ಶ್ರೀ ಮಹಾಲಕ್ಷ್ಮೀ ದಂಡಕಂ

ಮಂದಾರಮಾಲಾಂಚಿತಕೇಶಭಾರಾಂ ಮಂದಾಕಿನೀನಿರ್ಝರಗೌರಹಾರಾಂ .
ವೃಂದಾರಿಕಾವಂದಿತಕೀರ್ತಿಪಾರಾಂ ವಂದಾಮಹೇ ಮಾಂ ಕೃತಸದ್ವಿಹಾರಾಂ ..1..

ಜಯ ದುಗ್ಧಾಬ್ಧಿತನಯೇ ಜಯ ನಾರಾಯಣಪ್ರಿಯೇ .
ಜಯ ಹೈರಣ್ಯವಲಯೇ ಜಯ ವೇಲಾಪುರಾಶ್ರಯೇ ..2..

ಜಯ ಜಯ ಜನಯಿತ್ರಿ ವೇಲಾಪುರಾಭ್ಯಂತರಪ್ರಸ್ಫುರತ್ಸ್ಫಾರ-
ಸೌಧಾಂಚಿತೋದಾರಸಾಲಾಂತರಾಗಾರಖೇಲನ್ಮುರಾರಾತಿಪಾರ್ಶ್ವಸ್ಥಿತೇ .
ಕ್ಲೃಪ್ತವಿಶ್ವಸ್ಥಿತೇ .
ಚಿತ್ರರತ್ನಜ್ವಲದ್ರತ್ನಸಾನೂಪಮಪ್ರತ್ನಸೌವರ್ಣ
ಕೋಟೀರಕಾಂತಿಚ್ಛಟಾಚಿತ್ರಿತಾಚ್ಛಾಂಬರೇ . ದೇವಿ ದಿವ್ಯಾಂಬರೇ .
ಫುಲ್ಲಸನ್ಮಲ್ಲಿಕಾಮಾಲಿಕಾಪ್ರೋಲ್ಲಸನ್ನೀಲಭೋಗೀಶಭೋಗಪ್ರತೀಕಾಶ-
ವೇಣ್ಯರ್ಧಚಂದ್ರಾಲಿಕೇ . ವಲ್ಗುನೀಲಾಲಕೇ . ಕೇಶಸೌರಭ್ಯಲೋಭ-
ಭ್ರಮತ್ಸ್ಥೂಲಜಂಬೂಫಲಾಭಾಲಿಮಾಲಾಸಮಾಕರ್ಷಣೇಹೋತ್ಪತನ್ಮೌಲಿ-
ವೈಡೂರ್ಯಸಂದರ್ಶ ನತ್ರಸ್ತಲೀಲಾಶುಕಾಲೋಕಜಾತಸ್ಮಿತೇ . ದೇವಜಾತಸ್ತುತೇ .
ಈಶ್ವರೀಶೇಖರೀಭೂತಸೋಮಸ್ಮಯೋತ್ಸಾದನಾಭ್ಯುತ್ಸುಕತ್ವಚ್ಛಿರಃಸಂಶ್ರಿತ-
ಪ್ರಾಪ್ತನಿತ್ಯೋದಯಬ್ರಘ್ನಶಂಕಾಕರಸ್ವರ್ಣಕೋಟೀರಸಂದರ್ಶನಾನಂದಿತಸ್ವೀಯ-
ತಾತಾಂಕಕಾರೋಹಣಾಭೀಪ್ಸುಲಬ್ಧಾಂತಿಕಾರ್ಕಾತ್ಮ-
ಜಾನಿರ್ಝರಾಶಂಕನೀಯಾಂತಕಸ್ತೂರಿಕಾಚಿತ್ರಕೇ . ವಾರ್ಧಿರಾಟ್ಪುತ್ರಿಕೇ .
ಮಾನ್ಮಥಶ್ಯಾಮಲೇಕ್ಷ್ವಾತ್ಮಧನ್ವಾಕೃತಿಸ್ನಿಗ್ಧಮುಗ್ಧಾದ್ಭುತ-
ಭ್ರೂಲತಾ ಚಾಲನಾರಬ್ಧಲೋಕಾಲಿನಿರ್ಮಾಣರಕ್ಷಿಣ್ಯಸಂಹಾರಲೀಲೇಽಮಲೇ .
