋಣಪದ್ಮಮಧ್ಯಸ್ಥೇ ಷಡಂಗಯುವತೀಮಯೇ .
   ಬ್ರಹ್ಮಾಣ್ಯಾದಿಸ್ವರೂಪೇ ಚ ಲಕ್ಷ್ಮೀದೇವಿ ನಮೋಽಸ್ತು ತೇ ..7..

   ದೇವಿ ತ್ವಂ ಚಂದ್ರವದನೇ ಸರ್ವಸಾಮ್ರಾಜ್ಯದಾಯಿನಿ .
   ಸರ್ವಾನಂದಕರೇ ದೇವಿ ಲಕ್ಷ್ಮೀದೇವಿ ನಮೋಽಸ್ತು ತೇ ..8..

   ಪೂಜಾಕಾಲೇ ಪಠೇದ್ಯಸ್ತು ಸ್ತೋತ್ರಮೇತತ್ಸಮಾಹಿತಃ .
   ತಸ್ಯ ಗೇಹೇ ಸ್ಥಿರಾ ಲಕ್ಷ್ಮೀರ್ಜಾಯತೇ ನಾತ್ರ ಸಂಶಯಃ ..9..

   ಪ್ರಾತಃಕಾಲೇ ಪಠೇದ್ಯಸ್ತು ಮಂತ್ರಪೂಜಾಪುರಃಸರಂ .
   ತಸ್ಯ ಚಾನ್ನಸಮೃದ್ಧಿಃ ಸ್ಯಾದ್ವರ್ದ್ಧಮಾನೋ ದಿನೇದಿನೇ ..10..

   ಯಸ್ಮೈ ಕಸ್ಮೈ ನ ದಾತವ್ಯಂ ನ ಪ್ರಕಾಶ್ಯಂ ಕದಾಚನ .
   ಪ್ರಕಾಶಾತ್ಕಾರ್ಯಹಾನಿಃ ಸ್ಯಾತ್ತಸ್ಮಾದ್ಯತ್ನೇನ ಗೋಪಯೇತ್  ..11..

   ತ್ರೈಲೋಕ್ಯಮಂಗಲಂ ನಾಮ ಸ್ತೋತ್ರಮೇತತ್ಪ್ರಕೀರ್ತಿತಂ .
   ಬ್ರಹ್ಮವಿದ್ಯಾಸ್ವರೂಪಂಚ ಮಹೈಶ್ವರ್ಯಪ್ರದಾಯಕಂ ..12..

   ಪಠನಾದ್ಧಾರಣಾನ್ಮರ್ತ್ಯಸ್ತ್ರೈಲೋಕ್ಯೈಶ್ವರ್ಯವಾನ್ಭವೇತ್ .
   ಯದ್ಧೃತ್ವಾ ಪಠನಾದ್ದೇವಾಃ ಸರ್ವೈಶ್ವರ್ಯಮವಾಪ್ನುಯುಃ ..13..

   ಬ್ರಹ್ಮಾ ವಿಷ್ಣುಶ್ಚ ರುದ್ರಶ್ಚ ಧಾರಣಾತ್ಪಠನಾದ್ಯತಃ .
   ಸೃಜತ್ಯವತಿ ಹರತ್ಯೇವ ಕಲ್ಪೇಕಲ್ಪೇ ಪೃಥಕ್ಪೃಥಕ್ ..14..

   ಪುಷ್ಪಾಂಜಲ್ಯಷ್ಟಕಂ ದೇವ್ಯೈ ಮೂಲೇನೈವ ಪಠೇತ್ತತಃ .
   ಯುಗಕಾಲಕೃತಾಯಾಸ್ತು ಪೂಜಾಯಾಃ ಫಲಮಾಪ್ನುಯಾತ್ ..15..

   ಪ್ರೀತಿಮನ್ಯೋನ್ಯತಃ ಕೃತ್ವಾ ಕಮಲಾ ನಿಶ್ಚಲಾ ಗೃಹೇ .
   ವಾಣೀ ವಕ್ತ್ರೇ ವಸೇತ್ತಸ್ಯ ಸತ್ಯಂ ಸತ್ಯಂ ನ ಸಂಶಯಃ ..16..

   ಅಷ್ಟೋತ್ತರಶತಂಚಾಸ್ಯ ಪುರಶ್ಚರ್ಯಾವಿಧಿಃ ಸ್ಮೃತಃ ..17..

   ಭೂರ್ಜೇ ವಿಲಿಖ್ಯ ಗುಲಿಕಾಂ ಸ್ವರ್ಣಸ್ಥಾಂ ಧಾರಯೇದ್ಯದಿ .
   ಕಂಠೇ ವಾ ದಕ್ಷಿಣೇ ವಾಹ್ಯೌ ಸೋಽಪಿ ಸರ್ವತಪೋಮಯಃ ..18..

