ಶ್ರೀ ಗಾಯತ್ರೀ ಕವಚಂ

ಶ್ರೀ ಗಾಯತ್ರೀ ಕವಚಂ

ಶ್ರೀಗಣೇಶಾಯ ನಮಃ |
ಯಾಜ್ಞವಲ್ಕ್ಯ ಉವಾಚ |
ಸ್ವಾಮಿನ್ ಸರ್ವಜಗನ್ನಾಥ ಸಂಶಯೋಽಸ್ತಿ ಮಹಾನ್ಮಮ |
ಚತುಃಷಷ್ಠಿಕಲಾನಂ ಚ ಪಾತಕಾನಾಂ ಚ ತದ್ವದ || 1||

ಮುಚ್ಯತೇ ಕೇನ ಪುಣ್ಯೇನ ಬ್ರಹ್ಮರೂಪಂ ಕಥಂ ಭವೇತ್ |
ದೇಹಂ ಚ ದೇವತಾರೂಪಂ ಮಂತ್ರರೂಪಂ ವಿಶೇಷತಃ || 2||

ಕ್ರಮತಃ ಶ್ರೋತುಮಿಚ್ಛಾಮಿ ಕವಚಂ ವಿಧಿಪೂರ್ವಕಂ |
ಬ್ರಹ್ಮೋವಾಚ |
ಗಾಯತ್ರ್ಯಾಃ ಕವಚಸ್ಯಾಸ್ಯ ಬ್ರಹ್ಮಾ ವಿಷ್ಣುಃ ಶಿವೋ ಋಷಿಃ || 3||

ಋಗ್ಯಜುಃಸಾಮಾಥರ್ವಾಣಿ ಛಂದಾಂಸಿ ಪರಿಕೀರ್ತಿತಾಃ |
ಪರಬ್ರಹ್ಮಸ್ವರೂಪಾ ಸಾ ಗಾಯತ್ರೀ ದೇವತಾ ಸ್ಮೃತಾ || 4||

ರಕ್ಷಾಹೀನಂ ತು ಯತ್ಸ್ಥಾನಂ ಕವಚೇನ ವಿನಾ ಕೃತಂ |
ಸರ್ವಂ ಸರ್ವತ್ರ ಸಂರಕ್ಷೇತ್ಸರ್ವಾಂಗಂ ಭುವನೇಶ್ವರೀ || 5||

ಬೀಜಂ ಭರ್ಗಶ್ಚ ಯುಕ್ತಿಶ್ಚ ಧಿಯಃ ಕೀಲಕಮೇವ ಚ |
ಪುರುಷಾರ್ಥವಿನಿಯೋಗೋ ಯೋ ನಶ್ಚ ಪರಿಕೀರ್ತ್ತಿತಃ || 6||

ಋಷಿಂ ಮೂರ್ಧ್ನಿ ನ್ಯಸೇತ್ಪೂರ್ವಂ ಮುಖೇ ಛಂದ ಉದೀರಿತಂ |
ದೇವತಾಂ ಹೃದಿ ವಿನ್ಯಸ್ಯ ಗುಹ್ಯೇ ಬೀಜಂ ನಿಯೋಜಯೇತ್ || 7||

ಶಕ್ತಿಂ ವಿನ್ಯಸ್ಯ ಪದಯೋರ್ನಾಭೌ ತು ಕೀಲಕಂ ನ್ಯಸೇತ್ |
ದ್ವಾತ್ರಿಂಶತ್ತು ಮಹಾವಿದ್ಯಾಃ ಸಾಂಖ್ಯಾಯನಸಗೋತ್ರಜಾಃ || 8||

ದ್ವಾದಶಲಕ್ಷಸಂಯುಕ್ತಾ ವಿನಿಯೋಗಾಃ ಪೃಥಕ್ಪೃಥಕ್ |
ಏವಂ ನ್ಯಾಸವಿಧಿಂ ಕೃತ್ವಾ ಕರಾಂಗಂ ವಿಧಿಪೂರ್ವಕಂ || 9||