ಸರ್ವದೇ ಕೋಮಲೇ . ಸ್ವಪ್ರಭಾನ್ಯಕ್ಕೃತೇ ಸ್ವಾನುಗಶ್ರುತ್ಯಧಃಕಾರಿಣೀಕಾಂತಿ-
ನೀಲೋತ್ಪಲೇ ಬಾಧಿತುಂ ವಾಗತಾಭ್ಯಾಂ ಶ್ರವಃಸನ್ನಿಧಿಂ ಲೋಚನಾಭ್ಯಾಂ
ಭೃಶಂ ಭೂಷಿತೇ . ಮಂಜುಸಂಭಾಷಿತೇ . ಕಿಂಚಿದುದ್ಬುದ್ಧಚಾಂಪೇಯ-
ಪುಷ್ಪಪ್ರತೀಕಾಶನಾಸಾಸ್ಥಿತಸ್ಥೂಲಮುಕ್ತಾಫಲೇ .
ದತ್ತಭಕ್ತೌಘವಾಂಛಾಫಲೇ . ಶೋಣಬಿಂಬಪ್ರವಾಲಾಧರದ್ಯೋತವಿದ್ಯೋತ-
ಮಾನೋಲ್ಲಸದ್ದಾಡಿಮೀಬೀಜರಾಜಿಪ್ರತೀಕಾಶದಂತಾವಲೇ .
ಗತ್ಯಧಃ ಕ್ಲೃಪ್ತದಂತಾವಲೇ .
ತ್ವತ್ಪತಿಪ್ರೇರಿತತ್ವಷ್ಟಸೃಷ್ಟಾದ್ಭುತಾತೀದ್ಧಭಸ್ಮಾಸುರತ್ರಸ್ತ
ದುರ್ಗಾಶಿವತ್ರಾಣಸಂತುಷ್ಟತದ್ದತ್ತಶೀತಾಂಶುರೇಖಾಯುಗಾತ್ಮತ್ವಸಂಭಾವನಾ-
ಯೋಗ್ಯಮುಕ್ತಾಮಯಪ್ರೋಲ್ಲಸತ್ಕುಂಡಲೇ . ಪಾಲಿತಾಖಂಡಲೇ ..1..

ಅಯಿ ಸುರುಚಿರನವ್ಯದೂರ್ವಾದಲಭ್ರಾಂತಿನಿಷ್ಪಾದಕಪ್ರೋಲ್ಲಸತ್ಕಂಠ-
ಭೂಷಾನಿಬದ್ಧಾಯತಾನರ್ಘ್ಯಗಾರುತ್ಮತಾಂಶುಪ್ರಜಾಪಾತ್ಯಸಾರಂಗ-
ನಾರೀಸ್ಥಿರಸ್ಥಾಪಕಾಶ್ಚರ್ಯಕೃದ್ದಿವ್ಯಮಾಧುರ್ಯಗೀತೋಜ್ಜ್ವಲೇ . ಮಂಜುಮುಕ್ತಾವಲೇ .
ಅಂಗದಪ್ರೋತದೇವೇಂದ್ರನೀಲೋಪಲತ್ವಿಟ್ಛಟಾಶ್ಯಾಮಲೀಭೂತಚೋಲೋಜ್ಜ್ವಲಸ್ಥೂಲ-
ಹೇಮಾರ್ಗಲಾಕಾರದೋರ್ವಲ್ಲಿಕೇ . ಫುಲ್ಲಸನ್ಮಲ್ಲಿಕೇ . ಊರ್ಮಿಕಾಸಂಚಯಸ್ಯೂತ
ಶೋಣೋಪಲಶ್ರೀಪ್ರವೃದ್ಧಾರುಣಚ್ಛಾಯಮೃದ್ವಂಗುಲೀಪಲ್ಲವೇ .
