ಶ್ರೀ ಮಹಾಲಕ್ಷ್ಮೀ ಸ್ತವಃ

ಮಯಿ ಕುರು ಮಂಗಲಮಂಬುಜವಾಸಿನಿ ಮಂಗಲದಾಯಿನಿ ಮಂಜುಗತೇ
    ಮತಿಮಲಹಾರಿಣಿ ಮಂಜುಳಭಾಷಿಣಿ ಮನ್ಮಥತಾತವಿನೋದರತೇ .
ಮುನಿಜನಪಾಲಿನಿ ಮೌಕ್ತಿಕಮಾಲಿನಿ ಸದ್ಗುಣವರ್ಷಿಣಿ ಸಾಧುನುತೇ
    ಜಯ ಜಯ ಹೇ ಮಧುಸೂದನಮೋಹಿನಿ ಮೋದವಿಧಾಯಿನಿ ವೇದನುತೇ ..1..

ಕಲಿಮಲಹಾರಿಣಿ ಕಾಮಿತದಾಯಿನಿ ಕಾಂತವಿಧಾಯಿನಿ ಕಾಂತಹಿತೇ
    ಕಮಲದಲೋಪಮ ಕಮ್ರಪದದ್ವಯ ಶಿಂಜಿತನೂಪುರ ನಾದಯುತೇ .
ಕಮಲಸುಮಾಲಿನಿ ಕಾಂಚನಹಾರಿಣಿ ಲೋಕಸುಖೈಷಿಣಿ ಕಾಮಿನುತೇ
    ಜಯ ಜಯ ಹೇ ಮಧುಸೂದನಮೋಹಿನಿ ಮೋದವಿಧಾಯಿನಿ ವೇದನುತೇ ..2..

ಕುವಲಯಮೋಚಕನೇತ್ರಕೃಪಾಪರಿಪಾಲಿತ ಸಂಶ್ರಿತಭಕ್ತಕುಲೇ
    ಗುರುವರ ಶಂಕರಸನ್ನುತಿತುಷ್ಟಿಸುವೃಷ್ಟಸುಹೇಮಮಯಾಮಲಕೇ .
ರವಿಕುಲವಾರಿಧಿಚಂದ್ರಸಮಾದರಮಂತ್ರಗೃಹೀತಸುಪಾಣಿತಲೇ
    ಜಯ ಜಯ ಹೇ ಮಧುಸೂದನಮೋಹಿನಿ ಮೋದವಿಧಾಯಿನಿ ವೇದನುತೇ ..3..

ಕುಲಲಲನಾಕುಲಲಾಳಿತಲೋಲವಿಲೋಚನಪೂರ್ಣಕೃಪಾಕಮಲೇ
    ಚಲದಳಕಾವಲಿವಾರಿದಮಧ್ಯಗಚಂದ್ರಸುನಿರ್ಮಲಫಾಲತಲೇ .
ಮಣಿಮಯಭಾಸುರಕರ್ಣವಿಭೂಷಣಕಾಂತಿಪರಿಷ್ಕೃತಗಂಡತಲೇ
    ಜಯ ಜಯ ಹೇ ಮಧುಸೂದನಮೋಹಿನಿ ಮೋದವಿಧಾಯಿನಿ ವೇದನುತೇ ..4..

ಸುರಗಣದಾನವಮಂಡಲಲೋಹಿತಸಾಗರಸಂಭವದಿವ್ಯತನೋ
    ಸಕಲಸುರಾಸುರದೇವಮುನೀನತಿಹಾಯ ಚ ದೋಷದೃಶಾಹಿ ರಮೇ .
ಗುಣಗಣವಾರಿಧಿನಾಥಮಹೋರಸಿದತ್ತಸುಮಾವಲಿಜಾತಮುದೇ
    ಜಯ ಜಯ ಹೇ ಮಧುಸೂದನಮೋಹಿನಿ ಮೋದವಿಧಾಯಿನಿ ವೇದನುತೇ ..5..