ವ್ಯಾಹೃತಿತ್ರಯಮುಚ್ಚಾರ್ಯ ಹ್ಯನುಲೋಮವಿಲೋಮತಃ |
ಚತುರಕ್ಷರಸಂಯುಕ್ತಂ ಕರಾಂಗನ್ಯಾಸಮಾಚರೇತ್ || 10||

ಆವಾಹನಾದಿಭೇದಂ ಚ ದಶ ಮುದ್ರಾಃ ಪ್ರದರ್ಶಯೇತ್ |
ಸಾ ಪಾತು ವರದಾ ದೇವೀ ಅಂಗಪ್ರತ್ಯಂಗಸಂಗಮೇ || 11||

ಧ್ಯಾನಂ ಮುದ್ರಾಂ ನಮಸ್ಕಾರಂ ಗುರುಮಂತ್ರಂ ತಥೈವ ಚ |
ಸಂಯೋಗಮಾತ್ಮಸಿದ್ಧಿಂ ಚ ಷಡ್ವಿಧಂ ಕಿಂ ವಿಚಾರಯೇತ್ || 12||

ಅಸ್ಯ ಶ್ರೀಗಾಯತ್ರೀಕವಚಸ್ಯ ಬ್ರಹ್ಮವಿಷ್ಣುರುದ್ರಾ ಋಷಯಃ,
ಋಗ್ಯಜುಃಸಾಮಾಥರ್ವಾಣಿ ಛಂದಾಂಸಿ, ಪರಬ್ರಹ್ಮಸ್ವರೂಪಿಣೀ
ಗಾಯತ್ರೀ ದೇವತಾ, ಭೂರ್ಬೀಜಂ, ಭುವಃ ಶಕ್ತಿಃ, ಸ್ವಾಹಾ ಕೀಲಕಂ,
ಶ್ರೀಗಾಯತ್ರೀಪ್ರೀತ್ಯರ್ಥೇ ಜಪೇ ವಿನಿಯೋಗಃ ||

ಓಂ ಭೂರ್ಭುವಃ ಸ್ವಃ ತತ್ಸವಿತುರಿತಿ ಹೃದಯಾಯ ನಮಃ |
ಓಂ ಭೂರ್ಭುವಃ ಸ್ವಃ ವರೇಣ್ಯಮಿತಿ ಶಿರಸೇ ಸ್ವಾಹಾ |
ಓಂ ಭೂರ್ಭುವಃ ಸ್ವಃ ಭರ್ಗೋ ದೇವಸ್ಯೇತಿ ಶಿಖಾಯೈ ವಷಟ್ |
ಓಂ ಭೂರ್ಭುವಃ ಸ್ವಃ ಧೀಮಹೀತಿ ಕವಚಾಯ ಹುಂ |
ಓಂ ಭೂರ್ಭುವಃ ಸ್ವಃ ಧಿಯೋ ಯೋ ನಃ ಇತಿ ನೇತ್ರತ್ರಯಾಯ ವೌಷಟ್ |
ಓಂ ಭೂರ್ಭುವಃ ಸ್ವಃ ಪ್ರಚೋದಯಾದಿತಿ ಅಸ್ತ್ರಾಯ ಫಟ್ ||

ವರ್ಣಾಸ್ತ್ರಾಂ ಕುಂಡಿಕಾಹಸ್ತಾಂ ಶುದ್ಧನಿರ್ಮಲಜ್ಯೋತಿಷೀಮ್ಮ್ |
ಸರ್ವತತ್ತ್ವಮಯೀಂ ವಂದೇ ಗಾಯತ್ರೀಂ ವೇದಮಾತರಂ || 13||

ಅಥ ಧ್ಯಾನಂ |
ಮುಕ್ತಾ ವಿದ್ರುಮಹೇಮನೀಲಧವಲಚ್ಛಾಯೈರ್ಮುಖೈಸ್ತ್ರೀಕ್ಷಣೈ-
    ರ್ಯುಕ್ತಾಮಿಂದುನಿಬದ್ಧರತ್ನಮುಕುಟಾಂ ತತ್ತ್ವಾರ್ಥವರ್ಣಾತ್ಮಿಕಾಂ |
ಗಾಯತ್ರೀಂ ವರದಾಭಯಾಂಕುಶಕಶಾಂ ಶೂಲಂ ಕಪಾಲಂ ಗುಣಂ
    ಶಂಖಂ ಚಕ್ರಮಥಾರವಿಂದಯುಗಲಂ ಹಸ್ತೈರ್ವಹಂತೀಂ ಭಜೇ || 14||