ಲಾಲಿತಾನಂದಕೃತ್ಸಲ್ಲವೇ . ದಿವ್ಯರೇಖಾಂಕುಶಾಂಭೋಜಚಕ್ರಧ್ವ-
ಜಾದ್ಯಂಕರಾಜತ್ಕರೇ . ಸಂಪದೇಕಾಕರೇ .
ಕಂಕಣಶ್ರೇಣಿಕಾಬದ್ಧರತ್ನಪ್ರಭಾಜಾಲಚಿತ್ರೀಭವತ್ಪದ್ಮಯುಗ್ಮ-
ಸ್ಫುರತ್ಪಂಚಶಾಖದ್ವಯೇ . ಗೂಢಪುಣ್ಯಾಶಯೇ . ಮತ್ಪದಾಬ್ಜೋಪಕಂಠೇ
ಚತುಃಪೂರುಷಾರ್ಥಾ ವಸಂತ್ಯತ್ರ ಮಾಮಾಶ್ರಯಂ ಕುರ್ವತೇ ತಾನ್ ಪ್ರದಾಸ್ಯಾಮಿ
ದಾಸಾಯ ಚೇತ್ಯರ್ಥಕಂ ತ್ವನ್ಮನೋನಿಷ್ಠಭಾವಂ ಜಗನ್ಮಂಗಲಂ ಸೂಚಯದ್ ವಾ
ವರಾಭೀತಿಮುದ್ರಾದ್ವಯಾ ವ್ಯಂಜಯಸ್ಯಂಗಪಾಣಿದ್ವಯೇನಾಂಬಿಕೇ . ಪದ್ಮಪತ್ರಾಂಬಕೇ .
ಚಾರುಗಂಭೀರಕಂದರ್ಪಕೇಲ್ಯರ್ಥನಾಭೀಸರಸ್ತೀರಸೌವರ್ಣ-
ಸೋಪಾನರೇಖಾಗತೋತ್ತುಂಗವಕ್ಷೋಜನಾಮಾಂಕಿತಸ್ವರ್ಣಶೈಲ-
ದ್ವಯಾರೋಹಣಾರ್ಥೇಂದ್ರನೀಲೋಪಲಾಬದ್ಧಸೂಕ್ಷ್ಮಾಧ್ವ-
ಸಂಭಾವನಾಯೋಗ್ಯಸದ್ರೋಮರಾಜ್ಯಾಢ್ಯದೇಹೇ ರಮೇ . ಕಾ ಗತಿಃ ಶ್ರೀರಮೇ .
ನಿಷ್ಕನಕ್ಷತ್ರಮಾಲಾಸದೃಕ್ಷಾಭನಕ್ಷತ್ರಮಾಲಾಪ್ರವಾಲಸ್ರಗೇಕಾವಲೀ-
ಮುಖ್ಯಭೂಷಾವಿಶೇಷಪ್ರಭಾಚಿತ್ರಿತಾಚ್ಛೋತ್ತರಾಸಂಗಸಂಛಿನ್ನವಕ್ಷೋರುಹೇ
. ಚಂಚಲಾಗೌರಿ ಹೇ .
ಕೇಲಿಕಾಲಕ್ವಣತ್ಕಿಂಕಿಣೀಶ್ರೇಣಿಕಾಯುಕ್ತಸೌವರ್ಣಕಾಂಚೀನಿಬದ್ಧ-
ಸ್ಫುರತ್ಸ್ಪಷ್ಟನೀವ್ಯಾಢ್ಯಶುಕ್ಲಾಂಬರೇ . ಭಾಸಿತಾಶಾಂಬರೇ .
ಪುಂಡರೀಕಾಕ್ಷವಕ್ಷಃಸ್ಥಲೀಚರ್ಚಿತಾನರ್ಘ್ಯಪಾಟೀರಪಂಕಾಂಕಿತಾನಂಗ-
ನಿಕ್ಷೇಪಕುಂಭಸ್ತನೇ . ಪ್ರಸ್ಫುರದ್ಗೋಸ್ತನೇ ..2..

