ಶ್ರೀ ಮಹಾಲಕ್ಷ್ಮೀ ಸ್ತವ ಕವಚ ಪೂಜಾ

ಶ್ರೀಗಣೇಶಾಯ ನಮಃ .

ನಾರದ ಉವಾಚ .
ಆವಿರ್ಭೂಯ ಹರಿಸ್ತಸ್ಮೈ ಕಿಂ ಸ್ತೋತ್ರಂ ಕವಚಂ ದದೌ .
ಮಹಾಲಕ್ಷ್ಮ್ಯಾಶ್ಚ ಲಕ್ಷ್ಮೀಶಸ್ತನ್ಮೇ ಬ್ರೂಹಿ ತಪೋಧನ ..1..

ನಾರಾಯಣ ಉವಾಚ .
ಪುಷ್ಕರೇ ಚ ತಪಸ್ತಪ್ತ್ವಾ ವಿರರಾಮ ಸುರೇಶ್ವರಃ .
ಆವಿರ್ಬಭೂವ ತತ್ರೈವ ಕ್ಲಿಷ್ಟಂ ದೃಷ್ಟ್ವಾ ಹರಿಃ ಸ್ವಯಂ .. 2..

ತಮುವಾಚ ಹೃಷೀಕೇಶೋ ವರಂ ವೃಣು ಯಥೇಪ್ಸಿತಂ .
ಸ ಚ ವವ್ರೇ ವರಂ ಲಕ್ಷ್ಮೀಮೀಶಸ್ತಸ್ಮೈ ದದೌ ಮುದಾ .. 3..

ವರಂ ದತ್ತ್ವಾ ಹೃಷೀಕೇಶಃ ಪ್ರವಕ್ತುಮುಪಚಕ್ರಮೇ .
ಹಿತಂ ಸತ್ಯಂ ಚ ಸಾರಂ ಚ ಪರಿಣಾಮಸುಖಾವಹಂ .. 4..

ಮಧುಸೂದನ ಉವಾಚ .
ಗೃಹಾಣ ಕವಚಂ ಶಕ್ರ ಸರ್ವದುಃಖವಿನಾಶನಂ .
ಪರಮೈಶ್ವರ್ಯಜನಕಂ ಸರ್ವಶತ್ರುವಿಮರ್ದನಂ .. 5..

ಬ್ರಹ್ಮಣೇ ಚ ಪುರಾ ದತ್ತಂ ವಿಷ್ಟಪೇ ಚ ಜಲಪ್ಲುತೇ .
ಯದ್ಧೃತ್ವಾ ಜಗತಾಂ ಶ್ರೇಷ್ಠಃ ಸರ್ವೈಶ್ವರ್ಯಯುತೋ ವಿಧಿಃ .. 6..

ಬಭೂವುರ್ಮನವಃ ಸರ್ವೇ ಸರ್ವೈಶ್ವರ್ಯಯುತಾ ಯತಃ .
ಸರ್ವೈಶ್ವರ್ಯಪ್ರದಸ್ಯಾಸ್ಯ ಕವಚಸ್ಯ ಋಷಿರ್ವಿಧಿಃ .. 7..

ಪಂಕ್ತಿಶ್ಛಂದಶ್ಚ ಸಾ ದೇವೀ ಸ್ವಯಂ ಪದ್ಮಾಲಯಾ ವರಾ .
ಸಿದ್ಧ್ಯೈಶ್ವರ್ಯಸುಖೇಷ್ವೇವ ವಿನಿಯೋಗಃ ಪ್ರಕೀರ್ತಿತಃ .. 8..

ಯದ್ಧೃತ್ವಾ ಕವಚಂ ಲೋಕಃ ಸರ್ವತ್ರ ವಿಜಯೀ ಭವೇತ್ .
ಮಸ್ತಕಂ ಪಾತು ಮೇ ಪದ್ಮಾ ಕಂಠಂ ಪಾತು ಹರಿಪ್ರಿಯಾ .. 9..

ನಾಸಿಕಾಂ ಪಾತು ಮೇ ಲಕ್ಷ್ಮೀಃ ಕಮಲಾ ಪಾತು ಲೋಚನೇ .
ಕೇಶಾನ್ಕೇಶವಕಾಂತಾ ಚ ಕಪಾಲಂ ಕಮಲಾಲಯಾ .. 10..

