ಶ್ರೀ ಗಾಯತ್ರೀ ಮಂಜರೀ

ಶ್ರೀ ಗಾಯತ್ರೀ ಮಂಜರೀ

ಏಕದಾ ತು ಮಹಾದೇವಂ ಕೈಲಾಶಗಿರಿಸಂಸ್ಥಿತಂ |
ಪಪ್ರಚ್ಛ ದೇವೀ ವಂದ್ಯಾ ವಿಬುಧಮಂಡಲೈಃ || 1||

ಕತಮಂ ಯೋಗಮಾಸೀನೋ ಯೋಗೇಶ ತ್ವಮುಪಾಸಸೇ |
ಯೇನ ಹಿ ಪರಮಾಂ ಸಿದ್ಧಿಂ ಪ್ರಾಪ್ನುವಾನ್ ಜಗದೀಶ್ವರ || 2||

ಶ್ರುತ್ವಾ ತು ಪಾರ್ವತೀ ವಾಚಂ ಮಧುಸಿಕ್ತಾಂ ಶ್ರುತಿಪ್ರಿಯಾಂ |
ಸಮುವಾಚ ಮಹಾದೇವೋ ವಿಶ್ವಕಲ್ಯಾಣಕಾರಕಃ || 3||

ಮಹದ್ರಹಸ್ಯಂ ತದ್ಗುಪ್ತಂ ಯತ್ತು ಪೃಷ್ಟಂ ತ್ವಯಾ ಪ್ರಿಯೇ |
ತಥಾಪಿ ಕಥಯಿಷ್ಯಾಮಿ ಸ್ನೇಹಾತ್ತತ್ತ್ವಾಮಹಂ ಸಮಂ || 4||

ಗಾಯತ್ರೀ ವೇದ ಮಾತಾಸ್ತಿ ಸಾದ್ಯಾ ಶಕ್ತಿರ್ಮತಾ ಭುವಿ |
ಜಗತಾಂ ಜನನೀ ಚೈವ ತಾಮುಪಾಸೇಽಹಮೇವ ಹಿ || 5||

ಯೌಗಿಕಾನಾಂ ಸಮಸ್ತಾನಾಂ ಸಾಧನಾನಾಂ ತು ಹೇ ಪ್ರಿಯೇ |
ಗಾಯತ್ರ್ಯೇವ ಮತಾ ಲೋಕೇ ಮೂಲಾಧಾರೋ ವಿದಾಂವರೈಃ || 6||

ಅತಿ ರಹಸ್ಯಮಯ್ಯೇಷಾ ಗಾಯತ್ರೀ ತು ದಶ ಭುಜಾ |
ಲೋಕೇಽತಿ ರಾಜತೇ ಪಂಚ ಧಾರಯಂತಿ ಮುಖಾನಿ ತು || 7||

ಅತಿ ಗೂಢಾನಿ ಸಂಶ್ರುತ್ಯ ವಚನಾನಿ ಶಿವಸ್ಯ ಚ |
ಅತಿ ಸಂವೃದ್ಧ ಜಿಜ್ಞಾಸಾ ಶಿವಮೂಚೇ ತು ಪಾರ್ವತೀ || 8||

ಪಂಚಾಸ್ಯ ದಶಬಾಹೂನಾಮೇತೇಷಾಂ ಪ್ರಾಣವಲ್ಲಭ |
ಕೃತ್ವಾ ಕೃಪಾಂ ಕೃಪಾಲೋ ತ್ವಂ ಕಿಂ ರಹಸ್ಯಂ ತು ಮೇ ವದ || 9||

ಶ್ರುತ್ವಾ ತ್ವೇತನ್ಮಹಾದೇವಃ ಪಾರ್ವತೀವಚನಂ ಮೃದು |
ತಸ್ಯಾಃ ಶಂಕಾಮಪಾಕುರ್ವನ್ ಪ್ರತ್ಯುವಾಚ ನಿಜಾಂ ಪ್ರಿಯಾಂ || 10||

ಗಾಯತ್ರ್ಯಾಸ್ತು ಮಹಾಶಕ್ತಿರ್ವಿದ್ಯತೇ ಯಾ ಹಿ ಭೂತಲೇ |
ಅನನ್ಯ ಭಾವತೋ ಹ್ಯಸ್ಮಿನ್ನೋತಪ್ರೋತೋಽಸ್ತಿ ಚಾತ್ಮನಿ || 11||