ಗುರುನಿಬಿಡನಿತಂಬಬಿಂಬಾಕೃತಿದ್ರಾವಿತಾಶೀತರುಕ್ಸ್ಯಂದನಪ್ರೋತಚಂದ್ರಾವಲೇ-
ಪೋತ್ಕರೇ . ಸ್ವರ್ಣವಿದ್ಯುತ್ಕರೇ . ಭೋಃ ಪ್ರಯಚ್ಛಾಮಿ ತೇ ಚಿತ್ರರತ್ನೋರ್ಮಿಕಾಂ
ಮಾಮಿಕಾಂ ಸಾದರಾದೇಹ್ಯದೋ ಮಧ್ಯಮಂ ಭೂಷಯಾದ್ಯೈತಯಾ ದ್ರಷ್ಟುಮಿಚ್ಛಾಮ್ಯಹಂ
ಸಾಧ್ವಿತಿ ತ್ವತ್ಪತಿಪ್ರೇರಿತಾಯಾಂ ಮುದಾ ಪಾಣಿನಾದಾಯ ಧೃತ್ವಾ ರಹಃ
ಕೇಶವಂ ಲೀಲಯಾನಂದಯಃ ಸಪ್ತಕೀವಾಸ್ತಿ ತೇ . ಸಪ್ತಲೋಕೀಸ್ತುತೇ .
ಚಿತ್ರರೋಚಿರ್ಮಹಾಮೇಖಲಾಮಂಡಿತಾನಂತರತ್ನಸ್ಫುರತ್ತೋರಣಾಲಂಕೃತ-
ಶ್ಲಕ್ಷ್ಣಕಂದರ್ಪಕಾಂತಾರರಂಭಾತರುದ್ವಂದ್ವಸಂಭಾವನೀಯೋರುಯುಗ್ಮೇ ರಮೇ .
ಸಂಪದಂ ದೇಹಿ ಮೇ . ಪದ್ಮರಾಗೋಪಲಾದರ್ಶಬಿಂಬಪ್ರಭಾಚ್ಛಾಯಸುಸ್ನಿಗ್ಧಜಾನು
.... ದ್ವಯೇ ಶೋಭನೇ ಚಂದ್ರಬಿಂಬಾನನೇ .
ಶಂಬರಾರಾತಿಜೈತ್ರಪ್ರಯಾಣೋತ್ಸವಾರಂಭಜೃಂಭನ್ಮಹಾ-
ಕಾಹಲೀಡಂಬರಸ್ವರ್ಣತೂಣೀರಜಂಘೇ ಶುಭೇ . ಶಾರದಾರ್ಕಪ್ರಮೇ .
ಹಂಸರಾಜಕ್ವಣದ್ಧಂಸಬಿಂಬಸ್ಫುರದ್ಧಂಸಕಾಲಂಕೃತಸ್ಪಷ್ಟ-
ಲೇಖಾಂಕುಶಾಂಭೋಜಚಕ್ರಧ್ವಜ-ವ್ಯಂಜನಾಲಂಕೃತಶ್ರೀಪದೇ .
ತ್ವಾಂ ಭಜೇ ಸಂಪದೇ . ನಮ್ರವೃಂದಾರಿಕಾಶೇಖರೀಭೂತಸೌವರ್ಣ-
ಕೋಟೀರರತ್ನಾವಲೀದೀಪಿಕಾರಾಜಿನೀರಾಜಿತೋತ್ತುಂಗಗಾಂಗೇಯ-
ಸಿಂಹಾಸನಾಸ್ತೀರ್ಣಸೌವರ್ಣಬಿಂದ್ವಂಕಸೌರಭ್ಯಸಂಪನ್ನತಲ್ಪಸ್ಥಿತೇ .
ಸಂತತಸ್ವಃಸ್ಥಿತೇ . ಚೇಟಿಕಾದತ್ತಕರ್ಪೂರಖಂಡಾನ್ವಿತಶ್ವೇತವೀಟೀದರಾದಾನ-
ಲೀಲಾಚಲದ್ದೋರ್ಲತೇ . ದೈವತೈರರ್ಚಿತೇ . ರತ್ನತಾಟಂಕಕೇಯೂರಹಾರಾವಲೀ-
ಮುಖ್ಯಭೂಷಾಚ್ಛಟಾರಂಜಿತಾನೇಕದಾಸೀಸಭಾವೇಷ್ಟಿತೇ . ದೇವತಾಭಿಷ್ಟುತೇ .