ಓಂ ಗಾಯತ್ರೀ ಪೂರ್ವತಃ ಪಾತು ಸಾವಿತ್ರೀ ಪಾತು ದಕ್ಷಿಣೇ |
ಬ್ರಹ್ಮವಿದ್ಯಾ ಚ ಮೇ ಪಶ್ಚಾದುತ್ತರೇ ಮಾಂ ಸರಸ್ವತೀ || 15||

ಪಾವಕೀ ಮೇ ದಿಶಂ ರಕ್ಷೇತ್ಪಾವಕೋಜ್ಜ್ವಲಶಾಲಿನೀ |
ಯಾತುಧಾನೀಂ ದಿಶಂ ರಕ್ಷೇದ್ಯಾತುಧಾನಗಣಾರ್ದಿನೀ || 16||

ಪಾವಮಾನೀಂ ದಿಶಂ ರಕ್ಷೇತ್ಪವಮಾನವಿಲಾಸಿನೀ |
ದಿಶಂ ರೌದ್ರೀಮವತು ಮೇ ರುದ್ರಾಣೀ ರುದ್ರರೂಪಿಣೀ || 17||

ಊರ್ಧ್ವಂ ಬ್ರಹ್ಮಾಣೀ ಮೇ ರಕ್ಷೇದಧಸ್ತಾದ್ವೈಷ್ಣವೀ ತಥಾ |
ಏವಂ ದಶ ದಿಶೋ ರಕ್ಷೇತ್ ಸರ್ವತೋ ಭುವನೇಶ್ವರೀ || 18||

ಬ್ರಹ್ಮಾಸ್ತ್ರಸ್ಮರಣಾದೇವ ವಾಚಾಂ ಸಿದ್ಧಿಃ ಪ್ರಜಾಯತೇ |
ಬ್ರಹ್ಮದಂಡಶ್ಚ ಮೇ ಪಾತು ಸರ್ವಶಸ್ತ್ರಾಸ್ತ್ರಭಕ್ಷಕ್ರಃ || 19||

ಬ್ರಹ್ಮಶೀರ್ಷಸ್ತಥಾ ಪಾತು ಶತ್ರೂಣಾಂ ವಧಕಾರಕಃ |
ಸಪ್ತ ವ್ಯಾಹೃತಯಃ ಪಾಂತು ಸರ್ವದಾ ಬಿಂದುಸಂಯುತಾಃ || 20||

ವೇದಮಾತಾ ಚ ಮಾಂ ಪಾತು ಸರಹಸ್ಯಾ ಸದೈವತಾ |
ದೇವೀಸೂಕ್ತಂ ಸದಾ ಪಾತು ಸಹಸ್ರಾಕ್ಷರದೇವತಾ || 21||

ಚತುಃಷಷ್ಟಿಕಲಾ ವಿದ್ಯಾ ದಿವ್ಯಾದ್ಯಾ ಪಾತು ದೇವತಾ |
ಬೀಜಶಕ್ತಿಶ್ಚ ಮೇ ಪಾತು ಪಾತು ವಿಕ್ರಮದೇವತಾ || 22||

ತತ್ಪದಂ ಪಾತು ಮೇ ಪಾದೌ ಜಂಘೇ ಮೇ ಸವಿತುಃಪದಂ |
ವರೇಣ್ಯಂ ಕಟಿದೇಶಂ ತು ನಾಭಿಂ ಭರ್ಗಸ್ತಥೈವ ಚ || 53||