ಜಗತ್ಪ್ರಸೂರ್ಗಂಡಯುಗ್ಮಂ ಸ್ಕಂಧಂ ಸಂಪತ್ಪ್ರದಾ ಸದಾ .
ಓಂ ಶ್ರೀಂ ಕಮಲವಾಸಿನ್ಯೈ ಸ್ವಾಹಾ ಪೃಷ್ಠಂ ಸದಾಽವತು .. 11..

ಓಂ ಹ್ರೀಂ ಶ್ರೀಂ ಪದ್ಮಾಲಯಾಯೈ ಸ್ವಾಹಾ ವಕ್ಷಃ ಸದಾಽವತು .
ಪಾತು ಶ್ರೀರ್ಮಮ ಕಂಕಾಲಂ ಬಾಹುಯುಗ್ಮಂ ಚ ತೇ ನಮಃ .. 12..

ಓಂ ಹ್ರೀಂ ಶ್ರೀಂ ಲಕ್ಷ್ಮ್ಯೈ ನಮಃ ಪಾದೌ ಪಾತು ಮೇ ಸಂತತಂ ಚಿರಂ .
ಓಂ ಹ್ರೀಂ ಶ್ರೀಂ ನಮಃ ಪದ್ಮಾಯೈ ಸ್ವಾಹಾ ಪಾತು ನಿತಂಬಕಂ .. 13..

ಓಂ ಶ್ರೀಂ ಮಹಾಲಕ್ಷ್ಮ್ಯೈ ಸ್ವಾಹಾ ಸರ್ವಾಂಗಂ ಪಾತು ಮೇ ಸದಾ .
ಓಂ ಹ್ರೀಂ ಶ್ರೀಂ ಕ್ಲೀಂ ಮಹಾಲಕ್ಷ್ಮ್ಯೈ ಸ್ವಾಹಾ ಮಾಂ ಪಾತು ಸರ್ವತಃ .. 14..

ಇತಿ ತೇ ಕಥಿತಂ ವತ್ಸ ಸರ್ವಸಂಪತ್ಕರಂ ಪರಂ .
ಸರ್ವೈಶ್ವರ್ಯಪ್ರದಂ ನಾಮ ಕವಚಂ ಪರಮಾದ್ಭುತಂ .. 15..

ಗುರುಮಭ್ಯರ್ಚ್ಯ ವಿಧಿವತ್ಕವಚಂ ಧಾರಯೇತ್ತು ಯಃ .
ಕಂಠೇ ವಾ ದಕ್ಷಿಣೇ ಬಾಹೌ ಸ ಸರ್ವವಿಜಯೀ ಭವೇತ್ .. 16..

ಮಹಾಲಕ್ಷ್ಮೀರ್ಗೃಹಂ ತಸ್ಯ ನ ಜಹಾತಿ ಕದಾಚನ .
ತಸ್ಯಚ್ಛಾಯೇವ ಸತತಂ ಸಾ ಚ ಜನ್ಮನಿ ಜನ್ಮನಿ .. 17..

ಇದಂ ಕವಚಮಜ್ಞಾತ್ವಾ ಭಜೇಲ್ಲಕ್ಷ್ಮೀಂ ಸ ಮಂದಧೀಃ .
ಶತಲಕ್ಷಪ್ರಜಾಪೇಽಪಿ ನ ಮಂತ್ರಃ ಸಿದ್ಧಿದಾಯಕಃ .. 18..

ನಾರಾಯಣ ಉವಾಚ .
ದತ್ತ್ವಾ ತಸ್ಮೈ ಚ ಕವಚಂ ಮಂತ್ರಂ ವೈ ಷೋಡಶಾಕ್ಷರಂ .
ಸಂತುಷ್ಟಶ್ಚ ಜಗನ್ನಾಥೋ ಜಗತಾಂ ಹಿತಕಾರಣಂ .. 19..

ಓಂ ಹ್ರೀಂ ಶ್ರೀಂ ಕ್ಲೀಂ ನಮೋ ಮಹಾಲಕ್ಷ್ಮ್ಯೈ ಸ್ವಾಹಾ .
ದದೌ ತಸ್ಮೈ ಚ ಕೃಪಯಾ ಚೇಂದ್ರಾಯ ಚ ಮಹಾಮುನೇ .. 20..

ಧ್ಯಾನಂ ಚ ಸಾಮವೇದೋಕ್ತಂ ಗೋಪನೀಯಂ ಸುದುರ್ಲಭಂ .
ಸಿದ್ಧೈರ್ಮುನೀಂದ್ರೈರ್ದುಷ್ಪ್ರಾಪ್ಯಂ ಧ್ರುವಂ ಸಿದ್ಧಿಪ್ರದಂ ಶುಭಂ .. 21..