ಬಿಭರ್ತಿ ಪಂಚಾವರಣಾನ್ ಜೀವಃ ಕೋಶಾಸ್ತು ತೇ ಮತಾಃ |
ಮುಖಾನಿ ಪಂಚ ಗಾಯತ್ರ್ಯಾಸ್ತಾನೇವ ವೇದ ಪಾರ್ವತಿ || 12||

ವಿಜ್ಞಾನಮಯಾನ್ನಮಯ-ಪ್ರಾಣಮಯ-ಮನೋಮಯಾಃ |
ತಥಾನಂದಮಯಶ್ಚೈವ ಪಂಚ ಕೋಶಾಃ ಪ್ರಕೀರ್ತಿತಾಃ || 13||

ಏಷ್ವೇವ ಕೋಶಕೋಶೇಷು ಹ್ಯನಂತಾ ಋದ್ಧಿ ಸಿದ್ಧಯಃ |
ಗುಪ್ತಾ ಆಸಾದ್ಯ ಯಾ ಜೀವೋ ಧನ್ಯತ್ವಮಧಿಗಚ್ಛತಿ || 14||

ಯಸ್ತು ಯೋಗೀಶ್ವರೋ ಹ್ಯೇತಾನ್ ಪಂಚ ಕೋಶಾನ್ನು ವೇಧತೇ |
ಸ ಭವಸಾಗರಂ ತೀರ್ತ್ವಾ ಬಂಧನೇಭ್ಯೋ ವಿಮುಚ್ಯತೇ || 15||

ಗುಪ್ತಂ ರಹಸ್ಯಮೇತೇಷಾಂ ಕೋಷಾಣಾಂ ಯೋಽವಗಚ್ಛತಿ |
ಪರಮಾಂ ಗತಿಮಾಪ್ನೋತಿ ಸ ಏವ ನಾತ್ರ ಸಂಶಯಃ || 16||

ಲೋಕಾನಾಂ ತು ಶರೀರಾಣಿ ಹ್ಯನ್ನಾದೇವ ಭವಂತಿ ನು |
ಉಪತ್ಯಕಾಸು ಸ್ವಾಸ್ಥ್ಯಂ ಚ ನಿರ್ಭರಂ ವರ್ತತೇ ಸದಾ || 17||

ಆಸನೇನೋಪವಾಸೇನ ತತ್ತ್ವ ಶುದ್ಧ್ಯಾ ತಪಸ್ಯಯಾ |
ಚೈವಾನ್ನಮಯಕೋಶಸ್ಯ ಸಂಶುದ್ಧಿರಭಿಜಾಯತೇ || 18||

ಐಶ್ವರ್ಯಂ ಪುರುಷಾರ್ಥಶ್ಚ ತೇಜ ಓಜೋ ಯಶಸ್ತಥಾ |
ಪ್ರಾಣಶಕ್ತ್ಯಾ ತು ವರ್ಧಂತೇ ಲೋಕಾನಾಮಿತ್ಯಸಂಶಯಂ || 19||

ಪಂಚಭಿಸ್ತು ಮಹಾಪ್ರಾಣೈರ್ಲಘುಪ್ರಾಣೈಶ್ಚ ಪಂಚಭಿಃ |
ಏತೈಃ ಪ್ರಾಣಮಯಃ ಕೋಶೋ ಜಾತೋ ದಶಭಿರುತ್ತಮಃ || 20||

ಬಂಧೇನ ಮುದ್ರಯಾ ಚೈವ ಪ್ರಾಣಾಯಾಮೇನ ಚೈವ ಹಿ |
ಏಷ ಪ್ರಾಣಮಯಃ ಕೋಶೋ ಯತಮಾನಂ ತು ಸಿದ್ಧ್ಯತಿ || 21||

ಚೇತನಾಯಾ ಹಿ ಕೇಂದ್ರಂತು ಮನುಷ್ಯಾಣಾಂ ಮನೋಮತಂ |
ಜಾಯತೇ ಮಹತೀತ್ವಂತಃ ಶಕ್ತಿಸ್ತಸ್ಮಿನ್ ವಶಂಗತೇ || 22||

ಧ್ಯಾನ-ತ್ರಾಟಕ-ತನ್ಮಾತ್ರಾ ಜಪಾನಾಂ ಸಾಧನೈರ್ನನು |
ಭವತ್ಯುಜ್ಜ್ವಲಃ ಕೋಶಃ ಪಾರ್ವತ್ಯೇಷ ಮನೋಮಯಃ || 23||