   ಬ್ರಹ್ಮಾಸ್ತ್ರಾದೀನಿ ಶಸ್ತ್ರಾಣಿ ತದ್ಗಾತ್ರಂ ಪ್ರಾಪ್ಯ ಪಾರ್ವತಿ .
   ಮಾಲ್ಯಾನಿ ಕೌಸುಮಾನ್ಯೇವ ಭವಂತ್ಯೇವ ನ ಸಂಶಯಃ ..19..

   ಅಸ್ಯಾಪಿ ಪಠನಾತ್ಸದ್ಯಃ ಕುಬೇರೋಽಪಿ ಧನಾಧಿಪಃ .
   ಇಂದ್ರಾದ್ಯಾಃ ಸಕಲಾ ದೇವಾ ಧಾರಣಾತ್ಪಠನಾದ್ಯತಃ..

   ಪುಷ್ಪಾಂಜಲ್ಯಷ್ಟಕಂ ದೇವ್ಯೈ ಮೂಲೇನೈವ ಸಕೃತ್ಪಠೇತ್ .
   ಸಂವತ್ಸರಕೃತಾಯಾಸ್ತು ಪೂಜಾಯಾಃ ಫಲಮಾಪ್ನುಯಾತ್ ..21..

   ಯೋ ಧಾರಯತಿ ಪುಣ್ಯಾತ್ಮಾ ತ್ರೈಲೋಕ್ಯಮಂಗಲಂ ತ್ವಿದಂ .
   ಸ್ತೋತ್ರಂತು ಪರಮಂ ಪುಣ್ಯಂ ಸೋಽಪಿ ಪುಣ್ಯವತಾಂ ವರಃ ..22..

   ಸರ್ವೈಶ್ವರ್ಯಯುತೋ ಭೂತ್ವಾ ತ್ರೈಲೋಕ್ಯವಿಜಯೀ ಭವೇತ್ .
   ಪುರುಷೋ ದಕ್ಷಿಣೇ ಬಾಹೌ ನಾರೀ ವಾಮಭುಜೇ ತಥಾ .
   ಬ್ರಹ್ಮಾಸ್ತ್ರಾದೀನಿ ಶಸ್ತ್ರಾಣಿ ನೈವ ಕೃಂತಂತಿ ತಂ ಜನಂ .
   ಪಠೇದ್ವಾ ಧಾರಯೇದ್ವಾಪಿ ಯೋ ನರೋ ಭಕ್ತಿತತ್ಪರಃ ..24..

   ಏತತ್ತು ಸ್ತೋತ್ರಮಜ್ಞಾತ್ವಾ ಯೋಽರ್ಚಯೇಜ್ಜಗದೀಶ್ವರೀಂ .
   ದಾರಿದ್ರ್ಯಂ ಪರಮಂ ಪ್ರಾಪ್ಯ ಸೋಽಚಿರಾನ್ಮೃತ್ಯುಮಾಪ್ನುಯಾತ್ ..25..

   ಯಃ ಪಠೇತ್ಪ್ರಾತರುತ್ಥಾಯ ಸರ್ವತೀರ್ಥಫಲಂ ಲಭೇತ್ .
   ಯಃ ಪಠೇದುಭಯೋಃ ಸಂಧ್ಯೋತ್ತಸ್ಯ ವಿಘ್ನೋ ನ ವಿದ್ಯತೇ ..26..

   ಧಾರಯೇದ್ಯಃ ಸ್ವದೇಹೇ ತು ತಸ್ಯ ವಿಘ್ನಂ ನ ಕುತ್ರಚಿತ್ .
   ಭೂತಪ್ರೇತಪಿಶಾಚೇಭ್ಯೋ ಭಯಸ್ತಸ್ಯ ನ ವಿದ್ಯತೇ ..27..

   ರಣೇ ಚ ರಾಜದ್ವಾರೇ ಚ ಸರ್ವತ್ರ ವಿಜಯೀ ಭವೇತ್ .
   ಸರ್ವತ್ರ ಪೂಜಾಮಾಪ್ನೋತಿ ದೇವೀಪುತ್ರ ಇವ ಕ್ಷಿತೌ ..28 ..
   ಏತತ್ಸ್ತೋತ್ರಂ ಮಹಾಪುಣ್ಯಂ ಧರ್ಮಕಾಮಾರ್ಥಸಿದ್ಧಿದಂ .
   ಯತ್ರ ತತ್ರ ನ ವಕ್ತವ್ಯಂ ಗೋಪಿತವ್ಯಂ ಪ್ರಯತ್ನತಃ ..29..

   ಗೋಪಿತಂ ಸರ್ವತಂತ್ರೇಷು ಸಾರಾತ್ಸಾರಂ ಪ್ರಕೀರ್ತಿತಂ .
   ಸರ್ವತ್ರ ಸುಲಭಾ ವಿದ್ಯಾ ಸ್ತೋತ್ರಮೇತತ್ಸುದುರ್ಲಭಂ ..30..