ಶ್ವೇತಚಂಪಕವರ್ಣಾಭಾಂ ಶತಚಂದ್ರಸಮಪ್ರಭಾಂ .
ವಹ್ನಿಶುದ್ಧಾಂಶುಕಾಧಾನಾಂ ರತ್ನಭೂಷಣಭೂಷಿತಾಂ .. 22..

ಈಷದ್ಧಾಸ್ಯಪ್ರಸನ್ನಾಸ್ಯಾಂ ಭಕ್ತಾನುಗ್ರಹಕಾರಿಕಾಂ .
ಕಸ್ತೂರೀಬಿಂದುಮಧ್ಯಸ್ಥಂ ಸಿಂದೂರಂ ಭೂಷಣಂ ತಥಾ .. 23..

ಅಮೂಲ್ಯರತ್ನರಚಿತಕುಂಡಲೋಜ್ಜ್ವಲಭೂಷಣಂ .
ಬಿಮ್ರತೀ ಕಬರೀಭಾರಂ ಮಾಲತೀಮಾಲ್ಯಶೋಭಿತಂ .. 24..

ಸಹಸ್ರದಲಪದ್ಮಸ್ಥಾಂ ಸ್ವಸ್ಥಾಂ ಚ ಸುಮನೋಹರಾಂ .
ಶಾಂತಾಂ ಚ ಶ್ರೀಹರೇಃ ಕಾಂತಾಂ ತಾಂ ಭಜೇಜ್ಜಗತಾಂ ಪ್ರಸೂಂ .. 25..

ಧ್ಯಾನೇನಾನೇನ ದೇವೇಂದ್ರೋ ಧ್ಯಾತ್ವಾ ಲಕ್ಷ್ಮೀಂ ಮನೋಹರಾಂ .
ಭಕ್ತ್ಯಾ ಸಂಪೂಜ್ಯ ತಸ್ಯೈ ಚ ಚೋಪಚಾರಾಂಸ್ತು ಷೋಡಶ .. 26..

ಸ್ತುತ್ವಾಽನೇನ ಸ್ತವೇನೈವ ವಕ್ಷ್ಯಮಾಣೇನ ವಾಸವ .
ನತ್ವಾ ವರಂ ಗೃಹೀತ್ವಾ ಚ ಲಭಿಷ್ಯಸಿ ಚ ನಿರ್ವೃತಿಂ .. 27..

ಸ್ತವನಂ ಶೃಣು ದೇವೇಂದ್ರ ಮಹಾಲಕ್ಷ್ಮ್ಯಾಃ ಸುಖಪ್ರದಂ .
ಕಥಯಾಮಿ ಸುಗೋಪ್ಯಂ ಚ ತ್ರಿಷು ಲೋಕೇಷು ದುರ್ಲಭಂ .. 28..

ನಾರಾಯಣ ಉವಾಚ .
ದೇವಿ ತ್ವಾಂ ಸ್ತೋತುಮಿಚ್ಛಾಮಿ ನ ಕ್ಷಮಾಃ ಸ್ತೋತುಮೀಶ್ವರಾಃ .
ಬುದ್ಧೇರಗೋಚರಾಂ ಸೂಕ್ಷ್ಮಾಂ ತೇಜೋರೂಪಾಂ ಸನಾತನೀಂ .
ಅತ್ಯನಿರ್ವಚನೀಯಾಂ ಚ ಕೋ ವಾ ನಿರ್ವಕ್ತುಮೀಶ್ವರಃ .. 29..

ಸ್ವೇಚ್ಛಾಮಯೀಂ ನಿರಾಕಾರಾಂ ಭಕ್ತಾನುಗ್ರಹವಿಗ್ರಹಾಂ .
ಸ್ತೌಮಿ ವಾಙ್ಮನಸೋಃ ಪಾರಾಂ ಕಿಂವಾಽಹಂ ಜಗದಂಬಿಕೇ .. 30..

ಪರಾಂ ಚತುರ್ಣಾಂ ವೇದಾನಾಂ ಪಾರಬೀಜಂ ಭವಾರ್ಣವೇ .
ಸರ್ವಸಸ್ಯಾಧಿದೇವೀಂ ಚ ಸರ್ವಾಸಾಮಪಿ ಸಂಪದಾಂ .. 31..