ಯಥಾವತ್ ಪೂರ್ಣತೋ ಜ್ಞಾನಂ ಸಂಸಾರಸ್ಯ ಚ ಸ್ವಸ್ಯ ಚ |
ನೂನಮಿತ್ಯೇವ ವಿಜ್ಞಾನಂ ಪ್ರೋಕ್ತಂ ವಿಜ್ಞಾನವೇತ್ತೃಭಿಃ || 24||

ಸಾಧನಾ ಸೋಽಹಮಿತ್ಯೇಷಾ ತಥಾ ವಾತ್ಮಾನುಭೂತಯಃ |
ಸ್ವರಾಣಾಂ ಸಂಯಮಶ್ಚೈವ ಗ್ರಂಥಿಭೇದಸ್ತಥೈವ ಚ || 25||

ಏಷಾಂ ಸಂಸಿದ್ಧಿಭಿರ್ನೂನಂ ಯತಮಾನಸ್ಯ ಹ್ಯಾತ್ಮನಿ |
ನು ವಿಜ್ಞಾನಮಯಃ ಕೋಶಃ ಪ್ರಿಯೇ ಯಾತಿ ಪ್ರಬುದ್ಧತಾಂ || 26||

ಆನಂದಾವರಣೋನ್ನತ್ಯಾತ್ಯಂತಶಾಂತಿ-ಪ್ರದಾಯಿಕಾ |
ತುರೀಯಾವಸ್ಥಿತಿರ್ಲೋಕೇ ಸಾಧಕಂ ತ್ವಧಿಗಚ್ಛತಿ || 27||

ನಾದ ಬಿಂದು ಕಲಾನಾಂ ತು ಪೂರ್ಣ ಸಾಧನಯಾ ಖಲು |
ನನ್ವಾನಂದಮಯಃ ಕೋಶಃ ಸಾಧಕೇ ಹಿ ಪ್ರಬುದ್ಧ್ಯತೇ || 28||

ಭೂಲೋಕಸ್ಯಾಸ್ಯ ಗಾಯತ್ರೀ ಕಾಮಧೇನುರ್ಮತಾ ಬುಧೈಃ |
ಲೋಕ ಆಶ್ರಯಣೇನಾಮೂಂ ಸರ್ವಮೇವಾಧಿಗಚ್ಛತಿ || 29||

ಪಂಚಾಸ್ಯಾ ಯಾಸ್ತು ಗಾಯತ್ರ್ಯಾಃ ವಿದ್ಯಾಂ ಯಸ್ತ್ವವಗಚ್ಛತಿ |
ಪಂಚತತ್ತ್ವ ಪ್ರಪಂಚಾತ್ತು ಸ ನೂನಂ ಹಿ ಪ್ರಮುಚ್ಯತೇ || 30||

ದಶಭುಜಾಸ್ತು ಗಾಯತ್ರ್ಯಾಃ ಪ್ರಸಿದ್ಧಾ ಭುವನೇಷು ಯಾಃ |
ಪಂಚ ಶೂಲ ಮಹಾಶೂಲಾನ್ಯೇತಾಃ ಸಂಕೇತಯಂತಿ ಹಿ || 31||

ದಶಭುಜಾನ್ನಾಮೇತಾಸಾಂ ಯೋ ರಹಸ್ಯಂ ತು ವೇತ್ತಿ ಯಂ ಸಃ |
ತ್ರಾಸಂ ಶೂಲಮಹಾಶೂಲಾನಾಂ ನಾ ನೈವಾವಗಚ್ಛತಿ || 32||

ದೃಷ್ಟಿಸ್ತು ದೋಷಸಂಯುಕ್ತಾ ಪರೇಷಾಮವಲಂಬನಂ |
ಭಯಂ ಚ ಕ್ಷುದ್ರತಾಽಸಾವಧಾನತಾ ಸ್ವಾರ್ಥಯುಕ್ತತಾ || 33||

ಅವಿವೇಕಸ್ತಥಾವೇಶಸ್ತೃಷ್ಣಾಲಸ್ಯಂ ತಥೈವ ಚ
ಏತಾನಿ ದಶ ಶೂಲಾನಿ ಶೂಲದಾನಿ ಭವಂತಿ ಹಿ || 34||

ನಿಜೈರ್ದಶಭುಜೈರ್ನೂನಂ  ಶೂಲಾನ್ಯೇತಾನಿ ತು ದಶ |
ಸಂಹರತೇ ಹಿ ಗಾಯತ್ರೀ ಲೋಕಕಲ್ಯಾಣಕಾರಿಣೀ || 35||