ಪಾರ್ಶ್ವಯುಗ್ಮೋಲ್ಲಸಚ್ಚಾಮರಗ್ರಾಹಿಣೀಪಂಚಶಾಖಾಂಬುಜಾಧೂತ-
ಜೃಂಭದ್ರಣತ್ಕಂಕಣಾಭಿಷ್ಟುತಾಭೀಶುಸಚ್ಚಾಮರಾಭ್ಯಾಂ ಮುದಾ ಚೀಜ್ಯಸೇ .
ಕರ್ಮಠೈರಿಜ್ಯಸೇ . ಮಂಜುಮಂಜೀರಕಾಂಚ್ಯುರ್ಮಿಕಾಕಂಕಣಶ್ರೇಣಿ-
ಕೇಯೂರಹಾರಾವಲೀ- ಕುಂಡಲೀಮೌಲಿನಾಸಾಮಣಿದ್ಯೋತಿತೇ . ಭಕ್ತಸಂಜೀವಿತೇ ..3..

ಜಲಧರಗತಶೀತವಾತಾರ್ದಿತಾ ಚಾರುನೀರಂಧ್ರದೇವಾಲಯಾಂತರ್ಗತಾ ವಿದ್ಯುದೇಷಾ
ಹಿ ಕಿಂ ಭೂತಲೇಽಪಿ ಸ್ವಮಾಹಾಲ್ಯಸಂದರ್ಶನಾರ್ಥಂ ಕ್ಷಮಾಮಾಸ್ಥಿತಾ
ಕಲ್ಪವಲ್ಯೇವ ಕಿಂ ಘಸ್ರಮಾತ್ರೋಲ್ಲಸಂತಂ ರವಿಂ ರಾತ್ರಿಮಾತ್ರೋಲ್ಲಸಂತಂ ವಿಧುಂ
ಸಂವಿಧಾಯ ಸ್ವತೋ ವೇಘಸಾತುಷ್ಟಚಿತ್ತೇನ ಸೃಷ್ಟಾ ಸದಾಪ್ಯುಲ್ಲಸಂತೀ
ಮಹಾದಿವ್ಯತೇಜೋಮಯೀ ದಿವ್ಯಪಾಂಚಾಲಿಕಾ ವೇತಿ ಸದ್ಭಿಃ ಸದಾ ತವರ್ಯಸೇ . ತ್ವಾಂ
ಭಜೇ ಮೇ ಭವ ಶ್ರೇಯಸೇ . ಪೂರ್ವಕದ್ವಾರನಿಷ್ಠೇನ ನೃತ್ಯದ್ವರಾಕಾರರಂಭಾ-
ದಿವಾರಾಂಗನಾಶ್ರೇಣಿಗೀತಾಮೃತಾಕರ್ಣನಾಯತ್ತ-
ಚಿತ್ತಾಮರಾರಾಧಿತೇನೋಚ್ಚಕೈರ್ಭಾರ್ಗವೀಂದ್ರೇಣ ಸಂಭಾವಿತೇ . ನೋ ಸಮಾ
ದೇವತಾ ದೇವಿ ತೇ . ದಕ್ಷಿಣದ್ವಾರನಿಷ್ಠೇನ ಸಚ್ಚಿತ್ರಗುಪ್ತಾದಿಯುಕ್ತೇನ
ವೈವಸ್ವತೇನಾರ್ಚ್ಯಸೇ . ಯೋಗಿಭಿರ್ಭಾವ್ಯಸೇ . ಪಶ್ಚಿಮದ್ವಾರಭಾಜಾ ಭೃಶಂ
ಪಾಶಿನಾ ಸ್ವರ್ಣೇದೀ- ಮುಖ್ಯನದ್ಯನ್ವಿತೇನೇಡ್ಯಸೇ . ಸಾದರಂ ಪೂಜ್ಯಸೇ .