ದೇವಸ್ಯ ಮೇ ತು ಹೃದಯಂ ಧೀಮಹೀತಿ ಗಲಂ ತಥಾ |
ಧಿಯೋ ಮೇ ಪಾತು ಜಿಹ್ವಾಯಾಂ ಯಃಪದಂ ಪಾತು ಲೋಚನೇ || 24||

ಲಲಾಟೇ ನಃ ಪದಂ ಪಾತು ಮೂರ್ಧಾನಂ ಮೇ ಪ್ರಚೋದಯಾತ್ |
ತದ್ವರ್ಣಃ ಪಾತು ಮೂರ್ಧಾನಂ ಸಕಾರಃ ಪಾತು ಭಾಲಕಂ || 25||

ಚಕ್ಷುಷೀ ಮೇ ವಿಕಾರಸ್ತು ಶ್ರೋತ್ರಂ ರಕ್ಷೇತ್ತು ಕಾರಕಃ |
ನಾಸಾಪುಟೇರ್ವಕಾರೋ ಮೇ ರೇಕಾರಸ್ತು ಕಪೋಲಯೋಃ || 26||

ಣಿಕಾರಸ್ತ್ವಧರೋಷ್ಠೇ ಚ ಯಕಾರಸ್ತೂರ್ಧ್ವ ಓಷ್ಠಕೇ |
ಆತ್ಯಮಧ್ಯೇ ಭಕಾರಸ್ತು ಗೋಕಾರಸ್ತು ಕಪೋಲಯೋಃ || 27||

ದೇಕಾರಃ ಕಂಠದೇಶೇ ಚ ವಕಾರಃ ಸ್ಕಂಧದೇಶಯೋಃ |
ಸ್ಯಕಾರೋ ದಕ್ಷಿಣಂ ಹಸ್ತಂ ಧೀಕಾರೋ ವಾಮಹಸ್ತಕಂ || 28||

ಮಕಾರೋ ಹೃದಯಂ ರಕ್ಷೇದ್ಧಿಕಾರೋ ಜಠರಂ ತಥಾ |
ಧಿಕಾರೋ ನಾಭಿದೇಶಂ ತು ಯೋಕಾರಸ್ತು ಕಟಿದ್ವಯಂ || 29||

ಗುಹ್ಯಂ ರಕ್ಷತು ಯೋಕಾರ ಊರೂ ಮೇ ನಃ ಪದಾಕ್ಷರಂ |
ಪ್ರಕಾರೋ ಜಾನುನೀ ರಕ್ಷೇಚ್ಚೋಕಾರೋ ಜಂಘದೇಶಯೋಃ || 30||

ದಕಾರೋ ಗುಲ್ಫದೇಶಂ ತು ಯಾತ್ಕಾರಃ ಪಾದಯುಗ್ಮಕಂ |
ಜಾತವೇದೇತಿ ಗಾಯತ್ರೀ ತ್ರ್ಯಂಬಕೇತಿ ದಶಾಕ್ಷರಾ || 31||

ಸರ್ವತಃ ಸರ್ವದಾ ಪಾತು ಆಪೋಜ್ಯೋತೀತಿ ಷೋಡಶೀ |
ಇದಂ ತು ಕವಚಂ ದಿವ್ಯಂ ಬಾಧಾಶತವಿನಾಶಕಂ || 32||

ಚತುಃಷಷ್ಠಿಕಲಾವಿದ್ಯಾಸಕಲೈಶ್ವರ್ಯಸಿದ್ಧಿದಂ |
ಜಪಾರಂಭೇ ಚ ಹೃದಯಂ ಜಪಾಂತೇ ಕವಚಂ ಪಠೇತ್ || 33||

ಸ್ತ್ರೀಗೋಬ್ರಾಹ್ಮಣಮಿತ್ರಾದಿದ್ರೋಹಾದ್ಯಖಿಲಪಾತಕೈಃ |
ಮುಚ್ಯತೇ ಸರ್ವಪಾಪೇಭ್ಯಃ ಪರಂ ಬ್ರಹ್ಮಾಧಿಗಚ್ಛತಿ || 34||