ಕನಕಘಟೋಪಮಕುಂಕುಮಶೋಭಿತ ಹಾರಸುರಂಜಿತ ದಿವ್ಯಕುಚೇ
    ಕಮಲಜಪೂಜಿತ ಕುಂಕುಮಪಂಗಿಲ ಕಾಂತಪದದ್ವಯತಾಮರಸೇ .
ಕರಧೃತಕಂಜಸುಮೇ ಕಟಿವೀತದೂಕುಲಮನೋಹರಕಾಂತಿವೃತೇ
    ಜಯ ಜಯ ಹೇ ಮಧುಸೂದನಮೋಹಿನಿ ಮೋದವಿಧಾಯಿನಿ ವೇದನುತೇ ..6..

ಸುರಪತಿಪೂಜನದತ್ತಮನೋಹರಚಂದನಕುಂಕುಮಸಂವಲಿತೇ
    ಸುರಯುವತೀಕೃತವಾದನನರ್ತನವೀಜನವಂದನಸಮ್ಮುದಿತೇ .
ನಿಜರಮಣಾರುಣಪಾದಸರೋರುಹಮರ್ದನಕಲ್ಪನತೋಷಯುತೇ
    ಜಯ ಜಯ ಹೇ ಮಧುಸೂದನಮೋಹಿನಿ ಮೋದವಿಧಾಯಿನಿ ವೇದನುತೇ ..7..

ದಿನಮಣಿಸನ್ನಿಭದೀಪಸುದೀಪಿತ ರತ್ನಸಮಾವೃತದಿವ್ಯಗೃಹೇ
    ಸುತಧನಧಾನ್ಯಮುಖಾಭಿಧಲಕ್ಷ್ಮ್ಯಭಿಸಂವೃತಕಾಂತಗೃಹೀತಕರೇ .
ನಿಜವನಪೂಜನ ದಿವ್ಯಸುಮಾರ್ಚನ ವಂದನಕಲ್ಪಿತಭರ್ತೃಮುದೇ
    ಜಯ ಜಯ ಹೇ ಮಧುಸೂದನಮೋಹಿನಿ ಮೋದವಿಧಾಯಿನಿ ವೇದನುತೇ ..8..

ಮಮ ಹೃದಿವಾಸ ಪರಾಭವತಾಪಮಪಾಕುರು ದೇಹಿ ಮುದಂ ಹಿ ರಮೇ
    ಮಯಿ ಕರುಣಾಂ ಕುರು ಸಾದರವೀಕ್ಷಣಮರ್ಥಿಜನೇ ದಿಶ ಚಾರುತನೋ .
ಸಕೃತಭಿವೀಕ್ಷಣಜಾತಮಹೋದಯಶಕ್ರಮುಖಾಖಿಲದೇವಗಣೇ
    ಜಯ ಜಯ ಹೇ ಮಧುಸೂದನಮೋಹಿನಿ ಮೋದವಿಧಾಯಿನಿ ವೇದನುತೇ ..9..

ಸುತಧನಮೌಕ್ತಿಕಹೈಮನಿವೇಶಿತರತ್ನಸುಭೂಷಣ ದಾನರತೇ
    ರಥಗಜವಾಜಿಸಮಾವೃತಮಂದಿರರಾಜ್ಯಸುಕಲ್ಪನಕಲ್ಪಲತೇ .
ಕುಸುಮಸುಚಂದನವಸ್ತ್ರಮನೋಹರರೂಪಕಲಾರತಿಪೋಷರತೇ
    ಜಯ ಜಯ ಹೇ ಮಧುಸೂದನಮೋಹಿನಿ ಮೋದವಿಧಾಯಿನಿ ವೇದನುತೇ ..10..