ಉತ್ತರದ್ವಾರನಿಷ್ಠೇನ ಯಕ್ಷೋತ್ತಮೈರ್ನಮ್ರಕೋಟೀರಜೂಟೈರ್ಮನೋಹಾರಿಭೀ
ರಾಜರಾಜೇನ ಭಕ್ತೇನ ಸಂಭಾವ್ಯಸೇ . ಯೋಗಿಭಿಃ ಪೂಜ್ಯಸೇ . ಲಕ್ಷ್ಮಿ
ಪದ್ಮಾಲಯೇ ಭಾರ್ಗವಿ ಶ್ರೀರಮೇ ಲೋಕಮಾತಃ ಸಮುದ್ರೇಶಕನ್ಯೇಽಚ್ಯುತಪ್ರೇಯಸಿ
..... ಸ್ವರ್ಣಶೋಭೇ ಚ ಮೇ ಚೇಂದಿರೇ ವಿಷ್ಣುವಕ್ಷಃ ಸ್ಥಿತೇ
ಪಾಹಿ ಪಾಹೀತಿ ಯಃ ಪ್ರಾತರುತ್ಥಾಯ ಭಕ್ತ್ಯಾ ಯುತೋ ನೌತಿ ಸೋಽಯಂ ನರಃ
ಸಂಪದಂ ಪ್ರಾಪ್ಯ ವಿದ್ಯೋತತೇ . ಭೂಷಣದ್ಯೋತಿತೇ . ದಿವ್ಯ
ಕಾರುಣ್ಯದೃಷ್ಟ್ಯಾಶು ಮಾಂ ಪಶ್ಯ ಮೇ ದಿವ್ಯಕಾರುಣ್ಯದೃಷ್ಟ್ಯಾಶು
ಮಾಂ ಪಶ್ಯ ಮೇ ದಿವ್ಯಕಾರುಣ್ಯದೃಷ್ಟ್ಯಾಶು ಮಾಂ ಪಶ್ಯ ಮೇ . ಮಾಂ ಕಿಮರ್ಥಂ
ಸದೋಪೇಕ್ಷಸೇ ನೇಕ್ಷಸೇ ತ್ವತ್ಪದಾಬ್ಜಂ ವಿನಾ ನಾಸ್ತಿ ಮೇಽನ್ಯಾ ಗತಿಃ ಸಂಪದಂ ದೇಹಿ
ಮೇ ಸಂಪದಂ ದೇಹಿ ಮೇ ಸಂಪದಂ ದೇಹಿ ಮೇ . ತ್ವತ್ಪದಾಬ್ಜಂ ಪ್ರಪನ್ನೋಽಸ್ಮ್ಯಹಂ
ಸರ್ವದಾ ತ್ವಂ ಪ್ರಸನ್ನಾ ಸತೀ ಪಾಹಿ ಮಾಂ ಪಾಹಿ ಮಾಂ ಪಾಹಿ ಮಾಂ ಪದ್ಮಹಸ್ತೇ
ತ್ರಿಲೋಕೇಶ್ವರಿಂ ಪ್ರಾರ್ಥಯೇ ತ್ವಾಮಹಂ ದೇವಿ ತುಭ್ಯಂ ನಮೋ ದೇವಿ ತುಭ್ಯಂ ನಮೋ
ದೇವಿ ತುಭ್ಯಂ ನಮಃ ..ಸತ್ರಿಷಷ್ಟ್ಯುತ್ತರಶತರಗಣಾಢ್ಯಶ್ಚತುರ್ದಲಃ .
ಮಹಾಲಕ್ಷ್ಮೀದಂಡಕೋಽಯಂ ಕೃತಃ ಕೇಶವಸೂರಿಣಾ ..

ಇತಿ ಕೇಶವಸೂರಿಕೃತಃ ಮಹಾಲಕ್ಷ್ಮೀದಂಡಕಃ ಸಂಪೂರ್ಣಃ .
ಸ್ತೋತ್ರಸಮುಚ್ಚಯಃ 2 (85)