ಪುಷ್ಪಾಂಜಲಿಂ ಚ ಗಾಯತ್ರ್ಯಾ ಮೂಲೇನೈವ ಪಠೇತ್ಸಕೃತ್ |
ಶತಸಾಹಸ್ರವರ್ಷಾಣಾಂ ಪೂಜಾಯಾಃ ಫಲಮಾಪ್ನುಯಾತ್ || 35||

ಭೂರ್ಜಪತ್ರೇ ಲಿಖಿತ್ವೈತತ್ ಸ್ವಕಂಠೇ ಧಾರಯೇದ್ಯದಿ |
ಶಿಖಾಯಾಂ ದಕ್ಷಿಣೇ ಬಾಹೌ ಕಂಠೇ ವಾ ಧಾರಯೇದ್ಬುಧಃ || 36||

ತ್ರೈಲೋಕ್ಯಂ ಕ್ಷೋಭಯೇತ್ಸರ್ವಂ ತ್ರೈಲೋಕ್ಯಂ ದಹತಿ ಕ್ಷಣಾತ್ |
ಪುತ್ರವಾನ್ ಧನವಾನ್ ಶ್ರೀಮಾನ್ನಾನಾವಿದ್ಯಾನಿಧಿರ್ಭವೇತ್ || 37||

ಬ್ರಹ್ಮಾಸ್ತ್ರಾದೀನಿ ಸರ್ವಾಣಿ ತದಂಗಸ್ಪರ್ಶನಾತ್ತತಃ |
ಭವಂತಿ ತಸ್ಯ ತುಚ್ಛನಿ ಕಿಮನ್ಯತ್ಕಥಯಾಮಿ ತೇ || 38||

ಅಭಿಮಂತ್ರಿತಗಾಯತ್ರೀಕವಚಂ ಮಾನಸಂ ಪಠೇತ್ |
ತಜ್ಜಲಂ ಪಿಬತೋ ನಿತ್ಯಂ ಪುರಶ್ಚರ್ಯಾಫಲಂ ಭವೇತ್ || 39||

ಲಘುಸಾಮಾನ್ಯಕಂ ಮಂತ್ರಂ, ಮಹಾಮಂತ್ರಂ ತಥೈವ ಚ |
ಯೋ ವೇತ್ತಿ ಧಾರಣಾಂ ಯುಂಜನ್, ಜೀವನ್ಮುಕ್ತಃ ಸ ಉಚ್ಯತೇ || 40||

ಸಪ್ತಾವ್ಯಾಹೃತಿವಿಪ್ರೇಂದ್ರ ಸಪ್ತಾವಸ್ಥಾಃ ಪ್ರಕೀರ್ತಿತಾಃ |
ಸಪ್ತಜೀವಶತಾ ನಿತ್ಯಂ ವ್ಯಾಹೃತೀ ಅಗ್ನಿರೂಪಿಣೀ || 41||

ಪ್ರಣವೇ ನಿತ್ಯಯುಕ್ತಸ್ಯ ವ್ಯಾಹೃತೀಷು ಚ ಸಪ್ತಸು |
ಸರ್ವೇಷಾಮೇವ ಪಾಪಾನಾಂ ಸಂಕರೇ ಸಮುಪಸ್ಥಿತೇ || 42||

ಶತಂ ಸಹಸ್ರಮಭ್ಯರ್ಚ್ಯ ಗಾಯತ್ರೀ ಪಾವನಂ ಮಹತ್ |
ದಶಶತಮಷ್ಟೋತ್ತರಶತಂ  ಗಾಯತ್ರೀ ಪಾವನಂ ಮಹತ್ || 43||

ಭಕ್ತಿಯುಕ್ತೋ ಭವೇದ್ವಿಪ್ರಃ ಸಂಧ್ಯಾಕರ್ಮ ಸಮಾಚರೇತ್ |
ಕಾಲೇ ಕಾಲೇ ಪ್ರಕರ್ತವ್ಯಂ ಸಿದ್ಧಿರ್ಭವತಿ ನಾನ್ಯಥಾ || 44||