ಯೋಗಿನಾಂ ಚೈವ ಯೋಗಾನಾಂ ಜ್ಞಾನಾನಾಂ ಜ್ಞಾನಿನಾಂ ತಥಾ .
ವೇದಾನಾಂ ವೈ ವೇದವಿದಾಂ ಜನನೀಂ ವರ್ಣಯಾಮಿ ಕಿಂ .. 32..

ಯಯಾ ವಿನಾ ಜಗತ್ಸರ್ವಮಬೀಜಂ ನಿಷ್ಫಲಂ ಧ್ರುವಂ .
ಯಥಾ ಸ್ತನಂಧಯಾನಾಂ ಚ ವಿನಾ ಮಾತ್ರಾ ಸುಖಂ ಭವೇತ್ .. 33..

ಪ್ರಸೀದ ಜಗತಾಂ ಮಾತಾ ರಕ್ಷಾಸ್ಮಾನತಿಕಾತರಾನ್ .
ವಯಂ ತ್ವಚ್ಚರಣಾಂಭೋಜೇ ಪ್ರಪನ್ನಾಃ ಶರಣಂ ಗತಾಃ .. 34..

ನಮಃ ಶಕ್ತಿಸ್ವರೂಪಾಯೈ ಜಗನ್ಮಾತ್ರೇ ನಮೋ ನಮಃ .
ಜ್ಞಾನದಾಯೈ ಬುದ್ಧಿದಾಯೈ ಸರ್ವದಾಯೈ ನಮೋ ನಮಃ .. 35..

ಹರಿಭಕ್ತಿಪ್ರದಾಯಿನ್ಯೈ ಮುಕ್ತಿದಾಯೈ ನಮೋ ನಮಃ .
ಸರ್ವಜ್ಞಾಯೈ ಸರ್ವದಾಯೈ ಮಹಾಲಕ್ಷ್ಮ್ಯೈ ನಮೋ ನಮಃ .. 36..

ಕುಪುತ್ರಾಃ ಕುತ್ರಚಿತ್ಸಂತಿ ನ ಕುತ್ರಾಪಿ ಕುಮಾತರಃ .
ಕುತ್ರ ಮಾತಾ ಪುತ್ರದೋಷಂ ತಂ ವಿಹಾಯ ಚ ಗಚ್ಛತಿ .. 37..

ಸ್ತನಂಧಯೇಭ್ಯ ಇವ ಮೇ ಹೇ ಮಾತರ್ದೇಹಿ ದರ್ಶನಂ .
ಕೃಪಾಂ ಕುರು ಕೃಪಾಸಿಂಧೋ ತ್ವಮಸ್ಮಾನ್ಭಕ್ತವತ್ಸಲೇ .. 38..

ಇತ್ಯೇವಂ ಕಥಿತಂ ವತ್ಸ ಪದ್ಮಾಯಾಶ್ಚ ಶುಭಾವಹಂ .
ಸುಖದಂ ಮೋಕ್ಷದಂ ಸಾರಂ ಶುಭದಂ ಸಂಪದಃ ಪ್ರದಂ .. 39..

ಇದಂ ಸ್ತೋತ್ರಂ ಮಹಾಪುಣ್ಯಂ ಪೂಜಾಕಾಲೇ ಚ ಯಃ ಪಠೇತ್ .
ಮಹಾಲಕ್ಷ್ಮೀರ್ಗೃಹಂ ತಸ್ಯ ನ ಜಹಾತಿ ಕದಾಚನ .. 40..

ಇತ್ಯುಕ್ತ್ವಾ ಶ್ರೀಹರಿಸ್ತಂ ಚ ತತ್ರೈವಾಂತರಧೀಯತ .
ದೇವೋ ಜಗಾಮ ಕ್ಷೀರೋದಂ ಸುರೈಃ ಸಾರ್ಧಂ ತದಾಜ್ಞಯಾ .. 41..

.. ಇತಿ ಶ್ರೀಬ್ರಹ್ಮವೈವರ್ತಮಹಾಪುರಾಣೇ ಗಣಪತಿಖಂಡೇ
ನಾರದನಾರಾಯಣಸಂವಾದೇ ಲಕ್ಷ್ಮೀಸ್ತವಕವಚಪೂಜಾಕಥನಂ
ನಾಮ ದ್ವಾವಿಂಶೋಽಧ್ಯಾಯಃ .. 22..