   ಶಠಾಯ ಭಕ್ತಿಹೀನಾಯ ನಿಂದಕಾಯ ಮಹೇಶ್ವರಿ .
   ನ್ಯೂನಾಂಗೇ ಅತಿರಿಕ್ತಾಂಗೇ ಕ್ರೂರೇ ಮಿಥ್ಯಾಭಿಭಾಷಿಣೇ..

   ಯತ್ರ ತತ್ರ ನ ವಕ್ತವ್ಯಂ ಮಯಾ ತು ಪರಿಭಾಷಿತಂ .
   ದತ್ವಾ ತೇಭ್ಯೋ ಮಹೇಶಾನಿ ನಶ್ಯಂತಿ ಸಿದ್ಧಯಃ ಕ್ರಮಾತ್ ..32..

   ಮಂತ್ರಾಃ ಪರಾಙ್ಮುಖಾ ಯಾಂತಿ ಶಾಪಂ ದತ್ವಾ ಸುದಾರುಣಂ .
   ಅಶುಭಂಚ ಭವೇತ್ತಸ್ಯ ತಸ್ಮಾದ್ಯತ್ನೇನ ಗೋಪಯೇತ್ ..33..

   ಗೋರೋಚನಾಕುಂಕುಮೇನ ಭೂರ್ಜಪತ್ರೇ ಮಹೇಶ್ವರಿ .
   ಲಿಖಿತ್ವಾ ಶುಭಯೋಗೇ ಚ ಬ್ರಹ್ಮೇಂದ್ರೌ ವೈಧೃತೌ ಯಥಾ..

   ಕುಮಾರೀಂ ಪೂಜಯಿತ್ವಾ ತು ದೇವೀಸೂಕ್ತಂ ನಿವೇದ್ಯ ಚ .
   ಪಠಿತ್ವಾ ಭೋಜಯೇದ್ವಿಪ್ರಾಂಧನವಾನ್ವೇದಪಾರಗಾನ್  ..35..

   ಮಾಸಮೇಕಂ ಪಠೇದ್ಯಸ್ತು ಪ್ರತ್ಯಹಂ ನಿಯತಃ ಶುಚಿಃ .
   ದಿವಾ ಭವೇದ್ಧವಿಷ್ಯಾಶೀ ರಾತ್ರೌ ಭಕ್ತಿಪರಾಯಣಃ .
   ತಸ್ಯ ಸರ್ವಾರ್ಥಸಿದ್ಧಿಃ ಸ್ಯಾತ್ ಸತ್ಯಂಸತ್ಯಂ ಮಹೇಶ್ವರಿ ..37..

   ಷಟ್ಸಹಸ್ರಪ್ರಮಾಣೇನ ಪ್ರತ್ಯಹಂ ಪ್ರಜಪೇತ್ಸದಾ .
   ಷಣ್ಮಾಸೈರ್ವಾ ತ್ರಿಭಿರ್ಮಾಸೈಃ ಖೇಚರೋಭವತಿ ಧ್ರುವಂ ..38..

   ಅಪುತ್ರೋ ಲಭತೇ ಪುತ್ರಮಧನೋ ಧನವಾನ್ಭವೇತ್ .
   ಅರೋಗೀ ಬಲವಾಂಸ್ತಸ್ಯ ರಾಜಾ ಚ ದಾಸತಾಮಿಯಾತ್ ..39..

   ಯ ಏವಂ ಕುರುತೇ ಧೀಮಾನ್ಸ ಏವ ಕಮಲಾಪತಿಃ .
   ಸ ಏವ ಶ್ರೀಮಹಾದೇವಸ್ತಸ್ಯ ಪತ್ನೀ ಹರಿಪ್ರಿಯಾ ..40..

   ಬಹುನಾ ಕಿಮಿಹೋಕ್ತೇನ ಸ್ತವಸ್ಯಾಸ್ಯ ಪ್ರಸಾದತಃ .
   ಧರ್ಮಾರ್ಥಕಾಮಮೋಕ್ಷಂಚ ಲಭತೇ ನಾತ್ರ ಸಂಶಯಃ ..41..

   ಇತಿ ತೇ ಕಥಿತಂ ದೇವಿ ತ್ರೈಲೋಕ್ಯಮಂಗಲಾಭಿಧಂ .
   ಲಕ್ಷ್ಮೀಸ್ತೋತ್ರಂ ಮಹಾಪುಣ್ಯಂ ಸಂಸಾರಾರ್ಣವತಾರಕಂ ..42..

   ಋಜವೇ ಸುಚರಿತ್ರಾಯ ವಿಷ್ಣುಭಕ್ತಿಪರಾಯ ಚ .
   ದಾತವ್ಯಂಚ ಪ್ರಯತ್ನೇನ ಪರಮಂ ಗೋಪನಂ ತ್ವಿದಂ ..43..

..ಇತಿ ಶ್ರೀಶಂಕರಭಾಷಿತಂ ತ್ರೈಲೋಕ್ಯಮಂಗಲನಾಮಕಲಕ್ಷ್ಮೀಸ್ತೋತ್ರಂ ಸಂಪೂರ್ಣಂ .