ಪ್ರಣವಂ ಪೂರ್ವಮುದ್ಧೃತ್ಯ ಭೂರ್ಭುವಸ್ವಸ್ತಥೈವ ಚ |
ತುರ್ಯಂ ಸಹೈವ ಗಾಯತ್ರೀಜಪ ಏವಮುದಾಹೃತಂ || 45||

ತುರೀಯಪಾದಮುತ್ಸೃಜ್ಯ ಗಾಯತ್ರೀಂ ಚ ಜಪೇದ್ದ್ವಿಜಃ |
ಸ ಮೂಢೋ ನರಕಂ ಯಾತಿ ಕಾಲಸೂತ್ರಮಧೋಗತಿಃ || 46||

ಮಂತ್ರಾದೌ ಜನನಂ ಪ್ರೋಕ್ತಂ ಮತ್ರಾಂತೇ ಮೃತಸೂತ್ರಕಂ |
ಉಭಯೋರ್ದೋಷನಿರ್ಮುಕ್ತಂ ಗಾಯತ್ರೀ ಸಫಲಾ ಭವೇತ್ || 47||

ಮತ್ರಾದೌ ಪಾಶಬೀಜಂ ಚ ಮಂತ್ರಾಂತೇ ಕುಶಬೀಜಕಂ |
ಮಂತ್ರಮಧ್ಯೇ ತು ಯಾ ಮಾಯಾ ಗಾಯತ್ರೀ ಸಫಲಾ ಭವೇತ್ || 48||

ವಾಚಿಕಸ್ತ್ವಹಮೇವ ಸ್ಯಾದುಪಾಂಶು ಶತಮುಚ್ಯತೇ |
ಸಹಸ್ರಂ ಮಾನಸಂ ಪ್ರೋಕ್ತಂ ತ್ರಿವಿಧಂ ಜಪಲಕ್ಷಣಂ || 49||

ಅಕ್ಷಮಾಲಾಂ ಚ ಮುದ್ರಾಂ ಚ ಗುರೋರಪಿ ನ ದರ್ಶಯೇತ್ |
ಜಪಂ ಚಾಕ್ಷಸ್ವರೂಭೇಣಾನಾಮಿಕಾಮಧ್ಯಪರ್ವಣಿ || 50||

ಅನಾಮಾ ಮಧ್ಯಯಾ ಹೀನಾ ಕನಿಷ್ಠಾದಿಕ್ರಮೇಣ ತು |
ತರ್ಜನೀಮೂಲಪರ್ಯಂತಂ ಗಾಯತ್ರೀಜಪಲಕ್ಷಣಂ || 51||

ಪರ್ವಭಿಸ್ತು ಜಪೇದೇವಮನ್ಯತ್ರ ನಿಯಮಃ ಸ್ಮೃತಃ |
ಗಾಯತ್ರೀ ವೇದಮೂಲತ್ವಾದ್ವೇದಃ ಪರ್ವಸು ಗೀಯತೇ || 52||

ದಶಭಿರ್ಜನ್ಮಜನಿತಂ ಶತೇನೈವ ಪುರಾ ಕೃತಂ |
ತ್ರಿಯುಗಂ ತು ಸಹಸ್ರಾಣಿ ಗಾಯತ್ರೀ ಹಂತಿ ಕಿಲ್ಬಿಷಂ || 53||

ಪ್ರಾತಃಕಾಲೇಷು ಕರ್ತವ್ಯಂ ಸಿದ್ಧಿಂ ವಿಪ್ರೋ ಯ ಇಚ್ಛತಿ |
ನಾದಾಲಯೇ ಸಮಾಧಿಶ್ಚ ಸಂಧ್ಯಾಯಾಂ ಸಮುಪಾಸತೇ || 54||

ಅಂಗುಲ್ಯಗ್ರೇಣ ಯಜ್ಜಪ್ತಂ ಯಜ್ಜಪ್ತಂ ಮೇರುಲಂಘನೇ |
ಅಸಂಖ್ಯಯಾ ಚ ಯಜ್ಜಪ್ತಂ ತಜ್ಜಪ್ತಂ ನಿಷ್ಫಲಂ ಭವೇತ್ || 55||