ಧಿಮಿ ಧಿಮಿ ಧಿಂಧಿಮಿ ಧಿಂಧಿಮಿ ಧಿಂಧಿಮಿ ದುಂದುಭಿನಾದಸುಪೂರ್ಣದಿಶೇ
    ಘುಮ ಘುಮ ಘುಂಘುಮ ಘುಂಘುಮ ಘುಂಘುಮ ಶಂಖನಿನಾದಸುತುಷ್ಟಿವಶೇ .
ನಟನಕಲಾಪಟುದೇವನಟೀಕುಲಚಂಕ್ರಮನರ್ತನದತ್ತದೃಶೇ
    ಜಯ ಜಯ ಹೇ ಮಧುಸೂದನಮೋಹಿನಿ ಮೋದವಿಧಾಯಿನಿ ವೇದನುತೇ ..11..

ಹರಿಹರಪೂಜನಮದ್ಭುತಭಾಷಣಮಷ್ಟಸುಸಿದ್ಧಿಮುಪಾನಯ ಮೇ
    ಮಧುಕೃತಪಾಯಸಮುದ್ಗಕೃತೌದನಭಕ್ಷ್ಯನಿವೇದನತುಷ್ಟಮತೇ .
ಸಕಲಸುಮಾರ್ಪಣಪೂಜನಸಂಭ್ರಮದೇವವಧೂಕುಲಸಂವಲಿತೇ
    ಜಯ ಜಯ ಹೇ ಮಧುಸೂದನಮೋಹಿನಿ ಮೋದವಿಧಾಯಿನಿ ವೇದನುತೇ ..12..

ಅನವಧಿಮಂಗಲಮಾರ್ತಿವಿನಾಶನಮಚ್ಯುತಸೇವನಮಂಬ ರಮೇ
    ನಿಖಿಲಕಲಾಮತಿಮಾಸ್ತಿಕಸಂಗಮಮಿಂದ್ರಿಯಪಾಟವಮರ್ಪಯ ಮೇ .
ಅಮಿತಮಹೋದಯಮಿಷ್ಟಸಮಾಗಮಮಷ್ಟಸುಸಂಪದಮಾಶು ಮಮ
    ಜಯ ಜಯ ಹೇ ಮಧುಸೂದನಮೋಹಿನಿ ಮೋದವಿಧಾಯಿನಿ ವೇದನುತೇ ..13..

ಕರಧೃತಶುಕ್ಲಸುಮಾವಲಿನಿರ್ಮಿತಹಾರಗಜೀವೃತಪಾರ್ಶ್ವತಲೇ
    ಕಮಲನಿವಾಸಿನಿ ಶೋಕವಿನಾಶಿನಿ ದೈವಸುವಾಸಿನಿ ಲಕ್ಷ್ಮ್ಯಭಿದೇ .
ನಿಜರಮಣಾರುಣಚಂದನಚರ್ಚಿತಚಂಪಕಹಾರಸುಚಾರುಗಲೇ
    ಜಯ ಜಯ ಹೇ ಮಧುಸೂದನಮೋಹಿನಿ ಮೋದವಿಧಾಯಿನಿ ವೇದನುತೇ ..14..

ಅನಘಮನಂತಪದಾನ್ವಿತರಾಮಸುದೀಕ್ಷಿತಸತ್ಕೃತಪದ್ಯಮಿದಂ
    ಪಠತಿ ಶೃಣೋತಿ ಚ ಭಕ್ತಿಯುತೋ ಯದಿ ಭಾಗ್ಯಸಮೃದ್ಧಿಮಥೋ ಲಭತೇ .
ದ್ವಿಜವರದೇಶಿಕಸನ್ನುತಿತುಷ್ಟರಮೇ ಪರಿಪಾಲಯ ಲೋಕಮಿಮಂ
    ಜಯ ಜಯ ಹೇ ಮಧುಸೂದನಮೋಹಿನಿ ಮೋದವಿಧಾಯಿನಿ ವೇದನುತೇ ..15..

ಇತಿ ಶ್ರೀ ಅನಂತರಾಮದೀಕ್ಷಿತೇನ ವಿರಚಿತಃ ಶ್ರೀಮಹಾಲಕ್ಷ್ಮೀಸ್ತವಃ ಸಂಪೂರ್ಣಃ .