ಕಲೌ ಯುಗೇ ಮನುಷ್ಯಾಣಾಂ ಶರೀರಾಣೀತಿ ಪಾರ್ವತಿ |
ಪೃಥ್ವೀ ತತ್ತ್ವ ಪ್ರಧಾನಾನಿ ಜಾನಾಸ್ಯೇವ ಭವಂತಿ ಹಿ || 36||

ಸೂಕ್ಷ್ಮತತ್ತ್ವ ಪ್ರಧಾನಾನ್ಯಯುಗೋದ್ಭೂತ ನೃಣಾಮತಃ |
ಸಿದ್ಧೀನಾಂ ತಪಸಾಮೇತೇ ನ ಭವಂತ್ಯಧಿಕಾರಿಣಃ || 37||

ಪಂಚಾಂಗ ಯೋಗ ಸಂಸಿದ್ಧ್ಯಾ ಗಾಯತ್ರ್ಯಾಸ್ತು ತಥಾಪಿ ತೇ |
ತದ್ಯುಗಾನಾಂ ಸರ್ವಶ್ರೇಷ್ಠಾಂ ಸಿದ್ಧಿಂ ಸಂಪ್ರಾಪ್ನುವಂತಿ ಹಿ || 38||

ಗಾಯತ್ರ್ಯಾ ವಾಮಮಾರ್ಗೀಯಂ ಜ್ಞೇಯಮತ್ಯುಚ್ಚಸಾಧಕೈಃ |
ಉಗ್ರಂ ಪ್ರಚಂಡಮತ್ಯಂತಂ ವರ್ತತೇ ತಂತ್ರ ಸಾಧನಂ || 39||

ಅತ ಏವ ತು ತದ್ಗುಪ್ತಂ ರಕ್ಷಿತಂ ಹಿ ವಿಚಕ್ಷಣೈಃ |
ಸ್ಯಾದ್ಯತೋ ದುರುಪಯೋಗೋ ನ ಕುಪಾತ್ರೈಃ ಕಥಂಚನ || 40||

ಗುರುಣೈವ ಪ್ರಿಯೇ ವಿದ್ಯಾ ತತ್ತ್ವಂ ಹೃದಿ ಪ್ರಕಾಶ್ಯತೇ |
ಗುರುಂ ವಿನಾ ತು ಸಾ ವಿದ್ಯಾ ಸರ್ವಥಾ ನಿಷ್ಫಲಾ ಭವೇತ್ || 41||

ಗಾಯತ್ರೀ ತು ಪರಾವಿದ್ಯಾ ತತ್ಫಲಾವಾಪ್ತಯೇ ಗುರುಃ |
ಸಾಧಕೇನ ವಿಧಾತವ್ಯೋ ಗಾಯತ್ರೀ-ತತ್ತ್ವ ಪಂಡಿತಃ || 42||

ಗಾಯತ್ರೀಂ ಯೋ ವಿಜಾನಾತಿ ಸರ್ವಂ ಜಾನಾತಿ ಸ ನನು |
ಜಾನಾತೀಮಾಂ ನ ಯಸ್ತಸ್ಯ ಸರ್ವಾ ವಿದ್ಯಾಸ್ತು ನಿಷ್ಫಲಾಃ || 43||

ಗಾಯತ್ರ್ಯೇವತಪೋ ಯೋಗಃ ಸಾಧನಂ ಧ್ಯಾನಮುಚ್ಯತೇ |
ಸಿದ್ಧೀನಾಂ ಸಾ ಮತಾ ಮಾತಾ ನಾತಃ ಕಿಂಚಿತ್ ಬೃಹತ್ತರಂ || 44||

ಗಾಯತ್ರೀ ಸಾಧನಾ ಲೋಕೇ ನ ಕಸ್ಯಾಪಿ ಕದಾಪಿ ಹಿ |
ಯಾತಿ ನಿಷ್ಫಲತಾಮೇತತ್ ಧ್ರುವಂ ಸತ್ಯಂ ಹಿ ಭೂತಲೇ || 45||

ಗುಪ್ತಮುಕ್ತಂ ರಹಸ್ಯಂ ಯತ್ ಪಾರ್ವತಿ ತ್ವಾಂ ಪತಿವ್ರತಾಂ |
ಪ್ರಾಪ್ಸ್ಯಂತಿ ಪರಮಾಂ ಸಿದ್ಧಿಂ ಜ್ಞಾಸ್ಯಂತ್ಯೇತತ್ ತು ಯೇ ಜನಾಃ || 46||

|| ಇತಿ ಶ್ರೀ ಗಾಯತ್ರೀ ಮಂಜರೀ  ಸಂಪೂರ್ಣಂ ||