ವಿನಾ ವಸ್ತ್ರಂ ಪ್ರಕುರ್ವೀತ ಗಾಯತ್ರೀ ನಿಷ್ಫಲಾ ಭವೇತ್ |
ವಸ್ತ್ರಪುಚ್ಛಂ ನ ಜಾನಾತಿ ವೃಥಾ ತಸ್ಯ ಪರಿಶ್ರಮಃ || 56||

ಗಾಯತ್ರೀಂ ತು ಪರಿತ್ಯಜ್ಯ ಅನ್ಯಮಂತ್ರಮುಪಾಸತೇ |
ಸಿದ್ಧಾನ್ನಂ ಚ ಪರಿತ್ಯಜ್ಯ ಭಿಕ್ಷಾಮಟತಿ ದುರ್ಮತಿಃ || 57||

ಋಷಿಶ್ಛಂದೋ ದೇವತಾಖ್ಯಾ ಬೀಜಂ ಶಕ್ತಿಶ್ಚ ಕೀಲಕಂ |
ನಿಯೋಗಂ ನ ಚ ಜಾನಾತಿ ಗಾಯತ್ರೀ ನಿಷ್ಫಲಾ ಭವೇತ್ || 58||

ವರ್ಣಮುದ್ರಾಧ್ಯಾನಪದಮಾವಾಹನವಿಸರ್ಜನಂ |
ದೀಪಂ ಚಕ್ರಂ ನ ಜಾನಾತಿ ಗಾಯತ್ರೀ ನಿಷಫಲಾ ಭವೇತ್ || 59||

ಶಕ್ತಿರ್ನ್ಯಾಸಸ್ತಥಾ ಸ್ಥಾನಂ ಮಂತ್ರಸಂಬೋಧನಂ ಪರಂ |
ತ್ರಿವಿಧಂ ಯೋ ನ ಜಾನಾತಿ ಗಾಯತ್ರೀ ತಸ್ಯ ನಿಷ್ಫಲಾ || 60||

ಪಂಚೋಪಚಾರಕಾಂಶ್ಚೈವ ಹೋಮದ್ರವ್ಯಂ ತಥೈವ ಚ |
ಪಂಚಾಂಗಂ ಚ ವಿನಾ ನಿತ್ಯಂ ಗಾಯತ್ರೀ ನಿಷ್ಫಲಾ ಭವೇತ್ || 61||

ಮಂತ್ರಸಿದ್ಧಿರ್ಭವೇಜ್ಜಾತು ವಿಶ್ವಾಮಿತ್ರೇಣ ಭಾಷಿಂ |
ವ್ಯಾಸೋ ವಾಚಸ್ಪತಿರ್ಜೀವಸ್ತುತಾ ದೇವೀ ತಪಃಸ್ಮೃತೌ || 62||

ಸಹಸ್ರಜಪ್ತಾ ಸಾ ದೇವೀ ಹ್ಯುಪಪಾತಕನಾಶಿನೀ |
ಲಕ್ಷಜಾಪ್ಯೇ ತಥಾ ತಚ್ಚ ಮಹಾಪಾತಕನಾಶಿನೀ |
ಕೋಟಿಜಾಪ್ಯೇನ ರಾಜೇಂದ್ರ ಯದಿಚ್ಛತಿ ತದಾಪ್ನುಯಾತ್ || 63||

ನ ದೇಯಂ ಪರಶಿಷ್ಯೇಭ್ಯೋ ಹ್ಯಭಕ್ತೇಭ್ಯೋ ವಿಶೇಷತಃ |
ಶಿಷ್ಯೇಭ್ಯೋ ಭಕ್ತಿಯುಕ್ತೇಭ್ಯೋ ಹ್ಯನ್ಯಥಾ ಮೃತ್ಯುಮಾಪ್ನುಯಾತ್ || 64||

ಇತಿ ಶ್ರೀಮದ್ವಸಿಷ್ಠಸಂಹಿತೋಕ್ತಂ ಗಾಯತ್ರೀಕವಚಂ ಸಂಪೂರ್ಣಂ ||